1, 2. а) Мае вералозы ӝоген калыкъёс? б) Кыӵе юанъёслы валэктонъёс шедьтоно?

 ПУКТЭ син азяды: калыкъёс кема возьмам кылъёсты веразы, «тупаса улон, кышкатэк улон» вуиз шуыса. Соос ушъясько, дыр, адямиос ноку но сокем тупаса ӧз улэ на шуыса. Политика удысысь кивалтӥсьёс милемыз оскытыны тыршо, соос дуннеысь вань шуг-секытъёсты сэрттыны-пертчыны быгатозы шуыса. Нош зэмзэ вераса, соос уз быгатэ чакласа возьыны югдурез, кудӥз собере луоз! Библиысь азьпалзэ ивортэмъя, «соку шӧдтэк шорысь... соос доры бырон вуоз» но «нокин но ватӥськыны уз быгаты» (1 Фес. 5:3).

² Вань куд-ог кулэ луись юанъёс, кудъёсызлы валэктонъёс шедьтоно: мар луоз «бадӟым куректон» дыръя? Мае милесьтым Иегова возьмалоз? Кызьы милемлы али ик ини дасяськоно, «бадӟым куректон» дыръя Инмарлы оскымон мед кылёмы шуыса? (Матф. 24:21).

3. Кызьы, Усьтӥськонын 17:5, 15—18 гожтэмъя, Инмар «Быдӟым Вавилонэз» быдтоз?

³ Лыдӟе Усьтӥськонэз 17:5, 15—18. «Быдӟым Вавилон» быдтэмын луоз! Кызьы? «Инмар соослэн [калыкъёслэн] сюлмазы Аслэсьтыз эриксэ» быдэстыны мылкыд поноз. Кыӵе эрик сярысь вераськон мынэ? Дунне вылысь вань зэмос луисьтэм религиосты быдтыны, озьы ик со религиосты но, кудъёсыз асьсэды христиан шуыса нимало, нош  уг дышето Иеговалы солэн курон-косонъёсызъя йыбыртъяны. Та эрикез быдэстыны мылкыд Инмар «нап-горд пӧйшурлэн» «дас сюръёсызлэн» сюлмазы поноз. Дас сюръёс возьмато вань кивалтэтъёсты, кудъёсыз султо «пӧйшур» пала — Огазеяськем Нациослэн Организацизы пала (Усьт. 17:3, 11—13; 18:8). Соослэн зэмос луисьтэм религиос вылэ урдскемзы возьматоз, бадӟым куректон кутскиз шуыса. Со шӧдтэк шорысь кылдэм кышкыт югдур вань адямиос вылын шӧдӥськоз.

4. а) Кызьы калыкъёс валэктыны быгатозы зэмос луисьтэм религия вылэ урдскемзэс? б) Кызьы асьсэды возёзы, вылды, религиозной организациосы ветлэм адямиос?

⁴ Ми ум тодӥське, кызьы калыкъёс Быдӟым Вавилон вылэ урдскемзэс валэктозы. Соос вераны быгатозы, дуннеысь религиос тупаса улон вайыны люкето но котьку но политикае пырисько шуыса. Яке соос вераны быгатозы, религиос укыр трос узырлык но ваньбур люказы шуыса (Усьт. 18:3, 7). Со уз возьматы, дыр, та религиосы ветлӥсь вань адямиос быдтэмын луозы шуыса. Калыкъёс религиозной организациосты быдтозы, луоз. Куке та организациос уз луэ ни, отчы ветлэм адямиос валалозы, религия удысысь азьмынӥсьёс соосты пӧязы шуыса. Соос вералозы, дыр: «Ми та религиосын ноку но герӟаськемын ӧй вал».

5. Мар карыны Иегова кылзэ сётӥз но малы?

⁵ Библиын верамын ӧвӧл, кӧня кыстӥськоз Быдӟым Вавилонэз быдтон, нош ми тодӥськомы, со кема дыр ӵоже уз луы шуыса (Усьт. 18:10, 21). Иегова кылзэ сётӥз, аслэсьтыз быръем адямиоссэ но зэмос религиез утён понна, со нуналъёсты вакчиятоз шуыса (Марк 13:19, 20). Нош мае возьмалоз милесьтым Иегова бадӟым куректон кутскем дырысен Армагеддон ожмаськонозь?

6. Малы зэмос луисьтэм религилэсь палэнын возиськыны гинэ ӧжыт луоз?

⁶ Кызьы азьло статьяын верамын вал, Иегова возьма, солэн ужась-тыршисьёсыз Быдӟым Вавилонлэсь палэнын возиськозы шуыса. Но зэмос луисьтэм религилэсь палэнын возиськыны гинэ ӧжыт луоз.  Озьы ик милемлы юн мылкыдын Иеговалы ужаны-тыршыны кулэ. Эскеромы кык амалъёсты, кызьы сое лэсьтыны быгатомы.

