1. Мар сярысь сюлмаськиз Иегова?

 ЯРАТӤСЬ Иегова Инмармы сюлмаськиз, кенешын котькуд оскымон ужась-тыршисезлы кыӵе ке уж висъямын мед луоз шуыса. Кенешын ми пӧртэм ужъёсты быдэсъяськомы ке но, ми ваньмы Иеговалы дуно потӥськомы но ог-огмылы кулэ луиськомы. Та кулэ луись малпанэз валаны юртто апостол Павеллэн гожтэтъёсыз. Ойдолэ малпаськомы та гожтэтъёсысь куд-ог малпанъёс вылын.

2. Малы милемлы вын-агайёсмес но сузэр-апайёсмес гажаны кулэ, озьы ик соосын ӵош ужаны-тыршыны, Ефесъёслы 4:16 лыдэ басьтыса?

² Кызьы гожтэмын та статьялы валтӥсь кылбурын, милемлы Иеговалэн мукет ужась-тыршисьёсызлы вераны уг яра: «Тӥ мыным кулэ ӧвӧл» (1 Кор. 12:21). Милям потэ ке, кенешмы тупаса мед улоз шуыса, милемлы вань вын-агайёсмес но сузэр-апайёсмес гажано но соосын ӵош ужано-тыршоно. (Лыдӟе Ефесъёслы 4:16.) Куке ми огкылысь ужаломы-тыршомы, котькудӥз шӧдоз, сое ярато шуыса, но кенешмы юн луоз.

3. Мае ми эскеромы та статьяын?

³ Кызьы вын-агайёслы но сузэр-апайёслы гажанмес возьматоно? Та статьяын ми эскеромы куд-ог примеръёсты. Ми вераськомы, кызьы тӧроос ог-огзылы гажамзэс возьматыны быгато. Озьы ик малпаськомы, кызьы ми пӧлысь котькудӥз возьматыны быгатэ, кузпалъяськымтэ вын-агайёсты но сузэр-апайёсты дунъя шуыса. Нош собере тодомы, кызьы яратонмес возьматоно соослы, кинъёс асьме кылын туж ик умой уг верасько.

4. Кыӵе визь-кенешез, кудзэ вераз Павел, уже кутыны кулэ тӧроос? (Римъёслы 12:10).

⁴ Кенешын вань тӧроос Иеговалэн святой духеныз пуктэмын. Нош соослэн быгатонлыкъёссы но югдуръёссы пӧртэмесь (1 Кор. 12:17, 18). Куд-ог вын-агайёс алигес кутскизы тӧро луыса ужаны-тыршыны, соин ик та удысын трос лэсьтыны ӧз вуэ на. Мукетъёсыз арлыдзы яке тазалыксы сэрен уг быгато лэсьтыны сомында, кӧня лэсьтэмзы потэ. Озьы ке но тӧроослы уг яра вераны ог-огзылы: «Тӥ мыным кулэ ӧвӧл». Со интые, тӧроос уже кутыны кулэ Павеллэсь визь-кенешсэ, кудӥз гожтэмын Римъёслы 12:10 (лыдӟе).

5. Малы тӧроос ог-огзэс гажаны кулэ но кызьы соос гажамзэс возьматыны быгато?

⁵ Тӧроос ог-огзылы гажамзэс возьмато соку, куке ог-огзэс сак кылзо. Со туж кулэ, куке тӧроос секыт юанъёсты эскеро. Малы? Тани мар вераськиз 1988-тӥ арын 1-тӥ коньывуон понна поттэм «Возьмаськон башняын», кудӥз англи кылын гожтэмын вал: «Тӧроос валаны кулэ: Христос, святой духлэн юрттэменыз, кенешысь котькуд тӧро пыр юрттыны быгатэ Библиысь визь-кенешез шедьтыны, кудӥз секыт югдурез сэрттыны-пертчыны яке кулэ луись ужпум кутыны юрттоз (Ап. уж. 15:6—15). Святой дух кенешысь одӥг тӧролы гинэ уг юртты, нош вань тӧроослы юрттэ».

