1. Кыӵе ужъёсы пырисько сузэр-апайёс но кыӵе шуг-секытъёсын соос пӧлысь тросэз пумиськыло? (Учке вылбамысь суредэз.)

 МИ ТУЖ шумпотӥськомы, кенешысь трос сузэр-апайёс вань сюлмысьтызы тыршо шуыса! Соос пырисько христиан пумиськонъёсы, тодытон уже, Эксэйлык юртъёсты эскерон-тупатъян ужъёсы но кенешысь мукетъёсыз сярысь сюлмасько. Зэм но, соослэн но шуг-секытъёссы вань. Соос пӧлысь кин ке но арлыдо анай-атайёсыз сярысь сюлмаське. Кин ке но ӵыжы-выжыосызлэн пумитъяськеменызы пумиськылэ. Нош кин ке но нылпиоссэ одӥгназ будэтэ но трос ужано луэ.

2. Малы сузэр-апайёслы юрттыны кулэ?

² Малы ми сузэр-апайёслы юрттыны кулэ? Малы ке шуоно та дуннеын соосты котьку ик уг гажало. Со сяна, соослы юрттыны милесьтым мылкыдмес ӝутэ Библия. Кылсярысь, апостол Павел куриз Римысь кенешез Фиваез шуныт пумитаны но солы юрттыны, «солэн кыӵе ке кулэяськонъёсыз луизы ке» (Рим. 16:1, 2). Азьвыл Павел фарисей вал но, мукет фарисейёс сямен, кышномуртъёсты ӧз гажа, вылды. Нош христиан мурт луыса, со Иисуслэсь адӟем кариз но кышномуртъёс шоры гажаса но лякытэн учкиз (1 Кор. 11:1).

3. Кызьы Иисус учкиз кышномуртъёс шоры, озьы ик соосыз шоры но, кудъёсыз Инмарлэсь эриксэ быдэсъязы?

³ Иисус вань кышномуртъёс шоры гажаса учкиз (Иоанн 4:27). Со туж пӧртэм вал солэсь, кызьы со дыре учкизы кышномуртъёс шоры иудейёслэн религиозной кивалтӥсьёссы. Одӥг энциклопедиын гожтэмын: «Иисус кышномуртъёсты ноку ӧз сантэма но ӧз ултӥя». Со интые, со туж гажаз кышномуртъёсты, кудъёсыз Атаезлэсь эриксэ быдэсъязы. Тунсыко: духовной семьяез сярысь веракуз, Иисус со пӧлы пыртӥз пиосмуртъёсты но, кышномуртъёсты но (Матф. 12:50).

4. Мае ми эскеромы та статьяын?

 ⁴ Иисус котьку дась вал юрттыны кышномуртъёслы, кудъёсыз Инмарлы ужазы-тыршизы. Соослэсь тыршемзэс со дунъяз но соосты утьылӥз. Ойдолэ эскеромы, кызьы, Иисуслэсь адӟем карыса, сузэръёслы юрттыны быгатӥськомы.

5. Малы куд-ог сузэр-апайёслы эшъёс шедьтыны капчи ӧвӧл?

⁵ Милемлы ваньмылы — вын-агайёслы но, сузэр-апайёслы но — умой эшъёс кулэ. Нош куддыръя сузэр-апайёслы соосты шедьтыны капчи ик ӧвӧл. Малы? Тани мар верало куд-ог сузэръёс. «Мон быземын ӧвӧл,— вера Джордан b сузэр,— но ӵем дыръя кенешын асме кулэен уг шӧдӥськы. Мон малпасько, монтэк но быгатозы шуыса». Нош тани мар вера Кристен сузэр, кудӥз пионер луыса ужа-тырше но шаерезлэн мукет палаз кошкиз, тодытон уже тросгес пыриськон понна: «Куке выль кенеше выжиськод, мӧзмыт луыны быгатэ». Куддыръя христианъёслэн, кудъёсызлэн ӵыжы-выжыоссы Адӟись-Ивортӥсьёс уг луо, семьяенызы матысь кусыпъёссы ӧвӧл. Нош со дыре ик соос кенешысь вын-агайёсын но сузэр-апайёсын юн эшъяськыса ӧз вуэ на. Со сяна, мӧзмыт луыны быгатэ соослы но, кинъёс висеменызы сэрен дорысьтызы уг потало, озьы ик соосызлы но, кинъёс висись ӵыжы-выжыоссы сярысь сюлмасько. Аннет сузэр тодаз вае: «Куке вын-агайёс но сузэр-апайёс монэ куное ӧтьылӥзы, мон соос доры ветлыны ӧй быгаты, малы ке шуоно мыным анае сярысь сюлмаськоно вал».

