1. Мар карыны ӧтиз Иисус ньыль чорыгасьёсты но кызьы соос солэн ӧтёнэзлы вазиськизы?

 ПЁТР, Андрей, Иаков но Иоанн чорыгазы, улыны коньдон поттон понна. Пуктэ син азяды, макем соос паймизы, куке кылӥзы Иисуслэсь ӧтёнзэ: «Ойдолэ Мон сьӧры, Мон тӥледыз адями кутылӥсь каро» b. Мар каризы та дышетскисьёс, тае кылэмзы бере? Библиын гожтэмын: «Калтонъёссэс куштӥзы но соку ик Со сьӧры мынӥзы» (Матф. 4:18—22). Та кутэм ужпумзы быдэс улонзэс воштӥз. Чорыг интые соос улэп адямиосты кутылыны кутскизы (Лука 5:10). Туннэ Иисус сыӵе ик ӧтёнэн вазиське адямиослы, кудъёсыз зэмлыкез ярато (Матф. 28:19, 20). Та ӧтёнлы тӥ вазиськиды-а? «Адями кутылӥсь» луиды-а?

2. Малы умой-умой малпаськоно «адями кутылӥсь» луыны ужпум кутон азьын но мар юрттоз та вамышез лэсьтыны?

² Тӥ кӧня ке дыр ӵоже Библиез дышетӥськоды ини но улонады куд-ог воштӥськонъёс лэсьтӥды ини, вылды. Но табере тӥледлы ужпум кутоно: ӟеч иворез тодытыса ветлоно-а? Тӥ уд ке тодӥське, кыӵе ужпум кутоно, мылкыдды медаз куашка. Со озьы луыны быгатэ, малы ке шуоно тӥ валаськоды, макем кулэ луэ та вамыш. Зэм но, Библиын верамын: Пётр, Андрей, Иаков но Иоанн калтонъёссэс соку ик куштӥзы. Но уг луы вераны, соос малпаськытэк ужпум кутӥзы шуыса. Ог ӝыны ар талэсь азьлогес соос Иисусэн тодматскизы но валазы, Мессияез шедьтӥзы шуыса (Иоанн 1:35—42). Тӥ но трос тодӥды ини Иегова но Иисус сярысь, озьы ик азьланяз но Инмарен кусыпъёстэс юнматэмды потэ, дыр. Нош  ивортӥсь луыны ужпум кутон азьын ваньмыз сярысь умой-умой малпаськоно. Мар юрттӥз та ньыль чорыгасьёслы ужпум кутыны?

3. Мар юрттоз тӥледлы тодытон но дышетскисьёсты дасян уже быгатыса пыриськыны?

³ Иисуслэн нырысетӥ дышетскисьёсыз ас ужзэс яратӥзы но умой тодӥзы. Соос кышкасьтэмесь вал но валазы, макем кулэ быгатыны астэ кияд кутыны. Ваньмыз та юрттӥз соослы ӟеч иворез быгатыса ивортыны. Та статьяын ми эскеромы, мар юрттоз тӥледлы тодытон но дышетскисьёсты дасян уже быгатыса пыриськыны.

4. Малы Пётр чорыгаз?

⁴ Чорыгаса Пётр аслэсьтыз семьязэ сюдӥз-вордӥз. Со сяна, аслэсьтыз ужзэ со яратӥз (Иоанн 21:3, 9—15). Озьы ик со яратӥз адямиосты кутылон ужез но. Иеговалэн юрттэменыз, Пётр та ужын азинлыко вал (Ап. уж. 2:14, 41).

5. Малэсь кышказ Пётр, Лукалэсь 5:8—11 лыдэ басьтыса, но мар юрттоз милемлы та выллем шӧдонъёсты вормыны?

