ИНДОНЕЗИЫН вань пичи гинэ Санги́хе шормуӵ. Кӧня ке аръёс талэсь азьло тӥ отчы вуысалды ке, ярдурысь куинь сузэръёсмес адӟысалды, дыр. Отын улӥсьёс соосты туж умой тодо, малы ке шуоно сузэръёсмы юртто соослы Библиен тодматскыны. Но таяз учырын сузэръёс мукет ужен выро вал.

Зарезе пырыса, соос ярдуре бадӟым изъёсты поттылӥзы. Со изъёс пӧлысь куд-огъёсыз футболэн шудон туп быдӟаесь вал. Собере, пичи пу пуконъёс вылэ пуксьыса, соос со изъёсты молотэн пыргытылӥзы, курегпузлэсь но пичигес мед луозы шуыса. Пыргытэм изъёссэс ведраосы тыризы но корказы пала тубаттӥ тубтылӥзы. Отын соосты мешокъёсы кисьтазы но машинаосы тырыса, сюресъёс лэсьтыны нуллӥзы.

Со сузэръёс пӧлысь одӥгезлэн нимыз — Ху́льда. Огшоры дыръя со туж ик трос ӧз ужа, семьязэ сюдон-вордон понна гинэ. Но табере солэн выль ужпумез кылдӥз — солэн планшет басьтэмез потӥз. Сое басьтыса, со быгатысал JW Library^® приложениез уже кутыны. Хульда тодӥз, со приложениысь видеороликъёс но мукет публикациос солы юрттозы шуыса мукетъёсызлы ӟеч иворез вераны но Библиез умойгес валаны.

Толэзь но ӝыны Хульда котькуд ӵукна кык часлы кемагес ужаз. Пыргытэм изъёсыныз пичи грузовикез тырмытыны луэ вал. Талы луыса со быгатӥз планшет басьтон понна коньдон люканы.

Хульда вера: «Изъёсты пыргытыны капчи ӧвӧл. Мон туж жадисько вал, быдэс мугоры висе вал. Но выль планшетме киям басьтэме бере ик мон ваньмыз сярысь вунэтӥ! Планшетэн капчигес тодытыны но христиан пумиськонъёслы дасяськыны». Озьы ик, Хульдалэн верамезъя, планшет туж кулэ вал пандемия дыръя, куке вань пумиськонъёс но тодытон уж интернет пыр ортчытӥськизы. Ми туж шумпотӥськомы, Хульда аслэсьтыз ужпумзэ быдэстӥз шуыса.