1. Мар милемлы котькуд нунал кароно луэ?

 ВАНЬМЫ ми котькуд нунал ужпумъёс кутылӥськомы. Куд-огъёсыз капчиесь, кылсярысь, мае ӵукна сиёно яке ку изьыны выдоно. Мукетъёсыз — секытгес. Соос герӟаськемын тазалыкен, шудэн, семьяен но Инмарлы йыбыртъянэн. Милям потэ, кутэм ужпумъёсмы милемлы но, матысь адямиосмылы но пайда мед ваёзы шуыса. Нош валтӥсез — милям потэ, соос Иеговаез мед шумпоттозы шуыса (Рим. 12:1, 2).

2. Кыӵе вамышъёс юрттозы визьмо ужпум кутыны?

² Ми визьмо ужпум кутомы, вылды, таӵе вамышъёсты лэсьтӥмы ке: 1) ваньзэ лыдэ басьтомы, 2) тодомы, мар малпа со сярысь Иегова, но 3) малпаськомы, кыӵе ужпумъёс кутыны луэ милям учырамы. Ойдолэ эскеромы та вамышъёсты но тодомы, мар юрттоз малпаськыса ужпум кутыны (Мад. 2:11).

ВАНЬЗЭ ЛЫДЭ БАСЬТЭ

3. Малы ужпум кутэмлэсь азьло ваньзэ лыдэ басьтоно? Вералэ пример.

³ Ужпум кутэмлэсь азьло нырысь ик ваньзэ лыдэ басьтоно. Малы со кулэ? Шуом, адямилэн секыт висёнэз вань. Со эмъясь доры лыктӥз. Кутскоз-а эмъясь адямиез эмъяны, нырысь сое учкытэк но солы юанъёс сётъятэк? Уз! Ӵапак  озьы ик милемлы но ужпум кутэмлэсь азьло ваньзэ лыдэ басьтоно. Мар со понна кароно?

4. Мар юрттоз ваньзэ лыдэ басьтыны? (Мадёнъёс 18:14). (Озьы ик учке суредэз.)

⁴ Ваньзэ лыдэ басьтон понна, ӵем дыръя тырмыт малпаськыны кӧня ке юанъёс вылын. Шуом, тӥледыз шулдыръяськонэ ӧтизы. Тӥледлы ужпум кутоно: мыноно-а, ӧвӧл-а. Тӥ уд ке тодӥське шулдыръяськонэ ӧтись адямиез яке уд ке тодӥське, мар отын карозы, малпаське таӵе юанъёс вылын: «Кытын но ку ортчоз шулдыръяськон? Кӧня адями отын луоз? Кин чаклалоз, номыр уродэз медаз луы шуыса? Кин эшшо ӧтемын? Мар отын карозы? Отын вина юозы-а?» Та юанъёслы валэктонъёс юрттозы визьмо ужпум кутыны. (Лыдӟе Мадёнъёсты 18:14.)

5. Мар кароно ваньзэ тодэм бере?

⁵ Мар кароно ваньзэ тодэм бере? Пуктэ син азяды, кызьы ортчыны быгатэ шулдыръяськон. Кылсярысь, тӥ тодӥды, ӧтем адямиос пӧлын луозы шуыса соос, кинъёс Иеговалэн эсэпъёсызъя уг уло, яке нокин уз чакла, куноос мултэс вина медаз юэ шуыса. Азьло ик малпаське: та мугъёсын сэрен куноос юрӟым ужъёсын вырыны уз кутске-а? (1 Пётр 4:3). Со сяна, эшшо мае ке лыдэ басьтоно. Оло нош, ӵапак  шулдыръяськон дыръя тӥляд кенештылэн пумиськонэз луоз яке тӥ кинэн ке вераськиды, тодытыны мыноды шуыса. Ваньзэ лыдэ басьтыса, тӥледлы капчигес луоз визьмо ужпум кутыны. Табере тӥ дась кыкетӥ вамыш лэсьтыны. Тодэ, мар со сярысь малпа Иегова (Мад. 2:6).

ТОДЭ, МАР СО СЯРЫСЬ МАЛПА ИЕГОВА

6. Малы Иеговалы визьлык курыса вӧсяськоно? (Иаков 1:5).

⁶ Иеговалэсь юрттэт куре валаны, мар со малпа тӥляд учырды сярысь. Инмар вераз, милемлы визьлык сётоз шуыса. Иегова тӥледлы юрттоз валаны, кельшоз-а солы кутэм ужпумды. Иегова визьлыкез «жалятэк, пыкылытэк ваньмызлы сётэ». (Лыдӟе Иаковлэсь 1:5.)

7. Кызьы тодыны, мар малпа тӥляд учырды сярысь Иегова? Вералэ пример.