⁵ Ми тодытӥськомы, малы ке шуоно Иеговаез яратӥськомы. Та тужгес но валтӥсез муг, малы ми та уже пыриськиськомы. Иеговаез яратон юрттэ милемлы ӟеч иворез мукетъёсызлы вераны, ми малпаськомы ке но, та ужез быдэстыны ум быгатэ шуыса. Пётрез «адями кутылӥсь» луыны ӧтьыкуз, Иисус солы вераз: «Эн курда». (Лыдӟе Лукалэсь 5:8—11.) Пётр ӧз кышка солэсь, мар луыны быгатысал, Христослэн дышетскисез луиз ке. Со кышказ, малы ке шуоно туж паймиз, макем трос чорыг кутыны юрттӥз соослы Иисус. Пётр валаз, Иисус паймымон уж лэсьтӥз шуыса, озьы ик малпаз, ачиз соин ӵош  ужаны ярамон уг луы шуыса. Пётр сямен, тӥ но куддыръя кышканы быгатӥськоды. Оло нош, тӥ сюлмаськиськоды соин сэрен, маин пумиськыны быгатӥськоды, Христослэн дышетскисез луыса. Озьы ке, тырше эшшо но юнгес яратыны Иеговаез, Иисусэз но матысь адямиостэс. Та тӥлесьтыд мылкыддэс ӝутоз Иисуслэн ӧтёнэзлы вазиськыны — «адями кутылӥсь» луыны (Матф. 22:37, 39; Иоанн 14:15).

6. Мар эшшо милесьтым мылкыдмес ӝутэ тодытон уже пыриськыны?

⁶ Эскеромы на эшшо куд-ог мугъёсты, кудъёсыз милесьтым мылкыдмес ӝуто тодытон уже пыриськыны. Милям потэ быдэсъяммы Иисуслэсь курон-косонзэ: «Мынэлэ... калыкъёсты дышетэлэ» (Матф. 28:19, 20). Со сяна, ми тодытӥськомы, малы ке шуоно адямиос «возьмаськисьтэк кылем ыжъёс кадь» катьтэммемын но пазьгиськемын (Матф. 9:36). Соин ик соослы туж кулэ Эксэйлык сярысь иворез тодыны. Иеговалэн «вань адямиосты утиськытэмез, зэмлыкез тодытэмез потэ» (1 Тим. 2:4).

7. Кызьы Римъёслы 10:13—15 гожтэм кылъёс возьмато, малы туж кулэ луэ тодытон уж?

⁷ Ми валаськомы ке, тодытон уж адямиослэсь улонзэс уте шуыса, милям мылкыдмы ӝутскоз та уже пыриськыны. Чорыгась кутэм чорыгзэ яке вуза, яке сое ачиз сие. Нош ми адямиосты «кутылӥськомы», соосты утён понна. (Лыдӟе Римъёслы 10:13—15; 1 Тим. 4:16).

8, 9. Мае тодыны кулэ чорыгасьлы но малы?

⁸ Иисус улон нуналъёсы Израильысь чорыгасьлы тодыны кулэ вал, кыӵе чорыгез со кутыны быгатэ (Лев. 11:9—12). Озьы ик солы валано вал, кытын со сое кутыны быгатэ. Ӵем дыръя чорыг уя отын, кытын солы ву тупа но кытын сиён тырмыт. Нош лыдэ басьтоно-а, кыӵе дыре чорыганы кулэ? Бен. Одӥг миссионер, Чус океанысь шормуӵын ужакуз-тыршыкуз, тодӥз, чорыган понна тужгес но тупась дыр вань шуыса. Со интыысь вын-агай сое чорыганы ӧтиз. Миссионер солы вераз: «Пумиськомы ӵукна, укмыс час котырын». Нош вын-агай солы шуиз: «Тон монэ ӧд вала. Татын бырйыны кулэ: яке кемагес изёд, яке чорыг кутод».

