1, 2. а) Ку простить карыны тужгес но секыт? б) Кызьы Дениз сузэр простить каремзэ возьматӥз?

 СЕКЫТ-А тӥледлы простить карыны? Ми пӧлысь тросэзлы со капчи ӧвӧл, тужгес но кин ке, мае ке вераса яке лэсьтыса, милемыз туж вӧсь кариз ке. Но ми быгатӥськомы вожмес поттыса яке куатаськыса улэмысь дугдыны но простить карыны. Эскеромы, мар луиз Дени́з a сузэренымы. Туж секыт учыре сюрыса но, со быгатӥз простить карыны. 2017-тӥ арын Дениз семьяеныз Иеговалэн Адӟись-Ивортӥсьёсызлэн валтӥсь кивалтонниязы экскурсие мынӥз. Бертыкузы соос аварие сюризы. Мукет водитель машинаязы шуккиськиз. Дениз йырсазьзэ ыштӥз. Сайкамез бере со тодӥз, нылпиоссы туж зол вӧсь луизы, нош Бра́йан картэз кулӥз шуыса. Со дырез тодаз вайыса, Дениз вера: «Куректэменым мон номыре уг валаськы вал». Берлогес со тодӥз, водитель юэмын ӧй вал но сюресэз сак учкиз шуыса. Озьы ке но Дениз сузэрлы туж вӧсь вал. Соин ик со Иеговалэсь юрттэт куриз каньыл сюлмын улыны.

² Водителез, кудӥз соос борды шуккиськиз, янгыше уськытӥзы юри малпатэк адямиез вием понна. Со понна со пытсэтэ сюрыны быгатэ вал. Но суд сузэрмылы вераз, со пиосмуртэз пытсэтэ пуктозы-а, уз-а, герӟаськемын соин, мар сузэрмы судын вералоз. Дениз шуэ: «Мыным потэ вал, яраме выльысь усьтӥзы но отчы быдэс ведра сылал кисьтӥзы шуыса. Мыным выльысь тодам ваёно луиз улонысьтым самой секыт вакытэз». Кӧня ке арня ортчыса, Дениз судын  вал. Мар со вераз? Дениз судьяез ӧз куры со водителез пытсэтэ пуктыны b. Сузэрмылэн верамез бере судья бӧрдыны кутскиз. Со шуиз: «Судья луыса мон 25 ар ужасько ини. Но мынам ноку адӟеме ӧй вал на, кулэм муртлэн семьяез суд улэ шедем муртлы дур мед басьтысал шуыса. Татын „яратон“ но „простить карон“ кылъёсты мон ӧй кылы на».

3. Мар юрттӥз Дениз сузэрлы простить карыны?

³ Мар юрттӥз Дениз сузэрлы простить карыны? Со малпаськиз, кызьы Иегова простить каре (Мих. 7:18). Милемыз простить каремез понна ми Иеговалы тау кариськомы ке, та милемлы юрттоз мукетъёсты простить карыны.

4. Мае возьма милесьтым Иегова? (Ефесъёслы 4:32).

⁴ Иеговалэн потэ, мукетъёсты простить карыкумы, ми, со кадь ик, вань сюлмысьтымы простить мед каромы шуыса. (Лыдӟе Ефесъёслы 4:32.) Милемлы дась луоно простить карыны соосты, кинъёс милемыз вӧсь каризы (Пс. 85:5; Лука 17:4). Ойдолэ эскеромы куинь вамышъёсты, кудъёсыз милемлы юрттозы простить карыны соку но, куке со капчи ӧвӧл.

ШӦДОНЪЁСТЭС ВАЛАНЫ ТЫРШЕ

5. Макем вӧсь милемыз карыны быгато мукетъёсызлэн кылъёссы яке ужъёссы, Мадёнъёсты 12:18 лыдэ басьтыса?

