1, 2. Малы малпан кылдыны быгатэ Иегова вӧсяськонъёсмылы ответ уг сёты шуыса?

 «КУЗЁ-ИНМАР дорын буйгатсконэд мед луоз, Со тынад сюлмыдлэсь куронзэ быдэстоз» (Пс. 36:4). Кыӵе умой кылсётон! Возьматэ-а со, мае гинэ ми ӧм куре, Иегова сое соку ик сётоз шуыса? Малы кылдэ таӵе юан? Эскеромы таӵе учыръёсты. Бызьымтэ сузэр Иеговалы вӧсяське но солы вера, Эксэйлыкез тодытӥсьёслы школаын дышетскемез потэ шуыса. Но аръёс ортчыса но, сое уг ӧтё. Егит агай, кудӥзлэн секыт висёнэз вань, Иеговаез куре сое бурмытыны, кенешлы тросгес юрттыны мед быгатоз шуыса. Но солэн тазалыкез умойгес уг луы. Анай но атай вӧсясько, нылпизы зэмлыкъя мед улоз шуыса. Но нылпизы Иеговалы ужамысь-тыршемысь дугдэ.

² Оло нош, тӥ но Иеговалэсь мае ке куриды, нош со курондэс ӧз быдэсты. Соин ик тӥляд малпанды кылдыны быгатэ, Иегова котькинлэсь вӧсяськонъёссэс кылзэ, нош тӥлесьтыд уг кылзы шуыса. Яке тӥ малпаськоды, вылды, тӥ янгышады шуыса. Ӵапак озьы ассэ шӧдӥз Джа́нис b сузэр. Солэн но картэзлэн туж потэ вал Вефильын ужамзы-тыршемзы. Соос та сярысь вӧсяськизы. Джанис вера: «Мон малпай вал, Иегова соку ик вӧсяськеммес кылоз но милемыз Вефиле ӧтёзы шуыса». Озьы ке но, толэзьёс, аръёс ортчыса но, соосты Вефиле ӧз ӧте. Джанис азьланьтэ: «Мынам кӧты туж ӝож вал. Мон уг валаськы вал, малы  Иегова вӧсяськемме уг кылы. Мон малпай, со азьын янгышай шуыса. Вефильын ужан-тыршон сярысь мон пырак вӧсяськи ке но, малы со вӧсяськонэлы ответ ӧз сёты?»

3. Мае ми эскеромы та статьяын?

³ Куддыръя милям малпанмы кылдэ, вылды, Иегова вӧсяськонъёсмес уг кылзы шуыса. Таӵе малпанъёссы вал вашкала дыръя улӥсь Инмарлэн оскымон ужась-тыршисьёсызлэн но (Иов 30:20; Пс. 21:3; Авв. 1:2). Но тӥ оскыны быгатӥськоды, Иегова вӧсяськонъёстылы ответ сётоз шуыса (Пс. 64:3). Талы осконмес юнматон понна, эскеромы куинь юанъёсты: 1) Мае ми Иеговалэсь возьманы быгатӥськомы? 2) Мае Иегова милесьтым возьма? 3) Малы куддыръя мукетыз сярысь вӧсяськоно луоз, вылды?

4. Мар карыны кылзэ сётэ Иегова? (Иеремия 29:12).

⁴ Иегова кылзэ сётэ вӧсяськонъёсмес кылзыны. (Лыдӟе Иеремиялэсь 29:12.) Инмар аслэсьтыз оскымон ужась-тыршисьёссэ яратэ. Соин ик со соослэсь вӧсяськонъёссэс котьку но сак кылзэ (Пс. 9:39; 36:28). Но та уг возьматы, Инмар вань куронъёсмес быдэсъялоз шуыса. Оло нош, куд-ог куронъёсмы выль дуннеын гинэ быдэстэмын луозы.

5. Мае лыдэ басьтэ Иегова, вӧсяськонъёсмес кылзыкуз? Валэктэ.

⁵ Иегова лыдэ басьтэ, кызьы милям куронъёсмы герӟаськемын соин, мар со малпаз музъем но адямиос понна (Ис. 55:8, 9). Инмарлэн потэ вал, музъем вылын адямиос мед улозы шуыса, кудъёсыз солэсь шумпотыса кылзӥськысалзы. Но Шайтанлэн верамезъя, адямиос Инмартэк шудогес луозы (Ул.-выл. 3:1—5). Шайтан пӧяське шуыса возьматон понна, Иегова адямиослы лэзиз асьсэлы кивалтыны. Али адямиос кивалто бере, дунне шуг-секытъёсын тырмемын (Екк. 8:9). Ми валаськомы, Иегова со шуг-секытъёсты али уз быдты шуыса. Малы ке шуоно соку куд-огъёсыз малпасалзы, адямиос умой кивалтыны быгато но соослы Инмарлэн юрттэтэз кулэ ӧвӧл шуыса.

