Markos 6:1-56
6 Lokʼ batel te xchiʼuk och batel ta slumal stuk, te tijilik batel ek li yajchankʼoptake.
2 Lik chanubtasvanuk ta nail tsobobbail kʼalal Savado xaʼoxe, chʼayal to kʼot yoʼontonik xchiʼuk xi laj yalik jutuk mu skotoluk li buchʼutik te yakal chaʼiike: «¿Bu la xchan skotol kʼusitik li vinik leʼe? ¿Kʼu yuʼun ti akʼbil spʼijile xchiʼuk ti spas yuʼun li skʼelobiltak juʼelal* leʼe?
3 Leʼe jaʼ li karpinteroe, jaʼ li yol Mariae xchiʼuk jaʼ yitsʼinabtak li Santiago, Jose, Judas xchiʼuk li Simone, ¿mi mu jechuk? ¿Mi mu liʼuk nakalik ta jlumaltik li yixleltake?». Jaʼ yuʼun lik smak yokik ta skoj.
4 Pe xi albatik yuʼun li Jesuse: «Jaʼ noʼox muʼyuk ichʼbil ta mukʼ ta slumal stuk li j-alkʼope, ta stojolal yutsʼ yalal xchiʼuk ta sna stuk».
5 Jech oxal chaʼa, muʼyuk bu la spas junuk skʼelobil juʼelal te, jaʼ noʼox laj yakʼ skʼob* ta stojolal jayibuk buchʼutik ipik xchiʼuk la poxtaan.
6 Ta melel, toj labal to sba laj yil ti chʼabal xchʼunel yoʼontonike. Xchiʼuk xtok, ay xanavuk li ta bikʼtal lumetik ta sjoylejal taje, ay chanubtasvanuk.
7 Vaʼun la stak ta ikʼel xlajchaʼvoʼalik, lik stak batel ta chaʼchaʼvoʼ xchiʼuk lik yakʼanbe yabtel sventa tspasik ta mantal li ibal sba pukujetike.
8 Jech xtok, laj yal mantal ti mu me kʼusi xichʼik batel ti bu chbatike, jaʼ noʼox akʼo yichʼ batel snamteʼik, ti akʼo mu xichʼ batel spanik,* mi jaʼuk smoralik xchiʼuk mi jaʼuk xichʼik batel takʼin* li ta yav stakʼinik ti tsjokʼan ta xchukike,
9 jaʼ noʼox akʼo xchuk lek xonobik xchiʼuk ti mu me chaʼchopuk skʼuʼ spokʼ* slapik batele.
10 Xi albatik xtoke: «Buyuk noʼox jpʼejukal na ti cha-ochike, te komanik-o jaʼ to mi lalokʼik batel tee.
11 Xchiʼuk buyuk noʼox ti mu skʼan xchʼamoxuk xchiʼuk ti mu skʼan xaʼiik li kʼusi chavalike, lilino komel li spukukal* avokik kʼalal mi lalokʼik batel tee, sventa xakʼik venta ti mu lekuk oyike».
12 Jech oxal lokʼik batel xchiʼuk la xcholik mantal sventa tsutes yoʼonton li krixchanoetike,
13 la slokʼesik ep pukujetik xchiʼuk ep buchʼutik la xjaxbeik aseite ti ipike, vaʼun la xpoxtaik.
14 Pe kʼot ta xchikin ajvalil Erodes maʼ taje, yuʼun puk batel skʼoplal li Jesuse, vaʼun xi lik yal li krixchanoetike: «Laj yichʼ chaʼkuxesel* li Juan chakʼ ichʼvoʼe, jech oxal jaʼ ta skoj ti spas yuʼun skʼelobiltak juʼelale».
15 Pe xi chal li yantike: «Jaʼ Elias». Li yantik xtoke xi chalike: «Jaʼ jun j-alkʼop jech kʼuchaʼal li j-alkʼopetik echʼ ta voʼnee».
16 Pe kʼalal laj yaʼi Erodes taje, xi laj yale: «Li Juan ti la jtak ta tuchʼbel sjole laj yichʼ chaʼkuxesel».
17 Yuʼun jaʼ stuk Erodes laj yal mantal ti akʼo stsakik li Juane, la stikʼ ta chukel xchiʼuk la xchuk ta kadena ta skoj li Erodiase, ti jaʼ li yajnil sbankil ti Filipo sbie, yuʼun laj yikʼ.