⁵ Адямилэн кылъёсыз яке ужъёсыз милемыз туж вӧсь карыны быгато, тужгес но со матысь адямимы ке (Пс. 54:13—15). Куддыръя чидантэм вӧсь луэ — сюлмамы пуртэн бышкалтэм кадь. (Лыдӟе Мадёнъёсты 12:18.) Бышкалтэм пуртэз ӧд потты ке, номыр умоез уз луы. Ӵапак озьы ик милемыз вӧсь каризы ке, нош ми асьмеды оскытӥськомы ке, милемлы вӧсь ӧвӧл но ваньмыз умой шуыса, малпано ӧвӧл, милемлы капчигес луоз шуыса.

6. Кыӵе шӧдонъёсмы милям кылдыны быгато, куке милемыз вӧсь каро?

⁶ Куке милемыз вӧсь каро, ӵем дыръя ми йыркуръяськыны кутскиськомы. Йыркуръяськон шоры Библия уродэн уг учкы. Но валтӥсез — йыркуръяськон милемыз медаз вормы (Пс. 4:5; Еф. 4:26). Малы? Малы ке шуоно шӧдонъёс мае ке карыны мылкыдмес ӝуто. Нош вожпотон ӵем дыръя номыр умойзэ уг вайы (Иак. 1:20). Эн вунэтэ: вожез поттыны но вожпотыса улыны — со пӧртэм. Нырысетӥез — со милям шӧдонъёсмы, кыкетӥез — со милям быръёнмы.

7. Кыӵе эшшо шӧдонъёсмы милям кылдыны быгато, куке милемыз вӧсь каро?

⁷ Куке милемыз вӧсь каро, вож потэм сяна, мукет но шӧдонъёс кылдыны быгато. Кылсярысь, Энн сузэр вера: «Пичи дыръям атае анайме кельтӥз но кышно басьтӥз кышномуртэз, кудӥз монэн утиськыса улӥз. Куке соослэн нылпиоссы вордӥськизы, мыным потэ вал, мон сярысь вунэтӥзы шуыса. Пичи дырысеным ик мон малпай, мон нокинлы кулэ ӧвӧл шуыса». Джордже́т сузэр тодаз вае, кыӵе шӧдонъёсыз солэн вал, куке со тодӥз, картэз солы оскымон ӧвӧл шуыса: «Ми пичи дырысенымы ик эшъяськимы. Ми ӵош пионеръёс луыса ужамы-тыршимы. Мон малпай, вӧсь луыса сюлмы пазьгиськоз шуыса». Нао́ми сузэр вера: «Мон ӧй но малпа, картэ монэ вӧсь карыны быгатоз  шуыса. Куке со вераз, лушкемен порнографиез учкиз шуыса, мыным потӥз, со монэ пӧяса возиз но монэ кельтӥз шуыса».

8. а) Малы ми мукетъёсты простить кариськомы? б) Кыӵе пайда ми басьтомы, мукетъёсты простить каримы ке? (Учке « Мар кароно, тӥледыз вӧсь каризы ке» рамкаез.)

⁸ Ми ум быгатӥське чакланы, мае верало но кызьы асьсэды возё мукетъёсыз. Но ми быгатӥськомы чакланы, кызьы ми асьмеды возиськомы. Ӵем дыръя самой умоез, мар ми карыны быгатӥськомы, куке милемыз вӧсь каро,— со простить карыны. Малы? Малы ке шуоно ми Иеговаез яратӥськомы, нош солэн потэ, ми простить мед каромы шуыса. Ми азьланяз но вожмес поттыса улӥмы но простить ӧм каре ке, шонертэм ужъёс лэсьтомы но тазалыкмес лябӟытомы, вылды (Мад. 14:17, 29, 30). Тани мар вера Кристи́н сузэр: «Куке мон йыркуръяськыса но куатаськыса улӥсько, мон ӧжытгес пальпотӥсько, оло мае но сиисько, ӧжыт изисько. Соин ик шӧдонъёсме чакланы секытгес ини. Нош таин сэрен картэным но котырысьтым адямиосын кусыпъёсы сӧрисько».

9. Малы куатаськемысь дугдыны кулэ?

