Markos 15:1-47
15 Jaʼ noʼox kʼalal sakub osile, la stsob sbaik sventa chchap skʼopik li bankilal paleetik, li moletik xchiʼuk li jchanubtasvanejetik ta Mantale, jech, skotol li Sanedrine;* vaʼun la xchukbeik skʼob li Jesuse xchiʼuk laj yikʼik batel, bat yakʼik ta stojolal Pilato.
2 Jech oxal xi jakʼbat yuʼun li Pilatoe: «¿Mi voʼot Ajvalilot yuʼun li judaetike?». Xi la stakʼbee: «Voʼot laj aval atuk».
3 Pe li bankilal paleetike yakal chalik ti ep smule.
4 Vaʼun xi lik jakʼbatuk yan velta yuʼun li Pilatoe: «¿Mi muʼyuk kʼusi chatakʼ? ¡Kʼelo avil kʼu to yepal amul yakal chalik!».
5 Pe muʼyuk xa kʼusi mas la stakʼ li Jesuse, jech oxal toj labal sba laj yil li Pilatoe.
6 Veno, nopem onoʼox xaʼi ti tskoltabe lokʼel junuk jchukel li ta jujun kʼine, jaʼ ti buchʼu junukal tskʼanike.
7 Li vaʼ kʼakʼale te tikʼil ta chukel jun vinik ti Barrabas sbie, te chukul xchiʼuk li buchʼutik milvanik ta skoj ti la stoy sbaik ta stojolal ajvalile.
8 Jech oxal te kʼot li epal krixchanoetike xchiʼuk lik skʼanbeik li kʼusi nopem onoʼox xaʼi tspasbatik yuʼun Pilatoe.
9 Xi albatik yuʼun li Pilatoe: «¿Mi chakʼanik ta jkoltaboxuk lokʼel li Ajvalil yuʼun judaetike?».
10 Yuʼun laj yakʼ venta Pilato ti jaʼ ta skoj yitʼixal yoʼonton bankilal paleetik ti akʼbat ta skʼobe.
11 Pe li bankilal paleetike la stijbe yoʼonton li epal krixchanoetik ti jaʼ akʼo xkoltabatik lokʼel li Barrabase.
12 Pe xi albatik yan velta yuʼun li Pilatoe: «Vaʼun chaʼa, ¿kʼusi ta jpasbe li buchʼu Ajvalil yuʼun judaetik chavalike?».
13 Xi tsots avanik yan veltae: «¡Jokʼano ta jtel teʼ!».*
14 Pe xi albatik yuʼun li Pilatoe: «¿Kʼu yuʼun? ¿Kʼusi chopol la spas?». Pe mas to xi tsots avanike: «¡Jokʼano ta jtel teʼ!».
15 Vaʼun chaʼa, ta skoj ti tskʼan jun yoʼonton xkom yuʼun krixchanoetik li Pilatoe, la skoltabe lokʼel li Barrabase; jech oxal kʼalal laj xaʼox yakʼ ta tsitsel li Jesuse, laj yakʼ ta kʼabal sventa chichʼ milel ta jtel teʼ.
16 Vaʼun li soltaroetike laj yikʼik batel li ta amakʼe,* ti te oy li ta yut sna ajvalile; te une la stakik ta ikʼel skotol li soltaroetike,
17 vaʼun laj yakʼbeik slap kuxul morado kʼuʼil xchiʼuk la xotik chʼix sventa tspasik ta korona, vaʼun la xojbeik ta sjol;
18 vaʼun xi lik skʼoponike: «¡Liʼote, Ajvalil yuʼun judaetik!».
19 Jech xtok, lik sjisbeik aj ta sjol xchiʼuk la stubtaik, te une la skejan sbaik ta stojolal xchiʼuk laj yichʼik ta mukʼ.*
20 Ta slajeb une, kʼalal laj yoʼontonik ta slabanele, la slokʼbeik li kuxul morado kʼuʼile xchiʼuk la slapbeik li skʼuʼtak tslap ta sbae. Vaʼun laj yikʼik batel sventa tsbajik ta jtel teʼ.
21 Jech xtok, te x-echʼ batel jun vinik ti vokʼem* ta Sirene ti sut tal ta yosile, Simon sbi, jaʼ stotik li Alejandro xchiʼuk Rufoe, vaʼun la sujik sventa xtun ta xkuchel batel li jtel teʼ sventa vokolile.*
22 Vaʼun laj yikʼik batel ta jun osil ti Golgota sbie, taje xi smelolal kʼalal chichʼ jelubtasele: «Yavil Bakil Jolil».
23 Te laj yakʼbeik ox yuchʼ vino kapbil ta mirra,* pe muʼyuk la skʼan laj yuchʼ.
24 Vaʼun la sbajik ta jtel teʼ xchiʼuk laj yakʼik suerte* sventa tskʼelik buchʼu chichʼ li skʼuʼtak slapoj ta sba sventa tspukbe sbaike.
