1. Кыӵе мылкыдзы шӧдӥське Иеговалэн ужась-тыршисьёсызлэн вань дауръёс ӵоже?

 ЯРАТӤСЬКОДЫ-А тӥ Иеговаез? Тодӥськомы, яратӥськоды шуыса! Котьку вал сыӵе адямиос, кудъёсыз Иеговаез вань сюлмысьтызы яратӥзы, али но сыӵе адямиос вань (Пс. 103:33, 34). Соос котьку дась Иегова понна малэсь ке но куштӥськыны. Вашкала Израильын сыӵе адямиос вал назорейёс. Кинъёс со? Малы ми соослэсь дышетскиськомы?

2. а) Кинъёс со назорейёс? (Лыдпусъёс 6:1, 2). б) Малы израиль калык пӧлысь куд-огъёсыз назорей луыны кылзэс сёто вал?

² «Назорей» кыл еврей кылысь потэмын. Со «висъямын; сӥземын» шуэмез возьматэ. Та кыл умой возьматэ со муртъёслэсь мылкыдзэс, кудъёсыз, Иеговалы нимысьтыз амалэн ужан-тыршон понна, дась вал малэсь ке но куштӥськыны. Моисейлэн законаз верамын вал, пиосмурт но, кышномурт но Иеговалы кыл сётыны быгатэ вал, кыӵе ке дыр ӵоже со назорей кадь улоз шуыса a. (Лыдӟе Лыдпусъёсты 6:1, 2.) Кин ке назорей луыны кылзэ сётэ вал ке, солэсь возьмало вал, со лэсьтоз шуыса сое, мае назорей луисьтэм адями уг лэсьты вал. Соку малы куд-огъёсызлэн  назорей луэмзы потэ вал? Соос Иеговаез туж ярато вал но соослэн солы тау каремзы потэ вал (К. Зак. 6:5; 16:17).

3. Маин Инмарлэн туала ужась-тыршисьёсыз назорейёслы кельшо?

³ Куке «Христослэн законэз» Моисейлэсь законзэ воштӥз, адямиос назорейёс луыны ӧз быгатэ ни (Гал. 6:2; Рим. 10:4). Озьы ке но асьме дыръёсы но вань сыӵе адямиос, кудъёсызлэн, назорейёслэн кадь ик, вань сюлмысьтызы Иеговалы ужамзы-тыршемзы потэ. Куке ми Иеговалы сӥзиськиськомы, асьмеос кылмес сётӥськомы вань сюлмынымы, вань лулынымы, вань визьмынымы, вань кужмынымы Иеговалы ужаны-тыршыны (Марк 12:30). Иеговалы озьы ужаны-тыршыны сётэм кылмы возьматэ, асьмеос дась шуыса Иеговалэсь кылзӥськыны но малэсь ке куштӥськыны. Назорейёслэсь примерзэс эскерыса, асьмеос дышетскыны быгатомы, кызьы сӥзиськыкумы сётэм кылмыя улоно (Матф. 16:24) b. Ойдолэ эскеромы куд-ог примеръёсты.

ДАСЬ ЛУЭ МАЛЭСЬ КЕ КУШТӤСЬКЫНЫ

4. Мар карыны уг яра вал назорейёслы? (Лыдпусъёс 6:3, 4)

⁴ Лыдӟе Лыдпусъёсты 6:3, 4. Назорейёслы уг яра вал вина юыны, озьы ик сиыны но юыны сое, мар лэсьтэмын виноградлэсь. Мукетъёсыз ваньзэ сое сиё но юо вал. Отын номыр уродэз ӧй вал, малы ке шуоно вина — со Иеговалэн одӥгез кузьымез. Библиын верамын, вина «адямилэсь сюлэмзэ шулдыр карыны» сётэмын шуыса (Пс. 103:14, 15). Виналэсь лэсьтэм сиён но юон шумпотон вае ке но, назорейёс сое уг но сиё, уг но юо вал c.

5. Мар каризы Мадиан но Марсела кузпалъёс но малы?

