1. Кыӵе мылкыдын тодытӥз Иисус но адӟем каризы-а солэсь дышетскисьёсыз? (Учке вылбамысь суредэз.)

 МУЗЪЕМ вылын ужакуз-тыршыкуз, Иисус умой мылкыдын тодытӥз. Солэн потэ вал, дышетскисьёсыз но шумпотыса мед тодытозы шуыса (Иоанн 4:35, 36). Куке Иисус музъем вылын вал на, солэн дышетскисьёсыз ӟырдыт мылкыдын тодытӥзы (Лука 10:1, 5—11, 17). Нош куке Иисусэз кутӥзы но виизы, соослэн мылкыдзы сӥяз (Иоанн 16:32). Соин ик улӟемез бере Иисус дышетскисьёсызлэсь мылкыдзэс ӝутӥз тодытон ужез нырысетӥ интые пуктыны. Солы луыса инме ӝутскемез бере соос сокем ӟырдыт мылкыдын тодытыны кутскизы, тушмонъёссы но йыркуръяськыса ик веразы: «Тӥ асьтэлэсь дышетондэс быдэс Иерусалиме вӧлмытӥды ини» (Ап. уж. 5:28).

2. Кызьы Иегова христианъёслы тодытон ужын юрттэ?

² Тодытон ужен, кудаз нырысетӥ даурысь христианъёс пыриськизы, Иисус кивалтӥз. Нош Иегова ужась-тыршисьёсызлы та ужез быдэсъяны юрттӥз. Соин ик тросэз Эксэйлык сярысь иворез кылзӥзы. Кылсярысь, асьме вакытысь 33-тӥ арын ортчем Витьтонэтӥ нуналэ ог куинь сюрс адямиос пылатӥськизы (Ап. уж. 2:41). Дышетскисьёслэн лыдзы шӧдскымон йылыны кутскиз (Ап. уж. 6:7). Нош Иисус вераз, берпум нуналъёсы тодытон уж эшшо но паськытгес вӧлмоз шуыса (Иоанн 14:12; Ап. уж. 1:8).

3, 4. Малы куд-ог интыосын тодытыны туж ик капчи ӧвӧл? Мае ми эскеромы та статьяын?

³ Ваньмы ми тыршиськомы шумпотыса тодытыны. Куд-ог шаеръёсын со секыт ӧвӧл. Отын сокем трос адямиослэн  Библиез дышетэмзы потэ, соос пӧлысь куд-огъёсызлы асьсэлэсь черодзэс возьманы но кулэ луэ. Нош куд-ог шаеръёсын тодытыны туж ик капчи ӧвӧл, малы ке шуоно адямиосты дорысьтызы шедьтыны секыт. Нош соослэн, кинъёсты дорысьтызы шедьтыны быгатӥськомы, Библия сярысь вераськыны мылкыдзы ӧвӧл.

⁴ Тӥ улӥськоды ке отын, кытын тодытыны туж ик капчи ӧвӧл, тӥледлы та статьяысь визь-кенешъёс юрттозы, дыр. Ми эскеромы, мар каро куд-ог вын-агайёс но сузэр-апайёс, ӟеч иворез тросгес адямиослы веран понна? Со сяна, ми тодомы, мар юрттоз милемлы шумпотыса улыны соку но, куке адямиос милемыз уг кылзо?

5. Кыӵе шуг-секытъёсын пумиськыло трос вын-агайёс но сузэр-апайёс?

⁵ Вын-агайёс но сузэр-апайёс пӧлысь тросэзлы адямиосты дорысьтызы шедьтыны секытгес но секытгес луэ. Куд-ог ивортӥсьёс уло отын, кытын трос юртъеръёс но коркаос, кудъёсаз пырыны уг луы. Ӵем дыръя консьержъёс яке охранникъёс пырыны лэзё соосты гинэ, кинъёсты та коркаосын улӥсьёс куное ӧтизы. Мукет ивортӥсьёслы коркась корка тодытыны номыр уг люкеты ке но, соос туж ӧжыт адямиосты дорысьтызы шедьто. Нош куд-ог вын-агайёс но сузэр-апайёс тодыто сыӵе интыосын, кытын туж ӧжыт адямиос уло. Одӥг адямиен ке но вераськон понна, соос туж кыдёке мыноно луо, нош куддыръя со адями но дораз уг луы. Таӵе шуг-секытъёсын пумиськыкумы, милемлы киосмес лэзёно ӧвӧл. Мар кароно сыӵе шуг-секытъёсын пумиськыкумы? Озьы ик мар кароно, тросгес адямиослы ӟеч иворез веран понна?

