3 КИЧЭЭЛ
Раав Иеговага бүзүреп турган
Сагыжывыска эрткен үеже аян-чоруктан кылыптаалам. Ханаа́н чериниң Иерихо́н деп хоорайында турар дижик бис. Ооң чурттакчылары Иеговага бүзүревейн турар. Ында Раав деп херээжен кижи чурттап турар.
Кажан Раав бичии турда, аңаа Моисейниң канчаар Кызыл далайның суун ийи чарыпкаш, израильчилерни Египеттен үндүрүп эккелгенин чугаалап берип турган. Оон ыңай ол Иегованың израильчилерге дайзыннарын тиилээринге канчаар дузалашканын база дыңнаан. Ам болза израильчилерниң Иерихоннуң кыдыында турлагжып алганын ол билип каан.
Раав Иеговага бүзүреп турган болгаш, хайгыылчыларны камгалап каан
Бир катап кежээ ийи израильчи, Иерихонну шинчилеп көөр дээш, чорупканнар. Кажан олар Раавтың бажыңынга чедип кээрге, ол оларны хүлээп алгаш, бажыңынга хондуруп алган. Дүне Иерихоннуң хаанынга «хоорайда Раавтың бажыңында хайгыылчылар келген» деп дамчыткан. Ынчан хаан бодунуң улузун, оларны тудуп аар кылдыр, чоргузупкан. Раав ийи хайгыылчыны бодунуң бажыңының кырынга чажырыпкаш (ол девискээрде бажыңнар кыры калбак турган), хаанның айбычыларынга: «Ийе, хайгыылчылар кээп чорду, ынчалза-даа олар хоорайдан чоруй бардылар. Ам дүрген халыңар, ынчан оларны сүрүп чеде бээр силер!» — дээн. Раав хайгыылчыларны чүге камгалап турарын билир сен бе?~ Ол Иеговага бүзүреп турар, ынчангаш Ол израильчилерге Ханаан черни бериптер деп билир.
Хайгыылчылар Раавтың бажыңындан чоруурунуң мурнунда Иерихоннуң буступ турар үезинде ол болгаш ооң бүгү өг-бүлези дириг артар деп аазааннар. Олар аңаа чүнү кылырын чагааныл?~ «Кызыл хендирден алгаш, соңгаңдан халайтыр азып каг. Бир эвес ынчаар кылыр болзуңза, сээң бажыңыңда шупту улус камгалалды алыр» — деп, олар чугаалаан. Раав хайгыылчыларның чугаалаан аайы-биле бүгү чүвени шак ынчаар кылган. А ооң соонда чүү болганыл?~
Иегова Раавты болгаш ооң өг-бүлезин камгалап каан
Каш хүн эрткенде израильчилер хоорайны долгандыр ыыт чокка кылаштажып эгелээннер. Олар алды хонук дургузунда ону хүнде чаңгыс катап долганып турганнар. А чеди дугаар хонуунда олар хоорайны чеди катап долгангаш, ыыткыр алгыржыпканнар. Ынчан Иегова хоорайны долгандыр турган ханаларны буступ каар кылдыр кылыпкан. Ынчалзажок соңгазындан кызыл хендир бадырып каан бажың бүдүн хевээр артып калган! Чурукта ону көрүп тур сен бе?~ Раав болгаш ооң өг-бүлези камгалаттынган!
Раавтың үлегеринден чүнү өөренип ап болур сен?~ Раав Иеговага бүзүреп турган, чүге дизе Ооң кылган бүгү хуулгаазыннарының дугайында ол билир турган. Сен база Иегованың кайгамчыктыг ажыл-херектериниң дугайында билип ап болур сен. Раав ышкаш, Иеговага бүзүрээр сен бе?~ Ийе дээрзинге идегээр бис!
