1, 2. Мар адямиослы бадӟым изъян вае но кин отын янгыш?

 ТЕЛЕФОН, автомобиль, холодильник — со куд-огез гинэ выль арбериос, кудъёсыз улонмес трослы капчиятӥзы. Мукетъёсыз выль арбериос — пыӵал, сигарет, минаос, атомной бомбаос но трос мукетыз — адямиослэн улонзылы кышкытлык ваё. Нош вань на со, мар трослы азьлогес кылдэмын вал но адямиослы эшшо бадӟым изъян вае. Со пӧяськон. Пӧяськись зэмзэ тодэ ке но, со юри пӧяса вера, мукетъёсызлэсь визьёссэс туган вылысь. Кин вал нырысетӥез пӧяськись? Дьявол. Сое Иисус Христос «ӧрекчаськонлэн атаез» шуыса нимаз. (Лыдӟе Иоаннлэсь 8:44.) Ку вал нырысетӥез пӧяськон?

² Со вал трос дауръёс талэсь азьло Едем садын. Нырысетӥ адямиос, Адам но Ева, туж умой райын уло вал, кудзэ соослы Кылдытӥсь кузьмаз. Шайтан тодэ вал, Инмар Адамлы но Евалы «ӟечез но уродэз тодон писпулэсь емышсэ» сиыны ӧз лэзьы шуыса. Озьы ик со тодэ вал, соос ӧз ке кылзӥське, кулозы шуыса. Соин ик  со кый пыр вераз Евалы: «Уд, уд кулэ». (Со вал дунне вылын нырысетӥез пӧяськон.) Дьявол ватсаз на: «Нош Инмар тодэ, кудаз нуналэ емышез оскалтоды, со нуналэ тӥляд синъёсты усьтӥськозы, соку тӥ ӟечез но уродэз тодӥсь инмаръёс кадесь луоды» (Ул.-выл. 2:15—17; 3:1—5).

3. Малы вераны луоз, Шайтан изъян ваён вылысь пӧяз шуыса, но кытчы со вуттӥз?

³ Шайтан изъян ваён вылысь пӧяз. Со туж умой тодэ вал, Ева солы оскиз но емышез сииз ке, кулоз шуыса. Адам но Ева Иеговалэсь ӧз кылзӥське но бератаз кулӥзы (Ул.-выл. 3:6; 5:5). Со сяна, сьӧлыкен сэрен «кулон вань адямиос доры вуиз». Кызьы верамын Библиын, «кулон кузёяськыса улӥз, Адамлэн йыружезлы тупась сьӧлык лэсьтымтэос вылын но» (Рим. 5:12, 14). Инмар нырысь малпаз вал, адямиос пырак дауръёс ӵоже тырбыдэс луыса мед улозы шуыса. Нош табере, Давидлэн верамезъя, адямиослэн улон даурзы «сизьымдон ар мында, кужмоосызлэнгес — тямыстон ар», но «улонмылэн ӟеч адӟонэз — секыт уж, висён-курадӟон» (Пс. 89:10). Макем ӝож! Нош ваньмыз понна янгыш — Шайтан.

4. а) Кыӵе юанъёсты ми эскеромы? б) Псалтирь 14:1, 2 верамъя, кин Иеговалэн эшез луыны быгатэ?

⁴ Иисус вераз Шайтан сярысь: «Со зэмлыкын сылыны ӧз быгаты, уго со бордын зэмлык ӧвӧл» (Иоанн 8:44). Шайтан ӧз воштӥськы. Со али ке но «быдэс дуннелэсь визьзэ» туга (Усьт. 12:9). Милям уг поты, Шайтан милесьтым но визьмес мед тугалоз шуыса. Соин ик ойдолэ эскеромы куинь юанъёсты: кызьы Шайтан туннэ адямиослэсь визьёссэс туга? Малы адямиос пӧясько? Но мар юрттоз милемлы пӧяськытэк улыны, милям, Адамлэн но Евалэн кадь, Иеговаен кусыпъёсмы медаз сӧриське шуыса? (Лыдӟе Псалтирез 14:1, 2.)

5. Кызьы Шайтан туннэ адямиослэсь визьёссэс туга?

