1—3. Кыӵе мугъёсын сэрен вын-агайёс но сузэр-апайёс, кудъёсыз вань дырзэс тодытон ужлы сӥзё, ужан-тыршонзэс кельтоно луо?

 «МИССИОНЕР луыса ми 21 ар ӵоже ужамы-тыршимы. Со туж шудо дыр вал,— тодазы ваё Роберт но Мэри-Джо.— Но арлыдо анай-атайёсмылы юрттэт кулэ луиз. Ми дась вал соос сярысь сюлмаськыны, озьы ке но сюлэммылы дуно интыосмес кельтэммы уг поты вал».

² «Куке ми тодӥмы, тазалыкенымы герӟаськем шуг-секытъёсын сэрен ужан-тыршонмес азьланьтыны ум быгатэ ини шуыса, ми бӧрдытэк ӧм чидалэ,— верало Уильям но Терри. Милям котьку мылкыдмы вал кунгож сьӧрын ужаны-тыршыны, нош табере сыӵе луонлыкмы ӧй вал ни».

³ «Ми тодӥмы, кивалтӥсьёс филиалмес пытсаны малпало шуыса,— вера Алексей.— Куке со озьы ик луиз, но ми Вефильысь кошконо луимы, ми туж ӝоже усимы».

4. Мае ми эскеромы та статьяын?

⁴ Сыӵе учыръёсты вераны быгато Вефильын тыршись трос сюрс агайёс но сузэръёс, озьы ик мукет ужась-тыршисьёс но, кудъёсыз вань дырзэс тодытон ужлы сӥзё. Та вын-агайёслы но сузэр-апайёслы яратоно ужан-тыршонзэс кельтыны секыт вал b. Кызьы соослы выль югдурзылы дышоно? Кызьы тӥ соослы юрттыны быгатӥськоды? Та юанъёслы валэктонъёс милемлы ваньмылы выль югдуръёслы дышыны юрттозы.

5. Кызьы ми вылын шӧдӥськыны быгатэ мукет интые кошкон?

⁵ Кытын гинэ ми медам ужалэ-тырше — Вефильын-а яке мукет интыын-а,— милям сюлэммы ик биниськыны быгатэ адямиос борды яке тодытон интымы борды. Соин ик милемлы туж вӧсь луэ, куке ми мукет интые кошконо луиськомы. Милемлы секыт кельтыны соосты, кинъёс ми понна дуно луизы. Озьы ик ми соос понна сюлмаськыны быгатӥськомы, тужгес но соку, куке ми уйылон-уллянъёсын сэрен кошкиськомы (Матф. 10:23; 2 Кор. 11:28, 29). Со сяна, милемлы мукет интые кошкыны секыт луыны быгатэ, малы ке шуоно ми выль сям-йылолъёслы дышоно луиськомы. Озьы луыны быгатэ соку но, куке ми вордӥськем интыосамы берытскиськомы. «Асьме калыкмылэн сям-йылолъёссы милемлы мурт луизы. Анай кылынымы тодытыны гинэ но милемлы секыт вал,— верало Роберт но Мэри-Джо.— Ми мукет интыын трос дыр ӵоже ужамы-тыршимы бере, ас шаерамы ми асьмеды мурт шаерын кадь шӧдӥмы». Куд-ог вын-агайёс но сузэр-апайёс, мукет интые кошкемзы бере, коньдонэн герӟаськем шуг-секытъёсын пумиськыло. Соин сэрен соослы кышкыт луыны быгатэ. Мар соослы юрттоз?

6. Кызьы Иеговаен матысь кусыпъёс возёно?

⁶ Иеговаен матысь кусыпъёс возе (Иак. 4:8). Нош кызьы? Шӧдонъёсты сярысь вералэ солы, кин вӧсяськонъёсты кылзэ (Пс. 64:3). Кызьы гожтэмын Псалтирьын 61:9, Инмар азьын асьмелэсь сюлэммес усьтоно. Иегова, «мае куриськомы яке мар сярысь малпаськом-сюлмаськиськом, бадӟымлэсь но бадӟымгес ӟечлык сётыны быгатэ» (Еф. 3:20). Со уг сёты сое гинэ, мае ми вӧсяськыкумы куриськомы. Иегова милемыз паймытыны но шуг-секытъёсмес сэрттыны-пертчыны быгатэ озьы, кызьы ми ӧм но малпалэ.

