1—3. Бис шупту кандыг уткалыг «кара-бажыңда» олурар бис база Иегова бисти канчаар хостаар?

 СИЛЕРНИ үүлгетпээниңер кем-херекке онаап, бүгү назыныңарда кара-бажыңга олурар кылдыр шиидип каан дижик. Ам кара-бажыңда олурар силер. Хосталып үнер идегелиңер чок. Чүнү-даа өскертип шыдавазыңарны билип, баш муңгаш байдалда апарган силер. Ынчалза-даа силерни хостап шыдаар кижи бар деп база ооң хостаар бооп аазаанын билип каан силер. Ынчан чүнү миннир силер?

² Өлүмнү база бүгү назынында кара-бажыңга хоругдаттырарынга дөмейлеп болур. Канчаар-даа кызар болзувусса, дөмей-ле хосталгаже үнүп шыдавас бис. Ынчалза-даа Иегова бисти хостап шыдаар. Өлүм узуткаттырар деп, Ол аазап турар (1 Коринфичилерге 15:26).

³ Өлүмден кортпас дээрге кандыг кончуг эки чоор! Иегова бисти өлүмден хостаар деп турарындан аңгыда, чок апарган улусту чуртталгаже эгидерин аазап турар. Чок апарган улус амыдыралче катап эглип кээр деп, Бурган чугаалаан (Исайя 26:19). Библияда ону диргизиишкин деп адаан.

4. а) Чоок киживисти чидирген болзувусса, биске чүү аргалал бооп болур? б) Иисус кымнар-биле өңнүктер чораан?

⁴ Кады төрээнивисти азы чоок өңнүүвүстү чидиргеш, чүнү миннинген бис? Күштүг аарышкыны болгаш ханы качыгдалды. Чоок киживисти катап эгидип алыр харыывыс чок болгаш, боттарывыстың чүнү-даа кылып шыдавазывысты миннир бис. Ынчалза-даа Библиядан аргалалды ап болур бис. (Номчуптуңар: 2 Коринфичилерге 1:3, 4.) Иегова биле Иисус Христос бистиң чоок улузувустуң чурттаарын аажок күзеп турар деп көргүскен бир болуушкунну көрүптээлиңер. Иисус черге турган үезинде Лазар-биле база ооң дуңмалары Марфа, Мария-биле өңнүктер чораан. «Иисус Марфага, ооң дуңмазынга база Лазарга ынак турган» — деп Библияда бижээн. Бир катап Лазар аар аарааш, чок апарган (Иоанн 11:3—5).

5, 6. а) Лазарның ыглап-сыктаан эш-өөрүн база ооң дуңмаларын көргеш, Иисус чүнү миннинген? б) Чоок өңнүүнүң өлүмүнге Иисустуң хамаарылгазы бисти канчаар оожургадып турар?

⁵ Иисус Марфа биле Марияны аргалаар дээш чорупкан. Иисустуң оларже кел чыдарын дыңнааш, Марфа уткуй үнүпкен. Ооң келгенинге өөрүп турган-даа болза, Марфа мынча дээн: «Силер маңаа турган болзуңарза, мээң акым өлбес ийик». Иисус хөлүн эрттир саадап келген ышкаш кылдыр аңаа сагындырган. Оон Иисус ооң дуңмазы Марияны көрүп каан, ол аажок  качыгдап ыглаан турган. Иисус оларның ажыг-шүжүүн көргеш, баары ажып, база ыглай берген (Иоанн 11:21, 33, 35). Чоок киживисти чидиргеш, минниривис дег, аарышкыны ол миннинген.

⁶ Иисус бистиң сагыш-сеткиливисти билип турар деп бодал бисти дыка-ла оожургадыр! Ол оозу-биле Адазынга дөмей (Иоанн 14:9). Удавас Иегова өлүмнү узуткаар — Ооң ону кылыр күчү-күжү бар.

7, 8. Чевегниң аксында дашты ап кааптарынга Марфа чүге удурланган? Иисус чүнү кылганыл?

⁷ Лазарны орнукшуткан чевегге Иисус чедип келген. Аксын улуг даш-биле дуглап каан куй болган. «Дашты ап кааптыңар» — деп, ол дилээн. Ынчалза-даа Марфа аңаа удурланган, чүге дизе Лазарның мөчүзү чевегге дөрт хүн чыткан (Иоанн 11:39). Ооң чок апарган акызынга дузалаар дээш, Иисустуң чүнү кылыр деп турарын ол билбейн турган.