⁵ Шайтан асьмемыз медаз пӧя шуыса, милемлы солэсь кескич малпанъёссэ-ужъёссэ тодоно (2 Кор. 2:11). Ми тодӥськомы, быдэс дунне Шайтанлэн киулаз возиське шуыса. Отчы пыро пӧяськись религиозной кивалтӥсьёс но, кузьымъёс октӥсь политикъёс но, асьсэлы гинэ пайда утчась вуз карисьёс но (1 Иоанн 5:19). Соин ик ми ум паймиське, Шайтан но солэн периосыз нимо-дано адямиосыз пӧяськыны косо шуыса (1 Тим. 4:1, 2). Кылсярысь, куд-ог вуз карисьёс пӧяса тазалыклы изъян вайись арбериос вузало но адямиослэсь коньдонзэс талало.

6, 7. а) Малы тужгес но янгыш религиозной кивалтӥсьёс? б) Кыӵе ӧрекчи кылъёсты верамзэс тӥ кылӥды религиозной кивалтӥсьёслэсь?

⁶ Тужгес но янгыш религиозной кивалтӥсьёс, малы ке шуоно соос кышкытлык ваё со адямиослэн азьлапал улонзылы, кудъёсыз соослы оско. Адямиос зэмос луисьтэм дышетонъёслы оско но каро ке сое, мар Инмарлы уг яра, соос ыштыны быгато пырак дауръёс ӵоже улыны луонлыксэс  (Ос. 4:9). Иисус тодэ вал, религиозной кивалтӥсьёс адямиосты пӧяло шуыса. Со шонерак вераз: «Куректон тӥледлы, книга тодӥсьёс, фарисейёс, чеберъяськисьёс, одӥгзэ ке но берыктон понна, зарезез но музъемез котыръяськоды, нош куке со пӧрме, сое тӥ асьтэлэсь кык пол уродгес, геенналы [яке пырак дауръёслы быдтонлы] пи кариськоды» (Матф. 23:15). Иисус вераз, со религиозной кивалтӥсьёс асьсэлэн атайзы, Дьявол, кадесь шуыса, кудӥз «адями виись вал» (Иоанн 8:44).

⁷ Асьме вакытэ но трос религиозной кивалтӥсьёс. Кызьы гинэ соосты уг нимало: пасторъёс, священникъёс но мукет. Нырысетӥ даурын улӥсь фарисейёс сямен, соос Инмарлэн Кылысьтыз «зэмлыкез ёртыса-ӝикатыса» возё но сое ӧрекчи кылъёсын вошто (Рим. 1:18, 25). Соос зэмос луисьтэм дышетонъёсты вӧлмыто. Кылсярысь, соос верало, тылын ӝуась ад вань шуыса, яке верало, адями кулэм бере солэн лулыз улэ на шуыса. Озьы ик верало на, Инмарлы нокыӵе ик уг поты шуыса, куке пиосмурт пиосмуртэн, нош кышномурт кышномуртэн кӧла яке семья кылдытэ.

8. Кыӵе пӧяськонэз ӝоген кылозы адямиос? Мае милемлы тодамы возёно?

⁸ Адямиослэсь визьёссэс туганы быгато политикъёс но. Ӝоген ялозы: «Тупаса улон, кышкатэк улон». Со луоз тужгес но бадӟым пӧяськон, кудӥз куке но вал. Соку Шайтанлэн дуннеезлы «шӧдтэк шорысь... бырон вуоз». Эн лэзе асьтэды пӧяны, та дуннелы номыр но уз луы шуыса. Ми туж умой тодӥськомы, «возьмамтэ дыръя, уйин лушкаськись кадь, озьы Кузё-Инмарлэн нуналыз лыктоз» шуыса (1 Фес. 5:1—4).

9, 10. а) Малы адямиос пӧясько но кытчы вуттэ пӧяськон? б) Мае милемлы Иегова сярысь тодамы возёно?

⁹ Куке выль поттэм арбери адямиос пӧлын туж тодмо луэ, соку сое трос лыдын поттыны кутско. Озьы ик пӧяськонэн но. Пӧяськонлы адямиос дышемын ини, табере кивалтӥсьёс гинэ уг пӧясько ни. «Почему мы лжем» статьяяз Ю. Бхаттачарджи гожтӥз, пӧяськон мур пыӵам сямъёс пӧлы пыртэмын шуыса. Ӵемысь адямиос пӧясько асьсэды утён яке асьсэды умоен возьматон понна. Соос янгышсэс яке умойтэм ужзэс ватон понна пӧяло, яке асьсэлы кыӵе ке пайда басьтон понна. Статьяын озьы ик верамын вал, куд-ог адямиос капчиен пӧяло шуыса тодмотэм адямиосты, ӵош ужасьёссэс, эшъёссэс но яратоно адямиоссэс.