7. а) Мар юрттоз милемлы Иеговаен матысь кусыпъёс возьыны? б) Малы туж кулэ азьланяз но Иеговалы оскымон ужаны-тыршыны, Еврейёслы 6:10—12 лыдэ басьтыса?

⁷ Иеговаен матысь кусыпъёс возён понна, котькуд нунал Библиез лыдӟе но лыдӟемды вылын мур малпаське. Тани мар вера одӥг агай, кудӥз куке но миссионер луыса ужаз-тыршиз: «Котькуд арняе семьяен йыбырттондэс ортчытэ но кенешлэн пумиськонъёсызлы дасяське озьы ик, кызьы тӥ сое азьвыл ужан-тыршон интыяды кариськоды вал». Озьы ик выль кенешеныды ӵош ӟырдыт мылкыдын тодытэ. Иегова уг вунэты соосты, кинъёс солы оскымон ужало-тыршо, озьы ик соосты но, кинъёс азьвыл  мында лэсьтыны уг быгато ини. (Лыдӟе Еврейёслы 6:10—12.)

8. Кызьы 1 Иоаннлэн 2:15—17 кылъёс юртто тӥледлы огшоры улыны?

⁸ Огшоры улэ. Эн лэзе «таизлэн дуннелэн сюлмаськонэзлы» тӥледыз Иеговалы ужамысь-тыршемысь дугдытыны (Матф. 13:22). Эн кылзэ та дуннеысь адямиосты, ӵыжы-выжыостэс яке эшъёстэс, кудъёсыз тӥледлы юрттыны тыршо но верало, умойгес улон понна, тӥледлы тросгес коньдон поттоно шуыса. (Лыдӟе 1 Иоаннлэсь 2:15—17.) Оске Иеговалы, кудӥз кылзэ сётэ ваньзэ «кулэ дыръя» сётыны. Со юрттоз милемлы юн осконэн но каньыл сюлмын улыны, озьы ик улон понна ваньзэ кулэзэ сётоз (Евр. 4:16; 13:5, 6).

9. Малы пунэмаськытэк улыны тыршоно, Мадёнъёсты 22:3, 7 лыдэ басьтыса? Мар юрттоз милемлы шонер ужпумъёс кутыны?

⁹ Тырше пунэмаськытэк улыны. (Лыдӟе Мадёнъёсты 22:3, 7.) Мукет интые выжемен, трос коньдон кошкыны быгатэ. Соин сэрен мылкыд кылдоз, вылды, пунэмен коньдон басьтыны. Соин ик эн пунэмаське, басьтон понна сое, мар тӥледлы туж ик кулэ ӧвӧл. Куке тӥ туж сюлмаськыса улӥськоды (кылсярысь, куке тӥледлы висись ӵыжы-выжыдэс утялтыны кулэ), ужпум кутыны секыт, кӧня коньдон пунэмен басьтоно. Сыӵе учырын тодады возе, сюлворыса вӧсяськон шонер ужпум кутыны юрттоз шуыса. Иегова сюлэмдэс каньыл кароз, «тӥлесьтыд сюлэмдэс но, малпанъёстэс но... утьыса возёз» но валаны юрттоз, кыӵе ужпум кутоно (Флп. 4:6, 7; 1 Пётр 5:7).

10. Кызьы выль эшъёс шедьтоно?

¹⁰ Эшъёсты сярысь эн вунэтэ. Вералэ шӧдонъёсты но шуг-секытъёсты сярысь матысь эшъёстылы, тужгес но соослы, кинъёс асьсэос со выллем учыре сюрылӥзы. Со юрттоз астэ умойгес шӧдыны (Екк. 4:9, 10). Азьло эшъёсты котьку тӥледын луозы, нош али дыр вуиз выль эшъёсты шедьтыны. Тодады возе: тӥляд эшъёсты мед луозы шуыса, асьтэлы умой эш луоно. Кызьы выль эшъёс шедьтоно? Вералэ вын-агайёслы но сузэр-апайёслы, кыӵе ужъёс тӥ быдэсъяды, Иеговалы ужакуды-тыршыкуды. Оло нош, кенешысь куд-огъёсыз уз валалэ, малы тӥ, вань дырдэс сётыса, ужаны-тыршыны яратӥськоды, нош мукетъёсызлэн со сярысь тросгес тодэмзы потоз, но соос тӥледын эшъяськозы. Но укыр трос верано ӧвӧл ачид сярысь, Иеговалы ужан-тыршонын лэсьтэм ужъёсыд сярысь яке урод шӧдонъёсыд сярысь.