⁹ Озьы ик нырысетӥ даурысь «адями кутылӥсьёс» но бырйизы трос калыко интыосты но ветлӥзы отчы соку, ку адямиос со интыосын луыны кулэ вал. Кылсярысь, Иисуслэн дышетскисьёсыз тодытӥзы коркась корка ветлыса, вузкарон интыосын, храмын но сӥнагогаосын (Ап. уж. 5:42; 17:17; 18:4). Милемлы но тодыны кулэ, ку адямиос доразы луо, нош ку мукет интыын. Милям потэ ке, ӟеч иворез тросгес адямиос мед кылозы шуыса, ми дась луыны кулэ тупась дыре но тупась интыын тодытыны (1 Кор. 9:19—23).

10. Кыӵе тӥрлыкъёс сётӥз милемлы Иеговалэн организациез?

¹⁰ Чорыгасьлы тупась тӥрлыкъёс кулэ, озьы ик солы тодоно, кызьы соосты уже кутоно. Милемлы но тодытон понна тупась тӥрлыкъёс кулэ но тодоно, кызьы соосты уже кутоно. Иисус аслаз дышетскисьёсызлы валамон валэктӥз, кызьы «адями кутылӥсь» луыны. Со валэктӥз, мае сьӧразы басьтоно, кытын тодытоно но мар верано (Матф. 10:5—7; Лука 10:1—11). Туннэ Иеговалэн организациез сётӥз милемлы валтӥсь дышетон тӥрлыкъёс, кудъёсыз трос пайда вайизы ини c. Милемыз дышето та тӥрлыкъёсты уже кутыны. Сыӵе дышетскон юрттэ милемлы эшшо но быгатыса тодытыны но дышетыны (2 Тим. 2:15).

11. Малы «адями кутылӥсьёс» кышкасьтэмесь луыны кулэ?

¹¹ Чорыгасьёслы кышкасьтэм луыны кулэ. Кыӵе куазь луоз зарезь вылын, тодыны уг луы: шӧдтэк шорысь зол тӧл ӝутскыны быгатэ. Со сяна, чорыгасьёс ӵем дыръя уйин ужало. «Адями кутылӥсьёс» но кышкасьтэмесь луыны кулэ. Куке ми тодытыны кутскиськомы но мукетъёсызлы вераськомы, Иеговалэн Адӟись-Ивортӥсьёсыз луиськомы шуыса, ми пумиськыны быгатӥськомы «сильтӧлъёсын». Со пӧлы пырыны быгатэ ӵыжы-выжыосмылэн пумитъяськемзы, тодмоосмылэн серем каремзы, адямиослэн ӟеч иворез палэнтэмзы. Но ми талы ум паймиське. Иисус азьло ик вераз: солэн дышетскисьёсыз тодытозы адямиослы, кудъёсыз соослы пумитъяськозы (Матф. 10:16).

12. Мар юрттэ милемлы кышкасьтэм луыны, Иисус Навинлэсь 1:7—9 лыдэ басьтоно ке?

¹² Кызьы кышкасьтэм луоно? Нырысетӥез, оске, Иисус инмысен тодытон ужен кивалтыны азьланьтэ шуыса (Иоанн 16:33; Усьт. 14:14—16). Кыкетӥез, юнматэ оскондэс, Иегова тӥ сярысь сюлмаськоз шуыса (Матф. 6:32—34). Осконды юнмамъя, тӥ эшшо но кышкасьтэмесь луоды. Пётр, Андрей, Иаков но Иоанн юн осконзэс возьматӥзы, куке чорыган ужзэс кельтӥзы но Иисуслэн дышетскисьёсыз луизы. Тӥ но юн оскондэс возьматӥды, куке тодмоостылы но ӵыжы-выжыостылы верады, Иеговалэн Адӟись-Ивортӥсьёсыныз Библиез дышетыны но соослэн  пумиськонъёсазы ветлыны кутскиды шуыса! Веранэз ӧвӧл, Иеговалэн шонерлыко эсэпъёсызъя улон понна, тӥледлы тупатоно луиз сое, кызьы тӥ асьтэды возиськоды но улӥськоды. Со понна но тӥледлы кулэ вал оскон но кышкасьтэм сям. Кышкасьтэм луэмдэс юнматыса, тӥ адӟоды, макем шонересь луо та кылъёс: «Кытчы гинэ тон уд мыны, котьку но тонэн огазьын луоз Инмаред Кузё-Инмар». (Лыдӟе Иисус Навинлэсь 1:7—9.)