¹⁰ Кытчы вуттэ пӧяськон? Пӧяськись муртлы уг оско, но солэн мукет адямиосын кусыпъёсыз сӧрисько. Малпалэ ай, мар шӧдэ карт, кудӥзлэн кышноез мурт пиосмуртэн юмшам но, юмшамзэ ватыны тыршыса, пӧям сое. Яке малпалэ семья сярысь, кудаз карт дораз кышнозэ но нылпиоссэ жуге яке ултӥя, нош адямиос азьын ассэ зӥбыт пиосмурт кадь возе. Сыӵе пӧяськисьёс Иеговалэсь номыре но ватыны уг быгато, малы ке  шуоно «Со азьын ваньмыз усьтэмын, гольык каремын» (Евр. 4:13).

11. Малы дышетэ милемыз Ананияен но Сапфираен луэм учыр? (Учке статья кутсконысь суредэз.)

¹¹ Тани Библиысь одӥг пример. Нырысетӥ даурысь одӥг кузпалъёс Шайтанэз сюлэмъёсазы пырыны лэзизы но Инмарез пӧязы. Анания но Сапфира апостолъёсты пӧяны малпазы. Соос бусызэс вузазы, нош апостолъёслы вузаса поттэм коньдонзылэсь оглюкетсэ гинэ сётӥзы. Ананиялэн но Сапфиралэн кенеш азьын чеберъяськыса возьматэмзы потӥз, соос шырыт сямоесь шуыса. Нош Иегова ваньзэ адӟиз но соосты кыл кутытӥз (Ап. уж. 5:1—10).

12. Мар возьма соосты, кинъёс изъян ваён вылысь пӧясько но со понна уг ӧпкелё? Малы?

¹² Кызьы Иегова пӧяськисьёс шоры учке? Шайтан но ваньмыз, кинъёс солэсь адӟем карыса изъян ваён вылысь пӧяло но со понна уг ӧпкелё, «тылын ӝуась тыэ куштэмын» луозы (Усьт. 20:10; 21:8; Пс. 5:7). Малы? Малы ке шуоно сыӵе пӧяськисьёсты Иегова одӥг радэ пуктэ соосын, кинъёс солэн син азяз юрӟым ужъёс лэсьто (Усьт. 22:15).

13. Мае ми тодӥськомы Иегова сярысь но мар карыны мылкыдмес ӝутэ сое тодэммы?

¹³ Ми тодӥськомы, Инмар уг пӧяськы шуыса. Библиын верамын: «Инмар — Со адями ӧвӧл, Со уг ӧрекчаськы» (Лыд. 23:19). Иегова ӧрекчаськись кылэз синазькыль каре (Мад. 6:16, 17). Милям Иеговаез шумпоттэммы потэ ке, милемлы котьку зэмзэ гинэ верано. Соин ик ми ноку но ог-огмес ум пӧяське (Кол. 3:9).

14. а) Маин ми пӧртэм луиськомы зэмос луисьтэм религилэн ёзчиосызлэсь? б) Валэктэ возетэз, кудӥз гожтэмын Лукалэсь 6:45.

¹⁴ Зэмос христианъёсты пӧртэм тодметъёсъя тодмало. Одӥгез тодмет, кудӥз зэмос христианъёсты зэмос луисьтэм религилэн ёзчиосызлэсь висъя,— со пӧяськытэк улон. (Лыдӟе Захариялэсь 8:16, 17.) Павел валэктэ: «Ми Инмарлэн ужась-тыршисьёсыз луонмылэсь данзэ утьыны тыршиськомы... зэмлыклэн кылыныз» (2 Кор. 6:4, 7). Нош тани мар вераз Иисус: «Сюлэм пачылмыку, кыл вера» (Лука 6:45). Мукет кылъёсын вераса, соос, кинъёслэн сюлэмзы чылкыт, котьку зэмзэ гинэ верало. Соос одӥг пичи но уг пӧясько, нош верало озьы, кызьы вань, тодмотэм адямиослы, ӵош ужасьёссылы, эшъёссылы но яратоно адямиоссылы. Эскеромы куд-ог учыръёсты, кудъёсыз возьмато, ми мукетъёсызлы зэмзэ гинэ вераськомы шуыса.

15. а) Малы визьмо ӧвӧл кык пӧртэм улон нуыны? б) Мар юрттоз егитъёслы огъёзъёссылэн зӥбемзылы пумит сылыны? (Учке сноскаез.)