7. а) Кызьы Иеговалэн нравственность ласянь вылӥ эсэпъёсызъя улоно? б) Малы, Еврейёслы 10:24, 25 гожтэмъя, милемлы ӵош люкаськылыны кулэ, тужгес но асьме дыръёсы?

⁷ Нырысетӥез, милемлы кулэ Иеговалэн нравственность ласянь вылӥ эсэпъёсызъя улыны. Милемлы ноку но умоен учконо ӧвӧл та дуннелэн кырсь ужъёсыз шоры. Кылсярысь, ми ярантэмен лыдъяськомы котькыӵе азон-калгонэз, озьы ик пиосмурт пиосмуртэн яке кышномурт кышномуртэн кӧласа улонэз но (Матф. 19:4, 5; Рим. 1:26, 27). Кыкетӥез, кулэ азьланяз но Иеговалы йыбыртъяны вын-агайёсын но сузэр-апайёсын ӵош. Ми пумиськылӥськомы Эксэйлык юртъёсын, нош куке отын уг луы, улон интыосамы яке куддыръя лушкем интыосын но. Кыӵе гинэ югдур медаз кылды, ми Иеговалы йыбыртъян понна ӵош люкаськемысь ум дугдэ. Та пумиськонъёсты ми туж дунъяськомы, тужгес но «Солэн нуналэзлэсь матэгес вуэмзэ» шӧдӥськомы ке. (Лыдӟе Еврейёслы 10:24, 25.)

8. Кыӵе иворез ми вуонояз вераломы, вылды?

⁸ Бадӟым куректон дыръя ми чылкак мукет иворез вераломы, вылды. Али ми Эксэйлык сярысь ӟеч иворез вераськомы но выль дышетскисьёсты утчаськомы. Нош соку ми вераломы йӧзор кадь кышкыт иворез (Усьт. 16:21). Ми вераломы, дыр, ӝоген Шайтанлэн дуннеез быдэсак быдтэмын луоз шуыса. Дыр ортчыса, валамон луоз, мар сярысь со ивор луоз но кызьы ми сое тодытомы. Кутомы-а ми азьланяз но со амалъёсты, кудъёссэ ужан-тыршонын сю арлэсь кемагес кутӥськомы ини? Яке тодытон амалъёс воштӥськозы-а? Улыса адӟомы. Кызьы гинэ медаз луы, ми Иеговалэн судэз сярысь иворез кышкатэк вераломы! (Иез. 2:3—5).

9. Кызьы калыкъёс ивормы шоры учкозы но кыӵе осконмы милям вань?

⁹ Милям ивормы калыкъёслэсь вожзэс поттоз, дыр, но соос милесьтым тодытон ужмес пыраклы дугдытыны тыршозы. Кызьы туннэ ми Иеговалэн юрттэмезтэк ужаны-тыршыны ӧй быгатысалмы, озьы ик соку но милемлы солэн юрттэмез кулэ луоз. Оскыны луоз: Инмармы милемлы кужым сётоз, ми солэсь эриксэ мед быдэстомы шуыса (Мих. 3:8).

10. Лукалэсь 21:25—28 гожтэмъя, кыӵе шӧдонъёссы луозы тросэзлэн, куке соос адӟозы, мар луоз бадӟым куректон дыръя?

¹⁰ Лыдӟе Лукалэсь 21:25—28. Бадӟым куректон дыръя адямиос кышкатскемын луозы, кылдэм югдурез адӟыса. Соос адӟозы, кызьы ваньмыз, мар вылэ соос оскиськизы,— политика, вузкарон система но дуннелэн мукет люкетъёсыз — куашканы кутскоз. Соос курадӟозы, улонзэс ыштыны кышкаса, малы ке шуоно адямиослэн историязы со тужгес но кышкыт вакыт луоз (Соф. 1:14, 15). Та дыре Иеговалэн ужась-тыршисьёсызлы но секыт луоз, вылды. Ми та дуннелэн ноку но ӧй вал бере, ми пӧртэм пумо шуг-секытъёсын пумиськыны быгатомы. Оло, милям самой кулэез но уз луы.

11. а) Малы адямиос Иеговалэн Адӟись-Ивортӥсьёсызлы саклыксэс висъялозы? б) Малы милемлы бадӟым куректонлэсь кышкано ӧвӧл?