13. Кызьы малпаськон но вӧсяськон юрттозы тӥледлы кышкасьтэм луыны?

¹³ Мар эшшо карыны луоз на, кышкасьтэм луон понна? Со сярысь вӧсяськоно (Ап. уж. 4:29, 31). Иегова вӧсяськонъёстылы ответ сётоз но ноку тӥледыз уз кельты. Со котьку вӧзады луоз, тӥледлы юрттон понна. Озьы ик малпаськыны луоз со сярысь, кызьы Иегова вашкала дыръёсы аслэсьтыз ужась-тыршисьёссэ утьылӥз. Со сяна, тодады вае, кызьы со тӥледлы юрттӥз шуг-секытъёс пыр потыны но кужым сётӥз улонады воштӥськонъёс лэсьтыны. Юн оске: Инмар, кудӥз аслэсьтыз калыксэ Горд Кам зарезь пыр поттӥз, одно ик юрттоз тӥледлы Христослэн дышетскисез луыны (Пот. 14:13). Псаломъёсты гожъясьлэн кадь ик юн осконды мед луоз. Со гожтӥз: «Уг кышка, Кузё-Инмар мон палан: адями мыным мар кароз?» (Пс. 117:6).

14. Малы дышето тӥледыз Масаэ но Томоё сузэръёслэн учыръёссы?

¹⁴ Кышкасьтэм луон понна мукетыз амал — эскерыны, кызьы Иегова юрттӥз аслаз ужась-тыршисьёсызлы возьдаськон сямзэс вормыны. Учкомы Масаэ нимо сузэрлэсь учырзэ. Со возьдаськись вал но малпаз, тодытыны ноку уз быгаты шуыса. Тодмотэм адямиосын вераськыны солы туж секыт вал, ӝужыт гурезь йылэ тубыны тыршем кадь. Со туж тыршиз Инмарез но матысь адямиоссэ юнгес яратыны. Масаэ малпаськиз со сярысь, макем ӧжыт дыр кылиз та дуннелы, озьы ик вӧсяськиз, тодытыны мылкыдыз мед юнмалоз шуыса. Со кышканъёссэ вормиз, озьы ик пионер луыса ужаны-тыршыны но кутскиз. Нош тани эшшо одӥг учыр, кудӥз возьматэ, Иегова выль ивортӥсьёслы кышкасьтэм луыны юрттэ шуыса. Куке Томоё нимо сузэр коркась корка ветлыса тодытыны кутскиз, нырысетӥ ӧс дорын ик со шоры кышномурт кеськиз: «Иеговалэн Адӟись-Ивортӥсьёсыз? Мынам уг поты тӥледын вераськеме!» Та кылъёсын кышномурт ӧссэ пытсаз. Томоё ӧз кышка но соин ӵош тодытӥсь сузэрлы вераз: «Тон кылӥд-а? Мон ымме усьтыса но ӧй вуы, нош со валаз ини, мон Иеговалэн Адӟись-Ивортӥсез луисько шуыса. Мон туж шумпотӥсько!» Али Томоё пионер луыса ужа-тырше.

15. Мар со сыӵе астэ кияд кутыны быгатон но малы со христианъёслы кулэ?

¹⁵ Чорыгась ассэ кияз ӧз куты ке, трос чорыг кутыны уз быгаты. Одӥг словарьын валэктӥське: со, кин ассэ кияз кутэ, ассэ косыны быгатэ лэсьтыны сое, мае лэсьтыны кулэ. Та сям чорыгасьёслы кулэ, вазь ӵукна султон понна, зарезь вылын вань ужъёссэс быдэстон понна но, умойтэм куазь шоры учкытэк, ужан понна. Азинлыко ужаммы-тыршеммы но пумозяз чидаммы потэ ке, милемлы но асьмеды киямы кутыны кулэ (Матф. 10:22).