18 Yuʼun xi onoʼox ch-alilanbat yuʼun Juan li Erodese: «Mu stakʼ ti liʼ avikʼojbe yajnil li abankile».
19 Pe li Erodiase xtiʼet sjol ta stojolal xchiʼuk tskʼan tsmil, pe mu kʼusi xut.
20 Ta skoj ti snaʼoj ti jaʼ jun tukʼil vinik xchiʼuk ti chʼule mu skʼan kʼusi chopol spasbe Juan li Erodese, jaʼ yuʼun lek xchabioj. Vaʼun kʼalal chaʼibe li kʼusi chale mu xa snaʼ kʼusi tspas; akʼo mi jech, xmuyubaj noʼox* chaʼibe li sloʼile.
21 Pe la stabe lek yorail sventa tspas kʼusi oy ta yoʼonton li Erodiase, jaʼo kʼalal laj yakʼ veʼel Erodes ta skoj ti lokʼ ta jabile; la stak ta ikʼel li sviniktak ti tsots yabtelike, li komandanteetik yuʼun soltaroetike xchiʼuk li viniketik ti lek ojtikinbilik ta Galileae.
22 Vaʼun och batel li stseb Erodiase xchiʼuk akʼotaj, toj lek laj yil li Erodese xchiʼuk li buchʼutik yikʼoj ta veʼele. Jaʼ yuʼun xi laj yalbe li tsebe: «Kʼanbun ti kʼusi chakʼane, vaʼun ta xkakʼbot».
23 Jech, xi laj yakʼ ye* ta stojolal li tsebe: «Ti kʼusi chakʼanbune ta xkakʼbot, akʼo mi chakʼanbun j-oʼloluk ti kʼu yepal jventainoje».
24 Jech oxal lokʼ batel xchiʼuk xi la sjakʼbe li smeʼe: «¿Kʼusi ta jkʼan xanaʼ?». Xi la stakʼe: «Jaʼ xakʼanbe li sjol Juan chakʼ ichʼvoʼe».
25 Vaʼun ta anil noʼox och batel ti bu oy li ajvalile xchiʼuk xi la skʼanbee: «Ta jkʼan xalechbun tal ta ora ta jun mukʼta plato sjol li Juan J-akʼ-ichʼvoʼe».
26 Akʼo mi laj yat tajek yoʼonton li ajvalile, ta skoj ti yakʼoj xaʼox ye xchiʼuk ti laj yaʼi li buchʼutik yikʼoj ta veʼele, la spas li kʼusi kʼanbate.
27 Jech oxal chaʼa, li ajvalile ta anil noʼox la stak batel jun jchabivanej* ti akʼo yichʼbe tal sjol li Juane. Vaʼun bat xchiʼuk la xtuchʼbe tal sjol ta chukinab,
28 te une laj yichʼbe tal ta jun mukʼta plato li sjole. Vaʼun laj yakʼbe li tsebe, laje bat yakʼbe smeʼ li tsebe.
29 Kʼalal laj yaʼi li yajchankʼoptake, ay xkuchbeik tal li sbekʼtale xchiʼuk la smukik.
30 La stsob sbaik ta stojolal Jesus li jtakboletike xchiʼuk laj yalbeik skotol li kʼusitik la spasike xchiʼuk li kʼusitik laj yakʼik ta chanele.
31 Vaʼun xi albatike: «Laʼik, batik ti bu nom sventa atuk oyoxuke, bat kuxik jlikeluk». Yuʼun ep buchʼutik xtal xbatik ta stojolalik, jaʼ yuʼun mi jaʼuk xakʼ yorail xveʼik.
32 Jech oxal muyik ta varko* sventa chbatik ti bu nom yoʼ stuktuk chʼikil sventa stuk te oyike.
33 Pe li krixchanoetike laj yilik ti batike xchiʼuk ep buchʼutik laj yaʼiik, jaʼ yuʼun skotol li jteklumetike la stambeik batel anil ta yokik xchiʼuk jaʼ baʼyel kʼotik.
34 Vaʼun kʼalal lokʼ li Jesuse laj yil epal krixchanoetik xchiʼuk kʼuxubaj ta yoʼonton, yuʼun xkoʼolaj kʼuchaʼal chijetik ti muʼyuk jchabichij yuʼunike. Jech oxal ep kʼusitik lik yakʼbe xchan.
35 Pe bat xa tajek kʼakʼal, vaʼun tal li yajchankʼoptak ta stojolale xchiʼuk xi laj yalbeike: «Stuktuk bu chʼikil ti bu oyutike xchiʼuk bat xa tajek ora.
36 Tako xa batel li krixchanoetik sventa xbatik ta sjoylejal stiʼiltak jteklum xchiʼuk li ta bikʼtal lumetik sventa sman stukik li kʼusi tslajesike».
