Иегованың чонун үр үе дургузунда баштап чораан Нуннуң оглу Иисус 110 харлыында чок апарган. Ол дириг чорда, израильчилер Иеговага дыңнангыр турган. А ол чок апаарга, израильчилер, хананейлер ышкаш, дүрзү-бурганнарга чүдүп эгелээн. Ол дээш Иегова израильчилерни Иавин деп ханаан хаанның холунга берипкен. Иавин оларны кадыг-дошкун хинчектээрге, олар Иеговадан дузаны чаннып дилеп эгелээн. Ынчангаш Иегова оларга Варак деп чаа баштыңчыны берген. Ол чонну Иеговаже эглип кээринге дузалаар ужурлуг турган.

Девора дээр медеглекчи Варакты кыйгырткаш, аңаа Иеговадан медээни дамчыткан: «10000 кижини алгаш, Киссон хемче чеде бергеш, Иавинниң аг-шерии-биле демисеш. Ооң аг-шерииниң баштыңчызы Сисараны удуп алыр сен». Варак Деворага: «Сен мээң-биле баар болзуңза, баар мен» — дээн. «Сээң-биле баар мен. Ынчалза-даа Иегова Сисараны сен эвес, а херээжен кижи өлүрер диди» — деп, Девора харыылаан.

Девора, Варак база ооң дайынчылары демиселге белеткенир дээш, Фавор дагже үне бергеннер. Сисара ооң дугайында дыңнап  кааш, дайынчы тергелерин болгаш аг-шериин хем шынаазынга чыып алган. Девора Варакка мынча дээн: «Иегованың ачызында тиилеп алыр сен!» Варак база ооң 10000 дайынчызы дагдан дүжүп келгеш, Сисараның аг-шерии-биле демисежип кирипкен.

Ынчан Иегова Киссон хемни үерледипкен. Сисараның дайынчы тергелери малгашка чыдыпкан. Варак дайынчылары-биле Сисараның аг-шериин удуп алган-даа болза, Сисара дезипкен. Ол Иаил деп херээжен кижиниң майгынынга чаштына берген. Иаил аңаа сүт ижирткеш, шуглап каан. Шылаан дайынчы удуй берген. Ынчан Иаил оожум келгеш, майгынның өргени-биле ону өлүрүп каан.

Варак Сисараны дилеп, Иаилдиң майгынынга келген. Иаил олче уткуштур үнгеш, мынча дээн: «Сээң дилеп турар кижиң мында. Кирип кел». Варак өлүг чыткан Сисараны көрүп каан. Ооң соонда Варак биле Девора дайзыннарын тиилеп алырынга дузалааны дээш, Иегованы алдаржыдып, ырлап эгелээн. Оон Израильге 40 чыл ишти дайын болбаан.