⁸ Кажан дашты ап кааптарга, Иисус ыыткыр үн-биле: «Лазар, куй иштинден үнүп кел!» — деп кый дээн. Оон Марфа биле Марияның канчап-даа манавааны чүүл болган — «өлген кижи үнүп келген». Ооң «холдарын болгаш буттарын орнукшудулга шывыглары-биле ораап каан» болган (Иоанн 11:43, 44). Лазар дириг, Иисус ону диргизипкен! Ооң төрелдериниң болгаш өңнүктериниң  кайы хире өөрээнин бодап көрүңер даан, чүге дизе чоок кижизи оларның чанында, ооң-биле база катап куспактажып, чугаалажып болурлар. Ол, шынап-ла, кайгамчык хуулгаазын!

9, 10. а) Иисус Христос улусту диргизер күштү кайыын ап турган? б) Кижилерни диргизип турганын Библияда чүге бижээнил?

⁹ Иисус Христос улусту диргизер күштү кайыын ап турганыл? Лазарны диргизериниң мурнунда Иисус Иеговага мөргээн. Ынчап кээрге, ооң улусту диргизер күжү Иеговадан кээп турган. (Номчуптуңар: Иоанн 11:41, 42.) Диргискеннерниң санынга чүгле Лазар турбаан. Аар аарый берген 12 харлыг уругнуң дугайында Библияда бижээн. Ооң ачазы Иаир Иисуска чедип келгеш, уруун экиртип каарын чаннып дилээн. Ол ооң кара чаңгыс уруу турган. Ол аразында Иаирге сөс дамчыткан: «Сээң урууң өлүп калды. Башкыны ам хей-ле шүүдетпе». Ынчалза-даа Иисус Иаирге: «Кортпа, чүгле бүзүрелиң ышкынма, ынчан урууң экирип, камгалал алыр» — дээн. Ооң соонда олар кады Иаирниң бажыңынче чорупканнар. Иисус бажың чанынга келгеш, ыглап-сыктаан улусту көрүп каан. Ол оларга: «Ыглаваңар, бо уруг өлбээн, а удуп чыдар кижи ышкажыл» — дээн. Иисустуң чүнү чугаалаксаанын уругнуң ада-иези чедир билбээн чадавас. Бажыңдан шупту улусту үне бээрин ол дилээн.  Оон Иисус уругнуң ада-иези-биле ооң чыткан өрээлинче кире берген. Ооң холун тудуп алгаш, мынча дээн: «Кызыжак, сеңээ чугаалап тур мен, туруп кел!» Уруг туруп келгеш, кылаштап эгелээрге, ада-иези аажок өөрээн! Иисус ынчалдыр Иаирниң уруун диргизипкен (Марк 5:22—24, 35—42; Лука 8:49—56). Ада-иези уруун көрген санында-ла, Иегованың оларга чүнү кылганын сактып чораан a.

¹⁰ Иисустуң диргискен кижилери үе эрткен соонда, дөмей-ле чок апарган. Ынчалза-даа ол таварылгалар Иегованың чок апарган улусту диргизиптерин база ону албан күүседирин көргүзүп турар. Дыка-ла кайгамчык идегел-дир!

11. Экклесиаст 9:5-те өлүглер дугайында чүнү бижээн база бо шүлүк Лазарның өлген соонда кандыг байдалга турганын билип алырынга биске канчаар дузалап турар?

¹¹ «Өлүглер чүнү-даа билбес» — деп Библияда бижээн. Лазарның дугайында база ынча деп болур (Экклесиаст 9:5). Ону удаан кижиге дөмейлээн (Иоанн 11:11). Лазар чевегге чыткан үезинде «чүнү-даа билбес» турган.

12. Лазарның диргизиишкини херек кырында болган деп кайыын билир бис?

 ¹² Лазарның дирлип келгенин дыка хөй кижилер көрген. Ол кайгамчык хуулгаазын болган деп, Иисустуң удурланыкчылары безин билип турган. Лазарның катап дирлип келгени диргизиишкинниң херек кырында болганын бадыткап турар (Иоанн 11:47). Лазарны көөр дээш, хөй-ле кижилер кээп турган. Ону көргеш, олар Иисусту Бурган чоруткан деп бүзүреп эгелээннер. Ол чүүлге Иисустуң удурланыкчылары таарзынмайн, Иисусту-даа, Лазарны-даа өлүрер деп бодап алганнар (Иоанн 11:53; 12:9—11).

