1. Мар сярысь вераз Иисус дышетскисьёсызлы кулон азяз уе?

 КУЛОН азяз уе Иисус Христос, дышетскисьёсыныз вераськыкуз, ог 30 пол «яратон» кылэз вераз. Со нимысьтыз пусйиз, солэн дышетскисьёсыз ог-огзэс яратыны кулэ шуыса.(Иоанн 15:12, 17). Ӵапак сыӵе юн яратонзыя тодманы кулэ вал зэмос христианъёсты (Иоанн 13:34, 35). Яратон, кудӥз сярысь вераз Иисус, со огшоры шӧдон гинэ ӧвӧл. Со тужгес но умой сям, кудӥз адӟиське нырысь ик мукетъёсыз сярысь сюлмаськемысь. Иисус вераз: «Кин аслэсьтыз лулзэ аслаз эшъёсыз понна сётӥз ке, солэсь но бадӟымез яратон ӧвӧл ни. Мынэсьтым курон-косонъёсме быдэсъяськоды ке, тӥ Мынам эшъёсы луиськоды» (Иоанн 15:13, 14).

2. а) Кыӵе сямзыя тодмо луо Инмарлэн ужась-тыршисьёсыз? б) Кыӵе юанъёсты ми эскеромы та статьяын?

² Иеговалэн ужась-тыршисьёсыз тодмо луо ог-огзэс зэмзэ ик яратэменызы но огкылысь улэменызы (1 Иоанн 3:10, 11). Сыӵе яратонзэс возьмато Иеговалэн вань  ужась-тыршисьёсыз, кыӵе гинэ калыкысь соос медаз луэ но кыӵе гинэ кылын соос медаз вераське. Озьы ке но милям юанъёсмы кылдыны быгато: «Малы тужгес но туннэ адямиосты яратыны кулэ? Кызьы юнматэ милемыз Иеговалэн но Иисуслэн яратэмзы? Кызьы ми вын-агайёсмылы но сузэр-апайёсмылы яратэммес возьматыны но озьы соосты юнматыны быгатӥськомы?» (1 Кор. 8:1).

3. Кызьы шӧдӥсько адямиос вылын та «секыт дыръёс»?

³ Та «секыт дыръёсы» трос адямиослэн улонзы секыт ужъёсын но висён-курадӟонъёсын тырмемын (2 Тим. 3:1—5; Пс. 89:10). Соин сэрен адямиослэн киоссы ик лэзисько. Куд-ог эскеронъёсъя, арлы быдэ 800 000-лэсь тросгес адямиос асьсэды асьсэос быдто, 40 секундлы быдэ кин ке йырзэ быдтэ. Жаляса верано луэ, христианъёс пӧлын но сыӵе учыръёс луыло.

4. Иеговалэн кыӵе ужась-тыршисьёсызлэн кулон сярысь малпанзы кылдылӥз?

⁴ Вашкала дыръёсы Иеговалэн оскымон ужась-тыршисьёсызлэн улоназы но сыӵе югдуръёс кылдылӥзы, кудъёсыныз сэрен соос туж чигтӥськизы но улыны ик мылкыдзы куашкалляз. Кылсярысь, Иов, висемезлы чидатэк, Иеговалы вераз: «Синазькыль луиз мыным улон» (Иов 7:16; 14:13). Инмарлэсь косонзэ быдэстыкуз, Ионалы туж ӧз кельшы, кызьы югдур воштӥськиз. Со шуиз: «Кузё-Инмар, табере басьты мынэсьтым лулме, тазьы улытозь, кулыны умойгес луоз» (Иона 4:3). Нош одӥг пол Илия сэрттыны-пертчыны луонтэм югдуре шедиз шуыса малпаз но Инмарлы, кулон курыса, вазиськиз: «Кузё-Инмаре, тырмоз ини, басьты мынэсьтым лулме» (3 Экс. 19:4). Озьы ке но Иегова туж дунъя вал аслэсьтыз та оскымон ужась-тыршисьёссэ, но солэн потэ вал, соос мед улозы шуыса. Со соосты янгышэ ӧз уськыты кулон сярысь малпамзы понна. Иегова юрттӥз соослы сыӵе малпанъёссэс вормыны но яратыса юнматӥз соосты, азьланяз но солы оскымон ужаны-тыршыны кужымзы мед луоз шуыса.

5. Малы тужгес но туннэ вын-агайёсмес но сузэр-апайёсмес яратыны кулэ?