⁹ Озьы ик милемлы вӧсь луэ, куке адями янгышамзэ уг вала но милемыз уг куры сое простить карыны. Со бурмымтэ яра кадь. Мар кароно, со мед бурмоз шуыса? Джорджет сузэр, кудӥзлэн картэз солы оскымон ӧй вал, вера: «Дыр ортчыса, мон быгатӥ картэ вылэ куатаськемысь но солы вожме поттыса улэмысь дугдыны. Соку мынам сюлмы каньыл луиз». Куатаськемысь дугдӥмы ке, вожпотон сюлэммес вӧсь уз кары ни. Озьы ми асьмеос асьмелы кузьым лэсьтӥськомы: ми азьвылзэ кельтӥськомы но выльысь шумпотыса улыны кутскиськомы (Мад. 11:17). Нош мар кароно, ваньзэ тае валаса но, простить карыны уд ке быгатӥське?

ЙЫРКУРЪЯСЬКЕМЫСЬ ДУГДЭ

10. Малы дыр кулэ, йыркуръяськемысь дугдон понна? (Озьы ик учке суредъёсты.)

¹⁰ Мар кароно, йыркуръяськемысь дугдон понна? Со понна чидан кулэ. Малпаське: адямилы, кудӥз туж зол вӧсь луиз, бурмон понна дыр кулэ. Ӵапак озьы ик милемлы но, милемыз кин ке вӧсь кариз ке, сое простить  карыны дась луон понна, дыр кулэ (Екк. 3:3; 1 Пётр 1:22).

11. а) Кызьы вӧсяськон юрттыны быгатэ простить карыны? б) Мае тӥ тодӥды простить карон сярысь, сноскаысь видеороликъёсты учкыса?

¹¹ Иеговалы вӧсяське но солэсь юрттэт куре адямиез простить карыны c. Тани мар кариз Энн сузэр, кудӥзлэн атаез семьязэс кельтӥз: «Мон Иеговаез кури ваньмес простить карыны кылъёсмы но ужъёсмы понна, кудъёсыз сое ӝоже уськытӥзы. Собере мон атаелы но солэн кышноезлы гожтэт гожтӥ но верай, соосты простить карисько шуыса». Энн верамъя, со капчи ӧй вал. Но со шуэ: «Мынам туж потэ, Иегова кадь простить карыны тыршемме адӟыса, атаелэн но солэн кышноезлэн Инмаре сярысь тодыны куке но мылкыдзы мед ӝутскоз шуыса».

12. Малы, шӧдонъёсмы вылэ оскиськем интые, Иеговалы оскиськоно? (Мадёнъёс 3:5, 6).

¹² Шӧдонъёсмы вылэ оскиськем интые, Иеговалы оскиськоно. (Лыдӟе Мадёнъёсты 3:5, 6.) Со умойгес тодэ, мар милемлы умой луоз (Ис. 55:8, 9). Инмар ноку уг куры милемыз лэсьтыны сое, мар милемлы изъян вайысал. Озьыен, Иегова милемыз простить карыны куре ке, со милемлы одно ик пайда ваёз (Пс. 39:5; Ис. 48:17, 18). Нош ми шӧдонъёсмы вылэ оскиськимы ке, простить карыны ноку ум быгатэ (Мад. 14:12; Иер. 17:9). Наоми сузэр, кудӥзлэн картэз порнографиез учкиз, вера: «Нырысь мон малпай, мон картме простить карыны кулэ ӧвӧл шуыса. Мон сюлмаськисько вал, со монэ нош ик вӧсь кароз яке вунэтоз шуыса, макем зол монэ вӧсь кариз. Мон асме оскытӥсько вал, Иегова шӧдонъёсме вала шуыса. Но берлогес мон валай: Инмар монэ вала ке но, со уг возьматы, со монэн соглаш шуыса. Инмар тодэ, мыным секыт но куатаськемысь дугдыны мон соку ик уг быгатӥськы шуыса. Но Иеговалэн потэ, мон простить мед каро шуыса». d

УРОД ШӦДОНЪЁСТЭС УМОЙ ШӦДОНЪЁСЫН ВОШТЭ

13. Мар карыны ӧте Римъёслы 12:18—21?