¹⁵ Огъёзъёсынызы эшъяськон понна, куд-ог егит христианъёс кык пӧртэм улон нуо: семьяязы но кенешын соос одӥг, огъёзъёссы пӧлын нош мукет. Доразы но кенешын соос асьсэды адӟем карымон возё, нош школаын эшъёссы пӧлын но социальной сетьёсын соос чылкак мукет адямиос луо. Соос кырсь кылъёсын верасько, ӝикыттэм дӥськут нулло, умойтэм кырӟанъёс кылзо, трос вина юо, наркотикъёс куто, лушкемен кинэн ке пумиськыло но мукет. Соос пӧяло анай-атайёссэс, огъя оскисьёссэс но Инмарез (Пс. 25:4, 5). Иегова адӟе соосты, кинъёс сое данъям амал гинэ каро (Марк 7:6). Трослы умойгес улыны озьы, кызьы верамын Мадёнъёсын 23:17: «Сюлмыд сьӧлыкоослы медаз вожъяськы, вань улоно нуналъёсыз ӵоже Кузё-Инмарлэсь кышканэн мед улоз» a.

16. Вань дырез сётыса ужан-тыршон понна заявление гожтыку, малы туж кулэ вань юанъёслы пӧяськытэк ответ сётыны?

¹⁶ Тӥляд пионер луэмды яке вань дырдэс сётыса нимысьтыз ужамды-тыршемды потэ ке, кылсярысь, Вефильын, соку тӥледлы заявление гожтоно. Заявление гожтыкуды, туж кулэ пӧяськытэк ответ сётыны вань юанъёслы, кудъёсыз герӟаськемын тазалыкен, шулдыръяськонъёсты быръёнэн но вылӥ эсэпъёсъя улонэн (Евр. 13:18). Нош тӥ кыӵе ке кырсь уж лэсьтӥды яке кариды ке сое, мар понна тӥледыз табере возьытлыкты йыръе? Верады-а тӥ со сярысь тӧроослы? Ӧд ке, вераське соосын — соос юрттозы тӥледлы Инмарен кусыпъёстэс тупатыны. Соку тӥ быгатоды Инмарлы чылкыт возьытлыкен ужаны-тыршыны (Рим. 9:1; Гал. 6:1).

17. Мае тодамы возёно, полициын вын-агайёсмы сярысь юаллясько ке?

¹⁷ Кылсярысь, тӥляд шаерады Иеговалэн Адӟись-Ивортӥсьёсызлы Инмарлы йыбыртъяны люкето. Мар  кароно, тӥледыз полицие ӧтизы но кенешысь вын-агайёс сярысь юаллясько ке? Кулэ-а вераны ваньзэ, мае тӥ тодӥськоды? Кызьы ассэ возиз Иисус, куке со рим кивалтӥсь азьын сылӥз? Со тодэ вал, «шып улонлэн аслаз дырыз» но «вераськонлэн аслаз дырыз» шуыса, соин ик со котькуд юанлы ответ ӧз сёты (Екк. 3:1, 7; Матф. 27:11—14). Сыӵе учыръёсы визьмо луоно, вын-агайёсмылы кышкытлык медам вае шуыса (Мад. 10:19; 11:12).

18. Мар милемлы кароно, куке тӧроос юало милесьтым кенешысь кинлэн ке сьӧлыкамез сярысь?

¹⁸ Нош тӥ тодӥды ке, кенешын кин ке но секыт сьӧлыказ шуыса? Тӧроос туж чаклало бере, кенеш чылкыт мед луоз шуыса, соос тӥлесьтыд юаны быгатозы, мае тӥ тодӥськоды со учыр сярысь. Мар тӥ соку кароды, тужгес но вераськон мынэ ке тӥляд матысь эшты яке ӵыжы-выжыды сярысь? Библиын верамын: «Тодэмзэ верась мурт, зэмлыкез вера» (Мад. 12:17; 21:28). Милемлы верано ваньзэ, кызьы вань, номырзэ но ватоно но мыдланьтоно ӧвӧл. Тӧроос сое тодыны кулэ. Озьы соос валаны быгатозы, кызьы сьӧлыкам муртлы Иеговаен кусыпъёссэ тупатыны юрттоно (Иак. 5:14, 15).

19. Мае ми эскеромы мукетаз статьяын?

¹⁹ Псаломъёсты гожъясь Давид вӧсяськиз Иеговалы: «Сюлмысь зэмлыкез Тон яратӥд» (Пс. 50:8). Со тодэ вал, пӧяськытэк улон сюлмысь потэ шуыса. Христианъёс котьку ог-огзылы зэмзэ гинэ верало. Нош маин эшшо пӧртэм луо на Инмарлэн ужась-тыршисьёсыз? Соос адямиосты Инмарлэн зэмлыкезлы дышето. Со сярысь вераськон мыноз мукетаз статьяын.