6. Мар юрттэ тӧроослы огкылысь ужаны-тыршыны но кыӵе пайда со кенешлы вае?

⁶ Кыӵе ке юанэз эскерыны пумиськыкузы, тӧро мукет тӧроосты гажамзэ возьматоз, куке котьку но котькуд юанъя аслэсьтыз малпанзэ ваньмызлэсь азьло вераны уз тыршы. Со мукетъёсызлы вераны луонлык сётоз но уз малпа, солэн гинэ верамез шонер луэ шуыса. Сыӵе тӧро аслэсьтыз малпанзэ зӥбыт-востэмен вералоз но мукет тӧроослэсь верамзэс сак кылзоз. Нош тужгес но валтӥсез, со Библиысь возетъёсты эскерыны но «оскиськымон, визьмо ляльчилэн» кивалтэтэзъя лэсьтыны дась (Матф. 24:45—47). Куке тӧроос, кыӵе ке юанэз эскерыкузы, ог-огзылы яратэмзэс но гажамзэс возьматозы,  соосын святой дух луоз. Со юрттоз соослы кутыны сыӵе ужпумъёсты, кудъёсыз кенешез юнматозы (Иак. 3:17, 18).

7. Кызьы Иисус учкиз кузпалъяськымтэ адямиос шоры?

⁷ Милям кенешъёсамы вань семьяос но, озьы ик кузпалъяськымтэ христианъёс но. Кызьы милемлы учконо соос шоры, кинъёслэн кузпалзы ӧвӧл? Эскеромы Иисуслэсь примерзэ. Музъем вылын ужакуз-тыршыкуз, со кышно ӧз басьты. Иисус кузпалъяськытэк улӥз. Вань дырзэ но саклыксэ со висъяз Инмарлэсь ужзэ быдэстонлы. Иисус ноку ӧз вера, солэн дышетскисьёсызлы кузпалъяськыны яке кузпалъяськытэк улыны кулэ шуыса. Озьы ке но со вераз, куд-ог христианъёс кузпалъяськытэк улыны ужпум кутозы шуыса (Матф. 19:11, 12). Иисус гажаз кузпалъяськымтэ адямиосты. Со ӧз малпа, соос кузпалъяськемъёслэсь уродгес луо шуыса яке улонысь мае ке умойзэ ышто шуыса.

8. Мар сярысь малпаськыны мылкыдэз ӝутӥз Павел, 1 Коринфъёслы 7:7—9 лыдэ басьтоно ке?

⁸ Иисус сямен, апостол Павел но ужан-тыршон дыръяз кузпалъяськытэк улӥз. Павел ноку ӧз вера, христианъёслы семья кылдытыны уг яра шуыса. Со валаз: котькудӥз ачиз сыӵе ужпум кутэ. Озьы ке но со христианъёслэсь мылкыдзэс ӝутӥз малпаськыны, быгато-а соос кузпалъяськытэк Иеговалы ужаны-тыршыны. (Лыдӟе 1 Коринфъёслы 7:7—9.) Адӟиське: Павел ӧз малпа, кузпалъяськымтэ христианъёс, кузпалъяськемъёсыныз ӵошатыса, маин ке уродгес луо шуыса. Кылсярысь, со куриз егит кузпалъяськымтэ Тимофеез куд-ог кулэ луись ужъёсты быдэстыны (Флп. 2:19—22) b. Соин ик малпано ӧвӧл, кузпалъяськем гинэ яке кузпалъяськымтэ гинэ вын-агайёс кенешын дано ужъёсты быдэсъяны быгато шуыса (1 Кор. 7:32—35, 38).

9. Кызьы милемлы учконо кузпалъяськыса но кузпалъяськытэк улон шоры?