6. Малы оскыны кулэ, Иегова милемыз яратэ но котьку шонерлыко лэсьтэ шуыса?

⁶ Одӥг кадь вӧсяськонъёслы Иегова пӧртэм ответ сётыны быгатэ. Кылсярысь, куке Езекия эксэй секыт висьыны усиз, со Иеговаез туж куриз сое бурмытыны. Инмар куронзэ быдэстӥз (4 Экс. 20:1—6). Нош куке апостол Павел Иеговаез туж куриз сое мозмытыны мугораз бышкалскем шилэсь (со кыӵе ке висён вал, вылды), Иегова шуг-секытсэ ӧз быдты (2 Кор. 12:7—9). Озьы ик тодамы ваёмы, мар луиз Иаков но Пётр апостолъёсын. Иродлэн кыксэс ик виемез потэ вал. Ми тодӥськомы, кенеш Пётр понна туж вӧсяськиз шуыса. Агайёс но сузэръёс Иаков понна но туж вӧсяськизы, вылды. Озьы ке но кылчин Пётрез мозмытӥз, нош Иаковез казнить каризы (Ап. уж. 12:1—11). Соин ик юан кылдыны быгатэ: «Малы Иегова Пётрез утиз, нош Иаковез — ӧз?» Библия тае уг валэкты c. Но ми тодӥськомы, Иегова шонерлыкез яратэ шуыса (К. Зак. 32:4). Озьы ик тодӥськомы, Инмар Пётрез но, Иаковез но яратӥз, соос кыксы но солы ярамонэсь вал шуыса (Усьт. 21:14). Куддыръя Иегова вӧсяськонъёсмылы ответ уг сёты озьы, кызьы ми возьмаськомы вал.  Но ми оскиськомы, со милемыз яратэ но котьку шонерлыко лэсьтэ шуыса. Соин ик ми кӧтмес ӝож ум кариське, куке Иегова мукет сямен ответ сётэ (Иов 33:13).

7. Мар кароно ӧвӧл но малы?

⁷ Ми асьмелэсь югдурмес мукетъёсызлэн югдуренызы ум ӵошатӥське. Шуом, ми Иеговалы мае ке курыса вӧсяськиськомы, нош со куронмес уг быдэсты. Берлогес ми тодӥмы, кин ке но Иеговалы сыӵе ик куронэн вазиськиз но Иегова солэсь куронзэ быдэстӥз шуыса. Тае ас вылаз шӧдӥз Анна сузэр. Мэ́тью картэзлэсь рак висёнзэ шедьтӥзы. Анна вӧсяськиз, со мед бурмоз шуыса. Со вакытэ ик кенешысьтызы кык арлыдо сузэръёслэсь но сыӵе ик висёнзэс шедьтӥзы. Анна картэз понна но, со кык сузэръёс понна но вӧсяськиз. Сузэръёс бурмизы, нош Мэтью, жаляса верано луэ, кулӥз. Нырысь Анна малпаське вал: «Со сузэръёслы Иегова бурмыны юрттӥз-а? Соку малы Инмар картэ сярысь вӧсяськонъёсме ӧз кылы но сое ӧз бурмыты?» Ми ум тодӥське, малы сузэръёс бурмизы, нош Анналэн картэз — ӧз. Но ми тодӥськомы, азьланяз Иегова вань шуг-секытъёсмес одно ик быдтоз шуыса. Со туж возьма со дырез, куке аслэсьтыз эшъёссэ улӟытоз (Иов 14:15, ВД).

8. а) Кызьы Иегова милемлы юрттэ? (Исаия 43:2). б) Кызьы вӧсяськон милемлы юрттыны быгатэ шуг-секытъёс дыръя? (Учке «Вӧсяськон чиданы юрттэ» видеороликез.)