13. Иегова өлген улусту диргизиптер деп чүге бүзүреп болур бис?

¹³ «Чевеглерде чыдар бүгү улус» дирлип кээр деп, Иисус чугаалаан (Иоанн 5:28). Моон алырга, Иегова угаан-сарыылында кадагалап чорууру бүгү улусту диргизер. Ынчалза-даа кым-бир кижини диргизер дизе, Иегова ооң дугайында бүгү чүүлдү сактыр ужурлуг. Бо чүүл болдунар бе? Боданып көрээлиңерем. Октаргайда миллиард-миллиард сылдыстар бар. Иегова сылдыс бүрүзүнүң адын билир деп Библияда бижээн. (Номчуптуңар: Исайя 40:26.) Иеговага сылдыс бүрүзүнүң адын сактып алыры анаа чүүл болганда, диргизер дээн улузунуң дугайында сактыры Аңаа берге деп бе?! Иегова — Чаяакчы, ынчангаш Ооң улусту диргизиптер күжү бар деп бичии-даа чигзинмес бис.

14, 15. Иовтуң сөстеринден диргизиишкин дугайында чүнү билип ап турар бис?

 ¹⁴ Бурганга бердинген Иов диргизиишкинге бүзүреп чораан. Бир катап ол: «Өлген кижи дирлип кээр бе?» — деп айтырыг салгаш, оон Иеговага: «Сен ынчан кыйгырар ийик сен, а мен харыылаар ийик мен, чүге дээрге Бодуңнуң чаяалгаңны чоктаар сен» — деп, мөргээн. Чок апарган улусту диргизиптер үезин Иегова Боду четтикпейн манап турар деп чүүлге Иовтуң долузу-биле бүзүреп турганы бо сөстерден көскү (Иов 14:13—15).

¹⁵ Диргизиишкин дугайында бодал силерге кандыг минниишкиннер тывылдырар-дыр? Чоок кижиңерни чидирген болзуңарза, «ол дирлип кээр бе?» деп бодап чоруур чадавас силер. Чок апарган улустуң катап чурттаарын Иегова аажок күзеп турар деп чүүлдү билири бисти дыка-ла оожургадыр. «Кымны диргизер база олар каяа чурттаар?» деп айтырыгларга Библияда чүнү бижээнин ам билип алыылыңар.

16. Чер кырынга дирлип кээр улустуң чуртталгазы кандыг боорул?

¹⁶ Бурунгу үеде Бурганның диргискен улузу өг-бүлези болгаш эш-өөрү-биле өөрүшкүлүг катап чурттаар аргалыг болган. А келир үеде оон артык эки болур. Чүге дизе дирлип кээр улус кажан-даа өлбес боор. Олар дайын-чаа, кем-херек үүлгедиишкиннери болгаш аарыг-аржык чок черге дирлип кээр.

17. Кымны диргизерил?

 ¹⁷ Кымны диргизерил? Иисус: «Бүгү улус Ооң үнүн дыңнааш, чевеглерден туруп кээри үе-шактың келгени бо-дур» — дээн (Иоанн 5:28, 29). Ажыдыышкын 20:13-те оон ыңай мынча деп бижээн: «Далай аңаа чораан өлүг улусту үндүр чалгыпкан. Өлүм болгаш Тамы боттарының  өлүг улузун берипкен». Ынчангаш миллиард-миллиард улус дирлип кээр. Павел элчин «шынчы-даа, шынчы эвес-даа улус» дирлип кээр деп чугаалаан. (Номчуптуңар: Ажыл-чорудулга 24:15.) Кымнарның дугайында чугаа чоруп турарыл?

18. Кандыг улусту «шынчы» дээрил?

¹⁸ «Шынчы» улуска Иисус Христостуң кээриниң бетинде чурттап чораан Иегованың шынчы бараалгакчыларын хамаарыштырып болур. Ол дээрге, чижээ, Ной, Авраам, Сарра, Моисей, Руф болгаш Эсфир. Оон өске шынчы бараалгакчыларның дугайында Еврейлерге чагааның 11-ги эгезинден билип ап болур бис. Диргизиишкин соонда олар шупту чер кырынга чурттаар. Бистиң үевисте чок апарып турар Иегованың бараалгакчыларын «шынчы» деп болур бе? Ийе, олар база дирлип кээр.

