Та кылбур сое уг возьматы. Татын вераське адями сярысь, кудӥз усе, яке трос шуг-секытъёсын пумиськылэ, но кудӥз султэ, яке соосты ворме.

Ойдолэ учкомы, мар гожтэмын та кылбурлэсь азьло но со бере: «Сьӧлыклэсь кышкасьтэм мурт, шонер улӥсьлэн юртэзлы пумит урод уж эн малпа, солэсь каньылэн улон интызэ тырттэм эн кельты, уго шонер улӥсь мурт сизьым пол усиз ке но, султоз, нош сьӧлыклэсь кышкасьтэмъёс быронэ усёзы. Эн шумпоты тушмонэд пограку, сюлмыд но медаз шумпоты, со канжаськыку» (Мад. 24:15—17).

Куд-огъёсыз малпало: 16-тӥ кылбурын вераське адями сярысь, кудӥз сьӧлыка, собере ӧпкеле но, Инмар сое простить каре. Великобританиысь кык священникъёс гожтӥзы, «Инмар Кылэз тодытӥсьёс — вашкала дыръя но, туннэ но — та кылбурез ӵапак озьы валэкто» шуыса. Озьы ик та священникъёс верамъя, та кылбурез озьы валано ке, «умой адями бадӟым сьӧлык лэсьтӥз ке но, со Инмарез яратыны но солы ярамон луыны быгатэ, малы ке шуоно со ӧпкелиз». Таӵе валэктон кельшоз соослы, кинъёс сьӧлыклы пумит уг нюръясько. Адями малпаны быгатэ, кӧня гинэ со медаз сьӧлыка, Инмар сое котьку простить кароз шуыса.

Зэмзэ вераса, 16-тӥ кылбурын мукет малпан.

Еврей кыл, кудӥз 16-тӥ но 17-тӥ кылбуръёсын «усьыны» но «пограны» шуыса берыктэмын, пӧртэм пуштросэн кутӥське. Со возьматыны быгатэ огшоры усёнэз, кылсярысь: ош сюрес вылэ пограз, липет йылысь кин ке но усиз, ю тысь музъем вылэ усиз (К. Зак. 22:4, 8; Ам. 9:9). Со сяна, та кыл мукет сямен но кутӥськыны быгатэ, кылсярысь, таӵе учырын: «Адямилэсь вамышъёссэ Кузё-Инмар юнматэ, Солы ӟеч сюрессэ сётэ. Со канжаськиз ке но, уз усьы, Кузё-Инмар уго сое китӥз кутыса возе» (Пс. 36:23, 24; Мад. 11:5; 13:18; 17:20).

Учке, мар вераз Эдвард Пламптре, Библиез эскерись тодосчи: «Еврей кыл, кудӥз „усьыны“ шуыса берыктэмын, ноку уг кутӥськы „сьӧлыканы“ шуыса пуштросэн». Нош тани мар вераз 16-тӥ кылбур сярысь мукетыз тодосчи: «Инмарлэн калыкезлы изъян вайыны нокин уз быгаты, малы ке шуоно шонерлыкоос утемын луозы, нош сьӧлыклэсь кышкасьтэмъёс бырозы!»

Соин ик Мадёнъёсын 24:16 «усьыны» кыл уг возьматы сьӧлыкаса улэмез, нош возьматэ шуг-секытъёсты (соос трос но луо), кудъёсыныз шонерлыко адями пумиське. Та лек дуннеын Инмарлы оскымон адями секыт висьыны яке шугадӟонъёсын пумиськыны быгатэ. Сое кивалтӥсьёс но уйылыны-улляны быгато. Но сыӵе адямилэн оскемез луэ, Инмар сое юнматоз но котькыӵе шуг-секытъёс пыр потыны юрттоз шуыса. Тӥляд вань, дыр, адӟемды: Инмарлэн ужась-тыршисез шуг-секытэн пумиське ке но, ӵем дыръя ваньмыз умой йылпумъяське. Малы? Малы ке шуоно «вань усисьёсты Кузё-Инмар кутыса возе, вань погыртэмъёсты ӝутыса пуктэ» (Пс. 40:2—4; 144:14—19).

Шонерлыко адями мукет адямиослэн курадӟемзылы шумпотыса уг улы. Сое буйгатэ таӵе малпан: «Инмарлэсь кышкаса, Солы вӧсяськыса улӥсьёслы ӟечлык луоз» (Екк. 8:11—13; Иов 31:3—6; Пс. 26:5, 6).