⁸ Иегова котьку но милемлы юрттоз. Яратӥсь Атаймылэн, Иеговалэн, уг поты, ми мед курадӟомы шуыса (Ис. 63:9). Озьы ке но со уг быдты вань шуг-секытъёсмес, кудъёсыз куддыръя шур яке тыл выллемесь луо. (Лыдӟе Исаиялэсь 43:2.) Но со кылзэ сётэ, со милемын луоз но соос пыр потыны юрттоз шуыса. Инмар нокинлы но номырлы уз лэзьы милемыз соин люкыны. Озьы ик, ми ваньзэ чиданы мед быгатомы шуыса, Иегова милемлы кужмо святой духсэ сётэ (Лука 11:13; 2 Кор. 4:7). Озьыен, милям котьку но луоз ваньмыз, мар кулэ, ваньзэ чидан но Инмарлы оскымон луон понна d.

9. Малы осконо, Иегова милемлы юрттоз шуыса? (Иаков 1:6, 7).

⁹ Иегова возьма, ми солы оскомы шуыса (Евр. 11:6). Куддыръя шуг-секытъёсмы гурезь кадь бадӟымесь пото. Ми малпаськомы, вылды: «Мыным Иегова но уз юртты». Но Библия милемыз оскытэ, Инмарен ӵош ми ваньзэ вормыны быгатомы шуыса (Пс. 17:30). Соин ик осконэз лябӟытӥсь малпанъёслы эн сётске. Со интые, Иеговалы вӧсяське но оске, со тӥледлы одно ик ответ сётоз шуыса. (Лыдӟе Иаковлэсь 1:6, 7.)

10. Мар кароно, асьмеды вӧсяськеммыя возён понна? Вералэ пример.

¹⁰ Иегова возьма, ми асьмеды вӧсяськеммыя возёмы шуыса. Шуом, улосысь конгрессэ мынон понна, агайлэн уж дорысьтыз куриськемез потэ. Соин ик со Иеговалэсь юрттэтсэ куре. Кызьы Иегова солы ответ сётоз? Кузёеныз вераськон понна, Инмар солы кышкасьтэм сям сётыны быгатэ. Озьы ке но агайлы аслыз мыноно но кузёеныз вераськоно. Оло нош, одӥг пол вераськыса гинэ, сое уз лэзе, но солы кӧня ке пол вераськоно луоз. Оло нош, мукет ужасен воштӥськоно луоз яке дась луоно луоз та толэзь понна ӧжытгес уждун басьтыны.

11. Малы выльысь но выльысь вӧсяськоно?

¹¹ Иегова возьма, ми выльысь но выльысь  вӧсяськомы шуыса (1 Фес. 5:17). Кызьы адӟиське Иисуслэн кылъёсысьтыз, вань вӧсяськонъёсмылы Иегова ответ соку ик уз сёты (Лука 11:9). Соин ик кидэс эн лэзе! Выльысь но выльысь вӧсяське (Лука 18:1—7). Озьы тӥ Иеговалы возьматоды, со, мае тӥ куриськоды, тӥледлы туж кулэ шуыса. Озьы ик Иегова адӟоз оскемдэс, со тӥледлы юрттыны быгатэ шуыса.

12. а) Кыӵе юан вылын малпаськоно но малы? б) Кызьы валано, ми Иеговаез гажаса вӧсяськиськомы шуыса? (Озьы ик учке « Возьмато-а мынам вӧсяськонъёсы, мон Иеговаез гажасько шуыса?» рамкаез.)

¹² Иегова куронъёсмес уг быдэсты ке, куинь юан вылын малпаськыны луоз. Нырысетӥез: «Зэм-а со, мае мон курисько, мыным туж кулэ?» Ӵем дыръя ми малпаськомы, тодӥськомы шуыса, мар милемлы кулэ. Но Иегова сое умойгес тодэ. Нош куд-ог куронъёсмы Инмарлэн эрикезлы воксё пумит луыны быгато (1 Иоанн 5:14). Тодамы ваёмы анаез но атаез, кудъёсыз сярысь нырысетӥ абзацын вераськиз. Соос Иеговаез куро, нылпизы зэмлыкъя мед улоз шуыса. Со умойтэм курон ӧвӧл, кадь. Но Иегова нокинэ кужмысь уг косы солы ужаны-тыршыны. Солэн потэ, котькудӥз ачиз мед быръёз солы ужаны-тыршыны (К. Зак. 10:12, 13; 30:19, 20). Соин ик умойгес луоз, анай но атай Иеговалэсь юрттэтсэ куризы ке нылпизылэсь сюлэмзэ вырӟытыны. Озьы соос быгатозы нылпизылы юрттыны Иеговаез яратыны но соин эшъяськыны (Мад. 22:6; Еф. 6:4).

13. Ку Иегова милемлы юрттоз? Валэктэ (Евр. 4:16).