11. Кыӵе шонертэм малпанъёслэсь палэнсконо, кузпалэныды кусыпъёсты медаз сӧриське шуыса?

¹¹ Кузпалдылэн висеменыз сэрен, тӥ ужан-тыршондэс кельтоно яке мукет интые кошконо луиды ке, сое янгыше эн уськытэ. Мукет паласен учкыса, тазалыкен герӟаськем шуг-секытъёсты тӥляд асьтэлэн кылдӥзы ке, эн малпалэ, со понна тӥ янгыш но тӥ сэрен кузпалдылэн малпанъёсыз ӧз быдэсме шуыса. Эн вунэтэ: тӥ «одӥг лулмугор» луиськоды но тӥ Иеговалы  кыл сётӥды ог-огды сярысь котькыӵе югдуръёсы сюлмаськыны (Матф. 19:5, 6). Нош кышноды малпамтэ шорысь пияно луиз ке но соин сэрен тӥ кошконо луиды ке, нылпиды мед тодоз, Иеговалы ужан-тыршонын тӥ понна со котькыӵе ужлэсь но дуногес шуыса. Оскытэ нылпидэс, со «Кузё-Инмарлэн сётэм люкетэз» луэ шуыса (Пс. 126:3—5). Вералэ солы, макем трос шумпотон вайиз тӥледлы ужам-тыршемды. Со нылпидылэсь мылкыдзэ ӝутыны быгатоз Иеговалы ужан-тыршонын сыӵе ик ужпумъёс пуктыны.

12. а) Кызьы юрттыны луэ соослы, кинъёс вань дырзэс ужан-тыршонлы сӥзё, соос азьланяз но та ужез быдэстыны мед быгатозы шуыса? б) Мар карыны луэ, выль интыын соослы капчигес мед луоз шуыса?

¹² Туж умой, трос кенешъёс но ивортӥсьёс вань кужмысьтызы юрттыны тыршо шуыса соослы, кинъёс вань дырзэс тодытонлы сӥзё, соос азьланяз но озьы ужаны-тыршыны мед быгатозы шуыса. Вын-агайёс но сузэр-апайёс сыӵе ужась-тыршисьёслэсь мылкыдзэс ӝуто соослы сӥзем ужез азьланьтыны; сёто сое, мар соослы кулэ луэ, озьы ик коньдонэз но; юртто кыдёкын улӥсь ӵыжы-выжыоссы сярысь сюлмаськыны (Гал. 6:2). Тӥляд кенешады лыктӥзы ке ужась-тыршисьёс, кудъёсыз та ужлы вань дырзэс сӥзё но талэсь азьло мукет интыын тыршизы, эн малпалэ, соос кыӵе ке ужзэс быдэстыны ӧз быгатэ яке янгыш лэсьтӥзы шуыса c. Тырше юрттыны, выль интыын соослы капчигес мед луоз шуыса. Возьматэ, татын соослы шумпото шуыса. Ушъялэ соосты тыршемзы понна, тазалыкенызы сэрен соос азьвыл мында лэсьтыны уг быгато ке но. Соосын умойгес тодматске. Соослэн трос тодон-валанзы люкаськемын, но соос Иеговалы ужан-тыршонын трос лэсьтӥзы ини. Дышетске соослэсь!

13. Кызьы юрттоно соослы, кинъёс тӥляд кенешады ужаны-тыршыны вуизы?

 ¹³ Соослы, кинъёс мукет интые кошко, кулэ улон инты, машина, уж но улон понна ваньмыз кулэез. Быгатӥськоды-а тӥ соослы юрттыны? Озьы ик соослы тодоно луоз, дыр, кызьы, кылсярысь, вытъёсты тыроно но страховкаез лэсьтоно. Нош соослы тужгес но дуно потэ, куке ми соосты валаны тыршиськомы. Оло нош, соос сюлмасько тазалыкен герӟаськем шуг-секытъёс сэрен, кудъёсыз кылдӥзы соослэн яке ӵыжы-выжыоссылэн. Яке соос дуно адямизы кулэмен куректо d. Со сяна, сыӵе ужась-тыршисьёс туж мӧзмо, вылды, вын-агайёслэсь но сузэр-апайёслэсь, кудъёссэ соос кельтоно луизы, та сярысь соос пырак уг верало ке но. Дыр кулэ, сюлэмез шугъяськытӥсь шӧдонъёсты вормон понна.

14. Кызьы выль интыысь ивортӥсьёс юрттӥзы одӥг сузэрлы валаны, кызьы со интыын тодытоно?