¹¹ Кыӵе ке но дыре адямиос, кудъёсызлэн религиоссы быдтэмын луозы ини, йыркуръяськыны кутскозы, куке адӟозы, Иеговалэн Адӟись-Ивортӥсьёсыз Инмарзылы  йыбыртъяло на шуыса. Малпалэ гинэ, макем соос вожпотэмзэс возьматозы, озьы ик социальной сетьёсын но. Калыкъёс но соослэн кивалтӥсьсы, Шайтан, милемыз адӟемпотостэм карозы, малы ке шуоно ми гинэ Инмарлы йыбыртъяломы. Адямиос валалозы, пуктэм ужпумзы — вань религиосты быдтыны — ӧз быдэсмы шуыса. Соин ик соос милемлы вань саклыксэс висъялозы. Та дыре калыкъёс Магог музъемысь Гог b луозы. Соос огазеяськозы но, вань кужымзэс поныса, Иеговалэн калыкез вылэ урдскозы (Иез. 38:2, 14—16). Зэм но, та сярысь малпаськыкумы, ми сюлмаськыны быгатомы, малы ке шуоно ми пыр-поч ум тодӥське, кызьы со луоз. Но одӥгзэ ми умой тодӥськомы: милемлы бадӟым куректонлэсь кышкано ӧвӧл. Иегова милемлы возьматоз, кызьы утиськоно (Пс. 33:20). Ми шонертӥськыса йырмес ӝутыны быгатомы, малы ке шуоно милям мозмытсконмы матэ вуэ c.

12. Кызьы «оскиськымон, визьмо ляльчи» дася милемыз солы, мар луоз азьланяз?

¹² «Оскиськымон, визьмо ляльчи» дася милемыз, бадӟым куректон дыръя ми Иеговалы оскымон кыльыны мед быгатомы шуыса (Матф. 24:45). Со милемыз трос амалъёсын дася. Кылсярысь, эскеромы 2016—2018-тӥ аръёсы ортчем улосысь конгрессъёслэсь программаоссэс. Та конгрессъёсысь речьёс но видеороликъёс дырыз дыръя вал, соос мылкыдмес ӝутӥзы умоятыны сямъёсмес, кудъёсыз тужгес но кулэ луо Иеговалэн нуналыз азьын. Ойдолэ вакчияк эскеромы со сямъёсты.

13. Кызьы Иеговалы оскымон луэммес будэтоно но малы сое али ик ини лэсьтоно?

¹³ Оскымон луон. 2016-тӥ арын конгресс нимаськиз «Иеговалы оскымонэсь луэ!». Та конгрессын ми тодӥмы, Иеговалы оскымон луон понна, соин матысь но юн кусыпъёс возёно шуыса. Милемлы тодамы вайытӥзы: Иеговалы матэ кариськыны милемлы юртто сюлмысь вӧсяськонъёс но солэсь Кылзэ тыршыса эскерон. Ваньмыз со милемлы кужым сётэ, ми бадӟым шуг-секытъёсты вормыны мед быгатомы шуыса. Шайтанлэн дуннеезлы пум вуэ, соин ик Инмарлы но солэн Эксэйлыкезлы оскымон луыны милемлы секытгес луоз, дыр. Милемыз азьланяз но серем карозы, вылды (2 Пётр 3:3, 4). Югдур эшшо но секытгес луоз, дыр, малы ке шуоно ми нокин пала кариськытэк улыны тыршиськомы. Бадӟым куректон дыръя оскымон кылён понна, милемлы али ик ини та сяммес будэтоно.

14. а) Кыӵе воштӥськонъёс луозы Инмарлэн калыкеныз кивалтӥсь вын-агайёслэн улоназы? б) Малы со дыре милемлы оскымон луыны кулэ луоз?

¹⁴ Бадӟым куректон дыръя Инмарлэн калыкеныз кивалтӥсь вын-агайёслэн улоназы бадӟым воштӥськонъёс луозы. Кыӵе ке но дыре вань зырӟем христианъёс, кудъёсыз музъем вылын уло на, инме басьтэмын луозы, Армагеддонын ожмаськон понна (Матф. 24:31; Усьт. 2:26, 27). Озьыен, Кивалтӥсь кенеш милемын музъем вылын уз луы ни. Озьы ке но туж-туж трос калык, азьло сямен ик, радъямын луоз. Ас вылазы  кивалтэт басьтозы мукет ыжъёс пӧлысь быгатӥсь вын-агайёс. Милям оскымон луэммы адӟиськоз, куке ми лэсьтомы соослэн кивалтэтсыя, кудзэ соослы Инмар сётоз. Соин милям улонмы герӟаськемын луоз.

15. Кызьы чидась луонмес будэтоно но малы сое али ик ини кароно?

