70 дышетскисьёс нырысетӥ Ӝытанын ӧй вал ке но, со уг возьматы, соос Иисуслы ярамон ӧй вал яке соос сое кельтӥзы шуыса. Со ӝытэз Иисуслэн 12 оскымон апостолъёсыныз гинэ ортчытэмез потэ вал.

Соосыз но, таосыз но Иисуслэн дышетскисьёсыз вал. Нырысь трос дышетскисьёсыз пӧлысь Иисус бырйиз 12 пиосмуртъёсты, кудъёссэ апостолъёс шуыса нимаз (Лука 6:12—16). Куке Иисус «дас кыксэ ик дышетскисьёссэ ӧтиз но» «соосты Инмар Эксэйлыкез тодытыны, висисьёсты йӧнатыны ыстӥз», со Галилеяын вал (Лука 9:1—6). Берлогес, Иудеяын, Иисус «мукетъёссэ сизьымдон дышетскисьёссэ бырйиз но кыкен-кыкен Аслаз азьтӥз... ыстӥз» (Лука 9:51; 10:1). Озьыен, пӧртэм интыосын Иисуслэн дышетскисьёсыз вал, кудъёсыз со сярысь тодытӥзы.

Еврейёс, кудъёсыз Иисуслэн дышетскисьёсыз луо вал, азьвыл сямен ик котькуд ар Пасхаез пусйылӥзы, семьяенызы, вылды (Пот. 12:6—11, 17—20). Кулонэз азьынгес Иисус апостолъёсыныз Иерусалиме лыктӥз. Но со ӧз вера, Иудеяысь, Галилеяысь но Переяысь вань дышетскисьёсыз отчы мед лыктозы шуыса. Иисуслэн со ӝытэз апостолъёсыныз гинэ ортчытэмез потэ вал, дыр. Со соослы шуиз: «Мынам туж потэ вал тӥледын валче та Пасха ыжпиез сиеме» (Лука 22:15).

Со понна Иисуслэн кулэ луись мугез вал. Ӝоген со кулыны кулэ вал «Инмарлэн Ыжпиез» кадь, кудӥз «Ас вылаз дуннелэсь сьӧлыксэ басьтэ» (Иоанн 1:29). Со луыны кулэ вал Иерусалимын, кытын Инмарлэн ужась-тыршисьёсыз дауръёс ӵоже курбонъёс вайылӥзы. Пасхаез пусйыкузы, ыжпи израиль калыклы тодаз вайытэ вал, Иегова соосты египет пленысь мозмытӥз шуыса. Нош Иисуслэн курбонэз адямиосты сьӧлыклэсь но кулонлэсь мозмытэ (1 Кор. 5:7, 8). Иисуслэн курбонэзлы луыса апостолъёс христиан кенешлэн инъетэз луыны быгато вал (Еф. 2:20—22). Тунсыко: Выль Иерусалимлэн «борддорез дас кык инъет вылын сылэ, соос бордын Ыжпилэн дас кык апостолъёсызлэн нимъёссы гожтэмын» (Усьт. 21:10—14). Адӟиське, оскымон апостолъёслы Инмарлэн эриказ нимысьтыз инты висъямын шуыса. Соин ик Иисуслэн потэ вал, соос берпуметӥ Пасха дыръя но Ӝытан дыръя соин ӵош мед луозы шуыса.

Озьыен, 70 дышетскисьёс но Иисуслэн мукет дышетскисьёсыз нырысетӥ Ӝытанын ӧй вал. Но со соослы бадӟым пайда вайиз. Соос пумозяз оскымон вал ке, берлогес соос святой духен зырӟемын вал но пыриськизы Эксэйлык сярысь тупан кылэ, кудзэ Иисус со ӝытэ апостолъёсыныз кутӥз (Лука 22:29, 30).