1, 2. 1 Пётрлэн 4:7, 8 верамъя, мар юрттоз милемлы шуг-секытъёсты вормыны?

 ТА ДУННЕЛЭН пумыз матын ини, соин ик ӝоген ми бадӟым шуг-секытъёсын пумиськомы, дыр (2 Тим. 3:1). Кылсярысь, Шундыпуксёнпал Африкаысь одӥгаз шаерын быръёнъёс азьын ортчем кампания бере бадӟым бугыръяськонъёс кутскизы. Ӝыны арлэсь тросгес вын-агайёсмылы но сузэр-апайёсмылы кышкыт вал урамъёстӥ ветлыны, малы ке шуоно отын ожмаськонъёс мынӥзы. Мар юрттӥз соослы та шуг-секытъёс пыр потыны? Куд-огъёсыз ватӥськизы огъя оскисьёссылэн коркаосазы, кудъёсыз кышкыттэмгес интыосын вал. Одӥг вын-агай вераз: «Мон туж шумпотӥ, мон эшъёсы пӧлын вал шуыса! Ми ог-огмес юнматыны быгатӥмы».

² «Туж бадӟым курадӟон-куректон» дыръя милемлы туж кулэ луозы оскымон, яратӥсь эшъёсмы (Усьт. 7:14). Соин ик али самой тупась дыр эшъёсынымы кусыпъёсмес юнматыны. (Лыдӟе 1 Пётрлэсь 4:7, 8.) Ми тросэзлы дышетскыны быгатӥськомы Иеремиялэн примерысьтыз — солэн эшъёсыз юрттӥзы солы улэп кыльыны Иерусалимез куашкатон азьын b. Ойдолэ али пыр-поч эскеромы солэсь примерзэ.

3. а) Малы Иеремия адямиослэсь палэнскыны быгатысал? б) Мае Иеремия аслаз Варух гожъясезлы вераз но кызьы со соослэн кусыпъёссы вылын шӧдӥськиз?

³ Ньыльдон ар, яке солэсь но тросгес, Иеремия кескич адямиос пӧлын улӥз, кудъёсыз пӧлын солэн бускельёсыз, оло нош, вордскем карысьтыз, Анафофаысь, куд-ог ӵыжы-выжыосыз  но вал, вылды (Иер. 11:21; 12:6). Сыӵе югдуръёсын улыса но Иеремия адямиослэсь ӧз палэнскы. Аслаз шӧдонъёсыз сярысь со вераз оскымон гожъясезлы, Варухлы, озьы ик милемлы но, малы ке шуоно туннэ ми солэн сюлмаськонъёсыз сярысь Библиысь лыдӟыны быгатӥськомы (Иер. 8:21; 9:1; 20:14—18; 45:1). Малпалэ гинэ, макем юн ог-огенызы эшъяськизы Варух но Иеремия но макем соослэн ог-огзылы гажанзы будӥз, куке Варух Иеремиялэн улонысьтыз учыръёссэ гожъяз! (Иер. 20:1, 2; 26:7—11).

4. Мар карыны куриз Иегова Иеремияез но кызьы со уж Иеремиялэсь но Варухлэсь кусыпъёссэс юнматӥз?

⁴ Трос аръёс ӵоже Иеремия кышкатэк вераз израиль калыклы, мар возьма Иерусалимез (Иер. 25:3). Иеговалэн потэ вал, калык мед ӧпкелёз но урод-лек сюресэз вылысь мед кожоз шуыса. Соин ик со куриз Иеремияез вань та алон кылъёсты свитоке гожтыны (Иер. 36:1—4). Иеговалэсь ужзэ быдэстыкузы, Иеремия но Варух трос толэзьёс ӵоже дырзэс ӵош ортчытӥзы но ог-огзылэсь осконзэс юнматӥзы.

5. Малы вераны луоз, Варух Иеремиялы умой эш вал шуыса?

⁵ Куке Иеговалэн кылъёсыз гожтэмын вал, со кылъёсты калыклы шара лыдӟыны Иеремия аслаз Варух эшезлы оскиз (Иер. 36:5, 6). Варух кышкатэк косонзэ быдэстӥз. Иеремия туж данъяськиз, вылды, Варух храмлэн азбараз пыриз но Иеговалэсь кылъёссэ ваньмыз азьын лыдӟиз шуыса (Иер. 36:8—10). Иудеялэн кивалтӥсьёсыз кылӥзы Варухлэсь мар каремзэ но косӥзы сое со свитокез соослы шара лыдӟыны (Иер. 36:14, 15). Кивалтӥсьёс Инмарлэсь кылъёссэ Иоаким эксэйлы вераны малпазы, но нырысь веразы Варухлы: «Мын, пегӟы, тон но, Иеремия но, нокин но медаз тоды, кытын тӥ» (Иер. 36:16—19). Со туж умой визь-кенеш вал!