⁵ Зэм, вань христианъёс кулон сярысь уг малпасько ке но, тросэзлэн, ялан шуг-секытъёсын пумиськеменызы, мылкыдзы куашка, но соослы туж кулэ милям яратэммы. Кин ке уйылон-уллянъёсын пумиське, кинэ ке ултӥяло, кин ке сярысь ужан интыязы кыл вӧлдо. Кинлы ке ялан, уж бере кыльыса, ужано луэ яке ялан тыршоно дырыз дыръя ваньзэ лэсьтыны. Нош куд-ог христианъёслэсь вань кужымзэс быдто семьяязы кылдэм шуг-секытъёс. Кылсярысь, соосты оскисьтэм кузпалзы пыкылэ. Ваньмыз со вын-агайёслэсь но сузэр-апайёслэсь мылкыдзэс но кужымзэс быдтэ. Кин соосыз юнматыны быгатоз?

6. Кызьы Иегова яратыса юнматэ аслэсьтыз ужась-тыршисьёссэ?

⁶ Иегова оскытэ аслэсьтыз ужась-тыршисьёссэ, со ноку но соосты яратэмысь уз дугды шуыса. Макем юнматӥзы, луоз, израиль калыкез Иеговалэн кылъёсыз: «Мынам син азям тон дуно,  мусо, Мон тонэ яратӥ... Эн кышка, Мон тонэн огазьын» (Ис. 43:4, 5). Иеговалэн вань ужась-тыршисьёсыз оскыны быгато, со соосты туж юн яратэ шуыса a. Библиын Иегова сярысь верамын: «Со кужмо, тонэ утёз; тон понна Со шумпотыса шулдыръяськоз» (Соф. 3:16, 17).

7. Маин Иеговалэн яратэмез но анайлэн яратэмез огкадь луо? (Учке статья кутсконысь суредэз.)

⁷ Кыӵе гинэ шуг-секытэн медаз пумиське Иеговалэн ужась-тыршисьёсыз, со кылзэ сётэ, соосты буйгатоз но юнматоз шуыса. Библиын Иеговалэн таӵе кыл сётонэз гожтэмын: «Ки вылазы тӥледыз нуллозы, алвылазы эркияса возёзы. Анайлэн нунызэ эркиямез-лӥятэмез кадь, Мон тӥледыз эркияло-лӥято» (Ис. 66:12, 13). Пуктэ ай син азяды: анай нунызэ яратыса ӝиптэ ас бордаз яке шудэ соин, сое алвылаз возьыса. Со кылъёсын Иеговалэн возьматэмез потэ вал, макем юн яратэ со аслэсьтыз ужась-тыршисьёссэ. Эн вунэтэ: Иегова тӥледыз туж дунъя (Иер. 31:3).

8, 9. Кызьы юнматэ милемыз Христослэн яратэмез?

⁸ Мукетыз муг, малы ми оскыны быгатӥськомы, Иегова милемыз яратэ шуыса, гожтэмын Иоаннлэсь 3:16: «Инмар сокем дуннеез яратӥз, Аслэсьтыз одӥг вордӥськем Пизэ сётӥз, котькудӥз но Солы оскись мурт медаз быры, солэн быронтэм улонэз мед луоз шуыса». Ми понна улонзэ сётыса, Иисус но милемыз яратэмзэ возьматӥз. Солэн яратэмез туж юнматэ милемыз. Инмарлэн Кылыз оскытэ, куректон-кайгу но, ёртыса возён но Христослэн яратонэзлэсь  асьмеды уз люкы шуыса (Рим. 8:35, 38, 39).

⁹ Шуг-секытъёс милесьтым мылкыдмес куашкато но вань кужыммес быдто. Нош Христослэн яратэмез сярысь малпаськон юрттоз милемлы ваньзэ чиданы. (Лыдӟе 2 Коринфъёслы 5:14, 15.) Иисуслэн яратэмез милесьтым мылкыдмес ӝутэ улыны но азьланяз но Иеговалы ужаны-тыршыны. Ми инкуазь шимучыръёсын но уйылон-уллянъёсын пумиськиськомы яке урод малпанъёсынымы нюръяськиськомы ке но, со милемлы кужым сётэ чиданы.

10, 11. Кин юнматыны кулэ соосты, кинъёслэн мылкыдзы куашкамын? Валэктэ.

¹⁰ Озьы ик, Иегова юнматэ милемыз христиан кенеш пыр. Ми солэн яратэмез понна тау кареммес возьматӥськомы, вын-агайёсмес но сузэр-апайёсмес яратыса но юнматыса соосты (1 Иоанн 4:19—21). Апостол Павел ӧтиз христианъёсты: «Кызьы тӥ али лэсьтӥськоды, азьланяз но ог-огдылэсь мылкыддэс ӝутэ, ог-огдэс юнматэ» (1 Фес. 5:11). Зэм, тӧроос сяна, ваньмы асьмеос быгатӥськомы вын-агайёсмес но сузэр-апайёсмес буйгатыны но юнматыны, Иеговалэсь но Иисуслэсь адӟем карыса. (Лыдӟе Римъёслы 15:1, 2.)

