1. Кызьы милемлы пыӵаны быгатэ та дуннеысь ачид сярысь гинэ малпаськон сям?

 МАЛЫ сокем секыт уже кутыны сое, мае ми Инмарлэн Кылысьтыз тодӥмы? Одӥгез муг — мае ке шонер лэсьтэммы потэ ке, милемлы зӥбыт-востэм луоно, нош зӥбыт-востэм луыны капчи ӧвӧл. Ми «берпум аръёсы» улӥськомы, но котырамы уло адямиос, кудъёсыз Библиын асьсэды асьсэос но коньдонэз гинэ яратӥсесь, ушъяськисесь, мукетъёссэ ултӥясесь но чидасьтэмесь шуыса нимамын (2 Тим. 3:1—3). Ми валаськомы, сыӵе сямъёсты Инмар адӟемпотостэм каре шуыса. Озьы ке но куддыръя ми малпаны быгатӥськомы, сыӵе сямо адямиос шудоесь но соослэн котьмарзы вань шуыса (Пс. 36:1; 72:3). Кин ке тазьы но малпаны быгатоз: «Малы мон, нырысь ачим сярысь малпатэк, мукетъёсыз сярысь малпаны кулэ? Мукетъёсыныз асме „покчиез“ кадь вози ке, соос монэ гажамысь уз дугдэ- а?» (Лука 9:48). Ас сярысьтымы гинэ малпаськыны кутскыса, ми вын-агайёсынымы но сузэр-апайёсынымы кусыпъёсмес сӧромы но та дуннеысь адямиослы тупаны кутскомы.  Нош ми малпаськимы ке Инмарлэн зӥбыт-востэм ужась-тыршисьёсызлэн примеръёссы вылын, кудъёсыз сярысь Библиын гожтэмын, но соослэсь адӟем каримы ке, пайда басьтомы.

2. Кыӵе пайда вае милемлы Иеговалэн оскымон ужась-тыршисьёсызлэн примеръёссы вылын малпаськон?

² Иеговалэн оскымон ужась-тыршисьёсызлэсь адӟем кареммы потэ ке, таӵе юанъёс вылын малпаськоно: мар юрттӥз соослы Инмарен эшъяськыны но соин матысь кусыпъёс возьыны? Кытысь соос кужым басьтӥзы, солэсь эриксэ быдэсъян понна? Озьы ми асьмелэсь осконмес юнматомы.

3, 4. а) Кызьы Иегова милемыз дышетэ? б) Малы, осконмес юнматон понна, тодон-валан басьтыны гинэ тырмыт ӧвӧл?

³ Осконмес юнматон понна, Иегова милемлы Библия пыр, со вылэ пыкиськем публикациос, сайтмы, интернет-телевиденимы но пумиськонъёсмы пыр туж умой визь-кенешъёс но визьман-нодъянъёс сётэ. Но Иисус валэктӥз, тодон-валан басьтэм сяна, милемлы эшшо мар ке но кароно на шуыса. Со вераз: «Мынам сиёнэ — Монэ Ыстӥсьлэсь эриксэ карон но Солэсь ужзэ быдэстон» (Иоанн 4:34).

⁴ Иисус понна Инмарлэсь эриксэ быдэсъян сиён выллем вал. Кызьы сое валано? Кызьы умой сиён мылкыдэз ӝутэ но кужым сётэ, озьы ик Инмарлэсь эриксэ быдэсъян милемлы шумпотон вае но осконмес юнматэ. Тӥ трос учыръёсты тодады ваёды, дыр, куке, тодытонлы сӥзем пумиськонэ мыныкуды, чик кужымды ӧй вал, нош ужам-тыршемды бере бурдъяськыса кадь бертӥды.

5. Ми визьмо лэсьтӥськомы ке, кыӵе со милемлы пайда вае?