⁹ Озьыен, Иисус но, Павел но ӧз вералэ, христианъёслы кузпалъяськыны яке кузпалъяськытэк улыны кулэ шуыса. Та пумысен йылпумъян лэсьтэмын вал 2012-тӥ арын 1-тӥ коньывуон понна поттэм «Возьмаськон башняын» (ӟуч). Отын гожтэмын: «[Кузпалъяськыса  улонэз но, кузпалъяськытэк улонэз но] Инмарлэн кузьыменыз лыдъяны луэ. [...] Иегова уг малпа, кузпалъяськытэк улэмен сэрен, возьдаськыса но ӝожомыса улоно шуыса». Соин ик милемлы кузпалъяськымтэ вын-агайёсты но сузэр-апайёсты гажаны кулэ.

10. Кызьы гажанмес возьматоно кузпалъяськымтэ христианъёслы?

¹⁰ Кызьы возьматоно, ми кузпалъяськымтэ христианъёсты гажаськомы шуыса? Милемлы тодамы возёно: куд-ог вын-агайёс но сузэр-апайёс асьсэос ужпум кутӥзы кузпалъяськытэк улыны. Мукетъёсызлэн семья кылдытэмзы потэ ке но, тупась адямиез соос ӧз пумиталэ на. Озьы ик кенешын вань соос но, кинъёслэн кузпалзы кулӥз. Кызьы гинэ медам луы, юано-а сыӵе христианъёслэсь, малы соос кузпалъяськемын ӧвӧл? Яке ӵектоно-а юрттэтмес, кузпалъяськыны тупась адями шедьтон понна? Зэм но, куд-ог кузпалъяськымтэ христианъёс асьсэос юрттэт курыны быгато. Нош мар кароно, тӥлесьтыд юрттэт ӧз куре ке? Кызьы ассэ шӧдоз кузпалъяськымтэ вын-агай яке сузэр-апай, тӥ солы юрттэт ӵектӥды ке? (1 Фес. 4:11; 1 Тим. 5:13). Тани мар верало куд-ог христианъёс, кудъёсыз сыӵе югдуре сюризы.

11, 12. Кызьы, асьмеос но валатэк, кузпалъяськымтэ вын-агайёслэсь но сузэр-апайёслэсь мылкыдзэс сӧрыны быгатӥськомы?

¹¹ Одӥгез кузпалъяськымтэ ёросэз чаклась, кудӥз ужан-тыршонын трос лэсьтэ, кузпалъяськытэк улонысь трос пайдазэ адӟе. Озьы ке но со вера, солэн мылкыдыз куашка шуыса, куке вын-агайёс но сузэр-апайёс, солы юрттыны тыршыса, юало: «Малы тон та дырозь кышнояськымтэ?» Нош тани мар вера одӥг кузпалъяськымтэ агай, кудӥз Вефильын ужа-тырше: «Куддыръя малпан кылдэ, куд-ог христианъёс лыдъяло, кузпалъяськымтэ вын-агаез яке сузэр-апаез жаляны кулэ шуыса. Соин сэрен соос малпаны но быгатозы, кузпалъяськытэк улонзы кузьым ӧвӧл шуыса».

¹² Бызьымтэ сузэр, кудӥз Вефильын ужа-тырше, вера: «Куд-огъёсыз лыдъяло: вань кузпалъяськымтэ христианъёс малпаса гинэ уло, кызьы соослы кузпал шедьтоно, но, адямиос пӧлын луыкузы, кинэн ке тодматскыны муг гинэ утчало. Одӥг пол монэ Вефильлэн ужъёсызъя мукет каре ыстӥзы. Отчы вуон нуналам кенешлэн пумиськонэз вал. Сузэр, кудӥз доры мон улыны интыяськи, вераз, соослэн кенешазы мон аресъем кык агайёс вань шуыса. Со монэ оскытӥз, мыным кузпал уг утча шуыса, нош, Эксэйлык юртэ пыреммы бере ик, со монэ та агайёсын тодматӥз. Веранэз ик ӧвӧл, ми со агайёсын кытчы пырон инты ик ӧм шедьтэ».

13. Кинъёслэн ужам-тыршемзы одӥг сузэрез юнматэ?

