КИЧЭЭЛ 16
Иисус черге чүнү кылып чораан?
Дыка хөй улус Иисус дээрге чаш төл, мерген угаанныг башкы азы чагыга азып өлүрткен кижи деп бодаар. Ооң дугайында чүнү билир бис? Черге ол чүнү кылып чораан? Бо кичээлден Иисуска чүү эң чугула турганын база ол билиглер канчаар дузалап болурун билип алыр силер.
1. Иисуска кандыг ажыл эң чугула турган?
Ол боду мынчаар харыылаан: «Бурганның Чагыргазының дугайында Буянныг Медээни өске хоорай, суурларга база суртаалдаар ужурлуг мен». (Номчуптуңар: Лука 4:43.) Бурган Бодунуң Чагыргазын дээрге тургузуп каар, ол Чагырга черде шупту бергелерни шиитпирлээр деп, Иисус өөрүшкүлүг суртаалдап чораан a. Ол медээни дамчыдар дээш, Иисус үш чыл чартык дургузунда үезин-даа, күжүн-даа харамнанмаан (Матфей 9:35).
2. Иисус хуулгаазыннарны кандыг сорулгалыг кылып турган?
Бурган Иисусту дамчыштыр «күчү-күштүг херектери-биле, кайгамчык чүүлдери-биле база бадыткал демдектери-биле» херечилээн (Ажыл-чорудулга 2:22). Бурганның ыдыктыг сүлдезиниң ачызында Иисус бойдусту томаартып, муң-муң кижилерни чемгерип, аарыг улусту экиртип, безин өлгеннерни диргизип чораан (Матфей 8:23—27; 14:15—21; Марк 6:56; Лука 7:11—17). Иисустуң хуулгаазыннары ону Бурган чоруткан деп көргүзүп турар. Оон ыңай Иегова кижи-төрелгетенниң шупту бергелерин шиитпирлеп шыдаар күштүг деп ол хуулгаазыннар көргүскен.
3. Иисустуң чуртталгазы бисти чүү чүвеге өөредип турар?
Иисус Иеговага кажан-даа дыңнангыр чораан. (Номчуптуңар: Иоанн 8:29.) Кандыг-даа байдалдарда истеп-сүрүүшкүннерге, удурланыышкыннарга-даа таварышкаш, ол Адазының дилээн күүседип турган. Кижилер кандыг-даа үеде, безин берге байдалда Бурганга дыңнангыр болуп шыдаар деп ол бадыткаан. Аңаа хамаарыштыр Пётр элчин мынча дээн: «[Иисус] изин истезиннер дээш, үлегерин силерге арттырып каан» (1 Пётр 2:21).
ХАНЫ ШИНЧИЛЕҢЕР
Иисустуң өөрүшкүлүг медээни суртаалдап, хуулгаазыннарны кылып турганын эки билип алыр силер.
4. Иисус өөрүшкүлүг медээни чугаалап чораан
Өөрүшкүлүг медээни хөй улус дыңназын дээш, ол довурак-доозуннуг чүс-чүс километрлерни эрткен. Лука 8:1-ни номчааш, харыылаптыңар:
-
Иисус чүгле ону дыңнаар дээш келген улуска суртаалдап турган бе?
-
Өөрүшкүлүг медээни улус-биле үлежир дээш, Иисус кайы хире күжениишкиннер үндүргенил?
Чагдырткан Чагырыкчы өөрүшкүлүг медээ эккээр деп, Бурган баш удур медеглээн. Исайя 61:1, 2-ни номчааш, харыылаптыңар:
-
Ол өттүр билген медеглел Иисуска канчаар күүсеттинген?
-
Чүү деп бодаар силер, бөгүн кижилерге ол өөрүшкүлүг медээ херек бе?
5. Иисус чугула алыс шынга өөредип турган
Иисус Чагырга дугайында өөрүшкүлүг медээни суртаалдаарындан аңгыда, кижилерни чуртталганың янзы-бүрү талаларынга ажыктыг дүрүмнерге өөредип турган. Иисустуң даг кырынга суртаалындан каш чижекти көрүптээлиңер. Матфей 6:14, 34 биле 7:12-ни номчааш, харыылаптыңар:
-
Иисустуң бо сөстеринде кандыг үнелиг кичээлдер бар?