⁵ Ми Инмарлэсь кылзӥськиськомы но солэсь эриксэ быдэсъяськомы ке, визьмо лэсьтӥськомы (Пс. 106:43). Кыӵе пайда вае со милемлы? Библиын верамын: «Визьлык шедьтэм мурт шудо... дуно изъёслэсь но со дуногес; одӥгез но кулэ каронэд соин ӵошатскыны уз быгаты. [...] Визьлык басьтӥсьёс-шедьтӥсьёс понна — со улон писпу луэ, шудоесь сое утьыса улӥсь муртъёс» (Мад. 3:13—18). Нош Иисус вераз: «Тае тодӥськоды ке, сое быдэсъяськоды ке, тӥ шудоесь» (Иоанн 13:17). Шудо луон понна, Христослэн дышетскисьёсызлы кароно вал сое, мар Дышетӥсьсы косэ. Соослы котьку Иисуслэсь адӟем кароно но солэн дышетэмезъя улоно вал.

6. Малы милемлы азьланяз но Библиысь тодон-валанэз улонэ пыртоно?

⁶ Туннэ но милемлы кароно сое, мае Инмар шонерен лыдъя. Малы со кулэ шуыса валан понна, эскеромы одӥг примерез. Кылсярысь, автомеханиклэн тодон-валанэз но кулэ луись тӥрлыкъёсыз вань. Но со соосты уже ӧз куты ке, соос солы пайда уз вае. Со, трос аръёс ужаса, туж быгатӥсь ужась луиз ке но, солы азьланяз но ужано, быгатонлыкъёсыз медаз ыше шуыса. Озьы ик ми но. Библиысь тодон-валанэз улонэ пыртыны кутскеммы бере ик ми шумпотон басьтӥмы. Нош азьланяз но шумпотон басьтон понна, милемлы котькуд нунал уже кутоно сое, малы дышетэ Иегова.

7. Кыӵе пайда вае Библиысь примеръёс вылын малпаськон?

⁷ Ойдолэ эскеромы куд-ог учыръёсты, кудъёсаз милемлы кужым пононо луэ, вылды, зӥбыт-востэм кылён понна, но тодомы, кызьы со выллем учыръёсы асьсэды возизы Иеговалэн вашкала дыръя улӥсь ужась-тыршисьёсыз. Но осконмес юнматон понна, со учыръёс сярысь лыдӟыны гинэ ӧжыт, милемлы умой-умой малпаськоно соос вылын но малпано, кызьы со басьтэм тодон-валанэз улонамы пыртоно.

8, 9. Кызьы Павел зӥбыт-востэм луэмзэ возьматӥз Апостолъёслэн ужъёсазы 14:8—15 гожтэм учырын? (Учке статья кутсконысь суредэз.)

⁸ Инмарлэн «вань адямиосты утиськытэмез, зэмлыкез тодытэмез потэ» (1 Тим. 2:4). Нош тӥ кызьы учкиськоды пӧртэм адямиос шоры, кудъёсыз зэмлыкез уг тодо на? Апостол Павел сӥнагогаосысь утчаз ке но адямиосты, кудъёсыз Иегова сярысь ӧжыт ке но тодо вал ини, Эксэйлык сярысь иворез, еврейёслы сяна, со мукет адямиослы но вераз. Мукет инмаръёслы йыбыртъясь адямиослы ӟеч иворез веран Павеллэсь зӥбыт-востэм луэмзэ эскериз.

⁹ Тани одӥг учыр. Нырысетӥзэ пӧртэм шаеръёстӥ тодытыса ветлыкуз, Павел Варнаваен ӵош Листра карын ӟеч иворез вера вал. Отын улӥсьёс малпазы, соос Зевс но Ермий шуыса, кудъёсыз адями тусъем кариськизы. Шумпотӥзы-а солы Павел но Варнава? Малпазы-а соос, та соослы бакель карон луэ шуыса, мукет каръёсын сомында шуг-секытъёсты чидамзы понна? Малпазы-а соос, витьымтэ шорысь тодмо луэмзы соослы ӟеч иворез вераны юрттоз шуыса? Чик но ӧз! Павел но Варнава дӥськутсэс шорияк кесизы, калык пӧлы дыртыса пыризы но бадӟым куараен шуизы: «Мар тӥ лэсьтӥськоды? Ми тӥ кадесь ик адямиос» (Ап. уж. 14:8—15).