⁵ Иеговалы тросгес ужан-тыршон понна, асьмеос но, вашкала назорейёс сямен ик, дась малэсь ке куштӥськыны. Учкомы Мадиа́н но Марсе́ла кузпалъёслэсь примерзэс. Соос туж умой улӥзы, соослэн котьмарзы но вал. Мадианлэн умой ужез, уждунэз вал. Та кузпалъёс улӥзы чебер квартираын. Но соослэн Иегова понна тросгес лэсьтэмзы потӥз. Соос верало: «Ми коньдонмес ӝикытгес кутыны кутскимы. Пичигес  квартирае потӥмы, машинамес вузамы». Кин ке соосты озьы лэсьтыны косӥз-а? Ӧз. Соос асьсэос сыӵе ужпум кутӥзы, малы ке шуоно соослэн Иеговалы тросгес ужамзы-тыршемзы потӥз. Озьы соос шудогес луизы.

6. Малы христианъёс дась малэсь ке куштӥськыны? (Озьы ик учке суредэз.)

⁶ Туннэ христианъёс, Иеговалы ужан-тыршонын тросгес лэсьтон понна, дась малэсь ке куштӥськыны (1 Кор. 9:3—6). Иегова кужмысь уг косы милемыз озьы лэсьтыны. Озьы ик со но, малэсь тросэз куштӥсько, ас понназ урод ӧвӧл. Кылсярысь, номыр уродэз ӧвӧл, адями умой корка басьтӥз ке, умой уже интыяськиз ке яке нылпи вайиз ке. Но тросэз озьы уг лэсьто, малы ке шуоно соослэн Иеговалы тросгес ужамзы-тыршемзы потэ. Иегова сое туж дунъя. Со шумпотэ, куке ми лэсьтӥськомы ваньзэ, мае быгатӥськомы, солы ужан-тыршон понна (Евр. 6:10).

ЭН КЫШКАЛЭ МУКЕТЪЁСЫЗЛЭСЬ ПӦРТЭМ ЛУЫНЫ

7. Кыӵе шуг-секытъёсын пумиськыны быгато вал назорейёс? (Лыдпусъёс 6:5). (Озьы ик учке суредэз.)

⁷ Лыдӟе Лыдпусъёсты 6:5. Назорейёс йырсизэс уг ӵышко вал. Озьы соос возьмато вал, быдэсак Иеговалэсь кылзӥсько шуыса. Израиль пӧлысь кин ке кема дыр ӵоже назорей вал ке ини, солэн йырсиез кузь будэ вал, соин сое ваньзы тодмало вал. Мукетъёсыз назореез но солэсь кутэм ужпумзэ гажало вал ке, назорейлы сётэм кылзэ быдэстыны капчигес вал. Но жаляса верано луэ, вал вакыт, куке назорейёсты ӧз гажалэ. Амос пророк улон нуналъёсы зэмос йыбырттонлэсь палэнскемъёс ӵекто вал назорейёслы вина юыны, соос сётэм кылзэс быдэстыны медаз ни быгатэ шуыса (Ам. 2:12). Соин ик куддыръя назорейёслы туж кышкасьтэм луоно вал, асьсэлэсь сётэм кылзэс быдэстон понна но мукетъёсызлэсь пӧртэм луон понна.

8. Маин юнматӥз тӥледыз Беньяминлэн учырез?

⁸ Мукетъёсызлэсь пӧртэм луон понна, Иегова асьмелы но кышкасьтэм луыны юрттоз, асьмелэн возьдаськон сяммы вань ке но. Учкомы Норвегиысь 10 аресъем Бе́ньямин нимо агаймылэсь учырзэ. Соослэн школаязы, Украина пала пырыса, кырӟан кырӟано вал но Украиналэн кункышетэз кадь буёло дӥськутэн дӥсяськоно вал. Беньяминлэн кырӟасьёс пӧлы мынэмез уг поты вал. Но дышетӥсьсы сое адӟиз но бадӟым куараен ӧтиз: «Лык татчы! Кырӟа милемын ӵош. Ми ваньмы тонэ возьмаськомы». Беньямин дышетӥсез доры мынӥз  но кышкатэк вераз: «Та политикаен герӟаськемын, соин ик мон уг кырӟа. Тросэз Иеговалэн Адӟись-Ивортӥсьёсыз, ожмаськыны пумит луэменызы, пытсэтын но пуко». Дышетӥсез соин соглаш кариськиз но кырӟаны ӧз косы ни. Беньяминлэн ӵош дышетскисьёсыз но солэсь юазы, малы со соосын ӵош уг кырӟа. Беньямин куалектӥз, бӧрдэмез ик потӥз. Озьы ке но со быдэс классэз азьын кышкатэк выльысь вераз сое, мае со дышетӥсезлы вераз вал. Бертыса Беньямин та учырез анаезлы но атаезлы вераз. Со вераз, солы Иегова юрттӥз шуыса, соин ик со быгатӥз кышкатэк аслаз осконэз сярысь вераны.