6. Кызьы Иисус юрттӥз Марфалы но Мариялы, Лукалэсь 10:38—42 лыдэ басьтыса?

⁶ Иисус духовной сузэр-апайёсызлы дырзэ висъяз но соослы зэмос эш луиз. Малпаськомы Мария но Марфа эшъёсыз сярысь, кудъёсыз быземын ӧй вал, вылды. (Лыдӟе Лукалэсь 10:38—42.) Иисус вӧзын адямиос асьсэды умой шӧдӥзы, соин ик Мариялы но Марфалы кельше вал Иисусэн дырзэс ортчытъяны. Одӥг пол Мария пуксиз Иисуслэн пыд выжыяз но тодӥз, со пумит ӧвӧл шуыса. Ӵем дыръя Иисуслэн дышетскисьёсыз озьы каро вал c. Марфа йыркуръяськыны кутскиз, Мария солы уг юртты шуыса, но ӧз возьдаськы Иисуслы вераны, мар со та сярысь малпа. Та учырын Иисус кык сузэръёслы ик лякытэн валаны юрттӥз кулэ луись зэмлыкъёсты. Куке Иисус куное ветлӥз Марфа, Мария но Лазарь доры, адямиос адӟизы, макем зол со соосты яратэ (Иоанн 12:1—3). Соин ик паймонэз ӧвӧл: куке Лазарь секыт висьыны усиз, Марфа но Мария тодӥзы, Иисуслэсь юрттэт курыны быгато шуыса (Иоанн 11:3, 5).

7. Кызьы ми сузэр-апайёслэсь мылкыдзэс ӝутыны быгатӥськомы?

⁷ Куд-ог сузэр-апайёс понна кенешлэн пумиськонъёсыз — со одӥгез луонлык огъя оскисьёсынызы адӟиськыны. Соин ик пумиськонъёсын милемлы кулэ соосты шуныт пумитаны, соосын вераськыны но соос сярысь сюлмаськеммес возьматыны. Тани мар вера Джордан, кудӥз сярысь вераськиз ини: «Мон туж дунъясько, куке вын-агайёс но сузэр-апайёс пумиськонъёсын сётэм валэктонъёсы понна монэ ушъяло, тодытыны ӧтё яке кызьы ке мукет сямен мыным саклыксэс висъяло». Сузэр-апайёслы возьматыны кулэ, соос милемлы дуно пото шуыса. Киа сузэр вера: «Мон тодӥсько: кенешлэн пумиськоназ ӧй лыкты ке, кин ке но мыным одно ик гожтоз но юалоз, мынам ваньмыз умой-а шуыса. Та монэ  оскытэ, вын-агайёс но сузэр-апайёс монэ ярато шуыса».

8. Кызьы ми эшшо Иисуслэсь адӟем карыны быгатӥськомы?

⁸ Иисус духовной сузэръёсызлы дырзэ висъялляз. Милемлы но солэсь адӟем кароно. Соосты куное ӧтьыны луэ, ӵош сиськон понна яке огшоры вераськон понна. Нош вераськонъёсмы ог-огмес юнматыны кулэ (Рим. 1:11, 12). Иисус тодӥз: куд-огъёсызлы кузпалтэк улыны секыт луоз шуыса. Со дыре ик валэктӥз: зэмос шуд герӟаськемын ӧвӧл соин, вань-а адямилэн семьяез но нылпиосыз (Лука 11:27, 28). Ми шудо луиськомы соку, куке Иеговалы ужан-тыршон улонамы тужгес но валтӥсез луэ (Матф. 19:12). Тӧроослы но кузпалъяськытэк улон шоры Иисус сямен учконо.

9. Мар карыны быгато тӧроос, сузэр-апайёслы юрттон понна?

⁹ Тӧроослы тужгес но кулэ кенешысь кышномуртъёс шоры учкыны сузэр-апайёссы но анайёссы шоры кадь (1 Тим. 5:1, 2). Тӧроос сузэр-апайёслы дырзэс висъяны кулэ кенешлэн пумиськонэз азьын но со бере. Тани мар вера Кристен сузэр: «Мынам туж трос ужъёсы вал: мон пионер луыса ужай-тырши, уж дорам но трос лэсьтоно вал. Одӥг тӧро тае адӟиз но мынэсьтым юаз, кызьы мон ваньзэ вуисько. Мон туж тау карисько солэн сюлмаськемезлы».  Куке тӧроос ялан дырзэс висъяло, сузэр-апайёсын вераськон понна, сузэръёс валало, соос сярысь сюлмасько шуыса d. Аннетт валэктэ, кызьы солы юрттэ тӧроосын ялан вераськон: «Мон соосын умойгес тодматскисько, нош соос — монэн. Соин ик, шуг-секытэн пумиськыкум, мыным капчигес соослэсь юрттэт курыны».

