1, 2. Апостолъёслэн ужъёсазы 8:27—31, 35, 36, 38 гожтэмъя, мар евнухлэсь мылкыдзэ ӝутӥз пылатӥськыны?

 ПОТЭ-А тӥляд Христослэн дышетскисез луэмды но пылатӥськемды? Тросэз та вамышез лэсьтӥзы ини, малы ке шуоно соос Иеговаез ярато но тау каро ваньмыз понна, мар со соослы лэсьтӥз. Эскеромы одӥг евнухлэсь учырзэ, кудӥз Эфиопияысь эксэй кышномурт дорын ужаз-тыршиз.

² Тодон-валанъёс, кудъёссэ евнух Инмарлэн Кылысьтыз басьтӥз, солэсь мылкыдзэ ӝутӥзы ӝегатскытэк мар ке но карыны. (Лыдӟе Апостолъёслэсь ужъёссэс 8:27—31, 35, 36, 38.) Малы солэн сыӵе мылкыдыз вал? Зэм но, та адями Инмарлэсь Кылзэ дунъяз — со адӟиськиз соку, куке, уробоен мыныкуз, со Исаия пророклэн книгаысьтыз оглюкетсэ лыдӟиз. Но Филиппен вераськыса, солэн мылкыдыз ӝутскиз тау карыны со понна, мар солы Иисус Христос лэсьтӥз. Нош малы евнух Иерусалиме ветлӥз? Малы ке шуоно со Иеговаез яратэ вал ини. Кытысь ми сое тодӥськомы? Со Иерусалиме ветлӥз, Иеговалы йыбыртъян понна. Та пиосмурт вашкала ӵыжы-выжыосызлэсь осконзэс кельтӥз но зэмос Инмарлы йыбыртъяны кутскиз, вылды, солэн быръем калыкеныз ӵош. Иеговаез яратон солэсь мылкыдзэ ӝутӥз эшшо одӥг кулэ луись вамыш лэсьтыны — пылатӥськыны но Христослэн дышетскисез луыны (Матф. 28:19).

3. Мар адямилы люкетыны быгатэ пылатӥськыны? (Учке « Кыӵе музъемен ӵошатыны луэ тӥлесьтыд сюлэмдэс?» рамкаез.)

³ Яратон тӥлесьтыд мылкыддэс ӝутыны быгатэ пылатӥськыны. Со дыре ик яратон пылатӥськыны люкетыны но быгатэ. Тани куд-ог примеръёс. Кылсярысь, Иеговалы оскисьтэм  эшъёстэс но ӵыжы-выжыостэс туж зол яратӥськоды ке, тӥ малпаны но быгатоды: «Мон пылатӥськи ке, соос мынэсьтым палэнскозы» (Матф. 10:37). Оло нош, тӥ яратӥськоды лэсьтыны сое, мае Иегова адӟемпотостэм каре, но тӥледлы секыт асьтэлэсь улондэс солэн курон-косонъёсызъя тупатыны (Пс. 96:10). Яке тӥ пичи дырысеныды ик яратӥськоды, вылды, сям-йылолъёсты но праздникъёсты, кудъёсыз зэмос луисьтэм религиен герӟаськемын. Тӥ тодӥськоды ке но, соос Иеговалы ярамонэсь ӧвӧл шуыса, тӥляд та праздникъёсын герӟаськем умой тодэ ваёнъёсты вань но тӥледлы секыт соослэсь куштӥськыны (1 Кор. 10:20, 21). Соку тӥледлы кулэ луись быръён лэсьтоно.

4. Мар нырысь ик мылкыдэз ӝутыны кулэ пылатӥськыны?

⁴ Вань трос маръёс ке, мае ми яратӥськомы но мар понна тау кариськомы. Кылсярысь, Иеговалэн Адӟись-Ивортӥсьёсыныз пумиськемдылэсь азьло тӥ Библиез туж гажады, вылды. Тӥ Иисусэз яратӥськоды вал, дыр, ини. Нош куке тӥ Адӟись-Ивортӥсьёсын тодматскиды, тӥледлы соосын вераськыны кельше вал, луоз. Но та шуныт шӧдонъёс гинэ тӥлесьтыд мылкыддэс туж ик уз ӝутэ улондэс Иеговалы сӥзьыны но пылатӥськыны. Валтӥсез, мар мылкыдэз ӝутыны кулэ,— со Иегова Инмарез яратон. Тӥ Иеговаез тужгес но золгес яратӥськоды ке, тӥ уд лэзе нокинлы но номырлы люкетыны тӥледлы солы ужаны-тыршыны. Иеговаез яратонэз ӵошатыны луэ капкаен, кудӥз пылатӥськыны сюрес усьтэ. Озьы ик сое ӵошатыны луэ сюрес кузя лэсьтэм бордъёсын, кудъёсыз пылатӥськем бере юртто Иеговалы оскымон кыльыны.