¹¹ Кенешын кин ке секыт депрессиен курадӟе яке ялан кышканэн улэ ке, солы эмъясьёслэн юрттэтсы кулэ луоз но нимысьтыз эмъяськон ортчоно луоз, вылды (Лука 5:31). Тӧроос но кенешысь мукет христианъёс валало, соос эмъясьёс ӧвӧл шуыса. Озьы ке но соос сыӵе христианъёслы трос юрттэт  сётыны быгато, Библиысь таӵе визь-кенешлэсь кылзӥськыса: «Усем мылкыдын улӥсьёслэсь мылкыдзэс ӝутэ, начаръёслы юрттӥське. Котькытын, котьма ласянь чидасесь луэ» (1 Фес. 5:14). Ваньмылы кулэ валась но чидась луыны соосын, кинъёслэн мылкыдзы куашкамын, но буйгатыны соосты. Тыршиськоды-а тӥ юнматыны сыӵе вын-агайёсты но сузэр-апайёсты? Тыршиськоды ке, мар карыны тӥ быгатӥськоды на, соослы эшшо тросгес юрттон понна?

12. Вералэ, кызьы вын-агайёс но сузэр-апайёс кенешысь кинэ ке яратыса юнматӥзы.

¹² Европаын улӥсь сузэр вера: «Куддыръя мон асме ачим быдтон сярысь малпаськыны кутскисько. Но мынам трос буйгатӥсьёсы. Кенеш ке ӧй луысал, мон улэп ӧй луысал ни. Вын-агайёс но сузэр-апайёс котьку юнмато монэ но яратыса сюлмасько мон сярысь. Мон депрессиен курадӟисько шуыса куд-огез гинэ тодэ ке но, вань вын-агайёс но сузэр-апайёс котьку дась мыным юрттыны. Кенешысь одӥг кузпалъёс мыным духовной анай-атай луизы. Соос туж сюлмасько мон сярысь но котьку дась мыным юрттыны, уй но, нунал но». Зэм, кенешын ваньмыз сомында юрттыны уг быгато. Но котькудмы асьмеос троссэ лэсьтыны быгатӥськомы вын-агайёсмы но сузэр-апайёсмы понна, кудъёсызлы юнматон кулэ b.

13. Мае тодамы возёно, мукетъёссэ юнматыкумы?

¹³ Кылзӥське (Иак. 1:19). Ми сак кылзӥськомы ке вын-агаез яке сузэр-апаез, кудӥзлы секыт, озьы ми возьматӥськомы, сое яратӥськомы шуыса. Лякытэн юанъёс сётъяса, ми валаны быгатомы солэсь шӧдонъёссэ. Нош вын-агаймы яке сузэр-апаймы милям ымныр тусмыя валалоз, ми зэмзэ ик со сярысь сюлмаськиськомы шуыса. Шӧдӥськоды ке, адямилэн тӥледлы сюлэмзэ усьтэмез потэ шуыса, кылзэ сое но кыл куспаз эн пыре. Сое сак кылзыса, тӥ умойгес валалоды, мар солэн сюлэмаз. Адями адӟоз, тӥляд зэмзэ ик солы юрттэмды потэ шуыса, но оскиськоз тӥледлы. Соку тӥ сое буйгатыны быгатоды.

14. Малы депрессиен курадӟись адямиез судить карыны уг яра?

¹⁴ Судить эн каре. Малпатэк верам кылъёсынымы ми эшшо но вӧсь карыны быгатомы депрессиен курадӟись адямиез но солы юрттыны ум быгатэ ни. Мадёнъёсын 12:18 гожтэмын: «Юнме кыл тэкшерись пуртэн кадь вандэ, нош визьмо муртлэн кылыз эмъя» (Мад. 12:18). Зэм, ми сыӵе адямиез юри вӧсь ум каре. Озьы ке но милям кылъёсмы солэсь сюлэмзэ туж вӧсь карыны быгатозы. Милемлы туж тыршыны кулэ солэсь шӧдонъёссэ валаны но сое юнматыны (Матф. 7:12).

15. Мар юрттоз милемлы вын-агайёсмес но сузэр-апайёсмес буйгатыны?

