1, 2. Мар карыны ми дышетскиськомы Иеговалы матэгес кариськеммыя? Вералэ пример.

 ПИЧИ пиналлы кин ке но кузьым кузьма. Анаез но атаез верало солы: «„Тау“ шу». Пинал тау каре, малы ке шуоно сое анай-атаез куриз. Будэмезъя пинал умойгес валаны кутске, малы анаез но атаез малпало, тау кароно шуыса, куке кин ке ӟеч уж лэсьтэ. Но, бадӟым будыса, со ачиз сюлмысь тау карыны кутске. Малы? Малы ке шуоно со дышиз тау карыны.

² Озьы ик ми но. Зэмлыкез тодыны кутскыса, ми валамы, макем кулэ Иеговалэсь кылзӥськыны но солэсь валтӥсь куронъёссэ быдэсъяны. Нош Иеговалы матэгес кариськыса, ми тросгес тодӥськомы, мар солы кельше, нош мар уг, кызьы со учке со яке та юан шоры. Куке ми лэзиськомы, Иеговалэн учконъёсыз кутэм ужпумъёсмы но ужъёсмы вылын мед шӧдӥськозы шуыса, ми возьматӥськомы, Иегова кадь малпаськыны дышетскимы шуыса.

3. Малы куддыръя секыт луэ дышетскыны Иегова кадь малпаськыны?

³ Инмар кадь малпаськыны дышетскон шумпотон вае  ке но, со капчи ик ӧвӧл. Куддыръя милемлы тырбыдэстэм луэммы люкетэ. Кылсярысь, ми тодӥськомы, кызьы Иегова учке вылӥ эсэпъёсъя улон шоры, ваньбур шоры, тодытон уж шоры, вирез шонертэм амалэн кутон шоры но мукет, нош валаны, малы со озьы учке, милемлы секыт луыны быгатэ. Мар юрттоз милемлы дышетскыны Иегова кадь малпаськыны? Но кызьы Иегова кадь малпаськон юрттоз милемлы шонер ужпумъёс кутыны али но вуонояз?

4. Павел верамъя, кызьы ми визьмес выльдыны-воштыны быгатомы?

⁴ Лыдӟе Римъёслы 12:2. Та кылбурын апостол Павел валэктӥз, мар юрттоз милемлы дышетскыны Иегова кадь малпаськыны. Кызьы верамын вал талэсь азьло статьяын, та дунне кадь малпаськеммы уг поты ке, милемлы визьмес та дуннелэн малпанъёсызлэсь утёно. Со сяна, Павел вераз на, лулмес-сюлэммес, яке визьмес, выльдыны-воштыны кулэ шуыса. Мар кароно со понна? Библиез дышетоно, валаны тыршоно Инмарлэсь малпанъёссэ, малпаськоно солэн малпанъёсыз вылын но пумен дышетсконо со кадь малпаськыны.

5. Маин пӧртэм луо дышетон но огшоры гинэ лыдӟон?

⁵ Дышетон — со огшоры гинэ лыдӟон яке юанъёслы валэктонъёсты пусъён гинэ ӧвӧл. Библиез дышетыку, ми малпаськиськомы со вылын, мае тодӥськомы Иегова сярысь, солэн сюресъёсыз но малпанъёсыз сярысь. Ми валаны тыршиськомы, малы Иегова одӥгзэ карыны куре, нош мукетсэ карыны уг лэзьы. Со сяна, ми малпаськомы, мае милемлы улонамы но учконъёсамы воштоно. Ваньзэ сое одӥг кутскемен ми эскерыны ум быгатэ, дыр, но умой луысал эскеронлы висъям дырмылэсь ӝынызэ ке но мур малпаськонлы сӥзьыны (Пс. 118:97; 1 Тим. 4:15).

6. Мар луэ, куке ми Инмарлэн Кылыз вылын малпаськиськомы?

⁶ Ми Инмарлэн Кылыз вылын ялан малпаськиськомы ке, мар ке но туж паймымонэз луэ. Ми валаськомы, Иеговалэн учконъёсыз ваньмызлэсь умой шуыса. Ми ваньмыз шоры солэн синмыныз учкыны кутскиськомы но солэн малпанъёсыныз соглаш луиськомы. Милям визьмы выльдӥське-воштӥське но, ми мукет сямен малпаськыны кутскиськомы. Озьы ми Инмар кадь малпаськыны дышиськомы.

7, 8. а) Кызьы Иегова ваньбур шоры учке? (Учке статья кутсконысь суредъёсты.) б) Ми Инмар кадь малпаськиськомы ке, мар ми понна нырысетӥ интыын луоз?