¹³ Кыкетӥез юан таӵе: «Иеговалэн малпамезъя, тупась-а али дыр мынэсьтым куронме быдэстыны?» Милям потэ, дыр,  Иегова вӧсяськонмылы ответ соку ик мед сётоз шуыса. Но со умойгес тодэ, ку солы тупась дыр вуоз. (Лыдӟе Еврейёслы 4:16.) Иегова милемлы ответ соку ик ӧз сёты ке, ми малпаны быгатомы, со куронмес ноку уз быдэсты шуыса. Но со возьматыны быгатэ, Иегова сое мукет дыръя быдэстоз шуыса. Тодамы ваёмы егит агаез, кудӥзлэн туж бурмемез потэ. Иегова агаез паймымон амалэн бурмытысал ке, Шайтан шуысал, агай соин гинэ Инмарлы ужа-тырше шуыса (Иов 1:9—11; 2:4). Со сяна, Иегова дыр пуктӥз, куке со вань висёнъёсты быдтоз (Ис. 33:24; Усьт. 21:3, 4). Нош со дырозь возьмано ӧвӧл, Иегова адямиосты паймымон амалэн бурмытъялоз шуыса. Соин ик агай Иеговалэсь кужым но каньыллык курыны быгатэ, висемез шоры учкытэк, азьланяз но Иеговалы оскымон ужан-тыршон понна (Пс. 28:11).

14. Малы дышетскыны луэ Джанис сузэрлэсь?

¹⁴ Тодӥськоды на-а Джанис сузэрез, кудӥз Вефильын ужан-тыршон сярысь вӧсяськиз? Вить ар ортчыса гинэ, со валаз, кызьы Иегова солы ответ сётӥз. Со вера: «Со дыр ӵоже Иегова монэ дышетӥз но тупатъяз. Мыным дышетсконо вал эшшо но тросгес со вылэ оскиськыса улыны. Озьы ик мон валай, мыным ас поннам Библиез умойгес эскероно шуыса. Со сяна, мыным дышетсконо вал котькытын Иеговалы шумпотыса ужаны-тыршыны». Берлогес Джанис сузэрлэсь картсэ ёросэз чаклась луыса ужаны-тыршыны ӧтизы. Ортчемез шоры учкыса, сузэрмы вера: «Иегова вӧсяськонъёсылы ответ мукет сямен сётӥз ке но, берло мон валай, со мыным умойзэ гинэ сётӥз шуыса. Али мон туж тау карисько Иеговаез, мыным яратэмзэ возьматэмез понна».

15. Малы куддыръя умойгес луоз Иеговалы луонлык сётыны аслыз бырйыны, кыӵе милемлы ответ сётоно? (Озьы ик учке суредэз.)

 ¹⁵ Нош куинетӥез юан таӵе: «Оло, мыным мукетыз сярысь вӧсяськыны кулэ?» Умой, вӧсяськыкумы ми Иеговалы шонерак вераськомы ке, мар ми солэсь возьмаськомы. Но куддыръя умой луоз Иеговалы луонлык сётыны аслыз бырйыны, кыӵе ответ милемлы сётыны. Соку ми адӟомы, мар Иегова милесьтым возьма. Тодамы ваёмы сузэрез, кудӥз вӧсяське Эксэйлыкез тодытӥсьёслы школаын дышетскон сярысь. Солэн туж потэ отын дышетскемез но ужамез-тыршемез отын, кытын тросгес ивортӥсьёс кулэ. Соин ик сузэр быгатэ азьланяз но со Школаын дышетскон сярысь вӧсяськыны но курыны Иеговаез возьматыны солы, кызьы со али ик ини солы тросгес ужаны-тыршыны быгатэ (Ап. уж. 16:9, 10). Собере солы ассэ вӧсяськемезъя возёно. Кылсярысь, ёросэз чакласьлэсь юано, вань-а кытын ке кенеш, кытын тросгес пионеръёс кулэ. Яке филиалэ гожтоно но юано, кытын тросгес ивортӥсьёс кулэ e.

16. Мае ми тодӥмы та статьяысь?

¹⁶ Кызьы ми адӟимы, Иегова вӧсяськонъёсмылы ответ котьку яратыса сётэ но шонерлыко лэсьтэ (Пс. 4:4; Ис. 30:18). Куддыръя Инмар мукет сямен ответ сётэ. Но со вань вӧсяськонъёсмес кылзэ. Иегова милемыз туж яратэ. Со милемыз ноку уз кельты (Пс. 9:11). Соин ик «котькыӵе но дыръёсы Со вылэ» оскиськыса улэ но солы сюлэмдэс усьтэ (Пс. 61:9).