6. Маин тодытӥсьёс кельшо чорыгасьёслы?

⁶ Иисус тодытон ужез ӵошатӥз чорыганэн (Марк 1:17). Куддыръя чорыгась кӧня ке нуналъёс ӵоже нокыӵе чорыгез кутыны уг быгаты. Но со киоссэ уг лэзьы. Со мае ке воштыны тырше — дырез, интыез яке чорыган амалэз. Тодытыкумы ми но мае ке воштыны быгатӥськомы. Эскеромы куд-ог визь-кенешъёсты.

7. Кыӵе емышъёс вайыны быгатэ пӧртэм дыре тодытон?

⁷ Тодытэ пӧртэм дыре. Ми тросгес адямиосты дорысьтызы шедьтомы, тодытӥмы ке соку, куке соос доразы луыны кулэ. Соос куке но доразы бертыны кулэ ук! Тросэз вын-агайёс но сузэр-апайёс тодыто нуназе яке ӝытазе, малы ке шуоно ӵапак соку соос тросгес адямиосты дорысьтызы шедьтыны быгато. Адямиос но милемыз кылзыны дась луозы но нокытчы уз дыртэ, дыр. Тӥледлы кельшоз, вылды, амал, кудзэ уже кутэ Дэвид нимо тӧро. Куке со мукет ивортӥсен тодытон понна участокын ӟеч иворез вера, одӥг-кык час ортчыса, со нош ик лыктэ отчы, кытын нокинэ шедьтыны ӧз быгаты. Со вера: «Туж паймоно кадь, кӧня адямиосты ми шедьтӥськомы, выльысь лыктыса!» b

8. Кызьы ужан-тыршонын уже кутыны луэ кылъёсты, кудъёсыз гожтэмын Екклесиастын 11:6?

⁸ Милемлы киосмес лэзёно ӧвӧл. Ӵапак со сярысь тодамы вайытэ та статьялы валтӥсь кылбур. (Лыдӟе Екклесиастэз 11:6.) Дэвид но сыӵе ик мылкыдын тодытэ. Тани кыӵе учыр соин луиз. Одӥг коркась Дэвид нокинэ шедьтыны уг быгаты вал. Со выльысь но выльысь отчы ветлӥз. Одӥг пол ӧсэз усьтӥз пиосмурт. Со шумпотыса Библия сярысь вераськиз но вераз: «Мон татын  ог тямыс ар улӥсько ини, но Адӟись-Ивортӥсьёс мон доры одӥг пол но ӧз ветлэ на». Дэвид вера: «Мон валай, кема тыршемед бере тон адямиез дорысьтыз шедьтӥськод ке, ӵем дыръя соос ӟеч иворез шумпотыса кылзо».

9. Мар каризы куд-ог Адӟись-Ивортӥсьёс, вераськон понна соосын, кинъёсты дорысьтызы шедьтыны уг луы?

⁹ Тодытэ пӧртэм интыосын. Куд-ог Адӟись-Ивортӥсьёс тодытыны кутскизы пӧртэм интыосын, ӟеч иворез веран понна соослы, кинъёсты дорысьтызы шедьтыны уг быгато. Кылсярысь, урамын яке стендъёсын тодытыку, пумитаны луэ соосты, кинъёс уло сыӵе коркаосын, кытын тодытыны уг лэзё. Озьы ик тросэз вын-агайёс но сузэр апайёс валазы: паркъёсын, базаръёсын но ужан интыосазы адямиос умойгес мылкыдын милемын верасько но публикациосмес басьто. Флойран, Боливиысь ёросэз чаклась вера: «Ми тодытӥськомы базаръёсын но вузкарон интыосын нуназе бере, одӥг часысен куинь часозь. Соку вузкарисьёслэн ужзы ӧжытгес. Ми трос адямиосын умой вераськыны быгатӥськомы. Куд-огъёсыныз Библиез дышетыны но кутскиськомы».