¹³ Нош тани мар вера Вефильын ужась-тыршись мукетыз сузэр: «Мон тодӥсько вын-агайёсты но сузэр-апайёсты, кудъёсыз кузпалъяськытэк трос аръёс ӵоже пионеръёс луыса ужало-тыршо. Соос асьсэды визьмо возё; ас азязы ужпумъёс пукто; мукетъёсызлы юрттон понна, асьсэды уг жаляло; ужан-тыршонзэс ярато но кенеш понна трос лэсьто. Соос шонер учко кузпалъяськытэк улонзы шоры. Соос уг малпало, кузпалъяськем вын-агайёслэсь но сузэр-апайёслэсь умойгес луо шуыса, озьы ик уг сюлмасько, кузпалзы но нылпиоссы ӧвӧл шуыса». Соин ик туж шумпотоно луыны кенешын, кудаз ваньзы ог-огзэс гажало но ярато. Тӥ тодӥськоды: вын-агайёсты но сузэр-апайёсты уз малпалэ, тӥ мае ке умойзэ ыштӥськоды шуыса, озьы ик соос тӥледлы уз вожъяське. Со сяна, соос тӥледлы саклыксэс  висъялозы но уз малпалэ, тӥ соослэсь маин ке умойгес луиськоды шуыса. Озьы ик тӥ тодӥськоды, соос тӥледыз ярато шуыса.

14. Кызьы оскытоно кузпалъяськымтэ христианъёсты, ми соосты гажаськомы шуыса?

¹⁴ Кузпалъяськымтэ христианъёс тау карозы, куке тӥ соосты жаляса уд улэ, соос огназы шуыса, нош соосты умой сямъёссы понна дунъялоды. Соку сыӵе вын-агайёс но сузэр-апайёс уз малпалэ, ми соослы вераськомы кадь: «Тӥ мыным кулэ ӧвӧл» (1 Кор. 12:21). Соос оскозы, кенешын соосты гажало но дунъяло шуыса.

15. Кыӵе воштӥськонъёс лэсьтӥзы куд-ог христианъёс, тодытон уже тросгес пыриськон понна?

¹⁵ Берло аръёсы трос ивортӥсьёс ужпум пуктӥзы, мукет кылэз дышетыны, тодытон уже тросгес пыриськон понна. Со понна соос улоназы трос воштӥськонъёс лэсьтоно луизы. Та вын-агайёс но сузэр-апайёс выжизы мукет кылын вераськись кенеше, кудаз тросгес тодытӥсьёс кулэ (Ап. уж. 16:9). Соос асьсэос сыӵе ужпум кутӥзы. Со возьматэ, соослэн Иеговалы тросгес лэсьтэмзы потэ шуыса. Выль кылын умой вераськон понна, трос аръёс ортчыны быгато ке но, соос кенешлы туж юртто. Соослэн умой сямъёссы но быгатонлыкъёссы вын-агайёсты но сузэр-апайёсты юнмато. Ми туж дунъяськомы та христианъёсты, кудъёсыз, асьсэды жалятэк, ужало-тыршо!

16. Мае лыдэ басьто тӧроос, куке ужпум куто, агай быгатэ-а тӧро яке кенешлы юрттӥсь луыса ужаны-тыршыны?

¹⁶ Тӧроослы малпано ӧвӧл, вын-агай уг быгаты тӧро яке кенешлэн юрттӥсез луыса ужаны-тыршыны, малы ке шуоно со кенешлэсь кылзэ умой уг тоды на. Тӧроос лыдэ басьтозы Библиысь курон-косонъёсты, кудъёссэ быдэсъяны кулэ тӧроос но кенешлы юрттӥсьёс, нош агайлэсь кылэз тодэмзэ гинэ лыдэ уз басьтэ (1 Тим. 3:1—10, 12, 13; Тит. 1:5—9).

17. Кыӵе юанъёсты эскероно семьяослы, кудъёсыз мукет шаере улыны кошкизы?

