1, 2. а) Матфейлэсь 28:18—20 лыдэ басьтоно ке, кыӵе валтӥсь ужпумез христиан кенешлэн? б) Кыӵе юанъёсты ми та статьяын эскеромы?

 ПУКТЭ син азяды макем шумпотэмын вал апостолъёс, куке соос люкаськизы Галилеяысь гурезьлэн бамаз. Отчы лыктыны соосты куриз улӟем Иисус (Матф. 28:16). Соку, вылды, со «вить сюлэсь трос агай-вынъёслы ваньзылы ӵош возьматскиз» (1 Кор. 15:6). Малы Иисус куриз соосты отчы лыктыны? Со дышетскисьёсызлы мылкыдзэс ӝутӥсь уж сётӥз: «Мынэлэ, вань калыкъёсты дышетэлэ». (Лыдӟе Матфейлэсь 28:18—20.)

² Дышетскисьёс, кудъёсыз та кылъёсты кылӥзы, берлогес нырысетӥ даурысь христиан кенеше пыризы. Христиан кенешлэн валтӥсь ужпумез вал Христослэсь выль дышетскисьёссэ b дасяны. Туннэ быдэс дунне вылын трос христиан кенешъёс вань, но соослэн ужпумзы нокӧня но ӧз воштӥськы. Та статьяын ми эскеромы ньыль юанъёсты: малы туж кулэ Христослэсь дышетскисьёссэ дасяны? Мар милемлы со понна кароно? Вань христианъёс-а дышетскисьёсты дасяло? Но малы милемлы чидан кулэ?

3. Малы туж кулэ Христослэсь дышетскисьёссэ дасяны, Иоаннлэсь 14:6 но 17:3 лыдэ басьтыса?

³ Малы туж кулэ Христослэсь дышетскисьёссэ дасяны? Малы ке шуоно Христослэн дышетскисьёсыз гинэ Инмарлэн эшез луыны быгато. Со сяна, соос, кинъёс Христослэсь адӟем каро, али ик ини улонзэс умой пала вошто но пырак улыны оскон басьто. (Лыдӟе Иоаннлэсь 14:6;  17:3.) Веранэз ик ӧвӧл, Иисус милемыз туж кулэ ужез быдэстыны косӥз, но ми сое огнамы ум быдэстӥське. Тани мар гожтӥз апостол Павел ачиз сярысь но мукет христианъёс сярысь: «Ми — Инмарлэн ужасьёсыз» (1 Кор. 3:9). Макем дано уж сётӥзы милемлы Иегова но Иисус!

4. Малы дышетэ милемыз Иванлэн но Матильдалэн учырзы?

⁴ Дышетскисьёсты дасяса, ми трос шумпотон басьтӥськомы. Тани Иванлэн но Матильдалэн учырзы, кудъёсыз Колумбия шаерын уло. Одӥг пол соос ӟеч иворез веразы Давьер нимо егит пиосмуртлы, кудӥз соослы вераз: «Мынам потэ воштӥськеме, но мон уг быгатӥськы». Давьер боксёр вал, наркотикъёсын выриз, туж трос вина юыса улӥз но Эрика нимо кышномуртэн кузпалъяськытэк улӥз. Иван тодаз вае: «Давьер палэнысь гуртын улӥз, но, отчы вуон понна, милемлы трос часъёс ӵоже велосипедъёсын дэриё сюресъёстӥ мыноно вал. Куке Эрика адӟиз, Давьер воштӥськыны кутскиз шуыса, солэн но Библиез дышетэмез потӥз». Дыр ортчыса, Давьер вина юэмысь, наркотикъёсын но боксэн выремысь дугдӥз. Со сяна, соос Эрикаен кузпалъяськизы. Матильда вера: «Куке соос 2016-тӥ арын пылатӥськизы, ми Давьерлэсь кылъёссэ тодамы вайимы: „Мынам потэ воштӥськеме, но мон уг быгатӥськы“. Ми шумпотыса бӧрдӥмы». Зэм но, ми туж шумпотӥськомы, куке юрттӥськомы адямиослы Христослэн дышетскисьёсыз луыны!

5. Мар милемлы нырысь ик кароно, дышетскисьёсты дасян понна?

