Deuteronomio 30:1-20
30 »Mi tal ta atojolal skotol li kʼusitik laj xa yichʼ alele, jaʼ li bendision xchiʼuk li chopol kʼoptael ti laj xa kakʼ atʼuje+ xchiʼuk mi te chvul ta ajol*+ li ta yantik lum ti bu tspukot batel li Jeova Dios avuʼune,+
2 vaʼun mi jech chasut talel ta stojolal li Jeova Dios avuʼune+ xchiʼuk mi ta sjunul avoʼonton xchiʼuk ta sjunul akuxlejal+ chachikinta xchiʼuk anichʼnabtak skotol li kʼusitik chkalbot avie,
3 li Jeova Dios avuʼun une chikʼ sutel talel li buchʼutik batem ta chukel avuʼune+ xchiʼuk chkʼuxubinot.+ Jech xtok, chchaʼtsobot likel tal li Jeova Dios avuʼun ta skotol li lumetik ti bu la spukot batele.+
4 Manchuk mi ta jujujot to stiʼil vinajel pukbil batel li ateklumale, te to chbat stsobot talel li Jeova Dios avuʼune, chikʼot sutel yan velta.+
5 Li Jeova Dios avuʼune chakʼ avuʼunin li osil ti laj toʼox yuʼuninik li amoltotake, te chakʼ epajuk kʼusitik avuʼun xchiʼuk mas to ep chakʼ epajan ti jaʼ mu sta jech yepal bat li amoltotake.+
6 Li Jeova Dios avuʼune tsakubtas* avoʼonton xchiʼuk tsakubtasbe yoʼonton anitilulal+ sventa xakʼan ta sjunul avoʼonton xchiʼuk ta sjunul akuxlejal li Jeova Dios avuʼune, mi jech chapase, jech chakuxi.+
7 Vaʼun, li Jeova Dios avuʼune chakʼ kʼotuk ta stojolal avajkontratak li chopol kʼoptaeletike, yuʼun la spʼajoxuk xchiʼuk la snutsoxuk.+
8 »Vaʼun, chasut talel xchiʼuk chachikintabe li kʼusi chal Jeovae xchiʼuk chlik achʼunbe skotol li smantaltak ti yakal chkalbot avie.
9 Li Jeova Dios avuʼune chakʼ epajuk tajek li kʼusitik chapase,+ chakʼ epajuk li anichʼnabtake, li achonbolomtake xchiʼuk li kʼusitik chlokʼ ta avosile, yuʼun li Jeovae tskʼupin yan velta ti chakʼ epajuk li kʼusitik avuʼune jech kʼuchaʼal la skʼupin yakʼbel amoltotake.+
10 Jaʼ jech chachikintabe li kʼusi chal Jeova Dios avuʼune xchiʼuk chachʼunbe li smantaltak ti liʼ tsʼibabil ta slivroal Mantale, jech xtok, ta sjunul avoʼonton xchiʼuk ta sjunul akuxlejal chasut talel ta stojolal li Jeova Dios avuʼune.+
11 »Li mantal yakal chkalbot avie mu toj tsotsuk ta chʼunel, mu toj nomuk oy ta atojolal.+
12 Maʼuk ta vinajel to oy ti xi chlik avale: ‹¿Buchʼu chmuy batel ta vinajel kuʼuntik sventa chbat yichʼbutik tal yoʼ jchikintatik xchiʼuk jchʼuntike?›.+
13 Maʼuk ta jot to nab oy ti xi chlik avale: ‹¿Buchʼu chtuchʼ jelavel kuʼuntik nab sventa chbat yichʼbutik tal yoʼ jchikintatik xchiʼuk jchʼuntike?›.
14 Yuʼun nopol oy ta atojolal li mantale, te noʼox oy ta ave xchiʼuk ta avoʼonton+ sventa xavakʼ ta akuxlejal.+
15 »Aʼio avaʼi, oy chaʼtos kʼusi chkakʼ atʼuj: li kuxlejal xchiʼuk li kʼusi leke o li lajelal xchiʼuk li kʼusi chopole.+
16 Mi chachikintabe li smantaltak Jeova Dios avuʼun ti yakal chkalbot avie, ti chakʼan li Jeova Dios avuʼune,+ ti chaxanav ta sbetake xchiʼuk ti chachʼunbe li smantaltake xchiʼuk li kʼusitik chapanbil yuʼune, jech chakuxi un bi+ xchiʼuk cha-epaj. Li Jeova Dios avuʼune chakʼbot bendision li ta osil chavuʼunine.+
17 »Pe mi chlik xchʼak sba li avoʼontone,+ mi mu xachikinta xchiʼuk mi lalaj ta loʼlaele, ti jaʼ xa chlik anijan aba ta stojolal li yan diosetik xchiʼuk ti chlik tunan ta stojolale,+
18 chkalboxuk avaʼiik ti jpʼel skʼoplal chavichʼik lajesele.+ Muʼyuk jal chakuxiik li ta osil ti chbat avuʼuninik li ta jot Jordane.
19 Ta jvaʼan ta testigo ta atojolalik avi li vinajel xchiʼuk li balumil ti yakal chkakʼ atʼuj li kuxlejal o lajelale; li bendision o li chopol kʼoptaele.+ Skʼan xatʼuj li kuxlejale sventa xakuxi+ xchiʼuk li anitilulale.+
20 Jaʼ yuʼun, kʼano li Jeova Dios avuʼune,+ chikintabo li kʼusi chale xchiʼuk napʼano aba ta stojolal,+ yuʼun jaʼ akuxlejal xchiʼuk jal chakuxi yuʼun li ta osil ti jech laj yakʼ ye Jeova ta stojolal li amoltotake, jaʼ li Abraan, Isaak xchiʼuk Jakobe».+
Tsʼibetik ta yok vun
^ Literal «xchiʼuk mi chlik sutuk ta avoʼonton».
^ Literal «chakʼbe sirkunsision».