9. Кызьы ми Иеговаез шумпоттыны быгатӥськомы?

⁹ Асьмеос Инмарлэсь эриксэ быдэсъяськомы, соин ик котырысьтымы адямиослэсь пӧртэмесь луиськомы. Милемлы кышкасьтэм луоно, школаын но, уж дорын но веран понна, ми Иеговалэн Адӟись-Ивортӥсьёсыз шуыса. Нош та дуннеысь адямиос лекгес но лекгес луо бере, дыр ортчемъя милемлы секытгес луоз, дыр, Библиысь возетъёсъя улыны но ӟеч иворез вераны (2 Тим. 1:8; 3:13). Но вунэтоно ӧвӧл: ми ум ке кышкаське мукетъёсызлэсь пӧртэмесь луыны, соку Иеговаез шумпоттӥськомы (Мад. 27:11; Мал. 3:18).

ИЕГОВА УЛОНАДЫ НЫРЫСЕТӤ ИНТЫЫН МЕД ЛУОЗ

10. Малы Лыдпусъёсын 6:6, 7 гожтэм косон назорейёс понна зэмос шуг-секыт луыны быгатэ вал?

¹⁰ Лыдӟе Лыдпусъёсты 6:6, 7. Назорейёс кулэм муртлэн матаз лыктыны уг быгато вал. Назорейёс понна та зэмос шуг-секыт луыны быгатэ вал, тужгес но соку, куке матысь ӵыжы-выжызы кулэ вал. Малы ке шуоно со вакытэ кулэм муртлэн ӵыжы-выжыосыз со вӧзын луыны кулэ вал (Иоанн 19:39, 40; Ап. уж. 9:36—40). Нош назорейёс озьы лэсьтыны уг быгато вал, малы ке шуоно соос назорейёс луыны кыл сётӥзы. Ӵыжы-выжызы кулэмен сэрен, назорейёс туж кайгыро вал ке но, соос Иеговалы оскымон кыльыны тыршо вал. Веранэз ӧвӧл, Иегова юнматэ вал оскымон ужась-тыршисьёссэ но юрттэ вал соослы таӵе шуг-секытъёс пыр потыны.

11. Малы дась луоно христиан муртлы, со Иеговаез нырысетӥ интые пуктэ ке? (Озьы ик учке суредэз.)

¹¹ Ми туж тыршиськомы Иеговалы сӥзиськыкумы сётэм кылмыя улыны. Со адӟиське отысь, кыӵе ужпумъёс ми кутӥськомы  но кызьы асьмеды семьяямы возиськомы. Мар кулэ лэсьтыны семьяямы, ми сое лэсьтӥськомы. Нош семьямы куре ке лэсьтыны сое, мар люкетэ Иеговалы ужаны-тыршыны, соку ми бырйиськомы Иеговалы ужан-тыршонэз (Матф. 10:35—37; 1 Тим. 5:8). Зэм, Иеговаез шумпоттон понна, куддыръя милемлы кутоно луэ сыӵе ужпумъёс, кудъёсыз ӵыжы-выжыосмылы уг кельшо.

12. Мар кариз Александру, семьяяз секыт югдурен пумиськыса?

¹² Тани Алекса́ндру но Дори́на кузпалъёслэн учырзы. Соос ар пала Библиез дышетӥзы. Собере Дорина Библиез дышетэмысь дугдӥз, озьы ик со картсэ но дышетэмысь дугдыны косӥз. Но Александру шонерак но лякытэн вераз кышноезлы, дышетэмысь уз дугды шуыса. Дориналы со ӧз кельшы, со ялан картэзлы люкетыны тыршиз. Александру вера, кышнозэ валаны тыршиз шуыса, но со капчи ӧй вал. Куддыръя, кышноезлэн люкетэменыз сэрен но лек кылъёс вераменыз сэрен, Александрулэн малпанъёсыз кылдылӥзы Библиез дышетэмысь дугдыны. Но со ӧз сётскы, азьвыл сямен ик Иеговаез нырысетӥ интые пуктӥз но кышнозэ гажаса но яратыса улыны тыршиз. Дыр ортчыса, Дорина выльысь Библиез дышетыны кутскиз но пылатӥськиз. (Учке jw.org сайтысь «Александру и Дорина Вэкар. „Любовь долготерпелива и добра“» видеороликез.)