⁵ Нырысетӥез, мар милемлы кароно дышетскисьёсты дасян понна,— со утчано адямиосты, кудъёсызлэн Иеговаез тодэмзы потэ (Матф. 10:11). Куке ми вераськомы Иегова сярысь котькинлы, кинэ пумитаськомы, соку ми возьматӥськомы, Иеговалэн Адӟись-Ивортӥсьёсыз луиськомы шуыса. Нош куке ми быдэстӥськомы Христослэсь тодытыны косэмзэ, соку ми возьматӥськомы, зэмос христианъёс луиськомы шуыса.

6. Мар кароно, ужан-тыршонмы азинлыко мед луоз шуыса?

⁶ Зэм но, куд-огъёсыз шумпотыса соглаш карисько Библиез дышетыны. Но ми малпаны быгатӥськомы, тросэзлэн кутсконаз ик Библия сярысь тодэмзы уг поты шуыса. Соку милемлы соослэсь мылкыдзэс ӝутоно луоз, дыр, тросгес тодон-валан басьтэмзы мед потоз шуыса. Ужан-тыршонмы азинлыко мед луоз шуыса, умой дасяськоно. Малпаське, мар сярысь адямиослы вераськыны тунсыко потоз. Собере ужпум кутэ, кызьы вераськонэз кутсконо.

7. Мар сярысь адямиен кутсконаз вераськыны луэ? Малы, тӥ малпамъя, адямиез сак кылзоно но солэсь малпанзэ гажано?

⁷ Кылсярысь, адямилэсь юаны луоз: «Тӥлесьтыд юаме потэ. Быдэс дунне вылын адямиос огвыллем шуг-секытъёсын пумисько. Кызьы тӥ малпаськоды, вань-а сыӵе кивалтэт, кудӥз та шуг-секытъёсты сэрттыны-пертчыны быгатоз?» Собере Данииллэн 2:44 кылъёсты эскерыны луоз. Тани мукет амал. Юаны луоз: «Кызьы анай-атайёслы нылпизэс будэтоно, со умой адями мед луоз шуыса?», но собере Кыкетӥ Законын 6:6, 7 гожтэм кылъёсты эскерыны луоз. Мар сярысь гинэ тӥ медад вераське, тодады возе адямиос сярысь. Малпаське, кызьы соослы юрттоз со,  мае соос Библиысь тодозы. Адямиосын вераськыку, соосты сак кылзоно но соослэсь малпанзэс гажано. Со юрттоз тӥледлы соосты умойгес валаны, но соослэн тӥледыз кылзэмзы потоз, вылды.

8. Малы адями доры выльысь но выльысь лыктоно?

⁸ Адями доры выльысь но выльысь лыктон понна, тӥледлы трос дыр висъяно но кужым пононо луоз, вылды. Соку гинэ со Библиез дышетыны ужпум кутыны быгатоз. Малы озьы вераны луоз? Ӵем дыръя адямиосты дорысьтызы шедьтыны секыт. Со сяна, адями тӥледлы мед дышоз но тӥледын Библиез дышетыны соглаш мед кариськоз шуыса, со доры кӧня ке пол ветлоно луоз, дыр. Сяська мед будоз шуыса, со вылэ ялан ву киськано. Озьы ик адямиен но: солэн Иеговаез но Христосэз яратонэз мед будоз шуыса, соин ӵош ялан Инмарлэсь Кылзэ эскероно.

9, 10. Малы вераны луоз, котькуд христиан мурт утча шуыса адямиосты, кудъёсызлэн зэмлыкез тодэмзы потэ?

⁹ Котькуд христиан мурт утча адямиосты, кудъёсызлэн зэмлыкез тодэмзы потэ. Та ужез ӵошатыны луэ ышем нылпиез утчанэн. Тани мар луиз, куке куинь аресъем пияш ышиз. Сое ог 500 адямиос утчазы. 20 час ортчыса, соос пӧлысь одӥгез шедьтӥз сое бусыысь, кудаз кукуруза киземын вал. Та адями ӧз малпа, нылпиез со огназ шедьтӥз шуыса, соин ик вераз: «Ми трос сю кузя вал, но ми ваньмы тыршимы».