10. Тодытон понна кыӵе эшшо амалъёсты тӥ уже кутыны быгатӥськоды?

¹⁰ Тодытэ пӧртэм амалъёсын. Шуом, тӥ трос пол тыршиды адямиез дорысьтыз шедьтыны. Тӥ ветлӥды пӧртэм дыре, но шедьтыны ӧд быгатэ. Вань на-а мукет амалъёс, та адямилы ӟеч иворез веран понна? Тани мар вера Катарина сузэр: «Адямиослы, кудъёссэ огпол но дорысьтызы шедьтыны ӧй быгаты, мон гожтэтъёс гожъясько. Мон верасько со сярысь, мае верасал, соосты пумитаны быгатысал ке». Малы та милемыз  дышетэ? Тодытон понна участокын котькуд адямилы ӟеч иворез вераны тырше, пӧртэм амалъёсты уже кутыса.

11. Малы куд-ог адямиослэн ивормес кылзэмзы уг поты?

¹¹ Куд-ог адямиос ивормес уг кылзо. Соослэн Инмар сярысь но, Библия сярысь но тодэмзы уг поты. Дуннеысь шуг-секытъёсты адӟыса, соос Инмарлы уг оско. Соослэн Библия сярысь номыр тодэмзы уг поты, малы ке шуоно религиозной кивалтӥсьёс верало ке но, Инмарлэсь курон-косонъёссэ быдэсъяло шуыса, асьсэос озьы уг уло. Нош мукетъёсыз вань саклыксэс висъяло ужзылы, семьязылы яке асьсэлэн шуг-секытъёссылы. Соос малпало, Библия соослы юрттыны уг быгаты шуыса. Мар кароно, шумпотонмес медам ыштэ шуыса, адямиослэн ивормес кылзэмзы уг поты ке но?

12. Кызьы кылъёс, кудъёсыз гожтэмын Филиппыослы 2:4, милемлы ужан-тыршонын юртто?

¹² Возьматэ адямиослы сюлмысь тунсыкъяськемдэс. Соос, кинъёслэн милемыз нырысь кылзэмзы ӧз поты, берлогес ӟеч иворез кылзӥзы, малы ке шуоно адӟизы, ивортӥсь соосын сюлмысь тунсыкъяське шуыса. (Лыдӟе Филиппыослы 2:4.) Дэвид, кудӥз сярысь вераськиз ини, шуэ: «Ми адямиен вераськыны кутскиськомы ке, нош со вера ке, солы тунсыко ӧвӧл шуыса, ми соку ик Библимес но публикациосмес сумкаямы понӥськомы но юаськомы: „Яра-а юаны, малы со тӥледлы тунсыко уг поты?“» Адямиос шӧдо, ми соослэсь малпанъёссэс но шӧдонъёссэс лыдэ басьтӥськомы шуыса. Верам кылъёсмес соос вунэтыны но быгато. Но соос уз вунэтэ, дыр, мае шӧдӥзы, милемын вераськыса. Адями милемыз ӧз кылзы ке но, асьмеды соин лякыт воземмы возьматоз, кызьы ми со шоры учкиськомы.

13. Мар карыны ми быгатӥськомы, ивормы котькуд адямилы тунсыко мед луоз шуыса?

¹³ Ми возьматӥськомы, адямиен сюлмысь тунсыкъяськиськомы шуыса, куке солэсь кулэяськонъёссэ лыдэ басьтӥськомы. Шуом, тӥ адӟиды, коркан нылпи вань шуыса. Соку умой луысал адямиен эскерыны Библиысь возетъёсты, кудъёсыз нылпиосты будэтыны юртто. Яке вераськыны луоз со сярысь, кызьы Библия семьяослы юрттыны быгатэ шудогес луыны. Яке, шуом, тӥ адӟиды ӧс бордысь трос тунгонъёсты. Соку вераськыны луоз, кызьы трос йыружъёс сэрен туннэ тросэз кышкаса уло, но со сярысь, кызьы та шуг-секыт сэрттэмын-пертчемын луоз. Мар сярысь гинэ тӥ медад вераське, адямилы возьматыны тырше, кызьы Библия  солы юрттыны быгатэ. Катарина, кудӥз сярысь вераськиз ини, шуэ: «Мон аслым тодам вайытӥсько, кызьы зэмлык мынэсьтым улонме умой пала воштӥз». Та юрттэ Катариналы вераськыны юн осконэн, кудзэ адямиос но адӟо.