¹⁵ Буйгатэ, Библиез уже кутыса. (Лыдӟе Римъёслы 15:4, 5.) Библия — буйгатӥсь малпанъёсын тырмытэм шыкыс. Сое милемлы кузьмаз «чидан но буйгатскон» сётӥсь Инмар. Озьы ик милям вань эскерон понна тӥрлыкъёсмы,  кылсярысь, «Возьмаськон Башнялэн публикациосызлэн индекссы» но «Иеговалэн Адӟись-Ивортӥсьёсызлэн публикациоссыя эскерыны юрттэт», кудъёсыз ӟуч кылын поттэмын. Соосты уже кутыса, луоз шедьтыны юнматӥсь малпанъёс но Библиысь тупась кылбуръёс, кудъёсыз юрттозы адямилы пӧртэм шуг-секытъёссэ вормыны.

16. Кыӵе сямъёс юрттозы милемлы куашкам мылкыдо адямиез юнматыны?

¹⁶ Шӧдӥсь-валась но ӟечлыко луэ. Иегова — «гажан-жалянлэн Атаез» но «котькыӵе буйгатсконлэн Инмарез». Со туж гажа-жаля аслэсьтыз ужась-тыршисьёссэ. (Лыдӟе 2 Коринфъёслы 1:3—6; Лука 1:78; Рим. 15:13). Павел ӵапак озьы возиз ассэ вын-агайёсын но сузэр-апайёсын но милемлы туж умой пример кельтӥз. Со гожтӥз: «Ми тӥ пӧлын зӥбыт-востэм улӥмы,— нунызэ нонтӥсь анай кадь, кызьы со лякытэн утялтэ аслэсьтыз нылпиоссэ. Ми тӥледыз вань лулынымы-сюлмынымы яратӥмы, соин ик Инмарлэсь Ӟеч Иворзэ гинэ ӧвӧл, асьмелэсь лулмес но тӥледлы сётыны дасесь вал, сокем тӥ милемлы дуноесь-гажаноесь луиды» (1 Фес. 2:7, 8). Иеговалэсь адӟем карыса, шӧдӥсь-валась луиськомы ке, ми буйгатыны быгатомы куашкам мылкыдо вын-агаймес яке сузэр-апаймес, кудӥз буйгатскон курыса Инмарлы вӧсяськиз.

17. Мар кароно, мукетъёссэ юнматон понна?

¹⁷ Эн возьмалэ мукетъёсызлэсь тырбыдэс луэмзэс. Шонер учке вын-агайёс но сузэр-апайёс шоры но эн малпалэ, соос ноку но уз янгышалэ шуыса (Екк. 7:21, 22). Тодады возе: Иегова уг возьма милесьтым сое, мар карыны ми ум быгатӥське. Соин ик милемлы но ог-огмес чидано (Еф. 4:2, 32). Вын-агайёс но сузэр-апайёс медаз малпалэ, соос Инмарлы мукетъёсыз сярысь ӧжытгес тыршо шуыса. Милемлы ушъяно соосты пичи ке но тыршемзы понна. Сюлмысь ушъян адямиез бурдъя, юнматэ но Иеговалы ужан-тыршонын шумпотон понна муг шедьтыны юрттэ (Гал. 6:4).

18. Мар милесьтым мылкыдмес ӝутэ ог-огмес юнматыны?

¹⁸ Иегова но Иисус туж дунъяло Инмарлэсь котькудзэ ужась-тыршисьсэ (Гал. 2:20). Ми ӟырдыт яратӥськомы вын-агайёсмес но сузэр-апайёсмес, но милям потэ, соос сюлмаськеммес но ӟечлыко луэммес мед шӧдозы шуыса. Соин ик ойдолэ «утчаломе сыӵе улонэз, кудӥз тупаса улонэз вае» но «ог-огмес валэктыса-дышетыса уломе» (Рм 14:19). Макем ми возьмаськомы выль дуннеез, кудаз милям ноку но кайгырон понна мугъёсмы уз луэ ни! Висёнъёс, ожъёс, оскон понна уйылон-уллянъёс, мылкыд куашкан но семья куспын тэрымтэос вунозы-бырозы. Нокин но Адамлэсь выжем сьӧлык понна уз кулы ни! Христослэн сюрс ар ӵоже кивалтонэз йылпумъяськем бере вань адямиос тырбыдэсэсь луозы. Соосты, кинъёс берпуметӥ визь сынаськонын Инмарлы оскымон кылёзы, Иегова аслыз нылпие басьтоз. Соос солэн музъем вылысь нылпиосыз луозы но «Инмар нылпиослэн кадь ик данлыко эрикез» басьтозы (Рим. 8:21). Ойдолэ яратыса юнматомы вын-агайёсмес но сузэр-апайёсмес, ваньмы асьмеос сыӵе умой кузьымез басьтыны мед быгатомы шуыса!