⁷ Вӧсяськемды бере кылзэ, кыӵе валэктон сётоз Иегова. Пуктэ син азяды: тӥ тодмотэм карын йыромиды но отын улӥсь адямилэсь шонер сюрес юаськоды. Кошкоды-а тӥ, адямилэсь валэктэмзэ кылзытэк? Уд. Тӥ сое сак кылзоды. Ӵапак озьы ик Иеговалэсь визьлык куремды бере тырше валаны, кыӵе со валэктон сётоз. Со понна малпаськоно, Библиысь кыӵе законъёс но возетъёс тӥляд учыреныды герӟаськемын. Кылсярысь, мар юрттоз ужпум кутыны, мыноно-а, ӧвӧл-а шулдыръяськонэ,  кудӥз сярысь вераськиз ини? Инмарлэсь Кылзэ эскере. Мар отын вераське юрӟым ужъёс сярысь, урод эшъёс сярысь но со сярысь, мае христианъёслы нырысетӥ интые пуктоно — Инмарлэсь Эксэйлыксэ яке асьсэлэсь мылпотонъёссэс? (Матф. 6:33; Рим. 13:13; 1 Кор. 15:33).

8. Кытысь кулэ луись валэктон шедьтоно? (Озьы ик учке суредэз.)

⁸ Куддыръя кулэ луись валэктонэз шедьтыны секыт. Соку кенешыны луэ юн осконэн агаен яке сузэрен. Со сяна, аслыд эскерон ортчытоно. Кылсярысь, умой луоз эскерыны «Иеговалэн Адӟись-Ивортӥсьёсызлэн публикациоссыя эскерыны юрттэтэз» (ӟуч) но «Библиысь кылбуръёс, кудъёсыз христианъёслы юрттыны быгато» книгаез (ӟуч). Эн вунэтэ: тӥледлы кутоно сыӵе ужпум, кудӥз Иеговаез шумпоттоз.

9. Кызьы валано, кутэм ужпуммы Иеговаез шумпоттоз шуыса? (Ефесъёслы 5:17).

⁹ Кызьы валано, кутэм ужпуммы Иеговаез шумпоттоз шуыса? Нырысь ик Инмарез умой тодоно. Библиын гожтэмын: «Дун-Сьӧлыктэмез тодон — со визьлык» (Мад. 9:10). Милемлы валано, кыӵе сямо Иегова, кыӵе солэн эрикез, мае со яратэ, нош мае адӟемпотостэм каре. Соин ик юа аслэсьтыд: «Лыдэ басьтоно ке сое, мае мон тодӥсько Иегова сярысь, кыӵе мыным ужпум кутоно, сое шумпоттон понна?» (Лыдӟе Ефесъёслы 5:17.)

10. Малы ми Библиысь возетъёсты семьямылэсь но котырысьтымы адямиослэсь вылӥегес пуктӥськомы?

¹⁰ Куддыръя, Иеговаез шумпоттон понна, милемлы матысь адямиосмес ӝоже уськытоно луоз, вылды. Учкомы тае пример вылын. Анай но атай быдэ вуэм нылзэс косо бызьыны агайлы, кудӥз узыр улэ, но Инмарен кусыпъёссэ уг юнматы. Соос нылзылы умойзэ гинэ сӥзё ке но, нылзылы малпаськоно: «Мон со адямилы бызи ке, юрттоз-а со мыным Инмарен кусыпъёсме юнматыны?» Мар Иегова малпа сыӵе учыр сярысь? Валэктон гожтэмын Матфейлэсь 6:33. Та кылбур христианъёсты ӧте Эксэйлыкез улоназы нырысетӥ интые пуктыны. Ми анай-атаймес но котырысьтымы адямиосмес гажаськомы ке но, ми понна валтӥсез — Иеговаез шумпоттыны.

МАЛПАСЬКЕ, КЫӴЕ УЖПУМЪЁС КУТЫНЫ ЛУЭ

11. Мар юрттоз визьмо ужпум кутыны? (Мадёнъёс 2:11).

¹¹ Библиысь возетъёсты эскеремды бере тӥледлы малпаськоно, кыӵе ужпумъёс кутыны луэ но кыӵе бервылъёсы соос вуттыны быгато. (Лыдӟе Мадёнъёсты 2:11.) Куддыръя сое лэсьтыны капчи, нош куддыръя — ӧвӧл. Но малпаськыса тӥ быгатоды самой секыт учырын но визьмо ужпум кутыны.

12, 13. Кызьы малпаськон юрттоз визьмо ужпум кутыны, уж утчаку?