10. Малы Павел но Варнава асьсэды Листраын улӥсьёслэсь вылӥ ӧз каре?

¹⁰ «Ми тӥ кадесь ик адямиос» кылъёсын Павеллэн верамез потэ вал, соос но тырбыдэстэм адямиос шуыса. Со кылъёсын со ӧз вера, соос но, Листра карын улӥсьёс кадь ик, зэмос луисьтэм инмаръёслы йыбыртъяло шуыса. Павел но Варнава миссионеръёс вал, кудъёсызлы Инмар нимысьтыз уж сётӥз (Ап. уж. 13:2). Со вын-агайёс святой духен зырӟемын вал, но соослэн туж умой оскиськонзы вал. Озьы ке но соос асьсэды мукетъёсызлэсь вылӥ ӧз каре. Павел но Варнава валало вал, Листраын улӥсьёс ӟеч иворез санэ басьтӥзы ке, соослэн но инмын улыны осконзы луоз шуыса.

11. Кызьы ми Павеллэсь зӥбыт-востэм луэмзэ адӟем карыны быгатӥськомы, ӟеч иворез веракумы?

¹¹ Павел милемлы туж умой пример возьматӥз, кызьы зӥбыт-востэм луоно. Кызьы ми солэсь адӟем карыны быгатӥськомы? Нырысетӥез, ужан-тыршонын ми Иеговалы луыса азинлыко луимы ке, уг яра возьманы, милемыз данъялозы шуыса. Кыкетӥез, умой луысал котькудмылы асьмелэсь юаны: «Кызьы мон учкисько адямиос шоры, кудъёсызлы ӟеч иворез верасько? Ӧз пыӵа-а мыным но кыӵе ке калыкез яке кыӵе ке адямиосты улӥе-вылӥе карон сям, кудӥз ми палан туж вӧлмемын?» Туж шумпотоно, Иеговалэн Адӟись-Ивортӥсьёсыз тыршо шуыса тодыны, кыӵе кылын верасько соос палан улӥсь адямиос, соослы ӟеч иворез ас кылынызы тодыны юрттон понна. Куд-огъёсыз мукет кылэз дышето но тодматско со адямиослэн калык сямъёсынызы, кудъёссэ тросэз ултӥяло. Сыӵе вын-агайёслэн но сузэр-апайёслэн малпанзы но уг кылды асьсэды вылӥ карыны. Соос котькуд адямиез валаны тыршо но юртто солы Эксэйлык сярысь иворез санэ поныны.

12. Кызьы Епафрас мукетъёсыз сярысь сюлмаськемзэ возьматӥз?

¹² Зӥбыт-востэм луэммес ми озьы ик возьматомы на, вӧсяськимы ке соос понна, кинъёс «милемын валче... дунолыко осконэз огкадь кабыл басьтӥ[зы]» (2 Пётр 1:1). Епафрас озьы ик лэсьтӥз. Библиын Епафрас сярысь ньыль пол гинэ верамын — апостол Павеллэн гожтэтъёсаз. Римын, дораз жильыетын пукыкуз, Павел гожъяз Колоссы карын  улӥсь христианъёслы, Епафрас соос понна сюлмысьтыз вӧсяське шуыса (Кол. 4:12). Епафрас вын-агайёсты умой тодэ но зэмзэ ик соос понна сюлмаське вал. Павелэн ӵош пытсэтын пукыкуз но, со вын-агайёсызлэн кулэяськонъёссы сярысь ӧз вунэты (Флм. 23). Макем умой пример возьматӥз со, кызьы мукетъёсыз сярысь сюлмаськоно! Вын-агайёсмы но сузэр-апайёсмы понна вӧсяськеммы, уката ик соослэсь нимзэс вераса ке вӧсяськиськомы, троссэ лэсьтыны быгатэ (2 Кор. 1:11; Иак. 5:16).

