Baʼyel Kronikas 19:1-19
19 Ta tsʼakale, cham li Naas ti jaʼ ajvalil yuʼun j-ammonetike, vaʼun jaʼ och ta xkʼexol ta ajvalil li xnichʼone.+
2 Xi laj yal li Davide: «Chkakʼbe ta ilel tukʼil kʼanelal+ li Anun xnichʼon Naase, yuʼun laj yakʼbun ta ilel tukʼil kʼanelal li stote». Jaʼ yuʼun, li Davide la stak batel yaj-almantaltak sventa xbat spatbeik yoʼonton Anun ta skoj ti cham li stote. Pe kʼalal kʼotik ta yosil j-ammonetik li yajtuneltak David+ sventa spatbeik yoʼonton li Anune,
3 li bankilaletik yuʼun j-ammonetike xi laj yalbeik li Anune: «¿Mi yuʼun achʼunoj ti chichʼ ta mukʼ atot li David ti la stak talel buchʼu xuʼ spatbot avoʼontone? ¿Mi mu jaʼuk sventa spaʼi* jteklum xchiʼuk sventa stsalot ti la stak talel yajtuneltake?».
4 Li Anune la stsakbe li yajtuneltak Davide, la xjuxbe li yisimike+ xchiʼuk la xtuchʼbe yalel li skʼuʼ spokʼik ti chlik ta xchukbenalike,* jech la stakan sutel.
5 Kʼalal albat David li kʼusi pasbatik li viniketike, ta ora noʼox la stak batel yan viniketik sventa xbat snupik ta be, yuʼun toj tsots akʼatik ta kʼexlal; xi laj yal li ajvalile: «Te xakomik ta Jeriko,+ jaʼ to xasutik talel mi chʼi yan velta li avisimike».
6 Ta tsʼakale, li j-ammonetike laj yakʼik venta ti muʼyuk xa lek ch-ilatik yuʼun li Davide, jaʼ yuʼun li Anun xchiʼuk j-ammonetike la stakik batel jmil talento* plata ta Mesopotamia,* ta Aram-Maaka xchiʼuk ta Soba+ sventa xchʼamunik karetaetik xchiʼuk jkajlejetik ta kaʼ.
7 Jaʼ yuʼun, la slokʼik 32 mil ta kot kareta, la stojik xtok li ajvalil Maaka xchiʼuk sviniktake. Jech tal skotolik, te la spas skarpanaik ta stukʼil Medeba.+ Li j-ammonetik eke la stsob sbaik lokʼel ta steklumalik sventa xbatik ta paskʼop.
8 Kʼalal laj yaʼi li Davide, la stak batel li Joab+ xchiʼuk skotol li soltaroetike, la stak batel xtok li yajsoltarotak ti lek xuʼ yuʼunik paskʼope.+
9 Lokʼik tal li j-ammonetike xchiʼuk la xchol sbaik ta yochebal jteklum sventa spasik kʼop, yan li ajvaliletik ti laj yichʼik ikʼel tale te laj yakʼ sbaik ta jamalaltik.
10 Li Joabe laj yil ti chtal xa tsakatikuk ta kʼop ta yelovalik xchiʼuk ta spatike, jaʼ yuʼun la stʼuj li buchʼutik mas xtojobik ta paskʼop li ta Israele xchiʼuk la xchol sventa stsakik ta kʼop li jsiriaetike.+
11 Ti kʼu yepal kome jaʼ laj yakʼbe sbain* li xchiʼil ta vokʼel ti jaʼ li Abisaie,+ la xchol sbaik ek yoʼ stsakik ta kʼop li j-ammonetike.
12 Xi laj yal li Joabe: «Mi chavil ti jaʼ mas tsots tstsakikun ta kʼop li jsiriaetike,+ voʼot chtal akoltaun, pe mi laj kil ti jaʼ mas tsots tstsakikot ta kʼop li j-ammonetike, voʼon chbat jkoltaot un bi.
13 Skʼan tsotsuk koʼontontik xchiʼuk mu xijchibaj,+ yuʼun skʼan jkoltatik li jteklumaltike xchiʼuk li steklumaltak Jdiostike, vaʼun jaʼ tspas Jeova li kʼusi lek chile».
14 Jaʼ yuʼun, li Joab xchiʼuk sviniktake nopajik batel sventa xbat stsakik ta kʼop li jsiriaetike, pe jatavik batel li jsiriaetike.+
15 Kʼalal laj yakʼ venta j-ammonetik ti jatavik xa batel li jsiriaetike, jatavik lokʼel ek ta stojolal li Abisai ti jaʼ xchiʼil ta vokʼel li Joabe xchiʼuk ochik li ta jteklume. Ta tsʼakale, bat ta Jerusalen li Joabe.
16 Kʼalal laj yilik ti tsalatik xa yuʼun Israel li jsiriaetike, la stakik batel j-almantaletik sventa xbat stsobik li jsiriaetik ti te oyik ta yosilal Ukʼume,*+ li jsiriaetik ti te oyik ta yosilal Ukʼume jaʼ beiltasbilik batel yuʼun li Sobake, li bankilal soltaro yuʼun Adadesere.+
17 Kʼalal laj yaʼi li Davide, ta ora noʼox la stsob skotol li Israele xchiʼuk la xtuchʼ jelavel li Jordane, kʼot ti bu oyike xchiʼuk te la xchol sbaik sventa stsakik ta kʼop. Li David xchiʼuk sviniktake la xchol sbaik sventa stsakik ta kʼop li jsiriaetike, li jsiriaetik eke tal tsakvanikuk ta kʼop.+
18 Pe li jsiriaetike jatavik lokʼel ta stojolal li Israele; li Davide la smil vukmil ti kajajtik batel ta karetae xchiʼuk la smil 40 mil soltaroetik yuʼun jsiriaetik ti ta yakan chanavike, jech xtok, la smil li Sofak ti jaʼ bankilal yuʼun soltaroetike.
19 Li yajtuneltak Adadesere laj yakʼik venta ti lajik xa ta tsalel yuʼun li Israele,+ jaʼ yuʼun ta ora noʼox la spas ta jun yoʼontonik xchiʼuk li Davide, jech lik ventainatikuk;+ li jsiriaetike mu xa skʼan skoltaik li j-ammonetike.
Tsʼibetik ta yok vun
^ O «spamukʼta».
^ O «xchʼutike».
^ Li jun talentoe jaʼ 34.2 kilo yalal. Kʼelo Apendise B14.
^ Literal «Aram-Naaraim».
^ Literal «ta skʼob».
^ Jaʼ xkaltik, li Eufratese.