¹³ Простить карон понна, урод учырез вунэтыны гинэ тырмыт ӧвӧл. Милям потэ  милемыз вӧсь карись адямиен кусыпъёсмес тупатэммы, тужгес но со кенешысь вын-агаймы яке сузэр-апаймы ке (Матф. 5:23, 24). Йыркуръяськыса улэм интые, ми тыршиськомы гажаны-жаляны но простить карыны (Лыдӟе Римъёслы 12:18—21; 1 Пётр 3:9). Мар со понна кароно?

14. Мар милемлы тыршоно карыны но малы?

¹⁴ Милемыз вӧсь карись адями шоры тыршоно Иегова сямен учкыны. Инмар адямиослэсь умойзэ адӟыны тырше (2 Пар. 16:9; Пс. 129:3). Ӵем дыръя, мае ми утчаськомы, сое ик шедьтӥськомы. Ми тыршимы ке адямиослэсь умой сямъёссэс адӟыны, милемлы капчигес луоз соосты простить карыны. Джа́ррод агай вера: «Куке мынам кыӵе ке агаен кылы уг тупа, мон соку ик тодам вайисько солэсь трос умой сямъёссэ. Та мыным юрттэ сое простить карыны».

15. Малы адямилы вераны кулэ, тӥ сое простить кариды шуыса?

¹⁵ Озьы ик адямилы вераны кулэ, тӥ сое простить кариды шуыса. Малы? Тани мар вера Наоми сузэр: «Огпол картэ мынэсьтым  юаз: „Тон монэ простить карид-а?“ Мон вераны турттӥсько вал, сое простить кари шуыса, но ӧй быгаты. Соку мон валай, та дырозь вань сюлмысьтым сое простить ӧй кары на шуыса. Дыр ортчыса, мон быгатӥ солы вераны, „мон тонэ простить карисько“ шуыса. Адӟе вал тӥ картэлэсь синвуэн тырмем синъёссэ! Мон ӧй но малпа, макем капчи милемлы собере луоз. Али мон нош ик картэлы оскисько. Ми соин — самой умой эшъёс».

16. Мае тӥ тодӥды простить карон сярысь?

¹⁶ Иегова вала, простить карыны котьку ик капчи ӧвӧл шуыса. Озьы ке но солэн потэ, ми ог-огмес простить мед каромы шуыса (Еф. 4:32). Та статьяын ми эскеримы, мар милемлы юрттоз. Со понна шӧдонъёсмес валаны тыршоно но йыркуръяськемысь дугдоно. Соку ми быгатомы урод шӧдонъёсмес умой шӧдонъёсын воштыны. (Учке « Простить карон понна куинь вамышъёс» рамкаез.)

ПРОСТИТЬ КАРОНЛЭН КУЖЫМЕЗ

17. Малы кулэ мукет адямиосты простить карыны?

¹⁷ Тани куд-ог мугъёс, малы ми мукет адямиосты простить карыны кулэ. Нырысетӥез, озьы ми шумпоттӥськомы инмысь Атаймес, Иеговаез, кудӥз простить карон пумысен милемлы адӟем карон возьматэ (Лука 6:36). Кыкетӥез, озьы ми Иеговалэн простить каремез понна тау карон мылкыдмес возьматӥськомы (Матф. 6:12). Куинетӥез, простить карон тазалыкмес но мукетъёсыныз кусыпъёсмес юнматэ.

18, 19. Кызьы простить карон улонмес воштыны быгатэ?

¹⁸ Мукетъёсты простить карыкумы, ми ум но малпаське, вылды, макем бадӟым пайда со вайыны быгатэ. Кылсярысь, тани маин йылпумъяськиз Дениз сузэрлэн учырез, кудӥз сярысь статьялэн кутсконаз вераськиз. Дениз уг тоды вал, водитель, кудӥз сэрен картэз кулӥз, суд бере ассэ быдтыны малпа вал шуыса. Но куке Дениз со пиосмуртэз простить кариз, солэн потӥз Иеговалэн Адӟись-Ивортӥсьёсыныз Библиез дышетэмез.

¹⁹ Куддыръя ми малпаськомы, простить карыны ум быгатэ шуыса. Но со бадӟым шумпотон вайыны быгатэ (Матф. 5:7). Соин ик тырше лэсьтыны ваньзэ, мае быгатӥськоды, Иегова сямен, простить карон понна!