14. Кызьы ивортӥсьёс тодытыкузы ог-огзылы юрттыны быгато, Мадёнъёсты 27:17 лыдэ басьтыса?

¹⁴ Эн палэнтэ вын-агайёслэсь но сузэр-апайёслэсь юрттэтсэс. Апостол Павел Тимофейлы валэктӥз, кызьы тодытоно но адямиосты зэмлыклы дышетоно. Озьы ик со Тимофейлэсь мылкыдзэ ӝутӥз та тодон-валанъёссэ уже кутыны, мукет христианъёслы юрттон понна (1 Кор. 4:17). Тимофей сямен, милям но дышетскеммы луэ быгатӥсь вын-агайёслэсь но сузэр-апайёслэсь. (Лыдӟе Мадёнъёсты 27:17.) Тани Шон агайлэн учырез. Кӧня ке дыр ӵоже со пионер луыса ужаз-тыршиз. Со тодытӥз гуртын улӥсь адямиослы, кудъёсызлы асьсэлэн осконзы кельше вал. Мар юрттӥз Шонлы шумпотонзэ ыштытэк улыны? Со вера: «Луонлык вань дыръя мон котьку но тырши мукет ивортӥсен ӵош тодытыны. Одӥг корка дорысь мукет корка доры мыныкумы, ми тыршимы дышетон быгатонлыкъёсмес умоятыны. Кылсярысь, ми малпаськимы, кызьы адямиен вераськимы, но малпамы, мае мукет сямен карыны луоз, сыӵе учыр нош ик кылдӥз ке».

15. Малы вӧсяськон ужан-тыршонын бадӟым инты басьтэ?

¹⁵ Вӧсяське Иеговалы, юрттэт курыса. Тодытон азяды котьку но вӧсяське. Иеговалэн кужмо святой духез ӧз юртты ке, ми азинлыко ум луэ (Пс. 126:1; Лука 11:13). Иеговалы вӧсяськыкуды, пыр-поч вералэ, кыӵе тӥледлы юрттэт кулэ. Кылсярысь, куре тӥледыз ыстыны адями доры, кудӥзлэн Инмар сярысь тодэмез потэ но кудӥз тӥледыз кылзыны дась. Собере вӧсяськемдыя лэсьтэ. Тодытэ котькинлы, кинэ пумитаськоды.

16. Малы ас поннад Библиез эскероно, ужан-тыршон эшшо но тросгес пайда мед ваёз шуыса?

¹⁶ Дыр висъялэ, ас поннады Библиез эскерон понна. Библия милесьтым мылкыдмес ӝутэ: «Тодыны мед быгатоды: мае тӥлесьтыд Инмар возьма, кыӵе уж Солы ӟеч, ярамон, дун-шектэм луэ» (Рим. 12:2). Куке ми ас поннамы эскерон ортчытӥськомы, ми Инмарез умойгес но умойгес тодӥськомы. Соку, адямиосын Инмар сярысь вераськыкумы, соос адӟо, ми зэмзэ ик оскиськомы шуыса солы, мае ми вераськомы. Катарина вера: «Кемалась ӧвӧл мон валай, Библиысь валтӥсь дышетонъёслы осконме юнматоно шуыса. Соин ик мон сак эскери оскытыса веранъёсты, кудъёсыз возьмато: Кылдытӥсь вань, Библия — со Инмарлэн Кылыз но Иеговалэн туннэ организациез вань». Ас понназ Библиез эскерыса, Катарина аслэсьтыз осконзэ юнматӥз, нош тодытон уж солы эшшо но тросгес шумпотон вайыны кутскиз.