¹⁴ Со, кызьы тӥ асьтэды возиськоды, но тӥляд юрттэмды туж юнматыны быгатэ выль интые лыктэмъёсты. Тани мар вера одӥг сузэр, кудӥз трос аръёс ӵоже кунгож сьӧрын ужаз-тыршиз: «Азьло мон котькуд нунал Библиез дышетонъёсты ортчытъясько вал, нош выль интыын мон Библиысь кылбурез яке видеороликез возьматыны но ӧй быгаты. Нош та интыысь ивортӥсьёс монэ сьӧразы ӧтьылӥзы, адямиос доры выльысь лыктыкузы яке дышетонэз ортчытыкузы. Со, кызьы возизы асьсэды та ӟырдыт мылкыдоесь но кышкасьтэмесь вын-агайёс но сузэр-апайёс, кудъёсызлэн туж умой Библия дышетонъёссы вал, юрттӥз мыным выль инты шоры умоен учкыны. Мон дышетски та интыын улӥсь адямиосын вераськонъёсты кутскыны. Ваньмыз та юрттӥз мыным нош ик шумпотыса улыны».

15. Мар юрттоз тӥледлы выль кенешын азинлыко ужаны-тыршыны?

¹⁵ Выль кенешын тӥ трос лэсьтыны быгатӥськоды. Эн малпалэ, азьвыл интыяды тӥ уждэс умойтэм быдэстӥды яке али тӥ сокем дуно ӧвӧл ини шуыса. Улонады Иеговалэсь юрттэмзэ адӟыны тырше но тодытэмысь эн дугдэ. Адӟем каре нырысетӥ даурын улӥсь оскымон  христианъёслэсь. Мар гинэ медаз луы, соос «пӧртэм палъёстӥ ветлӥзы но Ӟеч Иворез тодытӥзы» (Ап. уж. 8:1, 4). Тӥляд тыршемды юнме уз луы. Кылсярысь, куд-ог пионеръёс, кудъёссэ одӥг шаерысь уллязы, кошкизы артысь шаере, кудаз со кылын вераськись ивортӥсьёс туж кулэ вал. Кӧня ке толэзьёс ортчыса, отын выль группаос кылдӥзы, кудъёсыз ялан будӥзы.

16. Мар юрттоз тӥледлы выль интыын ужан-тыршонэз яратыны?

¹⁶ Неемия иудей калыклы вераз, Иеговалэсь шумпотон соослэн утиськонзы но юнматсконзы луэ шуыса (Неем. 8:10). Тужгес но бадӟым шумпотон Иеговаен матысь кусыпъёсын герӟаськемын луыны кулэ, нош кыӵе ке интыын ужан-тыршонэн ӧвӧл, кыӵе гинэ дуно со тӥледлы медаз поты. Азьланяз но Иеговаен матысь кусыпъёс возе но солэсь визь-кенеш, буйгатскон но юрттэт утчалэ. Тодады возе: тӥ азьвыл интыын ужан-тыршондэс яратӥды, малы ке шуоно вань сюлмысьтыды адямиослы юрттыны тыршиды. Вань сюлэмдэс понэ, выль интыын ужан-тыршон понна, соку тӥ сое одно ик яратоды — Иегова тӥледлы юрттоз (Екк. 7:10).

17. Мар сярысь милемлы вунэтоно ӧвӧл?

¹⁷ Ум вунэтэ, Иеговалы ужан-тыршон пырак дауръёс ӵоже кыстӥськоз шуыса, нош кыӵе ке интыын ужан-тыршон — огдырлы гинэ. Выль дуннеын милям ваньмылэн ужан-тыршонамы воштӥськонъёс луозы. Алексей, кудӥз сярысь статьялэн кутсконаз вераськиз, оске: улонысьтыз воштӥськонъёс юртто солы вуоно воштӥськонъёслы дась луыны. Со вера: «Мон котьку тодӥ, Иегова зэм но вань но выль дунне зэм но луоз шуыса. Нош мон али гинэ шӧдӥ: Иегова мыным зэмзэ но матын, но табере мон юн оскисько, выль дунне ӝоген вуоз шуыса» (Ап. уж. 2:25). Кытын гинэ ми медам ужалэ-тырше, ойдолэ азьланяз но Иеговаен матысь кусыпъёс возёмы. Со котьку милемын ӵош луоз но шумпотыса улыны юрттоз, кытын гинэ ми медам ужалэ-тырше но кӧня гинэ кужыммы милям медаз луы (Ис. 41:13).