13. Кызьы вӧсяськыкуды тӥ Епафраслэсь адӟем карыны быгатӥськоды?

¹³ Малпалэ, кин понна тӥ, нимзэс вераса ик, вӧсяськыны быгатӥськоды. Епафраслэсь адӟем карыса, христианъёс вӧсясько вын-агайёс но сузэр-апайёс понна, кудъёсыз шуг-секытъёсын пумиськемын. Кинлы ке но туж кулэ луись ужпум кутоно, вылды, нош кин ке визь сынаськонэ сюремын. Тросэз асьмеос пӧлысь вӧсясько соос понна, кинъёслэн нимъёссы гожтэмын jw.org сайтын «Страны, где Свидетели Иеговы находятся в заключении за веру» статьяын. (Учке НОВОСТИ > ЮРИДИЧЕСКАЯ СИТУАЦИЯ.) Озьы ик, ми ум вунэтӥське соос сярысь, кинлэн матысь адямиез кулӥз, кинъёс уло отын, кытын алигес ортчизы ожъёс, инкуазь шимучыръёс яке шаеразы экономика удысын шуг-секытъёс кылдэмын. Зэм, трос вын-агайёс но сузэр-апайёс вань, кудъёсыз понна вӧсяськоно. Соос понна вӧсяськыса, ми возьматӥськомы, ас сярысьтымы гинэ ум сюлмаськиське шуыса (Флп. 2:4). Оскыны быгатӥськомы, Иегова сыӵе вӧсяськонъёсмес кылзэ шуыса.

14. Кыӵе адӟем карон возьматэ Иегова, кызьы мукетъёссэ кылзоно?

¹⁴ Кызьы эшшо зӥбыт-востэм луэммес возьматыны луоз? Мукетъёссэ сак кылзыса. Иаковлэн гожтэтаз 1:19 верамын: «Котькудӥз адями кылзӥськись мед луоз». Иегова туж умой пример возьматӥз, кызьы кылзоно (Ул.-выл. 18:32; Иис. Н. 10:14). Малпаломы, малы дышетыны быгатэ милемыз вераськон, кудӥз гожтэмын Потонын 32:11—14 (лыдӟе). Иегова Моисейлэн  визь-кенешъёсызтэк но ужпум кутыны быгатэ вал ке но, со Моисейлы луонлык сётӥз аслэсьтыз малпанзэ вераны. Тӥ Иегова интыын луысалды ке, кылзысалды-а тӥ адямиез, кудӥзлэн малпанэз янгыш, но лэсьтысалды-а озьы, кызьы со ӵектэ? Ӧд, дыр. Нош Иегова чиданзэ возьматэ но ваньзэс кылзэ, кин солы оскыса вӧсяське.

15. Кызьы, Иеговалэсь адӟем карыса, ми мукетъёссэ гажаммес возьматыны быгатӥськомы?

¹⁵ Котькудмылы юано асьмелэсь: «Иегова зӥбыт-востэм луэмзэ возьматэ но адямиосты кылзэ бере (кылсярысь, со кылзӥз Авраамез, Рахилез, Моисеез, Иисус Навинэз, Маноез, Илиез но Езекияез), соку мон но кулэ ӧвӧл-а огъя оскись вын-агайёсме но сузэр-апайёсме гажаны, кылзыны но соослэсь умой визь-кенешъёссэс санэ басьтыны? Ӵыжы-выжыосы яке кенешысьтым вын-агайёс пӧлысь кинлы мон тросгес дырме висъяны быгатысал? Кызьы мон соослы юрттыны быгатысал?» (Ул.-выл. 30:6; Суд. 13:9; 3 Экс. 17:22; 2 Пар. 30:20).