¹⁷ Асьсэ шаеразы урод югдур кылдэмен, куд-ог христиан семьяос мукет шаере кошкизы, улон инты яке уж шедьтон понна. Соослэн нылпиоссы школае ветло ке, отын со шаерысь кылын дышето, вылды. Уже интыяськон понна, анай-атайёс но кылэз дышетоно луо. Кыӵе кенеше ветлоно та семьялы? Ветлоно-а кенеше, кудаз верасько со шаерысь кылын, яке со кенеше, кудӥныз та семья вераське?

18. Кызьы возьматоно, семьялэн йырызлэсь кутэм ужпумзэ гажаськомы шуыса, Галатъёслы 6:5 лыдэ басьтоно ке?

¹⁸ Семьялэн йырызлы ужпум кутоно, кыӵе кенеше солэн семьяез ветлоз. Солы лыдэ басьтоно, мар умойгес луоз солэн семьяезлы. (Лыдӟе Галатъёслы 6:5.) Котькудӥз ачиз быръён лэсьтэ, соин ик милемлы  семьялэн йырызлэсь кутэм ужпумзэ гажано но та семьяез кенешамы шумпотыса пумитано (Рим. 15:7).

19. Мар сярысь умой малпаськоно но вӧсяськоно семьялэн йырызлы?

¹⁹ Куд-ог семьяос ужало-тыршо сыӵе кенешын, кудаз анай-атайёслэн вордскем кылынызы верасько. Нош нылпиоссы та кылэз умой уг тодо ни. Куке сыӵе семьяос уло интыын, кудаз со шаерысь кылын верасько, соку нылпиослы секыт валаны, вылды, мар сярысь пумиськонъёсын вераське, озьы ик Иеговаен кусыпъёссэс но юнматыны капчи ӧвӧл. Малы? Малы ке шуоно школаын со шаерысь кылын дышето, нош анай-атайёслэн кылынызы уг. Сыӵе учырын семьялэн йырызлы умой малпаськоно но Иеговалэсь визьлык куроно валан понна, кызьы нылпиоссылы юрттоно Иеговалы но солэн калыкезлы матэгес кариськыны. Анай-атайёслы нылпиоссэс дышетоно ас кылынызы вераськыны яке выжоно со кенеше, кудаз верасько нылпиоссылы валамон кылын. Кыӵе гинэ ужпум семьялэн йырыз медаз куты, кенеш, кудзэ та семья быръёз, соосты гажаны но дунъяны кулэ.

20. Кызьы гажаммес возьматоно вын-агайёслы но сузэр-апайёслы, кудъёсыз выль кылэз дышето?

²⁰ Эскерем мугъёс сэрен трос кенешъёсын вань вын-агайёс но сузэр-апайёс, кудъёсызлы выль кылэз дышетыны секыт. Куддыръя ас малпанзэс вераны соослы туж ик капчи ӧвӧл. Нош ми саклыкмес ӧм ке висъялэ солы, кызьы соос асьме кылын верасько, соку адӟомы, соос зэмзэ ик Иеговаез ярато но солы ужаны-тыршыны мылкыд каро шуыса. Та умой сямъёссэс адӟыса, ми туж гажаломы но дунъяломы та вын-агайёсты но сузэр-апайёсты. Ми соослы ум вералэ, «тӥ милемлы кулэ ӧвӧл» шуыса, милям кылынымы шуггес вераськеменызы гинэ.

21, 22. Мар понна ми Иеговалы тау кариськомы?

²¹ Ми Иеговалы туж тау кариськомы, аслаз кенешаз со милемлы дано уж сётӥз шуыса. Вын-агайёс но сузэр-апайёс, кузпалъяськемъёс но кузпалъяськымтэос, егитъёс но арлыдоос, кыӵе ке кылын умой яке шуггес вераськисьёс — ваньмы ми Иеговалы но ог-огмылы дуно луиськомы (Рим. 12:4, 5; Кол. 3:10, 11).

²² Ойдолэ тодамы возёмы апостол Павеллэсь адями мугор сярысь примерзэ но уже кутомы сое, мае эскеримы та статьяын. Со юрттоз милемлы вын-агайёсмылэсь но сузэр-апайёсмылэсь мылкыдзэс ӝутыны, озьы ик соосты яратыны но гажаны.