5. Мае ми тодомы та статьяысь?

⁵ Иисус вераз, милемлы Иеговаез вань сюлмынымы, вань лулынымы, вань визьмынымы но вань кужмынымы яратыны кулэ шуыса (Марк 12:30). Кызьы дышетсконо Иеговаез сокем юн яратыны но гажаны? Куке ми малпаськиськомы со сярысь, макем юн яратэ милемыз Иегова, со милесьтым но мылкыдмес ӝутэ сое яратыны (1 Иоанн 4:19). Та статьяысь тӥ тододы, мар кароно, Иеговалы яратонэз будэтон но пылатӥськон понна.

6. Кызьы ми Иегова сярысь тодон-валан басьтыны быгатӥськомы, Римъёслы 1:20 лыдэ басьтыса?

⁶ Иегова сярысь тодон-валан басьтэ, солэсь кылдытэмъёссэ чакласа. (Лыдӟе Римъёслы 1:20; Усьт. 4:11.) Висъялэ саклыктэс будосъёслы но пудо-животъёслы, кудъёссэ Иегова кылдытӥз, но малпаське, кызьы со Кылдытӥсьлэсь визьлыко луэмзэ возьматэ. Тросгес малпаське со сярысь, макем паймымон лэсьтэмын тӥляд мугорды (Пс. 138:14). Малпаське, макем кужмо милям Шундымы, лыдэ басьтоно ке, со трос миллиард кизилиос пӧлысь пичиез гинэ луэ шуыса (Ис. 40:26) b. Со тӥлесьтыд мылкыддэс ӝутоз эшшо но золгес Иеговаез гажаны. Нош тырмыт ӧвӧл тодыны гинэ, Иегова визьлыко но кужмо шуыса. Иеговаез юн яратон но солэн эшез луон понна, солэсь мукет сямъёссэ но тодыны кулэ.

7. Мае валаны кулэ, Иеговаез юнгес яратон понна?

⁷ Тӥледлы валаны кулэ, Иегова тӥледыз зэм но яратэ шуыса. Секыт-а тӥледлы оскыны: инбамез но музъемез Кылдытӥсь тодэ, тӥ вань шуыса но со тӥ сярысь сюлмаське шуыса? Оскиськоды ке, эн вунэтэ: Иегова «ваньмылы асьмелы матын улэ» (Ап. уж. 17:26—28). Инмар «вань сюлэмъёсты эскере» но тӥледлы кылзэ сётэ озьы ик, кызьы Давид Соломонлы вераз: «Утчад ке Сое [Инмарез], шедьтод Сое» (1 Пар. 28:9). Малпаське: тӥ али Библиез дышетӥськоды, малы ке шуоно  инмысь Атай тӥледыз ас дораз вайиз (Иоанн 6:44). Макем золгес тӥ дунъялоды ваньзэ, мар каре тӥ понна Иегова, сокем юнгес тӥ сое яратоды.

8. Кызьы возьматоно, Иеговалэн яратэмез тӥледлы дуно потэ шуыса?

⁸ Кызьы возьматоно, Иеговалэн яратэмез тӥледлы дуно потэ шуыса? Одӥгез луонлык — вӧсяськонын соин вераськон. Инмарлы сюлмаськонъёсты сярысь вераса но тау карыса ваньмыз понна, мар со тӥледлы лэсьтӥз, сое яратонды юнгес но юнгес луоз. Куке тӥ адӟоды, кызьы Иегова вӧсяськонъёстылы ответ сётэ, соку соин эшъяськонды юнмалоз (Пс. 114:1). Тӥ шӧдоды, Иегова тӥледыз вала шуыса. Нош Иеговаен кусыпъёстэс юнматон понна, тӥледлы но валаны кулэ, кызьы со малпаське. Озьы ик валаны кулэ, мар со тӥлесьтыд возьма. Со сярысь тодыны луэ, солэсь Кылзэ, Библиез, дышетыса гинэ.

9. Кызьы возьматоно, тӥ Библиез дунъяськоды шуыса?