19. Кандыг улусту «шынчы эвес» дээрил? Олар дирлип келгеш, кандыг аргалыг болур?

¹⁹ «Шынчы эвес» дээрге Иегованың дугайында билип алыр аргазы чок турган миллиард-миллиард чок апарган улус-тур. Иегова оларны утпаан. Бурган оларны диргизиптерге, олар Бурганның дугайында билиглерни алыр база Аңаа бараалгаар аргалыг болур.

20. Чамдык улусту чүге диргиспезил?

²⁰ Чок апарган улустуң шуптузу дирлип кээр бе? Чок. Иисус шупту улус дирлип кээр деп чугаалаваан (Лука 12:5). Кымны диргизер-диргиспезин  кым шиитпирлээрил? Адак сөөлгү шиитпирни Иегова үндүрер-даа болза, «дириглерни-даа, өлүглерни-даа» шиидер эргени Иисуска берген (Ажыл-чорудулга 10:42). Каржы, өскерлир хөңнү чок кижини Иегова диргиспес. (19 дугаар Капсырылганы көрүңер.)

21, 22. а) Дээрге чурттаары-биле дирлири дээрге чүү дээни ол? б) Дээрге чурттаары-биле бир дугаар кымны диргискен?

²¹ Оон ыңай чамдык улусту дээрге чурттаар кылдыр диргизер деп Библияда бижээн. Черге чурттаар улуска бодаарга, олар көзүлбес мага-боттуг чаяалгалар кылдыр дээрге дирлип кээр.

²² Дээрге чурттаары-биле бир дугаар дирилген кижи Иисус болган (Иоанн 3:13). Иегова Иисусту өлгениниң соонда үшкү хүнде диргизипкен (Ырлар 15:10; Ажыл-чорудулга 13:34, 35). Иисус кижи кылдыр эвес, а дээрге чурттаар күчү-күштүг көзүлбес мага-боттуг чаяалга кылдыр дирлип келген (1 Коринфичилерге 15:3—6). Иисустуң «мага-бодун өлүрүп кагза-даа, Сүлдези-биле Ол тынгарлып келген» деп, Павел элчин чугаалаан (1 Пётр 3:18). Дээрге чурттаары-биле дирлир улустуң санында Иисустан аңгыда, өске улус база бар.

23, 24. Иисустуң чугаалааны «бичежек кодан-сүрүгже» кым кирип турарыл? Оларның саны чежел?

²³ Өлүрүнүң мурнунда Иисус шынчы өөреникчилеринге мынча дээн: «Мен силерге турар чер  белеткээр дээш, чоруурум бо-дур» (Иоанн 14:2). Ынчап кээрге, Иисус-биле кады дээрге чурттаары-биле ооң эдерикчилериниң чамдыызы база дирлип кээр. Оларның саны чежел? Олар хөй эвес болур деп, Иисус чугаалаан. Иисус оларны «бичежек кодан-сүрүүм» дээн (Лука 12:32). Иоанн элчин оларның тода санын айыткан. Көстүүшкүнге Иисусту болгаш «144 000 кижини» ол көрген (Ажыдыышкын 14:1).

²⁴ Ол 144 000 кижини кажан диргизерил? Дээрге Иисус Христос чагырып эгелей бергениниң соонда деп, Библия айтып турар (1 Коринфичилерге 15:23). Христос шагда-ла чагырып эгелей берген болгаш, 144 000 шынчы христианнарның хөй кезиин дээрге чурттаары-биле диргизипкен. А оларның черде чурттап чоруур арткан кезии өлген соонда, ол-ла дораан дээрже үне бээрлер. Моон алгаш көөрге, дирилген улустуң хөй кезии чер кырынга чурттаар-даа болза, биче бөлүк улус дээрге чурттаар.

25. Дараазында эгеден чүнү билип алыр бис?

²⁵ Иегова удавас кижилерни өлүмнүң кулданыындан хостаар; база өлүм моон соңгаар турбас. (Номчуптуңар: Исайя 25:8.) Дээрге чурттаары-биле дирлип кээр улус аңаа чүнү канчаар? Олар Бурганның Чагыргазынга Иисус Христос-биле кады чагырар деп Библияда бижээн. Ол Чагырганың дугайында дараазында эгеден хөйнү билип алыр бис.