17. Мар юрттӥз Иисуслы шумпотыса тодытыны?

¹⁷ Куд-ог адямиос Иисусэз ӧз кылзэ ке но, со азьланяз но шумпотыса тодытӥз. Мар солы юрттӥз? Со тодӥз, котькуд адямилы зэмлыкез кылоно шуыса. Озьы ик солэн потэ вал тросгес адямиослы юрттэмез. Со сяна, Иисус валаз, соос, кинъёслэн сое нырысь кылзэмзы ӧз поты, берлогес ӟеч иворез кылзозы шуыса. Тодамы ваёмы Иисуслэсь самой матысь ӵыжы-выжыоссэ. Музъем вылын куинь но ӝыны ар ӵоже ужакуз-тыршыкуз, вынъёсыз пӧлысь одӥгез но солэн дышетскисез ӧз луы (Иоанн 7:5). Нош Иисуслэн улӟемез бере вынъёсыз солы оскизы (Ап. уж. 1:14).

18. Малы ми тодытэмысь ум дугдӥське?

 ¹⁸ Ми ум тодӥське, кин кылзоз Библиысь зэмлыкез, кудзэ ми тодытӥськомы. Одӥгъёсызлы со понна тросгес дыр кулэ, мукетъёсызлы — ӧжытгес. Соос но, кинъёслэн милемыз кылзэмзы уг поты но кинъёс адӟо милесьтым ӟеч ужъёсмес но умой мылкыдмес, дыр ортчыса, Иеговалэн Адӟись-Ивортӥсьёсыз луыны быгато (1 Пётр 2:12).

19. Кыӵе зэмлык сярысь милемлы тодамы возёно, кудӥз сярысь гожтэмын 1 Коринфъёслы 3:6, 7?

¹⁹ Ойдолэ тодамы возёмы: ми зэмлык кидысъёсты кизиськомы но соос вылэ ву киськаськомы ке но, соосты будэтэ Инмар. (Лыдӟе 1 Коринфъёслы 3:6, 7.) Тани мар вера Гетахун нимо агай, кудӥз Эфиопиын ужа-тырше: «Мон ужай-тырши шер тодытӥськись интыын. 20 арлэсь но кемагес, мон сяна, мукет Адӟись-Ивортӥсьёс отын ӧй вал. Нош али татын 14 ивортӥсьёс. Соос пӧлын 13 пылатӥськем ивортӥсьёс, отчы пыро мынам кышное но куинь нылпиосы. Нош пумиськонъёсы ог 32 адямиос ветло». Гетахун шумпотэ, тодытэмысь ӧз дугды но чидаса возьмаз шуыса, куке Иегова аслаз организацияз зӥбыт-востэм адямиосты ваёз (Иоанн 6:44).

20. Маин милям ужан-тыршонмы кельше адямиосты утён ужлы?

²⁰ Иегова котькуд адямилэсь улонзэ дунъя. Со милемлы дано уж сётӥз солэн Пиеныз ӵош ужаны — та дуннелэн пумыз вуытозь, вань калыкъёс пӧлысь адямиосты люканы (Агг. 2:7). Милесьтым ужан-тыршонмес ӵошатыны луэ адямиосты утён ужен, нош милемыз — утисьёсын, кудъёссэ ыстӥзы шимучыре сюрем адямиосты мозмытыны. Улэп адямиосты вань утисьёс уг шедьто ке но, котькудӥзлэн тыршемез кулэ луэ. Тае ик вераны луэ милям ужан-тыршонмы сярысь но. Ми ум тодӥське, кӧня адямиосты Шайтанлэн дуннеысьтыз утьыны луоз на. Но Иегова ми пӧлысь котькудзэ кутыны быгатэ, соослы юрттон понна. Тани мар вера Андреас агай, кудӥз Боливиын улэ: «Мон тодӥсько, адями зэмлыкен тодматскыны но пылатӥськыны быгатэ ваньмылэн тыршеммылы луыса». Ойдолэ ужан-тыршонмы шоры таӵе ик умой мылкыдын учкомы. Соку Иегова милемыз бакель кароз но, ужан-тыршонмы трос шумпотон ваёз!