⁹ Дышетске дунъяны Инмарлэсь Кылзэ, Библиез. Библиысь гинэ тодыны луэ Иегова сярысь зэмлыкез но солэн тӥ пумысен эрикез сярысь. Кызьы возьматыны луэ, тӥ Библиез дунъяськоды шуыса? Лыдӟе сое котькуд нунал. Дасяське дышетонъёслы, кудъёссэ ортчытэ тӥледын одӥгез Адӟись-Ивортӥсь. Улонады пыртэ сое, мае тодӥды (Пс. 118:97, 99; Иоанн 17:17). Вань-а тӥляд Библиез лыдӟон графикты? Лыдӟиськоды-а тӥ соя Библиез? Быгатӥськоды-а тӥ Инмарлэсь Кылзэ котькуд нунал лыдӟыны?

10. Маин аспӧртэмлыко луэ Библия?

¹⁰ Озьы ик Библия аспӧртэмлыко луэ, малы ке шуоно отын гожтэмын Иисус Христосэз адӟем адямиослэн верамъёссы. Та книгаын гинэ гожтэмын со, мар тӥ понна зэмзэ ик лэсьтӥз Иисус Христос. Иисуслэн верамъёсыз но ужъёсыз сярысь лыдӟыса, тӥляд солэн эшез луэмды потоз, дыр.

11. Кызьы дышетсконо Иеговаез яратыны?

¹¹ Дышетске Иисусэз яратыны, соку тӥ Иеговаез золгес яратоды. Иисус быдэсак Атаезлэсь адӟем кариз (Иоанн 14:9). Озьыен, макем тросгес тодон-валан тӥ басьтоды Иисус сярысь, сокем умойгес Иеговаез валалоды но  сокем юнгес сое яратоды. Тодады вае, макем бадӟым гажан-жалянзэ Иисус возьматӥз соослы, кинъёсты ултӥяса возизы: куанеръёслы, висисьёслы но лябъёслы. Озьы ик тодады вае солэсь пайдаё визь-кенешъёссэ но малпаське, кызьы улонды умой пала воштӥське, куке тӥ та визь-кенешъёсты уже кутӥськоды (Матф. 5:1—11; 7:24—27).

12. Мар карыны мылкыдды ӝутскоз, Иисус сярысь тодон-валан басьтыса?

¹² Тӥ Иисусэз юнгес яратоды, куке мур малпаськоды солэн мозмытӥсь курбонэз сярысь, кудӥзлы луыса тӥляд сьӧлыкъёсты простить каремын луыны быгато (Матф. 20:28). Куке тӥ валалоды, Иисус дась луыса тӥ понна улонзэ сётӥз шуыса, тӥляд мылкыдды кылдоз ӧпкельыны но Иеговалэсь прощенизэ курыны (Ап. уж. 3:19, 20; 1 Иоанн 1:9). Нош Иеговаез но Иисусэз яратӥды ке, тӥляд мылкыдды кылдоз кусып возьыны соосын, кинъёс озьы ик соосты ярато.

13. Мар сярысь сюлмаськиз Иегова?

¹³ Дышетске Иеговалэсь семьязэ яратыны. Ӵыжы-выжыосты но азьвыл эшъёсты, кудъёсыз Иеговалы ужатэк-тыршытэк уло, уг валало, дыр, малы тӥляд потэ улондэс Инмарлы сӥземды. Соос тӥледлы пумитъяськыны но быгато. Озьы ке но Иегова сюлмаськиз, тӥляд духовной семьяды мед луоз шуыса. Кенешысь вын-агайёсын но сузэр-апайёсын матысь кусыпъёс возиськоды ке, соку тӥ кулэ луись яратон но юрттэт шедьтоды (Марк 10:29, 30; Евр. 10:24, 25). Дыр ортчыса, тӥляд ӵыжы-выжыосты но Иеговалы ужаны-тыршыны но солэн курон-косонъёсызъя улыны кутскозы, вылды (1 Пётр 2:12).

14. Мае тӥ валады Инмарлэн курон-косонъёсыз пумысен, 1 Иоаннлэсь 5:3 лыдэ басьтыса?

¹⁴ Дышетске Иеговалэсь курон-косонъёссэ гажаны но соосъя улыны. Иеговаез тодэмдылэсь азьло тӥ асьтэлэн куронъёстыя улӥды, вылды, нош табере тӥ валаськоды, макем умойгес Инмарлэн курон-косонъёсызъя улыны (Пс. 1:1—3; лыдӟе 1 Иоаннлэсь 5:3). Малпаське визь-кенешъёс сярысь, кудъёссэ Библия сётэ картъёслы, кышноослы, анай-атайёслы но нылпиослы (Еф. 5:22—6:4). Семьяды шудогес луиз-а, куке тӥ та визь-кенешъёсты улонады пыртыны кутскиды? Тӥ умойгес адями луиды-а, куке уже кутӥды Иеговалэсь визь-кенешсэ со сярысь, кызьы эшъёсты визьмо быръёно? Тӥ шудогес луиды-а? (Мад. 13:21; 1 Кор. 15:33). Тӥ «бен» шуоды, дыр.

