Иегованың Херечилери Библияны өөренип тургаш, ооң аңгы-аңгы очулгаларын ажыглап турар. Ынчалза-даа олар «Чаа делегей» очулгазын (бир эвес оларның дылында бар болза) эң эки деп санаарлар. Чүге дизе ол очулга ылап шын, тода билдингир болгаш ында Бурганның адын ажыглап турар.

•   Бурганның адын ажыглааны. Чамдык Библия үндүрүкчүлери ооң Авторунга көргүзер ужурлуг хүндүткелди көргүспээннер. Чижээ, бир Библияның очулгазында, ооң үндүрүлгезинге киришкен 70 ажыг кижиниң адын бижээн. Ынчалза-даа ооң ёзулуг Автору болур Иегова Бурганның адын чаңгыс-даа киирбээн!

   Ынчалзажок «Чаа делегей» очулгазында Бурганның адын, ёзулуг сөзүглелинде дег, турар ужурлуг черлерде муң-муң катап салып каан база ында очулдурукчуларының аттарын айытпаан.

•   Ылап шыны. Хөй очулгаларда баштайгы библейжи сөзүглелди шын эвес дамчыдып турар. Чижээ, бир очулгада Матфей 7:13-те шүлүктү мынчаар бижээн: «Тар эжик дамчыштыр кириңер, чүге дээрге эрлик оранының эжии алгыг, а ынаар чедире бээр орук делгем». Ынчалзажок ёзулуг сөзүглелде бо шүлүкте «эрлик ораны» эвес, а «өлүм» деп сөстү ажыглаан. Очулдурукчулар ол сөстү багай улус «эрлик оранынга» мөңгеде өрттенип хилинчектенир деп чүүлге бүзүрээр болгаш, киирген чадавас. Ынчалза-даа ол өөредиг Библияга үндезилеттинмээн. А «Чаа делегей» очулгазында ол шүлүктү ылап шын дамчыткан: «Тар эжик дамчыштыр кириңер, чүге дээрге өлүм эжии алгыг, а ынаар чедире бээр орук делгем».

•   Тода билдингири. Эки очулга чүгле ылап шынныг эвес, а билдингир, номчуттунгур боор ужурлуг. Чижээ, Римчилерге 12:11-де Павел элчинниң ажыглаан сөстери «ыдыктыг сүлдеден хайныр» дээн утканы илереткен. Амгы үениң номчукчузунга ону билип алыры берге боор чадавас. А «Чаа делегей» очулгазында ол сөс каттыжыышкынын оон-даа тода дамчыткан: «Ыдыктыг сүлдеден кыптыгар» дээн.

 «Чаа делегей» очулгазы ылап шынныг, билдингир база ында Бурганның адын ажыглаан. Ооң база бир ылгалы — ону халаска ап болур. Ооң ачызында миллион-миллион кижилер, а ооң санында Библияны садып алыр аргазы чок улус, ону төрээн дылынга номчуп болур.