⁷ Милям малпанъёсмы шӧдонъёсынымы но ужъёсынымы герӟаськемын (Марк 7:21—23; Иак. 2:17). Сое умойгес валан понна, учкомы куд-ог примеръёсты. Евангелиосысь ми тодӥськомы, кызьы Иегова учке ваньбур шоры. Инмар малпаз, солэн Пиез будоз шуыса семьяын, кудӥз узыр уг улы вал (Лев. 12:8; Лука 2:24). Куке Иисус  вордӥськиз, Мария сое «турын тыронэ понӥз, кунокуаын соослы инты ӧз сюры уго» (Лука 2:7). Иеговалэн потысал ке, со быгатысал лэсьтыны озьы, солэн Пиез мукет, тупасьгес интыын мед вордӥськоз шуыса. Но солэн потэ вал, Иисус сыӵе семьяын мед будоз шуыса, кудаз Инмарлы йыбыртъян нырысетӥ интыын вал.

⁸ Иисуслэн вордӥськемез сярысь Библиысь лыдӟыса но со вылын малпаськыса, ми валаськомы, кызьы Иегова ваньбур шоры учке. Куд-ог анай-атайёслэн потэ, нылпиоссылэн самой умоез мед луоз шуыса, соин сэрен нылпиоссылэн Иеговаен кусыпъёссы лябӟо ке но. Но Иегова малпа, соин кусыпъёс нырысетӥ интыын луыны кулэ шуыса. Тӥ но со кадь малпаськоды-а? Мар сярысь верало тӥляд ужъёсты? (Лыдӟе Еврейёслы 13:5.)

9, 10. Кызьы ми возьматомы, Иегова кадь учкиськомы шуыса со шоры, куке кин ке но мукетызлы канжаськон понна муг луэ?

⁹ Озьы ик малпаськыны луоз со сярысь, кызьы Инмар учке, куке одӥгез христиан мурт мукетыз понна канжаське но соин сэрен сьӧлыка яке Иеговалы йыбыртъямысь дугдэ. Иисус вераз: «Кин одӥгзэ та пичиос пӧлысь, Мыным оскисез, сьӧлыке пыртӥз ке, солы умойгес луысал, чыртыяз вуко кӧ ошыса зарезе куштысалзы ке» (Марк 9:42). Макем кужмо кылъёс! Ми тодӥськомы, Иисус быдэсак Атаез кадь шуыса. Соин ик ми оскыны быгатӥськомы: Иеговалы туж уг кельшы, куке одӥгез христиан мурт мукетызлы канжаськон понна муг луэ (Иоанн 14:9).

¹⁰ Учкиськомы-а ми Иегова но Иисус сямен та юан шоры? Мар сярысь верало милям ужъёсмы? Кылсярысь, мар ми каромы, милям дӥськутмы но вылтусмы сэрен кудӥз ке огъя оскисьмы ассэ умойтэм шӧдэ яке умойтэмез сярысь малпаське? Возьматомы-а ми яратэммес но дугдомы-а озьы ветлэмысь? (1 Тим. 2:9, 10).

11, 12. Ми котькыӵе сӧриськем, умойтэм уж шоры Инмар кадь учкыны дышетскиськомы но асьмеды киямы возиськомы ке, кызьы со милемыз сьӧлыклэсь утёз?

¹¹ Учкомы на эшшо одӥг примерез. Иегова урод ужъёсты адӟемпотостэм каре (Ис. 61:8). Инмар тодэ, ми тырбыдэстэмесь но куддыръя милемлы сьӧлыко мыл потонъёсмылы пумит сылыны секыт луэ шуыса. Соин ик со милесьтым мылкыдмес ӝутэ урод ужъёсты вань кужмысьтымы адӟемпотостэм карыны. (Лыдӟе Псалтирез 96:10.) Малпаськимы ке, малы Иегова сьӧлыкез адӟемпотостэм каре, со юрттоз милемлы дышетскыны со кадь малпаськыны. Нош со кадь малпаськыны дышетскыса, милям юн мылкыдмы луоз шонер ужъёс лэсьтыны.