¹⁰ Тросэз адямиос та нылпи выллемесь: соос асьсэды ышемын шуыса шӧдо. Соослэн оскиськонзы ӧвӧл, но соос юрттэт утчало (Еф. 2:12). Соосты Иеговалэн 8 миллионлэсь тросгес Адӟись-Ивортӥсьёсыз  утчало. Оло нош, тӥ ӧд шедьтэ на Библиез дышетыны мылкыд карись адямиез, нош мукет ивортӥсьёс, кудъёсыз тӥ палан ик тодыто, шедьтӥзы. Куке вын-агай яке сузэр-апай шедьтэ сое, кин Христослэн дышетскисез луэ, ми ваньмы шумпотыны быгатӥськомы, малы ке шуоно ваньмы тыршимы.

11. Али Библиез тӥ нокинэн уд дышетӥське ке но, мар тӥ карыны быгатӥськоды, дышетскисьёсты дасян понна?

¹¹ Али Библиез тӥ нокинэн уд ке дышетӥське, озьы ке но тӥ быгатӥськоды мукет сямен дышетскисьёсты дасяны. Кылсярысь, тӥ быгатӥськоды шуныт пумитаны соосты, кинъёс нырысьсэ лыкто Эксэйлык юртэ, но соослы юрттэттэс ӵектыны. Яратондэс озьы возьматыса, тӥ адямиослы адӟыны юрттоды, ми зэмос христианъёс луиськомы шуыса (Иоанн 13:34, 35). Пумиськонъёсын валэктонъёс сётъяса, соос вакчиесь луизы ке но, тӥ дышетоды нырысьсэ лыктэм адямиосты осконзы сярысь сюлмысь но гажаса вераны. Со сяна, луоз выль ивортӥсен ӵош тодытыны но юрттыны солы, адямиен вераськыку, Библиысь кылбуръёсты уже кутыны. Озьы тӥ дышетоды сое Христослэсь адӟем карыны (Лука 10:25—28).

12. Кулэ-а нимысьтыз быгатонлыкъёс, дышетскисьёсты дасян понна? Валэктэ.

¹² Христослэсь дышетскисьёссэ дасян понна, нимысьтыз быгатонлыкъёс кулэ ӧвӧл. Тани одӥг учыр. Куке Фаустина нимо кышномурт, кудӥз Боливия шаерын улэ, Иеговалэсь Адӟись-Ивортӥсьёссэ нырысетӥзэ пумитаз, со лыдӟиськыны уг быгаты вал. Али со лыдӟиськыны ӧжыт быгатэ ни. Фаустина пылатӥськиз но мукет адямиосты Библиысь зэмлыклы шумпотыса дышетэ. Котькуд арняе со вить адямиен Библиез дышетэ. Тросэз соос пӧлысь, кинъёсын со Библиез дышетэ, солэсь умойгес лыдӟисько ке но, со куать адямилы пылатӥськыны юрттӥз ини (Лука 10:21).

13. Кыӵе пайда ми басьтомы, трос ужъёсмы шоры учкытэк, дышетскисьёсты дасяны тыршимы ке?

¹³ Тросэз христианъёслэн туж трос мукет кулэ луись ужъёссы вань. Озьы ке но соос дыр висъяло, адямиосын Библиез дышетон понна, но солэсь трос шумпотон басьто. Тани Мелани нимо сузэрлэн учырез, кудӥз Аляскаысь пичи карын улэ. Со тямыс аресъем нылзэ огназ будэтӥз, лумбыт нунал ужаз но ракен висись атаез сярысь сюлмаськиз. Солэн караз со сяна Иеговалэн Адӟись-Ивортӥсьёсыз ӧй вал ни. Солэн туж потэ вал шедьтэмез Библиез дышетыны мылкыд карись адямиез. Соин ик Мелани Инмарлэсь кужым ялан  куриз, кезьыт куазь шоры учкытэк, со мыныны но тодытыны мед быгатоз шуыса. Собере со тодматскиз Сара нимо кышномуртэн, кудӥз туж шумпотӥз тодыны, Инмарлэн нимыз вань шуыса. Кӧня ке дыр ортчыса, Сара Библиез дышетыны соглаш кариськиз. Мелани тодаз вае: «Котькуд удмуртарняе ӝыт мон туж жадемын луисько вал, озьы ке но ми нылыным ӵош со кышномурт доры Библиез дышетыны ветлӥмы. Со мыным но, нылылы но пайда вайылӥз. Сара трос юанъёс сётъяз, но милемлы кельше вал соослы валэктонъёс утчаны. Ми туж шумпотӥмы адӟыны, кызьы со Иеговалэн эшез луэ!» Саралы семьяез но эшъёсыз пумитъяськыны кутскизы ке но, кышкасьтэм луыса, со ваньзэ чидаз, черкысьтыз кошкиз но пылатӥськиз.