25 Staoj xaʼox li yoxibal orae,* vaʼun la sbajik li ta jtel teʼe.
26 Xchiʼuk xi tsʼibabil li ta sjol teʼ ti kʼusi smul chalike: «Li Ajvalil yuʼun judaetike».
27 Jech xtok, laj yichʼik jokʼanel chaʼvoʼ j-elekʼetik xchiʼuk, jun ta sbatsʼikʼob xchiʼuk jun ta stsʼetkʼob.
28 *——
29 Vaʼun li buchʼutik te ch-echʼike la xchopol kʼoptaik, la sjimulan sjolik xchiʼuk xi laj yalike: «¡Keʼ! Voʼot ti avaloj chajines templo xchiʼuk ti avaloj chavaʼan ta oxib noʼox kʼakʼale,
30 koltao aba atuk, yalan tal li ta jtel teʼ sventa vokolile».
31 Jaʼ jech ek, li bankilal paleetik xchiʼuk li jchanubtasvanejetik ta Mantale la slabanik ta komon xchiʼuk xi laj yalike: «¡La skolta yantik, pe mu xuʼ skolta sba stuk!
32 Akʼo yaluk tal li ta jtel teʼ sventa vokolil li Kristoe, li Ajvalil yuʼun Israele, yuʼun jech ta xkiltik xchiʼuk ta jchʼuntik». Jaʼ jech ek, li buchʼutik te laj yichʼik jokʼanel xchiʼuke, la xchopol kʼoptaik.
33 Ikʼub osil ta sjunul balumil kʼalal la sta svakibal ora* kʼalal to ta sbalunebal orae.*
34 Vaʼun li ta sbalunebal orae xi tsots lik avanuk li Jesuse: «E·li, E·li, ¿la·ma sa·bak·ta·ni?», taje xi smelolal kʼalal chichʼ jelubtasele: «Dios kuʼun, Dios kuʼun, ¿kʼu yuʼun ti laj aviktaune?».
35 Vaʼun kʼalal laj yaʼiik jlom li buchʼutik te nopol vaʼalike, xi lik yalike: «¡Aʼio avaʼiik! Yakal chikʼ tal Elias».
36 Vaʼun oy buchʼu bat ta anil, bat stsʼaj ta pajal vino jtos ti kʼusi sputspune, la xoj ta aj, vaʼun laj yakʼbe stsʼutsʼ, xi laj yale: «¡Chʼan utik!* Jkʼeltik mi xtal yalesatuk yuʼun li Eliase».
37 Pe tsots avan li Jesuse, vaʼun cham.*
38 Vaʼun jat yalel ta sjol kʼalal to ta yok li kortina* ta temploe, pas ta chaʼlik.
39 Jech oxal chaʼa, kʼalal laj yil li kʼusitik kʼot ta pasel kʼalal cham Jesus li bankilal soltaro* ti te vaʼal ta yelovale, xi laj yale: «Ta melel, li vinik liʼe jaʼ Xnichʼon Dios».
40 Jech xtok, te ta nomnom noʼox chkʼelvanik batel jayvoʼuk antsetik, te oy li Maria Magdalenae, li Maria ti jaʼ smeʼik li Kʼox Santiago xchiʼuk Josese xchiʼuk te oy ek li Salomee,
41 ti nopem xaʼi chchiʼinike xchiʼuk ti la skoltaik kʼalal te toʼox oy ta Galileae, xchiʼuk te yan ep antsetik ti la xchiʼinik muyel ta Jerusalene.
42 Vaʼun kʼalal bat xaʼox tajek kʼakʼale, ta skoj ti jaʼ xa Skʼakʼalil chchapan sbaike,* jaʼ xkaltik, ti jun xaʼox kʼakʼal skʼan Savadoe,
43 te tal Jose ta Arimatea, jun vinik ti lek ichʼbil ta mukʼ ta Sanedrine, ti smalaoj ek li Ajvalilal yuʼun Diose. Tsots yoʼonton bat ta stojolal Pilato, bat skʼanbe li sbekʼtal Jesuse.
44 Pe li Pilatoe tskʼan tsnaʼ mi chamem xa li Jesuse, jech oxal la stak ta ikʼel li bankilal soltaroe, vaʼun la sjakʼbe mi chamem xa li Jesuse.
45 Kʼalal albat yuʼun bankilal soltaro ti chamem xae, laj yakʼbe Jose li sbekʼtal Jesuse.
46 Ta tsʼakale, la sman lekil lino xchiʼuk bat syales, la xpix li ta lekil linoe xchiʼuk te laj yakʼ ta mukinal ti jombil ta jpʼej tone; te une la stselelin* batel ton kʼalal to ta stiʼ li mukinale.
47 Pe li Maria Magdalena xchiʼuk li Maria ti jaʼ smeʼ Josese, te skʼelojik-o ti bu laj yichʼ akʼele.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ O: «la skejan sbaik». Li ta voʼnee jaʼ senyail ti ch-ichʼvan ta venta li jun krixchanoe.
^ O: «ayanem».
^ Kʼelo glosario.
^ Li kʼusi la skapik-oe jaʼ jech tspas kʼuchaʼal li drogae. Kʼelo glosario.
^ Kʼelo glosario.
^ Te van ta baluneb ora ta sob.
^ Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.
^ Te van ta oʼloltik batel kʼakʼal.
^ Te van ta oxib ora ta bat kʼakʼal.
^ O: «Mu xavutik».
^ O: «laj yichʼ ikʼ ta slajeb velta».
^ Kʼelo glosario.
^ Jaʼ li buchʼu sbainoj o ti tspas ta mantal sien soltaroe.
^ Kʼelo glosario.
^ O: «la setetin»; «la xbalchʼun».