16. Кызьы ассэ возиз Давид, куке Семей солэсь чиданзэ быдтыны тыршиз?

¹⁶ Озьы ик, зӥбыт-востэм сям асьмеды киямы возьыны юрттэ, куке чиданмес быдтыны тыршо (Еф. 4:2). Эскеромы адӟем карымон примерез, кудӥз гожтэмын 2 Эксэйлыкъёслэн 16:5—13 (лыдӟе). Семей, Саул выжыысь адями, Давидлы но солэн вань медоосызлы лек кылъёс вераз но соос вылэ изъёс зӥръяз. Давид сое дугдытыны быгатэ вал ке но, со чидаз. Мар солы юрттӥз? Та юанлы валэктон 3-тӥ Псаломысь шедьтыны луоз.

17. Мар юрттӥз Давидлы ассэ кияз возьыны? Кызьы ми солэсь адӟем карыны быгатӥськомы?

¹⁷ 3-тӥ Псаломез Давид гожтӥз, куке солэн пиез Авессалом сое виыны тыршиз. Ӵапак со вакытэ ик Семей Давид вылэ урдскиз, но Давид ассэ кияз возиз. Мар солы юрттӥз? Псалтирьын 3:5 Давидлэн кылъёсыз гожтэмын: «Куараме поттыса, Кузё-Инмарлы вазиськисько но, Аслаз святой гурезьысеныз Со монэ кылэ». Милемлы пумит шонертэм уж лэсьто ке, ми но Инмарлы вӧсяськыны быгатӥськомы. Нош Иегова вӧсяськеммес кылоз но святой духсэ сётоз, ми ваньзэ чиданы мед быгатомы шуыса. Малпаське, кыӵе учыръёсы милемлы кулэ луоз чидан сям но ӝоже уськытӥсь адямиез простить карыны дась луон. Оскиськоды-а тӥ, Иегова милесьтым вань шуг-секытъёсмес адӟе но одно ик милемлы юрттоз шуыса?

18. Кызьы Инмар милемыз бакель кароз, ми лэсьтӥмы ке сое, мае со шонерен лыдъя?

¹⁸ Ми лэсьтӥмы ке сое, мае Инмар шонерен лыдъя, со милемыз бакель кароз. Мадёнъёсын 4:7 гожтэмын: «Визьлык люка, со ваньмызлэсь бадӟымез». Визьлыко луон понна, тодон-валан кулэ, но со гинэ тырмыт ӧвӧл. Визьлыко луэммы адӟиське отысь, кыӵе ужпумъёс ми кутӥськомы. Библия верамъя, кузьылиос гинэ но «визьлыкоослэсь но визьлыкоесьгес»: соос гужем асьсэлы сиён дасяло (Мад. 30:24, 25). Христос, «Инмар бордысь потэм визьмолык», котьку лэсьтӥз сое, мар Атайзэ шумпоттэ вал (1 Кор. 1:24; Иоанн 8:29). Визьмо ужпумъёс кутэм сяна, милемлы соосъя улоно на. Иегова бакель каре ужась-тыршисьёссэ, кудъёсыз зӥбыт-востэмесь кылё но лэсьто сое, мае со шонерен лыдъя. (Лыдӟе Матфейлэсь 7:21—23.) Ойдолэ тыршомы зӥбыт-востэмесь луыны, кенешысьтымы вын-агайёслы но сузэр-апайёслы зӥбыт-востэмесь луыны капчи мед луоз шуыса. Зэм, котьку шонер ужъёс лэсьтыны капчи ӧвӧл, со понна дыр но чидан кулэ. Но озьы лэсьтӥмы ке, ми шудо луомы.