13. Кызьы ми возьматыны быгатомы, Иеговаез но, семьямес но яратӥськомы шуыса?

¹³ Иегова озьы лэсьтӥз, адямиос семья кылдытыны мед быгатозы шуыса. Солэн потэ, семья кылдытыса, адями шудо мед луоз шуыса (Еф. 3:14, 15). Но зэмзэ ик шудо луон понна, милемлы лэсьтоно сое, мае куре Иегова. Семьяды сярысь сюлмаськемысь эн дугдэ, яратэ но гажалэ сое (Рим. 12:10). Ноку но эн вунэтэ, Иегова туж шумпотэ шуыса, куке адӟе тӥлесьтыд солы йыбыртъяны тыршемдэс но семьяды сярысь сюлмаськемдэс.

ЮРТТЭ ОГ-ОГДЫЛЫ НАЗОРЕЙЁС КАДЬ ЛУЫНЫ

14. Кинлы тужгес но верано юнматӥсь но буйгатӥсь кылъёсты?

¹⁴ Соос, кинъёс ужпум кутӥзы Иеговалы ужаны-тыршыны, Иеговаез ярато но со понна малэсь ке но куштӥськыны дась. Но со котьку ик капчи ӧвӧл. Кызьы асьмеос ог-огмылы юрттыны быгатомы? Ӟеч кылъёс вераса (Иов 16:5). Вань-а кенешады агайёс но сузэръёс, кудъёсыз, Иеговалы ужан-тыршонын тросгес лэсьтон понна, дась малэсь  ке но куштӥськыны? Тодӥськоды-а тӥ егитъёсты, кудъёсыз уг кышкало школаязы мукетъёсызлэсь пӧртэм луыны, куддыръя со туж секыт ке но? Нош мар вераны луоз соос сярысь, кинъёс Библиез дышето, яке агайёс но сузэръёс сярысь, кудъёсызлы, семьязы люкетэмен сэрен, секыт Иеговалы оскымон кыльыны? Вань та адямиос кышкасьтэм сямзэс возьмато но Иегова понна троссэ чиданы дась. Со понна соосты ушъяны луэ. Ойдолэ соосты котьку юнматомы но ӟеч кылъёс вераломы (Флм. 4, 5, 7).

15. Кызьы куд-огъёсыз юртто соослы, кинъёс вань дырзэс сётыса ужало-тыршо?

¹⁵ Озьы ик ми уж вылын юрттыны быгатомы агайёсмылы но сузэръёсмылы, кылсярысь, соослы, кинъёс вань дырзэс сётыса ужало-тыршо (Мад. 19:17; Евр. 13:16). Ӵапак озьы лэсьтӥз Шри-Ланкаын улӥсь арлыдо сузэр. Солы пенсизэ будэтӥзы но, со малпаз юрттыны кык егит сузэръёслы, кудъёсызлэн коньдонэн шуг-секытъёссы кылдӥзы. Сузэрлэн уг поты вал, соос пионер луыса ужамысь-тыршемысь мед дугдозы шуыса. Соин ик со кутскиз котькуд толэзе соослы коньдон сётъяны, соос телефонзы понна тырыны мед быгатозы шуыса. Макем умой пример возьматӥз та сузэр!

16. Мае ми тодӥмы, назорейёслэсь примерзэс эскерыса?

¹⁶ Назорейёс сярысь лыдӟыса, асьмеос тодӥмы, кыӵе мылкыдын Иеговалы ужаны-тыршыны кулэ. Озьы ик, назорейёс сярысь тодыса, асьмеос тросгес тодӥськомы инмысь Атаймы, Иегова, сярысь. Со тодэ, милям солы вань сюлмысьтымы ужаммы-тыршеммы потэ но со понна ми котьмае чиданы дась шуыса. Иегова кужмысь уг косы милемыз солы яратэммес возьматыны. Ми асьмеос бырйыны быгатӥськомы, кызьы солы яратэммес возьматоно (Мад. 23:15, 16; Марк 10:28—30; 1 Иоанн 4:19). Со сяна, назорейёс сярысь тодыса, валаны луэ, Иегова адӟе шуыса ваньзэ, мае ми лэсьтӥськомы но мае чидано луиськомы, солы ужан-тыршон понна. Соин ик ойдолэ азьланяз но Иеговалы ужаломы-тыршомы но солы ваньзэ умойзэ сётомы!