¹⁵ Чидась луон. 2017-тӥ арын конгресс нимаськиз «Эн сётске!». Ми дышетскимы солы, кызьы шуг-секытъёс дыръя чидасесь луоно. Ми тодӥмы, чиданмес умой югдуръёсын гинэ возьматоно ӧвӧл шуыса. Чидась луонмес будэтон понна, Иегова вылэ оскиськоно (Рим. 12:12). Ойдолэ ум вунэтэ Иисуслэсь кыл сётонзэ: «Пумозяз чидам мурт утиськоз» (Матф. 24:13). Солэн кылъёсысьтыз адӟиське, нокыӵе шуг-секытъёс шоры учкытэк, Инмарлы оскымон кылёно шуыса. Котькуд шуг-секытъёсын чидась луыса, ми али ик ини асьмемыз дасяськомы со дырлы, куке бадӟым куректон кутскоз.

16. Мар юрттоз милемлы кышкасьтэм луыны но кызьы ми со сямез али ик ини будэтыны быгатомы?

¹⁶ Кышкасьтэм луон. 2018-тӥ арын конгресс нимаськиз «Кышкасьтэм луэ!». Со тодамы вайытӥз, кышкасьтэм луэммы быгатонлыкъёсынымы герӟаськемын ӧвӧл шуыса. Чидась луон сямен ик, зэмзэ ик кышкасьтэм луыны быгатомы соку, куке Иегова вылэ оскиськиськомы. Кызьы дышетсконо со вылэ эшшо но золгес оскиськыны? Инмарлэсь Кылзэ котькуд нунал лыдӟыса но малпаськыса со вылын, кызьы Иегова аслэсьтыз калыксэ азьло дыръёсы утьылӥз (Пс. 67:21; 2 Пётр 2:9). Куке бадӟым куректон дыръя калыкъёс ми вылэ урдскозы, кышкасьтэм луон но Иегова вылэ оскиськон милемлы, азьло сярысь, эшшо но золгес кулэ луозы (Пс. 111:7, 8; Евр. 13:6). Ми али ик ини Иегова вылэ оскиськиськомы ке, соку ми кышкасьтэм луыны быгатомы, Гоглэсь урдскемзэ чидан понна d.

17. Малы милемлы Армагеддонлэсь кышкано ӧвӧл? (Учке вылбамысь суредэз.)

¹⁷ Кызьы азьло статьяын верамын вал ини, ми пӧлысь тросэзлэн быдэс улонзы  берпум аръёсы ортче. Нош озьы ик милям луонлыкмы вань ноку но кулытэк улыны но бадӟым куректон пыр потыны. Та дуннелэн быронэз йылпумъяськоз Армагеддон ожмаськонэн. Нош милемлы кышкано ӧвӧл, малы ке шуоно со Иеговалэн ожмаськонэз луоз (Мад. 1:33; Иез. 38:18—20; Зах. 14:3). Иегова вералоз Иисус Христослы, ку инмысь ожгарчиосын ӵош ожмаськыны потоно. Соин ӵош луозы улӟыса султэм зырӟемъёс но трос миллион кылчинъёс. Ваньзы ӵош соос ожмаськозы Шайтанэн, солэн периосыныз но соослэн музъем вылысь ожгарчиосынызы (Дан. 12:1; Усьт. 6:2; 17:14).

18. а) Кыӵе оскытон сётэ милемлы Иегова? б) Кызьы Усьтӥськон 7:9, 13—17 милемлы оскон сётэ, Иегова милемыз уз кельты шуыса?

¹⁸ Иегова оскытэ милемыз: «Тыныд пумит лэсьтэм одӥг арберилэн но азинлыкез уз луы» (Ис. 54:17). «Туж-туж трос калык» «бадӟым курадӟон-куректон пыр» потоз. Соос азьланяз но Иеговалы ужалозы-тыршозы. (Лыдӟе Усьтӥськонэз 7:9, 13—17.) Библия милемлы оскон сётэ: Иегова милемыз уз кельты! Ми тодӥськомы, «Кузё-Инмар оскиськымон муртъёсты уте» шуыса (Пс. 30:24). Ваньзы, кинъёс Иеговаез ярато но сое данъяло, шумпотозы, куке адӟозы, кызьы Иегова аслэсьтыз дун-чылкыт нимзэ дано кароз (Иез. 38:23).

19. Кыӵе осконмы ӝоген быдэсмоз?

¹⁹ Пуктэ син азяды, мар гожтэмын луысал 2 Тимофейлы 3:2—5 выль дуннеын улӥсь адямиос сярысь, кудъёсыз вылэ Шайтанлэн дуннеез уз пыӵа ни. (Учке « Кыӵеесь луозы адямиос» рамкаез.) Джордж Гангас агай e, кудӥз Кивалтӥсь кенешын ужаз-тыршиз, со сярысь тазьы вераз: «Кыӵе луоз дунне, куке ваньзы ог-огзылы вын-агайёс но сузэр-апайёс луозы! Ӝоген тӥ улоды выль дуннеын. Тӥ улоды сомында ик, кӧня улэ Иегова. Ми пырак уломы». Туж умой оскон, озьы ук?