10. Мар шумпоттэ сузэр-апайёсты?

¹⁰ Милемлы ваньмылы — вын-агайёслы но, сузэр-апайёслы но — кельше, куке мукетъёсыз быгатонлыкъёсмылы саклыксэс висъяло но тыршеммес дунъяло. Нош куке быгатонлыкъёсмес но ужмес нокин уг адӟы, милям мылкыдмы куашка. Абигейл сузэр, кудӥз быземын ӧвӧл, куддыръя малпа, солы нокин саклыксэ уг висъя шуыса. Со вера: «Мон кылӥсько гинэ: „Тон солэн сузэрез ук“ яке „Тон соослэн нылзы ук“, нош монэ асме нокин уг адӟы кадь». Нош тани Пэм нимо бызьымтэ сузэрлэн учырез. Трос аръёс ӵоже со миссионер луыса ужаз-тыршиз, нош собере дораз бертӥз, анай-атаез сярысь сюлмаськон понна. Али Пэмлы 70 ареслэсь тросгес, со азьло сямен ик пионер луыса ужа-тырше. Со вера: «Тыршеме понна тау карон кылъёс туж шунто мынэсьтым сюлэмме».

11. Кызьы Иисус возьматӥз, дунъя шуыса кышномуртъёсты, кудъёсыз солы юрттӥськыса улӥзы?

¹¹ Иисус дунъяз оскымон кышномуртъёслэсь ужам-тыршемзэс, кудъёсыз солы «асьсэлэн ваньбуренызы юрттӥськыса улӥзы» (Лука 8:1—3). Таӵе луонлык сётэм сяна, Иисус соослы Инмарлэн эрикез сярысь кулэ луись зэмлыкъёсты но валэктылӥз. Кылсярысь, Иисус та кышномуртъёслы кулонэз но улӟонэз сярысь вераз (Лука 24:5—8). Апостолъёсты кадь ик, Иисус соосты вуоно шуг-секытъёслы дасяз (Марк 9:30—32; 10:32—34). Со сяна, куке Иисусэз кутӥзы, апостолъёс сое кельтӥзы но бызьыса кошкизы. Нош куд-ог кышномуртъёс, кудъёсыз солы юрттӥськизы, «палэнысен учкыса сылӥзы», кызьы Иисусэз кортӵогазы но кызьы со кулӥз (Матф. 26:56; Марк 15:40, 41).

12. Кыӵе ужъёсты Иисус оскиз кышномуртъёслы?

¹² Иисус кышномуртъёслы кулэ луись ужъёсты оскиз. Кылсярысь, ӵапак кышномуртъёс вал нырысетӥосыз, кинъёс улӟем Иисусэз адӟизы. Иисус куриз соосты аслаз улӟемез сярысь апостолъёслы вераны (Матф. 28:5, 9, 10). Асьме вакытысь 33-тӥ арын Витьтонэтӥ нуналэ христианъёс пӧлын, кудъёссэ Инмар святой духен зырӟиз, кышномуртъёс но вал, вылды. Со зэмзэ ик озьы ке, та зырӟем сузэръёслы пӧртэм кылъёсын вераськыны но «Инмарлэн быдӟым ужъёсыз сярысь» вераны паймымон быгатонлык сётэмын вал (Ап. уж. 1:14; 2:2—4, 11).

13. Мар лэсьто сузэр-апайёс Иеговалы ужан-тыршонын но кызьы возьматоно, ми соослэсь тыршемзэс дунъяськомы шуыса?

