Proverbios 20:1-30
20 J-akʼvanej ta kʼexlal li vinoe,+ jtoyba li poxe;+buchʼuuk noʼox ti chkʼejpʼuj-o* ta bee muʼyuk pʼij.+
2 Ti kʼu yelan tsibtasvan li jun ajvalile xkoʼolaj kʼuchaʼal jkot leon* ti xloket snukʼe;*+buchʼuuk noʼox ti tsabe skapemal sjole chakʼ ta vokol li xkuxlejale.+
3 Ichʼbil ta mukʼ li buchʼu muʼyuk tstikʼ sba ta saʼkʼope,+pe skotol li buchʼutik bolike tstikʼ noʼox sbaik ta saʼkʼop.+
4 Li buchʼu chʼaje muʼyuk tslok yosil li ta inviernoe,*jech oxal kʼalal chʼabal kʼusi oy yuʼune, xtal xbat ta kʼan limoxna kʼalal chichʼ tsobel li kʼusitik chlokʼe.*+
5 Li kʼusitik tsnop ta yoʼonton li jun vinike xkoʼolaj kʼuchaʼal natil voʼ,pe li buchʼu oy spʼijile snaʼ slokʼesel tal.
6 Epal krixchanoetik chalik ti oy yuʼunik tukʼil kʼanelale,pe ¿buchʼu xuʼ sta ta saʼel jun tukʼil vinik?
7 Li buchʼu tukʼe oy stukʼil yoʼonton kʼusi tspas.+
Xmuyubaj noʼox li xnichʼnab* ti chtal ta tsʼakale.+
8 Kʼalal chchoti ta xchotleb sventa chchapanvan li ajvalile,+ta sat noʼox chchʼak sba lokʼel yuʼun skotol li choplejale.+
9 ¿Buchʼu van xuʼ xi chale: «Jsakubtasoj li koʼontone,+sakun, muʼyuk jmul»?+
10 Li jloʼlavanej kiloe xchiʼuk li spʼisobil ti muʼyuk tsʼakal leke*toj chopol chil li Jeovae.+
11 Li jun olol* eke ojtikinbil ta skoj li kʼusitik tspase,mi sak xchiʼuk mi tukʼ li stalelale.+
12 Li jchikintik ti xaʼi kʼoponele xchiʼuk li sbekʼ jsatik ti x-ilvanexchaʼtosal jaʼ spasoj li Jeovae.+
13 Mu kʼupiluk xavaʼi li vayele, yuʼun mi moʼoje, chapas ta povre.+
Vikʼo lek asat, vaʼun chnoj lek achʼut ta pan.+
14 Xi chal li jmanolajele: «¡Muʼyuk lek, muʼyuk lek!»;vaʼun ta xbat xchiʼuk xtoyet xa chaʼi sba.+
15 Oy oro xchiʼuk oy ep kʼupil sba tonetik ta nab,*pe li skʼopojel buchʼu oy spʼijile mas to ep sbalil.+
16 Ichʼbo skʼuʼ spokʼ li jun vinik mi la svaʼan sba ta chʼom ta skoj yan krixchanoe;+oyuk kʼusi xavichʼbe ta prental* mi jech la spas ta skoj jun jyanlum antse.*+
17 Li vinike lek mu chaʼi li pan ti ta loʼlavanej staoje,pe ta tsʼakale, nojem chkom ta grava li yee.+
18 Ta skoj ti chichʼ jakʼele,* lek chkʼot ta pasel li kʼusi nopbile+xchiʼuk skʼan oy buchʼu lek sbeiltasot* kʼalal chabat ta paskʼope.+
19 Li jutmulile* xtal xbat noʼox ta yalel li kʼusi mu stakʼ alele;+mu xachiʼin li buchʼu lek xaʼi xloʼiltavane.*
20 Buchʼuuk noʼox ti chchopol kʼopta li stot xchiʼuk smeʼechtupʼ skantil mi tal li ikʼal osile.+
21 Akʼo mi tsta skʼulejal ta slikebal li buchʼu xpichʼet noʼox yoʼontone,ta slajebale muʼyuk tsta bendision.+
22 Mu xiuk xavale: «¡Chopol ta jpakbe sutel li buchʼu toj chopol kʼusi spasojbune!».+
Pato avoʼonton ta stojolal Jeova,+ vaʼun jaʼ tskoltaot.+
23 Toj chopol chil Jeova li jloʼlavanej kiloe*xchiʼuk chopol li spʼisobil ti muʼyuk lek tsʼakale.
24 Li Jeovae jaʼ tsbeiltasbe yakan li jun vinike;+¿kʼuxi xuʼ snaʼ bu beal skʼan stam batel li jun vinike?
25 Jaʼ jun petsʼ ta stojolal jun vinik mi ta anil noʼox oy kʼusi jamal chalbe Diose+
xchiʼuk ti ta tsʼakal to tsnopbe skʼoplal li kʼusi laj yakʼ ye tspase.+
26 Li pʼijil ajvalile chchʼak lokʼel li buchʼutik toj chopolike+xchiʼuk tstselelinbe* ta sbaik li smajobil tsʼunobil ti set-sete.+
27 Li kʼusi chlokʼ ta ye* jun vinike xkoʼolaj kʼuchaʼal skantil Jeovasventa chakʼ ta ilel li kʼusi oy ta yutil to yoʼontone.
28 Li tukʼil kʼanelale xchiʼuk li tukʼilale jaʼ chchabiik li ajvalile;+ta skoj li tukʼil kʼanelale, tsnakan lek li xchotleb sventa ajvalile.+
29 Li smukʼulalik li keremetike jaʼ li yipike,+yan li yutsilalik moletike jaʼ li sakil sjolike.+
30 Mi yaxubemik jbekʼtaltik xchiʼuk mi oy jyayijemaltike,+ jaʼ tskoltautik ta yiktael li kʼusi toj chopolexchiʼuk li majele jaʼ tsakubtas li yut koʼontontike.
Tsʼibetik ta yok vun
^ O «chkʼejev-o; tstsʼepʼuj-o».
^ O «chʼiom leon ti xtinlajet sjol».
^ O «xlaket snukʼe; x-avete».
^ Jaʼ xkaltik, yorail siktik.
^ O jaʼ van skʼoplal «chlokʼ saʼ kʼalal chichʼ tsobel li kʼusitik chlokʼe, pe muʼyuk kʼusi tsta».
^ Literal «skeremtak».
^ O «Li chib kilo ti jelajtik yepal tspʼise xchiʼuk li chib spʼisobil ti jelajtik yepal tspʼise».
^ O «kerem».
^ O «prentail; xkʼexol».
^ O «jyanlume».
^ O «li tojobtasele».
^ O «pʼijil beiltasel».
^ O «jnopmulile».
^ O «li buchʼu chloʼlavan xchiʼuk yee».
^ O «chib kilo ti jelel tspʼise».
^ O «ti stselelet yuʼun».
^ Literal «Li yikʼal ye».