¹² Со сяна, ми Иегова кадь урод ужъёсты адӟемпотостэм каримы ке, быгатомы валаны, со яке та ужъёсты христианъёслы лэсьтыны уг яра шуыса, соос сярысь Библиын номыр верамын ӧвӧл ке но. Кылсярысь, туала вакытэ тросгес но тросгес тодмо луэ ал вылын эктон. Со одӥгез астэ юрӟым возён амал. Куд-огъёсыз сыӵе эктонэз сьӧлыкен уг лыдъяло, малы ке шуоно отчы пыриськисьёс  азон-калгон сьӧлык уг лэсьто a. Нош мар малпа со сярысь Иегова? Котькыӵе сӧриськем, умойтэм уж солы юрӟым потэ. Соин ик ойдолэ палэнын возиськомы котькуд со выллем ужлэсь, асьмеды киямы возёмы но адӟемпотостэм каромы ваньзэ, мае Инмар адӟемпотостэм каре (Рим. 12:9).

13. Малы кулэ азьло ик малпаськыны, кызьы учке Инмар со яке та юан шоры?

¹³ Ас поннады Библиез эскерыкуды, малпаське со вылын, кызьы Инмар малпаське но кызьы кылдэм югдурын солэсь малпанъёссэ лыдэ басьтоно. Соку, куке тӥледлы ӝог кыӵе ке ужпум кутоно луоз, тӥ быгатоды визьмо ужпум кутыны (Мад. 22:3). Эскеромы Библиысь примеръёсты.

14. Малы дышето милемыз Иосифлэн кылъёсыз, кудъёссэ со Потифарлэн кышноезлы вераз?

¹⁴ Куке Потифарлэн кышноез Иосифез азон-калгон сьӧлыке кыскыны турттэ вал, Иосиф чутрак пумит луиз. Озьы со возьматӥз, азьло ик малпаськиз шуыса, кызьы учке Иегова кузпаллы оскымон кылён шоры. (Лыдӟе Улон-вылонэз 39:8, 9.) Иосиф вераз со кышномуртлы: «Таӵе уродлэсь но урод ужез лэсьтыны, Инмар азьын сьӧлыканы быгатӥсько шат?» Та кылъёсысь адӟиське, Иосиф кузпалъёс вискысь кусыпъёс шоры Инмар кадь учкыны дышетскиз шуыса. Мар вераны луоз ми сярысь? Кылсярысь, уж дорады кин ке но азон-калгон мылкыдын тӥледлы мултэс саклык висъяны кутскиз. Яке кин ке но телефонады азон-калгон мылкыдэз пуромытӥсь кылъёс яке туспуктэм ыстӥз b. Тӥледлы капчигес луоз Иеговалы оскымон кыльыны, тӥ азьло ик малпаськиды ке, мар малпа со пумысен Иегова, солэн малпанъёсыныз соглаш луиды ке но азьло ик ужпум кутӥды ке, мар кароды.

15. Мар юрттоз милемлы, кызьы куке но куинь еврейёслы юрттӥз, Иеговалы оскымон кыльыны?

¹⁵ Табере учкомы куинь еврейёслэсь примерзэс — Седрахлэсь, Мисахлэсь но Авденаголэсь. Соос Навуходоносор эксэйлэн пуктэм зарни сульдэрезлы йыбырттыны чутрак пумит луизы. Эксэйлы ответ сётыса верам кылъёсысьтызы адӟиське, соос азьло ик малпаськизы шуыса, кызьы Иеговалы оскымон кылёно (Пот. 20:4, 5; Дан. 3:4—6, 12, 16—18). Пуктэ син азяды, тӥляд уж дорады зэмос луисьтэм религиен герӟаськем праздникез пусйыны малпало шуыса, но кузёды тӥлесьтыд коньдон куре. Мар тӥ кароды?  Сыӵе югдурлэсь кылдэмзэ возьмаса эн улэ, азьло ик малпаське, мар малпа со сярысь Иегова. Соку тӥледлы, со куинь еврейёслы кадь, капчигес луоз асьтэлэсь учконъёстэс валэктыны но шонер ужпум кутыны.

16. Малы сое, кызьы Иегова малпаське, тодоно эм юрттэт кулэ луэмлэсь азьло ик?

¹⁶ Озьы ик туж кулэ азьло ик малпаськыны со сярысь, кызьы Иеговалы оскымон кылёно, куке шӧдтэк шорысь эм юрттэт кулэ луоз. Веранэз ӧвӧл, вирез но солэсь ньыль валтӥсь компонентъёссэ пушкамы лэзьыны ми пумит луиськомы. Но вань сыӵе эмъян амалъёс, кудъёсаз вирез уже куто но кудъёсыз пумысен котькудӥз ачиз ужпум кутыны кулэ. Соку милемлы Библиысь возетъёсты лыдэ басьтоно, кудъёсаз адӟиське, кызьы Иегова малпаське (Ап. уж. 15:28, 29). Та юан вылын, больницаын малпаськем интые, куке висеменымы курадӟиськомы, нош эмъясьёс дыртыто ужпум кутыны, умойгес луоз азьло ик малпаськыны. Эскерон ортчытыны, эмъяськон пумысен куронъёстэс гожтыны, кылсярысь, вир сярысь документэз, но эмъясь враченыды вераськыны али ик кулэ ини c.