¹² Шуом, тӥ уж утчаськоды, семьядэс сюдон-вордон понна. Тӥ кык уж шедьтӥды но малпаськоды, кудаз интыяськоно. Тӥ ваньзэ лыдэ басьтӥды: тодӥды, кыӵе ужез быдэсъяно луоз, кыӵе дыре ужано луоз, кӧня дыр сюреслы кошкоз но мукетсэ. Кыказ ик ужын христианъёс ужаны быгато. Оло нош, одӥгез уж тӥледлы золгес кельше, малы ке шуоно отын уждунэз но бадӟымгес, ужез но тунсыкогес. Но ужпум кутэмлэсь азьло эшшо мае ке лыдэ басьтоно на.

¹³ Малпаське таӵе юанъёс вылын: «Та уже интыяськыса, кельтыло-а мон кенешлэсь пумиськонъёссэ? Кылёз-а мынам дыры юрттыны семьяысьтым котькудӥзлы  ассэ шудо шӧдыны, кышкатэк улыны но Иеговаен кусыпъёссэ юнматыны?» Таӵе юанъёс юрттозы тӥледлы валаны, «мар тужгес но кулэез луэ» — со Иеговалы йыбыртъян но семьялэн кулэяськонъёсыз (Флп. 1:10а, ВД). Соку тӥ сыӵе ужпум кутоды, кудзэ Иегова бакель кароз.

14. Кызьы малпаськон но яратон юрттозы милемлы мукетъёсызлэсь шӧдонъёссэс лыдэ басьтыны?

¹⁴ Малпаськон милемлы юрттоз валаны, кызьы кутэм ужпумъёсмы мукетъёсыз вылын шӧдӥськозы. Милям уг поты соослэсь осконзэс лябӟытэммы (Флп. 1:10б, ВД). Тае лыдэ басьтоно соку но, куке ми, кылсярысь, асьмелы дӥськут бырйиськомы. Шуом, милемлы кыӵе ке но дӥськут кельше. Кызьы асьсэды шӧдозы агайёс но сузэръёс, озьы ик мукет адямиос, мон сыӵе дӥськут дӥсяй ке? Малпаськон юрттоз милемлы соослэсь шӧдонъёссэс гажаны. Нош  яратон юрттоз таӵе кылъёсъя улыны: «Нокин но аслыз пайда медаз утча, мукетэзлы мед утчалоз» (1 Кор. 10:23, 24, 32; 1 Тим. 2:9, 10). Соку ми кутомы сыӵе ужпум, кудӥз возьматоз, ми котырысь адямиосмес яратӥськомы но гажаськомы шуыса.

15. Мар сярысь малпаськоно ужпум кутэмлэсь азьло?

¹⁵ Ужпум кутэмлэсь азьло малпаське, мар кароно луоз, сое быдэстон понна. Иисус дышетӥз, нырысь ик пуксёно но лыдъяно шуыса, «кӧня луоз кутон-тыриськонэз» (Лука 14:28). Со пӧлы пыре дыр, коньдон но кужым. Озьы ик умой луоз кенешыны семьяеныды, валан понна, кызьы котькудӥз тӥледлы юрттыны быгатоз. Кыӵе пайда вае таӵе амал? Тӥ валалоды, вылды, мае ке тупатоно яке воксё мукет ужпум кутоно шуыса. Со сяна, тӥ семьяеныды кенешиды ке но соослэсь кылзӥськиды ке, соос тӥледлы шумпотысагес юрттозы, вылды (Мад. 15:22).

ВИЗЬМО УЖПУМЪЁС КУТЭ

16. Кыӵе вамышъёс тӥледлы юрттозы визьмо ужпум кутыны? (Озьы ик учке  «Мар юрттоз визьмо ужпум кутыны» рамкаез.)

¹⁶ Та статьяысь вамышъёсты лэсьтыса, тӥ дась луоды визьмо ужпум кутыны. Тӥ ваньзэ лыдэ басьтӥды но Библиысь возетъёс вылын малпаськиды, кутэм ужпумды Инмарез мед шумпоттоз шуыса. Табере тӥ быгатӥськоды Иеговалэсь юрттэт курыны кутэм ужпумдэс быдэстыны.

17. Мар юрттэ визьмо ужпум кутыны?

¹⁷ Азьвыл ми трос визьмо ужпумъёс кутылӥмы ке но, тодамы возёно, мар юрттэ сыӵе ужпум кутыны. Со милям тодон-валанъёсмы ӧвӧл, нош Иеговалэн визьлыкез. Со гинэ сётыны быгатэ тодон, валан, озьы ик юрттыны быгатэ малпаськыны. Ваньмыз та зэмос визьлык сётэ (Мад. 2:1—5). Иеговалэн юрттэменыз ми быгатомы кутыны сыӵе ужпум, кудӥз сое шумпоттоз (Пс. 22:2, 3).