6. Мар каризы Иеремия но Варух, шуг-секытэн пумиськыса?

 ⁶ Иеремияен гожтэм кылъёсты кылыса, Иоаким эксэй туж вожзэ поттӥз но свитокез сутӥз. Озьы ик Иеремияез но Варухез кырмыны косӥз. Но Иеремия солэсь ӧз кышка. Со мукет свитокез басьтӥз но, Варухлы сётыса, Иеговалэсь кылъёссэ выльысь гожъяны косӥз. Соку Варух Иудеялэн Иоаким эксэеныз сутэм свитокысь вань кылъёссэ выльысь гожтӥз (Иер. 36:26—28, 32).

7. Кызьы Иеремиялэн но Варухлэн ӵош ужамзы кусыпъёссы вылын шӧдӥськиз, вылды?

⁷ Ӵем дыръя шуг-секытъёс пыр ӵош потэм адямиос ог-огзылы туж матын луо. Куке Иеремия но Варух лек Иоаким эксэен сутэм свиток интые выль свиток гожъязы, веранэз ӧвӧл, соос ог-огзы сярысь тросгес тодӥзы но соослэн кусыпъёссы эшшо но юнмазы. Малы ми дышетскыны быгатӥськомы та кык оскымон ужась-тыршисьёслэсь?

8. Мар люкетыны быгатэ зэмос эшъёс луыны но малы со шуг-секытэз вормыны кулэ?

⁸ Куддыръя милемлы секыт луыны быгатэ мукетъёсызлы сюлэммес усьтыны, малы ке шуоно кин ке но азьвыл милесьтым кӧтмес ӝож кариз (Мад. 18:20, 25). Яке ми малпаны быгатомы, кинэн ке матысь эшъяськыны милям кужыммы но, дырмы но ӧвӧл шуыса. Но со муг ӧвӧл мукетъёсызлэсь палэнскыны. Милям потэ ке, шуг-секытъёс дыръя вын-агайёсмы милемлы мед юрттозы шуыса, милемлы али ик ини дышетсконо соослы оскыны но малпанъёсмес но сюлэммес соослы усьтыны. Зэмос эшъёс луон понна, со туж кулэ луись вамыш (1 Пётр 1:22).

9. а) Кытысь адӟиське, Иисус аслаз эшъёсызлы оске вал шуыса? б) Кызьы мукетъёсызлы сюлэмдэс усьтыса вераськон юрттоз тӥледлы матысь эшъёс шедьтыны? Вералэ пример.

⁹ Иисус оске вал аслаз эшъёсызлы, малы ке шуоно со соослэсь номыре уг ваты вал (Иоанн 15:15). Асьмелэсь шумпотонмес, куректонъёсмес но сюлмаськонъёсмес мукетъёсызлы вераса, ми солэсь адӟем карыны быгатомы. Матысьёстэс сак кылзэ, соку тӥ адӟоды, тӥляд соосын трос огкадез вань шуыса: огкадь малпанъёс, шӧдонъёс но ужпумъёс. Тани 29 аресъем Синдилэн примерез. Солэн Мари-Луиза матысь эшезлы 67 арес. Со пионер луыса ужа-тырше. Синди но Мари-Луиза котькуд покчиарняе ӵукна тодыто но котьмар сярысь вераськыны быгато. Синди вера: «Мыным туж кельшо эшъёсыным пайда вайись вераськонъёс, малы ке шуоно озьы мон соосты умойгес тодыны но валаны быгатӥсько». Эшъяськон юнма, куке эшъёс ог-огзылы кышкатэк ас шӧдонъёссэс  верало но ог-огзэс кылзо. Синди выллем, тӥ но, мукетъёсызлы сюлэмдэс усьтыса, вераськиды ке, тӥляд но кусыпъёсты юнмалозы (Мад. 27:9).

10. Мадёнъёс 27:17 верамъя, кызьы кусыпъёсмы вылын шӧдӥськоз вын-агайёсынымы но сузэр-апайёсынымы тодытон уже ӵош пыриськон?

¹⁰ Иеремияен но Варухен луэм учырын сямен ик, вын-агайёсын но сузэр-апайёсын тодытон уже ӵош пыриськон юрттэ милемлы соослэсь умой сямъёссэс адӟыны. Ми соослэсь тросэзлы дышетскиськомы но соосын матэгес луиськомы. (Лыдӟе Мадёнъёсты 27:17.) Мае тӥ шӧдӥськоды, куке тодытон ужын кылӥськоды, кызьы вын-агай яке сузэр-апай кышкатэк аслаз осконэз сярысь вера яке, вань сюлэмзэ поныса, мукетъёсызлы Иегова сярысь но солэн малпанэз сярысь ивортэ? Сыӵе учыръёсы тӥ сое эшшо но юнгес яратыны кутскиськоды.