37 Xi takʼbatike: «Makʼlinik voʼoxuk». Vaʼun xi laj yalbeike: «¿Mi yuʼun van skʼan xbat jmankutik tal chib sien denario* pan sventa chkakʼbekutik sveʼ li krixchanoetike?».
38 Xi takʼbatike: «¿Jayib pan oy avuʼunik? ¡Kʼelik kik!». Kʼalal laj yilike, xi laj yalike: «Voʼob xchiʼuk chaʼkot choy».
39 Te une laj yalbe mantal skotol li krixchanoetik ti akʼo xchotiik ta jujutsop ta tsʼiʼleltike.
40 Vaʼun chotiik ta jujutsop, jlome 100 ta voʼ xchiʼuk jlome 50 ta voʼ.
41 Te une la stsak li voʼob pane xchiʼuk li chaʼkot choye, la skʼel muyel vinajel xchiʼuk la skʼan jun bendision. Vaʼun la svokʼ* li pane xchiʼuk lik yakʼbe li yajchankʼoptak sventa xbat yakʼbeik li krixchanoetike, xchiʼuk la xchʼakbe skotol krixchanoetik xtok li chaʼkot choye.
42 Jech oxal, veʼ skotolik xchiʼuk lek noj xchʼutik,
43 vaʼun noj lek lajcheb moch kʼalal la stsobbeik li skomenale, parte li choye.
44 Li buchʼutik la sveʼik pane jaʼ voʼmil viniketik.
45 Vaʼun ta anil noʼox laj yalbe mantal yajchankʼoptak ti akʼo xmuyik batel ta varko sventa baʼyel xjelavik li ta jot tiʼ nab ta Betsaidae, yuʼun laj to skʼopon komel krixchanoetik li stuke.
46 Pe kʼalal laj xaʼox skʼopon komel li krixchanoetike, bat ta vits sventa tspas orasion.
47 Kʼalal och xaʼox akʼobale, ta oʼlol nab xaʼox oy li varkoe, yan li Jesuse stuktuk te oy li ta vitse.
48 Kʼalal laj yil ti solel mu xanav yuʼun li svarkoike, ta skoj ti ta yelovalik chtal li tsatsal ikʼe, xanav batel ta ba nab ta stojolalik te van ta yorail xchankojal chabivanej* ta akʼobaltik; pe tukʼ ox tskʼan chjelav.
49 Kʼalal la staik ta ilel ti yakal chanav ta ba nabe, xi la snopike: «¿Mi yuʼun van yakal chijvaychinaj?». Vaʼun tsots lik avanikuk,
50 yuʼun laj yil skotolik xchiʼuk xiʼik. Pe ta ora noʼox kʼoponatik xchiʼuk xi albatike: «¡Tsotsuk avoʼontonik! Voʼonun, mu xaxiʼik».
51 Vaʼun, och ek li ta varko bu oyike, te une tsʼij xi likel li ikʼe. Toj labal sba laj yilik taje,
52 yuʼun muʼyuk bu laj yaʼibeik smelolal ta sventa li pane, moʼoj, yuʼun makal-o li yoʼontonike.
53 Kʼalal jelavik xaʼox batel ta jot nabe, kʼotik ta Jenesaret xchiʼuk te nopol la xchuk ta tiʼ nab li svarkoike.
54 Pe kʼalal lokʼik ta varkoe ojtikinat yuʼun li krixchanoetike.
55 Batik ta anil ta sjunul li jteklum taje xchiʼuk lik yikʼbeik batel ta svayeb* li buchʼutik ipike, te laj yikʼik batel ti bu oy laj yaʼiike.
56 Jech oxal ta buyuk noʼox ti chbate, mi ta bikʼit lumetik, mi ta jteklumetik o mi jaʼ li ta stiʼiltak jteklumetike, te chakʼik ta chʼivit li buchʼutik ipike, vaʼun xvokolet tskʼanbeik ti akʼo yakʼ ta pikel akʼo mi jaʼ noʼox li stsitsimal skʼuʼ slapoj ta sbae. Jaʼ yuʼun skotol li buchʼutik la spikike kolik.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ S.gr.: «kovre».
^ O: «jchop smasil skʼuʼ spokʼik».
^ O: «spolvoal»; «stsʼubil lumal»; «stanil».
^ Kʼelo glosario.
^ O: «pʼij noʼox yoʼn»; «nichim noʼox yoʼonton».
^ Kʼelo glosario.
^ Kʼelo glosario.
^ O: «kanova».
^ Kʼelo glosario.
^ O: «la xetʼ»; «la xut».
^ Chlik van ta oxib ora ta sob jaʼ to tstsuts kʼalal mi lokʼ Kʼakʼale.
^ O: «skamiya».