16. Мар юрттоз милемлы дышетскыны асьмеды киямы кутыны?

¹⁶ Адямиос уг вордӥсько асьсэды киязы возьыны быгатонлыкен. Ӵем дыръя, мае ке лэсьтон понна, ми тужгес но капчи амал утчаськомы. Нош куддыръя ужъёс, кудъёссэ одно ик быдэстыны кулэ, туж ик капчиесь ӧвӧл. Соку милемлы дышетсконо асьмеды киямы кутыны. Соин ик милемлы юрттэт кулэ,  секыт потӥсь ужъёсты быдэсъяны дышетскон понна. Иегова сётэ милемлы сыӵе юрттэт святой духез пыр (Гал. 5:22, 23).

17. Мар кариз Павел, ассэ кияз кутыны дышетскон понна, 1 Коринфъёслы 9:25—27 лыдэ басьтыса?

¹⁷ Апостол Павел ассэ кияз кутыны быгатӥз. Нош со ӧз ваты, шонер ужъёс лэсьтон понна, солы аслэсьтыз мугорзэ курадӟытыса зӥбломытоно вал шуыса. (Лыдӟе 1 Коринфъёслы 9:25—27.) Со ӧтиз мукет христианъёсты дышетскыны асьсэды киязы кутыны но ваньзэ лэсьтыны «озьы, кызьы кулэ, радызъя» (1 Кор. 14:40). Милемлы асьмеды киямы кутоно, азьланяз но Иеговалы ужан-тыршон понна, озьы ик ялан тодытон но Библиысь зэмлыклы адямиосты дышетон понна (Ап. уж. 2:46).

18. Кыӵе учырын Иегова милемыз азинлыко тодытӥсьёсын лыдъялоз?

¹⁸ Быгатӥсь чорыгась трос чорыг кутылэ. Нош милям азинлыко ужан-тыршонмы герӟаськемын ӧвӧл соин, кӧня адямиослы ми юрттӥмы Иеговалэн Адӟись-Ивортӥсьёсыз луыны (Лука 8:11—15). Иегова малпа, ми азинлыкоесь шуыса, куке азьланьтӥськомы ӟеч иворез тодытыны но солы адямиосты дышетыны. Малы? Малы ке шуоно озьы ми Инмарлэсь но солэн Пиезлэсь кылзӥськиськомы (Марк 13:10; Ап. уж. 5:28, 29).

19, 20. Малы тужгес но али туж кулэ тодытон уже пыриськыны?

¹⁹ Куд-ог шаеръёсын чорыганы лэземын нимысьтыз толэзьёсы гинэ. Соин ик чорыгасьёслы ӝегатскыны уг яра, тужгес но соку, куке висъям дыр йылпумъяське. «Адями кутылӥсьёслы» но ӝегатсконо ӧвӧл, малы ке шуоно та дуннелэн пумыз матын ини. Адямиосты утён понна туж ӧжыт дыр кылемын. Эн возьмалэ, куке тӥляд улонады ваньмыз туж умой луоз но тӥ быгатоды та кулэ луись уже пыриськыны (Екк. 11:4).

²⁰ Али ик ини малпаське, малы тодытыны кулэ; Библиысь тросгес тодон-валан басьтэ; кышкасьтэм сям будэтэ но асьтэды кияды кутыны дышетске. Быдэс дунне вылын тямыс миллионлэсь но тросгес адямиос луизы «адями кутылӥсьёс». Соосын ӵош ужалэ-тырше, соку тӥ басьтоды шумпотон, кудзэ сётэ Иегова (Неем. 8:10). Юн мылкыдды мед луоз ужан-тыршонын лэсьтыны ваньзэ, мае быгатӥськоды, со дырозь, куке Иегова вералоз, уж йылпумъяськиз шуыса. Вуоно статьяын ми эскеромы, мар юрттоз милемлы мылкыдмес юнматыны Эксэйлык сярысь ӟеч иворез тодытыны.