-
Чүү деп бодаар силер, ол сүмелер амгы үеде ажыктыг бе?
6. Иисус хуулгаазыннарны кылып турган
Иегова Иисуска хуулгаазыннар кылыр күштү берген. Марк 5:25—34-те бир таварылганы номчуңар азы ВИДЕОНУ көрүңер. Оон айтырыгларга харыылаптыңар.
-
Аар аарыг херээжен кижи чүү чүвеге бүзүрелдиг турган?
-
Бо төөгүде силерге ылаңгыя чүү солун болду?
Иоанн 5:36-ны номчааш, харыылаптыңар:
-
Иисустуң хуулгаазыннары чүнү бадыткап турар?
Билир силер бе?
Библияда Иисустуң төөгүзүн дөрт Буянныг Медээ деп номнарда бижээн. Ол номнарның бижээчилери Матфей, Марк, Лука болгаш Иоанн. Ном бүрүзү онзагай. Ында шупту информацияны каттыштырыптар болза, Иисустуң чуртталгазының дыка солун төөгүзү үнүп кээр.
-
МАТФЕЙ
номун бир дугаарында бижээн. Ол Иисустуң өөредиглериниң дугайында чугаалаан. Чагырга дугайында медээже ол онза кичээнгейни салган.
-
МАРК
эң кыска номну бижээн. Ол номда болуушкуннар хөй болгаш дүрген болуп турар.
-
ЛУКА
Иисустуң мөргүлдеринче кол кичээнгейни салып, ооң херээжен улуска хамаарылгазын көргүскен.
-
ИОАНН
Иисус кандыг кижи чораанын база чоок эштери-биле болгаш өске улус-биле ооң чугааларын бижээн.
ЧАМДЫК УЛУС МЫНЧА ДЕП БОЛУР: «Иисус анаа бөдүүн эки кижи чораан».
-
Силер чүү деп бодаар силер?
КОЛ БОДАЛ
Иисус Бурганның Чагыргазының дугайында чугаалап, хуулгаазыннарны кылып турган. Ол кандыг-даа байдалдарда Иеговага дыңнангыр чораан.
Катаптаашкын
-
Иисустуң чуртталгазынга кандыг ажыл-херек эң кол турган?
-
Иисустуң хуулгаазыннары чүнү бадыткап турарыл?
-
Иисус кандыг ажыктыг дүрүмнерге өөредип чораан?
НЕМЕЛДЕ
Иисус чүү чүвеже хөй кичээнгейни салып чораан?
«Бурганның Чагыргазы Иисуска чүге чугула?» («Таңныыл суургазы» октябрь 1, 2014 чыл)
Иисус хуулгаазыннарны херек кырында кылган деп бадыткалдарны көрүңер.
«Иисустуң хуулгаазыннары чүнү көргүскен?» («Таңныыл суургазы» июль 15, 2004 чыл)
Иисустуң кижилерни ылгай көрбес ынакшылы бир эр кижиге кандыг салдар чедиргенин номчуп көрүңер.
«Мен чүгле бодум дээш чурттап чораан мен» («Таңныыл суургазы» октябрь 1, 2014 чыл)
Бо таблицада Иисустуң чуртталгазында болуушкуннарны үе аайы-биле тургускан.
«Иисустуң черге чуртталгазының чугула болуушкуннары» («Чаа делегей» очулгазы, Немелде материал А7)
a Бурганның Чагыргазының дугайында тодаргайы-биле 31—33 дугаар кичээлдерде тайылбырлаан.
Силерге солун бооп болур
ҮРГҮЛЧҮ САЛЫР АЙТЫРЫГЛАР
Иегованың Херечилериниң библейжи кичээлдери канчаар эртип турар?
Иегованың Херечилеринде Ыдыктыг Бижилге-биле таныжып алырынга дузалаар ажыктыг курс бар. Өөредилге үезинде бодуңарның Библияңарны ажыглап, кичээлдерже өг-бүлеңерни, эштериңерни чалап ап болур силер.