¹³ Иеговалы ужан-тыршонын лэсьтэм ужъёссы понна сузэр-апайёсмы ушъяны ярамон луо. Соос юртъёсты пуктон но эскерон-тупатъян ужъёсы пырисько, инкуазь шимучыръёслэсь бервылъёссэс утялтыны юртто, мукет кылын вераськись группаослы юрттӥсько, публикациосмес берыкто, Вефильын ас мылкыд каремзыя ужало-тыршо, озьы ик пионеръёс но миссионеръёс луыса ужало-тыршо. Вын-агайёс сямен ик, сузэр-апайёс но дышетско Пионеръёсты дышетӥсь школаын, Эксэйлыкез тодытӥсьёслы школаын но Галаад школаын. Со сяна, кышноос картъёссылы юртто, соос кенешын но Иеговалэн организацияз сётэм ужъёссэс быдэсъяны мед быгатозы шуыса. Та вын-агайёслы «саламъёс-кузьымъёс» луыны секытгес луысал, вылды, кышнооссы соослы ӧз юрттысалзы ке  (Еф. 4:8). Малпаське: кызьы та тыршись сузэр-апайёслы юрттыны быгатӥськоды?

14. Мае валало визьмо тӧроос?

¹⁴ Визьмо тӧроос валало: сузэр-апайёс — со «туж бадӟым войско», кудъёсыз вань сюлмысьтызы ужало-тыршо. Озьы ик тӧроос валало, ӵем дыръя ӵапак сузэръёс тужгес но быгатыса ӟеч иворез верало шуыса. (Лыдӟе Псалтирез 68:11 сноскаысь e.) Соин ик тӧроос сыӵе сузэръёслэсь дышетскыны тыршо. Абигейл сузэрлы кельше, куке тӧроос солэсь юало, кызьы умойгес луысал адямиосын вераськонэз кутскыны. Со вера: «Та оскытэ монэ, Иегова аслаз организацияз мыным кулэ луись уж оскиз шуыса». Со сяна, тӧроос тодо: оскымон но кема дыр ӵоже ужась-тыршись сузэр-апайёс туж юрттыны быгато егит сузэръёслы, куке соос шуг-секытъёсын пумиськыло (Тит. 2:3—5). Зэм но, сузэр-апайёсмес одно ик кулэ яратыны но тау карыны!

15. Кыӵе учыръёсы сузэр-апайёслы милям юрттэтмы кулэ луоз?

¹⁵ Куддыръя сузэр-апайёслы, кудъёсыз пумиськизы секыт югдуръёсын, кулэ луоз со, кин соослы юрттысал яке соосты утьысал (Ис. 1:17). Кылсярысь, палкышнолы яке люкиськем сузэрлы кулэ луыны быгатэ юрттэт сэрттыны-пертчыны кыӵе ке шуг-секытсэ, кудӥныз ӵем дыръя солэн картэз выре вал. Нош арлыдо сузэрлы эмъясьёсын вераськыны юрттэт кулэ луоз, дыр. Пионер луыса ужась-тыршись сузэрез, кудӥз Инмарлэн организацияз кыӵе ке нимысьтыз ужез быдэсъя, утьыны кулэ луоз соку, куке мукетъёсыз малпало, солы сомында ик тодытоно шуыса, кӧня мукет пионеръёс тодыто. Кызьы сыӵе сузэр-апайёслы юрттоно? Ойдолэ нош ик эскеромы Иисуслэсь примерзэ.

16. Кызьы Иисус Марияез утиз, Марклэсь 14:3—9 лыдэ басьтоно ке?

¹⁶ Иисус соку ик утиз сузэр-апайёсты, кудъёссэ шонертэм валало вал. Кылсярысь, со озьы лэсьтӥз, куке Марфа Марияез пыкылыны кутскиз (Лука 10:38—42). Иисус Марияез утиз мукет учыре но, куке адямиос солэсь ужзэ шонертэмен лыдъязы но сое курланы кутскизы. (Лыдӟе Марклэсь 14:3—9.) Иисус валаз, Мариялэн малпанъёсыз умой вал шуыса, соин ик со сое ушъяз но вераз: «Со Мон понна ӟеч уж лэсьтӥз. [...] Со лэсьтӥз, мар быгатӥз». Озьы ик Иисус азьпалзэ тодытыса вераз на: «Быдэс дунне вылын, кытын гинэ та Евангелие тодытэмын луиз, сое буре вайыса, солэн мар каремез сярысь котькытын но верамын луоз». Та статья ӵапак тае возьматэ. Тунсыко: та кышномуртэз ӟеч ужез понна ушъякуз, Иисус быдэс дунне вылын тодытон уж сярысь вераз. Иисуслэн кылъёсыз Марияез туж юнматӥзы, луоз!

17. Кыӵе учыръёсы сузэръёсты утьыны кулэ?