17—19. Малы туж кулэ али ик ини валаны, кызьы Иегова учке со яке та юан шоры? Кыӵе учыръёслы милемлы азьло ик дасяськоно?

¹⁷ Табере ойдолэ тодамы ваёмы, мар кариз Иисус, куке Пётр малпаськытэк вераз солы: «Кузё-Инмаре, жаля Астэ!» Иисус трос малпаськиз, дыр, мае Инмар солэсь возьма. Озьы ик со трос малпаськиз, дыр, азьпалзэ ивортонъёс вылын, кудъёсаз верамын вал солэн музъем вылын улонэз но кулонэз сярысь. Со солы кужым сётӥз Инмарлы оскымон кыльыны но аслэсьтыз улонзэ адямиос понна сётыны. (Лыдӟе Матфейлэсь 16:21—23.)

 ¹⁸ Туннэ Инмарлэн потэ, солэн ужась-тыршисьёсыз солы матэ мед кариськозы но быгатэмзыя вань дырзэс но кужымзэс ӟеч иворез веранлы мед сётозы шуыса (Матф. 6:33; 28:19, 20; Иак. 4:8). Иисусэн луэм учырын сямен ик, куд-ог адямиос, милемлы умой карыны малпаса, милесьтым мылкыдмес лӧпкытыны быгатозы мукет улон сюрес бырйыны. Пуктэ син азяды, уж дорады кузёды ӵектэ тӥледлы умойгес но бадӟымгес уждунэн уж, но тӥ валаськоды, со уж Инмарлы ужаны-тыршыны люкетоз шуыса. Яке, тӥ дышетскиськоды ке, тӥляд луонлыкты кылдэ дорысьтыды кыдёке кошкыса умой образование басьтыны. Сыӵе учыръёсы шонер ужпум кутыны мед быгатоды шуыса, тӥляд потоз, дыр, вӧсяськемды, эскерон ортчытэмды, ӵыжы-выжыосыныды вераськемды, оло нош, тӧроосын но. Но умой луысал Иеговалэсь учконъёссэ али ик ини тодыны, но дышетскыны со кадь малпаськыны. Соку, одӥгаз верам югдуре шедьыса, тӥ шонер ужпум кутоды. Тӥ тодады возёды Инмарлы ужан-тыршонын кутэм ужпумъёстэс но тыршоды соосты быдэстыны.

¹⁹ Луоз малпаськыны, маин эшшо ми шӧдтэк шорысь пумиськыны быгатомы на. Зэм, ваньзэ азьло ик малпаны уг луы. Но, ас поннамы Библиез эскерыкумы, ми малпаськимы ке, кызьы Иегова учке со яке та юан шоры, кулэ дыръяз ми быгатомы, дыр, эскереммес тодамы вайыны но шонер ужпум кутыны. Озьыен, Библиез эскерыса, ойдолэ малпаськомы со вылын, кызьы Инмар учке со яке та юан шоры, дышетскомы со кадь малпаськыны но малпаломы, кызьы ваньмыз со юрттоз милемлы визьмо ужпумъёс кутыны али но азьланяз.

20, 21. а) Кыӵе милям эрикмы луоз выль дуннеын? б) Мар милемыз туннэ ик ини шудо карыны быгатэ?

²⁰ Ми чидатэк возьмаськомы выль дуннеез. Асьмеос пӧлысь тросэз музъем вылын райын пырак дауръёс ӵоже улыны оско. Куке Инмарлэн Эксэйлыкез кивалтоз, адямиос уз курадӟе ни. Со сяна, котькудӥзлэн эрикез луоз аслыз бырйыны, но котькудӥз ужпум кутоз, лыдэ басьтыса сое, мар солы кельше но мае со яратэ.

²¹ Но со уг возьматы, адямиос ас тодэмзыя улозы но, мар каремзы потэ, сое карыса улозы шуыса. Мар ӟечез луэ, нош мар уродэз луэ шуыса бырйыкузы, кылзӥськись адямиос лыдэ басьтозы Иеговалэсь законъёссэ но учконъёссэ (Пс. 36:11). Нош али, сыӵе дыр вуэмын ӧвӧл на дыръя, ми быгатӥськомы дышетскыны Инмар кадь малпаськыны но шудо улыны.