11, 12. Вералэ пример, кызьы тодытон уже пыриськон кусыпъёсмес юнматэ.

¹¹ Эскеромы кык примеръёсты, кудъёсыз возьмато, макем юнмало милям кусыпъёсмы, куке вын-агайёсын но сузэр-апайёсын тодытон уже ӵош пыриськиськомы. Адлина, кудӥзлы 23 арес, ӧтиз аслэсьтыз Кандиса эшсэ мыныны ӟеч иворез вераны отчы, кытын туж шер тодыто. «Милям тодытон уже тросгес пыриськеммы но тросгес шумпотон басьтэммы потэ вал,— вера со.— Милям кыкнамылэн ик юнматскеммы потэ вал, азьланяз но Иеговалы ваньзэ умойзэ сётыны мед быгатомы шуыса». Кыӵе пайда со соослы вайиз? Адлина азьланьтэ: «Котькуд ӝыт ми ог-огмылы вераллямы, мар милемын луиз, мар милемлы тунсыко потӥз, маиз кельшиз, адямиосын вераськыкумы, но кызьы Иегова тодытон ужын милемын кивалтӥз. Милемлы кыкнамылы ик кельшо вал таӵе пайдаё вераськонъёс. Соос юрттӥзы милемлы ог-огмес эшшо но умойгес тодыны».

¹² Лаила но Марианна, Франциысь кык бызьымтэ сузэръёс, вить арнялы мынӥзы Бангие. Со Шор Африка Республикалэн шоркарез. Лаила тодаз вае: «Милям Марианнаен трос шуг-секытъёсмы вал, но  ог-огенымы номыре ватытэк вераськон милесьтым кусыпъёсмес юнматӥз. Адӟыса, кызьы Марианна выль югдуръёслы дыше, кызьы со адямиослы яратонзэ возьматэ но макем со яратэ ӟеч иворез вераны, мынам солы гажанэ будӥз». Ваньзэ тае ас вылад шӧдыны мукет шаере ветлытэк но луэ. Ас палъёсады но кенешысьтыды вын-агаен яке сузэр-апаен ӟеч иворез веракуды, тӥляд луонлыкты вань ог-огдэс умойгес тодыны но кусыпъёстэс юнматыны.

13. Кыӵе шуг-секытэн ми пумиськыны быгатомы, вын-агайёсын но сузэр-апайёсын тодытон уже пыриськыкумы?

¹³ Куддыръя вын-агайёсын но сузэр-апайёсын тодытон уже пыриськыкумы, умой сямъёссэс адӟем сяна, ми соослэсь янгышъёссэс но адӟиськомы. Мар кароно сыӵе учыре? Тодамы ваёмы Иеремиялэсь примерзэ. Мар юрттӥз солы мукет адямиослэсь умой сямъёссэс адӟыны но янгышъёссылы саклыксэ висъятэк улыны?

14. Мае Иеремия Иегова сярысь тодӥз но малы со сое дышетӥз?

¹⁴ Иеремия гожтӥз книгаез, кудӥз солэн нимыныз нимамын. Озьы ик со гожтӥз, вылды, Эксэйлыкъёслэн куинетӥ но ньылетӥ книгаосты. Со книгаосты гожтыкуз, веранэз ӧвӧл, Иеремия эшшо умойгес адӟиз на, макем Иегова гажан-жалянзэ возьматэ сьӧлыко адямиослы. Кылсярысь, со тодӥз, кызьы Иегова гажан-жалянзэ возьматӥз Ахав эксэйлы, куке со аслаз лек ужъёсыз сярысь ӧпкелиз: Иегова жаляз сое но семьяезлэсь кулэмзэ адӟыны ӧз сёты (3 Экс. 21:27—29). Озьы ик Иеремия тодӥз, Ахавен ӵошатыса, Манассия эксэй Иеговалэсь нимзэ тросгес сантэмаз шуыса. Озьы ке но Иегова Манассияез простить кариз, малы ке шуоно со ӧпкелиз (4 Экс. 21:16, 17; 2 Пар. 33:10—13). Та учыръёс Иеремияез дышетӥзы Иеговалэсь адӟем карыны но матысь эшъёсыныз чидась но гажась-жалясь луыны (Пс. 102:8, 9).

15. Кызьы Иеремия Иеговалэсь адӟем кариз но чидась луэмзэ возьматӥз, куке Варухлэн мылкыдыз сӥяз?

