Бадыланышкан соонда чаа өг-бүле тыптыр. Ада-иеңерни хүндүлеп, оларга кезээде ынак бооп артар-даа болзуңарза, ам шупту улустуң аразындан кады өгленип алган кижиңер эң-не кол черни ээлээр боор. Төрелдериңерниң кайы-бирээзинге ону хүлээп алыры белен эвес болур чадавас. Ынчалза-даа библейжи дүрүмнер кады чурттаан эжиңер-биле-даа, төрелдериңер-биле-даа эки хамаарылганы кадагалап арттырып алырынга дузалаар.

БИБЛИЯ ЧҮНҮ ЧУГААЛАП ТУРАР. «Ачаң-биле аваңны хүндүлеп чор» (Эфесчилерге 6:2). Кайы-хире-даа назылыг болзуңарза, ада-иеңерни хүндүлээр ужурлуг силер. Кады чурттап турар эжиңер — бир-ле кижиниң төлү-дүр деп утпас болзуңарза эки. Ынчангаш ооң бодунуң ада-иезинге кичээнгей көргүзер хүлээлгези база бар. «Ынакшыл... адааргаачал... эвес», ынчангаш ашаан азы кадайын ооң ада-иезинге хүннээри — шын эвес чорук-тур (1 Коринфичилерге 13:4; Галатчыларга 5:26).

АЖЫКТЫГ СҮМЕЛЕР

• «Сээң ада-иең кезээде-ле мени чемелээн турар» азы «Сээң аваң мени черле көрбес ийик чоп» дээн хевирлиг чугаадан ойталап чоруңар

• Кады чурттаан эжиңерниң бүгү чүвеге хамаарыштыр көрүжүн билип алырын оралдажыңар

БИБЛИЯ ЧҮНҮ ЧУГААЛАП ТУРАР. «Эр кижи ада-иезин каапкаш, кадайы-биле катчып, чаңгыс мага-бот» апаар (Эге дөс 2:24). Өгленип алган сооңарда безин, ада-иеңер силер дээш харыысалга ап турар хевээр бис деп бодап болур. Ынчангаш олар силерниң амыдыралыңарже хөлүн эрттир киржип турар чадавас.

Ада-иеңер өг-бүлеңерниң херектеринче кайы-хире киржип болурун кады тодарадып, шиитпирлеп алгаш, эптиг-чымчаа-биле оларга ону тайылбырлап бериңер. Ажык болгаш дорту-биле чугаалаары дээрге кадыг кылдыр чугааланыры дивээни ол (Чугаалар 15:1). Томаанныг, биче-сеткилдиг болгаш үр шыдамык чорук төрелдер-биле чылыг-чымчак хамаарылганы тургузарынга база оларга шыдамык болгаш ынакшылдыг болурунга дузалаар (Эфесчилерге 4:2).

АЖЫКТЫГ СҮМЕЛЕР

• Бир эвес төрелдериңер силерниң амыдыралыңарже хөлүн эрттир киржип турар ышкаш апаар болза, ооң дугайында кады чурттаан эжиңер-биле оожум байдалга чугаалажып алыңар

• Чүнү кылып болуруңарны база канчаар алдынарыңарны дугуржуп алыңар