15. Мар юрттоз тӥледлы Библиысь визь-кенешъёсты улонады пыртыны?

¹⁵ Куддыръя тӥледлы валаны секыт, дыр, кызьы Библиысь визь-кенешъёсты улонэ пыртоно. Иегова сое тодэ, соин ик организациез пыр сётэ тӥледлы Библия вылэ пыкиськыса гожтэм литератураез, видеороликъёсты но интернет-публикациосты, кудъёсыз юртто тӥледлы «ӟечез но, уродэз но висъяны» (Евр. 5:13, 14). Ваньзэ тае эскерыса, тӥ адӟоды, макем соос пайдаё но валамонэсь луо, но тӥляд мылкыдды ӝутскоз, вылды, Иеговалэн организацияз пырыны.

16. Кызьы Иегова аслэсьтыз калыксэ радъяз?

¹⁶ Дышетске Иеговалэсь организацизэ яратыны но солэн кивалтэтэзъя улыны. Иегова ужась-тыршисьёссэ кенешъёсы люказ, нош кенешъёслы йыр карыса пуктӥз аслэсьтыз Пизэ, Иисус Христосэз (Еф. 1:22; 5:23). Иисус кӧня ке зырӟем христианъёсты куриз кивалтыны ужен, кудзэ асьме нуналъёсы быдэсъяны кулэ. Та христианъёсты со «оскиськымон, визьмо ляльчи» шуыса нимаз. Вын-агайёс, кудъёсыз соос пӧлы пыро, тыршыса быдэсъяло соослы сётэм ужез — тӥледлы духовной сиён сётъяны но Инмарен кусыпъёстэс утьыны (Матф. 24:45—47). Оскиськымон ляльчи сюлмаськемзэ возьматэ, кылсярысь, кенешъёсысь тӧроос пыр, кудъёсыз дышето но утё тӥледыз (Ис. 32:1, 2; Евр. 13:17; 1 Пётр  5:2, 3). Тӧроос лэсьто ваньзэ, тӥледыз буйгатон понна но Иеговалэн матысь эшъёсыз луыны юрттон понна. Нош тужгес но кулэез — соос юртто тӥледлы Иегова сярысь мукет адямиослы вераны (Еф. 4:11—13).

17. Малы ми мукетъёсызлы Иегова сярысь вераськомы, Римъёслы 10:10, 13, 14 лыдэ басьтыса?

¹⁷ Дышетэ мукетъёссэ Иеговаез яратыны. Иисус дышетскисьёссэ куриз мукетъёсызлы Иегова сярысь вераны (Матф. 28:19, 20). Зэм но, та курон-косонэз быдэсъяны луэ, солэсь кылзӥськыны кулэ шуыса гинэ. Но Иеговаез яратонды будэмъя, тӥ шӧдоды сое ик, мае шӧдӥзы Пётр но Иоанн, кудъёсыз веразы: «Ми ум быгатӥське адӟеммес но, кылэммес но вератэк улыны» (Ап. уж. 4:20). Куке адямилы Иеговаез яратыны юрттӥськод, номырин ӵошатыны луонтэм шумпотон шӧдӥськод. Пуктэ син азяды, макем шумпотӥз ӟеч иворез тодытӥсь Филипп, куке со Эфиопияысь евнухлы зэмлыкез тодыны но пылатӥськыны юрттӥз! Филипплэсь адӟем карыса но Иисуслэсь тодытыны куронэзлэсь кылзӥськыса, тӥ возьматоды, Иеговалэн Адӟись-Ивортӥсез луэмды потэ шуыса. (Лыдӟе Римъёслы 10:10, 13, 14.) Соку тӥ, Эфиопияысь евнух кадь, вералоды, вылды: «Мар мыным люкетэ пылатӥськыны?» (Ап. уж. 8:36).

18. Мае ми эскеромы вуоно статьяын?

¹⁸ Тӥ улонады тужгес но кулэ луись вамыш лэсьтоды, куке пылатӥськыны ужпум кутоды. Соин ик умой-умой малпаське таӵе юанъёс вылын: мар мыным тодыны кулэ пылатӥськон сярысь? Кыӵе вамышъёс лэсьтоно пылатӥськемлэсь азьло? Мар кароно пылатӥськем бере? Та юанъёс вуоно статьяын эскерисько.