14. а) Малы дышетскисьёсты дасянэз чорыганэн ӵошатыны луэ? б) Мар карыны мылкыддэс ӝуто Павеллэн кылъёсыз, кудъёсыз 2 Тимофейлы 4:1, 2 гожтэмын?

¹⁴ Тӥ малпаськоды ке но, ужан-тыршондылэн емышез ӧвӧл шуыса, эн дугдэ утчаны соосты, кин Христослэн дышетскисез луыны быгатэ. Тодады возе, Иисус та ужез чорыганэн ӵошатӥз шуыса. Чорыгасьёс, мае ке кутэмзылэсь азьло, трос часъёс ӵоже возьмало. Ӵем дыръя соос бер уйин яке вазь ӵукна ужало, нош куддыръя соос ярдурлэсь кыдёке кошконо луо (Лука 5:5). Озьы ик куд-ог ивортӥсьёс но трос часъёс ӵоже чидаса «чорыгало», пӧртэм дыре но пӧртэм интыосын тодытыса. Озьы тросгес адямиосты пумитаны луэ. Вын-агайёс но сузэр-апайёс, кудъёсыз туж тыршо адямиосты шедьтыны, ӵем дыръя пумитало  соосты, кинъёслэн ивормес тодэмзы потэ. Быгатӥськоды-а тӥ тодытыны сыӵе дыре, ку тросгес адямиосты дорысьтызы шедьтыны луэ, яке тодытыны сыӵе интыосын, кытын соосын вераськыны луэ? (Лыдӟе 2 Тимофейлы 4:1, 2.)

15. Малы чидан кулэ, куке ми кинэн ке но Библиез дышетӥськомы?

¹⁵ Малы чидан кулэ соку но, куке ми кинэн ке Библиез дышетӥськомы? Ми дышетскисьёслы юрттыны кулэ Библиысь зэмлыкез тодыны но яратыны. Озьы ик ми соослы юрттыны кулэ Библилэн Автореныз, Иеговаен, тодматскыны но сое яратыны. Со сяна, адямилы возьматоно гинэ ӧвӧл, мае Иисус дышетскисьёсызлэсь возьма, озьы ик возьматоно, кызьы улоно солэн дышетэмезъя. Чидаса юрттоно солы выль сямен улыны, Библиысь возетъёсты улонэ пыртыса. Кин ке но малпаськон амалзэ но сямъёссэ кӧня ке толэзьёс куспын воштыны быгатэ, нош кинлы ке но со понна тросгес дыр кулэ.

16. Малы дышетэ тӥледыз Раульлэн учырез?

¹⁶ Перу шаерын тодытӥсь миссионерен луиз учыр, кудӥз возьматэ, чидан пайда вае шуыса. Тани мар со вераз: «Мон Библиез дышетӥ Рауль нимо пиосмуртэн, кудӥныз ми кык книгаез дышетыса быдтӥмы, но со ӧз юртты солы шуг-секытъёссэ сэрттыны-пертчыны. Солэн кузпалэныз шуг-секытъёсыз вал, со урод кылъёсын вераськиз, но нылпиосыз сое ӧз гажалэ. Рауль котьку но кенешлэн пумиськонъёсаз ветлӥз бере, мон азьланьтӥ соин Библиез дышетыны, озьы ик солэсь но семьяезлэсь мылкыдзэс ӝутыны. Нырысьсэ пумиськеммы бере куинь ар ортчиз, соку гинэ со улонзэ тупатӥз но пылатӥськыны быгатӥз».

17. Мае ми эскеромы вуоно статьяын?

¹⁷ Иисус милемыз куриз: «Мынэлэ, вань калыкъёсты дышетэлэ». Та ужез быдэстыкумы, ми ӵем пумитаськомы адямиосты, кудъёсыз, милемын ӵошатыса, чылкак мукет сямен малпасько. Соос пӧлын вань адямиос, кудъёсыз Инмарлы уг оско яке религиен герӟаськем нокыӵе организацие уг пырисько. Вуоно статьяын ми вераськомы со сярысь, кызьы сыӵе адямиослы ӟеч иворез верано.