Саулдуң улуг оглу, Ионафан, эрес-дидим дайынчы чораан. Давид Ионафанны эзирден дүрген, арзылаңдан күштүг дээр турган. Бир катап Ионафан даг кырынга 20 филистим дайынчыны көрүп каан. Ол чепсек тудар чалчазынга мынча дээн: «Иегова биске демдек бээр болза, оларже халдай бээр бис. Филистимнер: „Бээр келиңер!“ дээр болза, халдап кириптер бис». Ынчан филистимнер: «Бээр келиңер, дайылдажыылыңар!» — деп алгырышкан. Ионафан биле ооң чалчазы дагже үне бергеш, оларны тиилеп алган.

Ионафан Саулдуң улуг оглу болгаш, ачазының хаан эргезин салгап ап болур турган. Ынчалза-даа Иегова Израильдиң дараазында хааны кылдыр Давидти шилип алган. Ионафан ону билир турган-даа болза, Давидти адааргаваан. Харын-даа олар чоок эжишкилер апарган. Олар бот-боттарын камгалаар деп аксы-сөзүн берген.  Найыралының демдээ кылдыр, Ионафан Давидке бодунуң хевин, хылыжын, чазын болгаш курун берген.

Давид Саулдан чаштынып турда, Ионафан аңаа мынча дээн: «Кортпа, күштүг бол! Иегова сени хаан кылдыр шилип алган. Ооң дугайында ачам база билир». Ионафан ышкаш, эки өңнүктүг болуксаар сен бе?

Ионафан эжи дээш амы-тынындан хөй катап чарлыр часкан. Ачазының Давидти өлүрер деп турарын билир болгаш: «Давидти өлүрери шын эвес. Ол кандыг-даа багай чүве кылбаан!» — деп ачазынга чугаалаан. Ынчан Саул Ионафанче аажок хорадай берген.

Ионафан чок апаарга, Давид ооң оглу Мемфивосфейни тып алгаш, аңаа: «Сээң ачаң мээң дыка чоок эжим чораан. Ынчангаш сен дээш бүгү чуртталгамда сагыш човаар мен. Сен мээң-биле кады чемненип, мээң ордумга чурттаар сен» — дээн. Давид Ионафанның дугайында кажан-даа утпаан.