¹⁷ Нош утиськоды-а тӥ сузэр-апайёсты, куке соослы юрттэт кулэ? Пуктомы син азямы таӵе учырез. Кенешысь куд-ог ивортӥсьёс адӟо: одӥг сузэр, кудӥзлэн картэз Иеговалы уг йыбыртъя, пумиськонъёсы ӵем дыръя бер вуэ но Эксэйлык юртысь пумиськонлэн йылпумъяськемез бере ик кошке. Со сяна, нылпиоссэ со туж шер сьӧраз вае. Та ивортӥсьёс сузэрез курлало, малы ке шуоно малпало, со картэныз ассэ юнгес возьысал ке, картэз нылпиоссэ пумиськонъёсы нуллыны лэзьысал шуыса. Нош зэмзэ вераса, сузэр лэсьтэ ини ваньзэ, мае быгатэ. Со уг быгаты аслэсьтыз ужъёссэ радъяны, картэзлэсь малпанзэ лыдэ басьтытэк. Нылпиосыз пумысен но со ачиз гинэ ужпум уг куты. Кызьы тӥ сузэрез пыкылонлэсь утьыны быгатӥськоды? Мукетъёсыз азьын сузэрез ушъялэ но со сярысь умой кылъёс вералэ соку но, куке со тӥледын артэ ӧвӧл. Соку та сузэр сярысь умойтэм вераськонъёс уз вӧлме ни.

18. Кызьы эшшо ми юрттыны быгатӥськомы сузэръёслы?

 ¹⁸ Кызьы эшшо возьматыны луоз сузэр-апайёс сярысь сюлмаськеммес? Соослы уж вылын юрттыса (1 Иоанн 3:18). Тани мар вера Аннетт: «Куд-ог вын-агайёс но сузэр-апайёс висись анаеным пукыны ветло, мон мукет ужъёсты быдэсъяны мед быгатом шуыса, яке сиён ваё. Солы луыса мон шӧдӥсько, кенешын монэ ярато но дунъяло шуыса». Джордан но тау каре, со сярысь сюлмасько шуыса. Одӥг агай солы кулэ луись визь-кенешъёс сётӥз, кызьы машиназэ умой возёно. Со вера: «Шумпотоно тодыны: вын-агайёс но сузэр-апайёс мон сярысь сюлмасько но соослэн потэ, машинаен ветлон мыным кышкытлык медаз вайы шуыса».

19. Кызьы тӧроос сузэр-апайёслы юрттыны быгато?

¹⁹ Тӧроос но тыршо сузэр-апайёслы юрттыны. Соос тодо: Иеговалэн потэ, сузэръёс сярысь мед сюлмаськозы шуыса (Иак. 1:27). Вын-агайёс Иисуслэсь адӟем каро но визьмо луэмзэс возьмато. Соос курон-косонъёс уг пуктыло соку, куке умойгес луысал лякыт сямо но валась луыны (Матф. 15:22—28). Куке тӧроос сузэр-апайёслы юрттыны луонлыкъёс утчало, сузэръёс шӧдо, Иегова но солэн организациез соос сярысь сюлмасько шуыса. Кылсярысь, куке Киа сузэрлэн тодытон группаысьтыз кылкутӥсь тӧро тодӥз, со улон интызэ воштэ шуыса, тӧро соку ик юрттэтсэ ӵектӥз. Киа вера: «Солы луыса мон трос ӧй сюлмаськы. Тӧроослэн ӟеч кылъёссы но юрттэтсы монэ оскытӥзы, кенешлы мон дуно луисько но секыт дыръёсы огнам уг кыльы шуыса».

20, 21. Кызьы возьматоно, ми вань сузэр-апайёсмес дунъяськомы шуыса?

²⁰ Туннэ кенешъёсамы туж трос тыршись сузэр-апайёсмы вань! Соослы милям юрттэтмы кулэ. Нош со понна милемлы Иисуслэсь адӟем кароно: соослы дырмес висъяно но соосын умойгес тодматсконо, ужан-тыршонын лэсьтэм ужъёссы понна тау кароно, озьы ик кулэ дыръяз утёно.

²¹ Римъёслы гожтэтэзлэн пумаз апостол Павел укмыс сузэр-апайёс сярысь вераз (Рим. 16:1, 3, 6, 12, 13, 15). Зэм но, та сузэръёс шумпотӥзы, куке кылӥзы, Павел соосты ушъяз но соослы салам вераз шуыса. Ойдолэ ми но кенешысьтымы вань сузэр-апайёслы юрттыса уломы. Озьы лэсьтыса, ми возьматомы, соос духовной семьямылэн оглюкетэз луо но ми соосты яратӥськомы шуыса.