Мындыг байдалды сагыштаалап көр даан: Андрей школаже бөгүн-даа, эртен-даа, кажан-даа барыксавайн турар. Шупту чүве үш ай бурунгаар, кажан Андрейниң чаңгысклассчылары ооң дугайында каржы хоп тарадыпкан соонда, эгелээн. Ооң соонда ону хоранныг сөстер-биле одаар апарган. Чамдыкта ооң номнарын билбээчеңнеп, холдарындан дүжүр соптар азы артындан кым идипкени билдинмес кылдыр идиптер. А дүүн мырыңай байдал нарыыдай берген. Андрей кыжаныглыг электроннуг чагаа алган...

Андрейниң орнунга турган болзуңза, канчаар сен?

Бодуңну «кошкак мен» деп бодава! Чогушпайн, дүржок кижилерге харыы берип болур сен. Канчаар?

•   ХЕРЕККЕ АЛБА. Библияда: «Мелегей кижи килеңин белени кончуг сула салыптар, а мерген угаанныг кижи — оожургадып аар» — деп бижээн (Чугаалар 29:11). Бир эвес хомудадыкчыларны херекке албайн, хорадавас болзуңза, олар соксай бээр чадавас.

• ӨЖЭЭН НЕГЕВЕ. Библияда: «Кымдан-даа чедирген хоразы дээш хора-биле орнун негевеңер» — деп бижээн (Римчилерге 12:17). Өжээн байдалды экижитпес, а харын дам-на баксырадыптар.

• ЭСКЕРИИЧЕЛ БОЛ. Библияда: «Угаанныг кижи айыыл көргеш, чашты бээр» — деп бижээн (Чугаалар 22:3). Болдунар-ла болза, айыылдыг кижилерни болгаш байдалдарны оюп чор.

• МАНАВААНЫ ХАРЫЫ БЭЭРИН ШЕНЕП КӨР. Библияда: «Эптиг-ээлдек харыы килеңни чайладыр» — деп бижээн (Чугаалар 15:1). Дорамчылалга баштак-биле харыылап болур сен. Чижээ, бир эвес сени «Шөртек хаван!» деп кыжырар болза: «Азыралым эки кижи диийн мен!» — деп, хүлүмзүрбүшаан, харыылап болур сен.

• АНАА ЧОРУВУТ. «Шыдамыккай боор болзуңза, улус сени чөңгээлекчилерден дээре, улуг апарган кижи кылдыр көөр — деп, 19 харлыг Нора чугаалап турар.— Сээң хомудадыкчыңга чедишпейн турар туттунуп билир чорук сенде бар деп көстүп кээр» (2 Тимофейге 2:24).

• БОДУҢНУ ХҮНДҮЛЕП ӨӨРЕН. Колдуунда хомудадыкчылар, харыы берип шыдавас, бодун төлеп чок кылдыр санап турар улусту дораан эскерип каар. Бир эвес чөңгээлекчиниң сени хорададыр дээн оралдажыышкыннарынга алыспас болзуңза, ол боду соксай бээр.

• ООҢ ДУГАЙЫНДА ӨСКЕЛЕРГЕ ЧУГААЛА. Бир башкы чораан кижи: «Базындырыышкынга таваржып турар улуска ооң дугайында өскелерге чугаалаар кылдыр сүмелээр-дир мен. Ынчаар кылыры шын болур. Оон аңгыда шак ынчалдыр өскелерни база базындырыышкындан камгалап ап болур» — деп чугаалаан.