¹⁵ Учкомы, кызьы Иеремия Варухлы юрттӥз, куке солэн огдырлы мылкыдыз сӥяз Инмарлэсь сётэм ужзэ быдэстыны. Иеремия Варухез ӧз кушты. Лякытэн, но со дыре ик Инмарлэсь визь-кенешсэ шонерак сётыса, со аслаз эшезлы юрттӥз (Иер. 45:1—5). Малы дышетэ милемыз та пример?

16. Мадёнъёс 17:9 верамъя, мар юрттоз милемлы кусыпъёсмес юнматыны?

¹⁶ Милемлы возьмано ӧвӧл, вын-агайёсмы но сузэр-апайёсмы котьку но котьмае шонер лэсьтозы шуыса. Соин ик ми кинэн ке эшъяськимы ке, вань кужыммес пононо со адямиен кусыпъёсмес утьыны. Эшмы кыӵе ке янгыш лэсьтӥз ке, милемлы лякытэн, но со дыре ик шонерак, солы Библиысь визь-кенеш сётоно луоз, дыр (Пс. 140:5). Нош со милесьтым кӧтмес ӝож кариз ке, милемлы сое простить кароно. Простить карыса, ми со кӧтӝожез тодамы ум вайылэ ни. (Лыдӟе Мадёнъёсты 17:9.) Та секыт дыръёсы туж кулэ адӟыны вын-агайёсмылэсь но сузэр-апайёсмылэсь умой сямъёссэс, нош янгышъёссылы саклыкмес висъяно ӧвӧл. Со милесьтым кусыпъёсмес юнматоз. Милемлы али ик ини кусыпъёсмес юнматоно, малы ке шуоно бадӟым куректон дыръя милемлы туж кулэ луозы матысь эшъёс.

17. Малы вераны луоз, Иеремия зэмос эш вал шуыса?

¹⁷ Иеремия пророк секыт дыръёсы но зэмос эш вал. Тани одӥг пример. Одӥг пол эксэй коркан ужась Авдемелех, Иеремияез кулонлэсь утиз, дэриен тырмем гуысь поттыса.  Со понна Адвемелех кышкаса улэ вал, кивалтӥсьёс солы пунэмзэ берыктозы шуыса. Куке Иеремия сое тодӥз, со ӧз малпа, солэн эшез кызьы ке но ачиз аслэсьтыз шуг-секытъёссэ вормоз шуыса. Пытсэтын пукыса но, Иеремия шедьтӥз амал, кызьы Авдемелехлы Иеговалэсь буйгатӥсь кылъёссэ вераны (Иер. 38:7—13; 39:15—18).

18. Мадёнъёс 17:17 верамъя, мар кароно, куке вын-агаймы яке сузэр-апаймы шуг-секытэн пумиськиз?

¹⁸ Туннэ вын-агайёсмы но сузэр-апайёсмы туж пӧртэм шуг-секытъёсын пумисько. Тросэз инкуазь шимучыръёсын яке ожъёсын сэрен курадӟо. Куке сыӵе учыръёс луо, кин ке но со вын-агайёсты но сузэр-апайёсты ас дораз пыртыны быгатэ. Кин ке но коньдонэн юрттыны быгатэ. Но ваньмы асьмеос Иеговаез курыны быгатӥськомы юрттыны соослы, кинъёс шуг-секытэн пумиськизы. Куддыръя уд но тодӥськы, мар вераны яке кызьы юрттыны мылкыдыз куашкам адямилы. Но ваньмы асьмеос юрттыны быгатӥськомы. Кылсярысь, вын-агаймылы яке сузэр-апаймылы ми дырмес кузьманы быгатӥськомы. Со сяна, веракузы ми быгатӥськомы соосты сак кылзыны яке соосын ӵош Библиысь кылбуръёсты лыдӟыны, кудъёсыз милемлы асьмелы кельшо но милемыз буйгато (Ис. 50:4). Валтӥсез — милемлы вӧзазы луоно, куке соослы юрттэт кулэ. (Лыдӟе Мадёнъёсты 17:17.)

19. Малы али ик ини вын-агайёсынымы но сузэр-апайёсынымы кусыпъёсмес юнматоно?

¹⁹ Ойдолэ али ик ини вын-агайёсынымы но сузэр-апайёсынымы матэгес тодматскомы но кусыпъёсмес юнматомы. Малы? Малы ке шуоно тушмонъёсмы, пӧяса но шонертэмзэ вераса, милесьтым кусыпъёсмес сӧрыны тыршозы. Соос тыршозы милемыз ог-огмылы пумит карыны, но уз быгатэ. Соос уз быгатэ косыны милемыз ог-огмес яратытэк улыны. Мар гинэ тушмонъёсмы медаз каре, соос милесьтым огкылысь улонмес уз быдтэ. Милям эшъёсынымы матысь кусыпъёсмы та лек дунне бырытозь гинэ уз луэ, нош пырак дауръёс ӵоже луозы!