АВРААМ библейжи төөгүде бүзүрели улуг кижи чораан. Ол Ур деп сайзыраңгай хоорайда шөлээн чуртталгазын каапкаш, кезек үе дургузунда Харранга чурттааш, бүгү арткан чуртталгазын көшкүн амыдырал тудуп, майгыннарга чурттап чораан (Эге дөс 12:1—3; Ажыл-чорудулга 7:2—7; Еврейлерге 11:8—10). Ынчалзажок ооң дугайында: «Амыдыралды мага хандыр чурттап алгаш, кыраан назынында ол өлүп калган» — деп бижээн (Эге дөс 25:8). Ооң чуртталгазын чүү мага хандырганыл? Ол өлүрүнүң мурнунда анаа-ла орун кырында мага хандыр чурттап эрткен амыдыралын сактып чыдар ирей эвес турган. Сөөлзүредир Авраам бодунуң быжыг бүзүрели дээш «Бурганның өңнүү» деп адаткан (Иаков 2:23; Исайя 41:8). Авраам бодунуң Чаяакчызынга чоок хамаарылганы сайзырадып алганындан сеткилинге мага ханыышкынны миннип чораан.

² Бир эвес, 4000 чыл бурунгаар чурттап чораан Авраам дег, Бурган-биле найыралыңарны сайзырадыр болзуңарза, чуртталгаңарга сеткил ханып, ооң ужур-утказын билип алыр силер. Октаргайның Чаяакчызы-биле найырал тудары?! Ону угаап бодаптары белен эвес боор чадавас. Ынчалзажок Бурган-биле найыралды сайзырадып ап болур. Канчаар? Эгезинде Ону билип алгаш, Аңаа ынак апаар болзуңарза эки  (1 Коринфичилерге 8:3; Галатчыларга 4:9). Чаяакчы-биле чоок хамаарылга чуртталгаңарны өөрүшкү болгаш ужур-утка-биле долдурар.

³ Иисус Христостуң төлевирин хүлээп алыр күзелдиг улуска Иегова аас-кежиктиг чурттаарынга дузалаар удуртулганы берген. Сактып келиңер даан, Адам чүнү эки, а чүнү багай деп санаарын боду шиитпирлээр дээш, Бурганга удур тура халаан. Иегова кижи төрелгетенни бачыт биле өлүмнүң кулданыындан хостаар дээш, бодунуң Оглун төлевир кылдыр берген. Ынчангаш кижи бүрүзү чүнү эки, а чүнү багай деп санаарын боду шиитпирлевейн, ол төлевирни хүлээп алыр болза эки. Иисустуң өргүлүн хүлээп ап турар улус Бурганның тургускан хоойлу-дүрүмүнге чагыртыр ужурлуг.

⁴ Библияны өөренгеш, ында айыткан дүрүмнерни ажыглаар болзуңарза, Бурганның эки-бакты ылгаар негелделериниң чөптүүнге шынзыгар силер (Ырлар 18:8—10). Моисей медээчи ышкаш: «А ам, бир эвес Сээң ээ көрнүүшкүнүңнү чедип алган болзумза, чалбарып дилеп тур мен: Сээң бодап алган оруктарыңны меңээ ажыдып берем... Сени билип ап көрейн» — деп, Бургандан дилээр боор силер (Хосталыышкын 33:13; Ырлар 24:4). Библияда дүрүмнер бо «аар-берге үеде» силерге шын орукту айтып бээр (2 Тимофейге 3:1). Ынчан Бурганга өөрүп четтирер миннишкиниңер улам күштелип, Иегованы оон-даа эки билип алгаш, Ооң-биле найыралыңарны быжыглаар күзелиңер өзер.

⁵ Авраам «амыдыралды мага хандыр чурттап» алган-даа болза, «кыраан назынында ол өлүп калган». Өлүм турар шаанда, кижилерниң назыны дөмей-ле хөлүн эрттир кыска бооп турар. Кижи бүрүзү, каш-даа харлыг болза, төрүмелинден чурттаксаар күзелдиг. Чүге дээрге «Бурган... кижи амытанга мөңге өй дугайында бодап чоруур чүректи берип каан. Ындыг-даа болза, кижилер Бурганның кылып турар ажыл-херээн эгезинден төнчүзүнге чедир билип шыдавас» (Экклесиаст 3:11). Мөңге чурттааш безин, Иегованың чаяалгаларының шуптузун чедир билип шыдавас бис. Иегованың шупту кайгамчыктыг ажыл-херээниң сан-түңү чок! Оларны хайгаарап, шинчилеп, оларга өөрүп болур бис (Ырлар 18:2—5; 103:24; 138:14).

⁶ Бөгүнгү таваржып турар бергелеривис кажан-даа төнмес болза, каяа мөңге чурттаксаар деп бис. Ынчалза-даа ол чүүл бисти дүвүретпес ужурлуг. Чүге дээрге «Бурганның аазааны чаа дээр биле чаа черни манап  турар бис. Аңаа улус чөптүг-шынныг амыдырал-биле амыдыраар» — деп, Библия аазап турар (2 Пётр 3:13). «Чаа дээр» дээн сөстер келир үеде бүдүн черни дээрден башкарар чаа чагыргага, Бурганның Чагыргазынга, хамааржыр. А «чаа чер» дээрге Чагырганың башкарылгазынга чагыртыр, дыңнангыр кижилерден тургустунган чаа ниитилел-дир. Ол чүүл херек кырында бүде бээр кылдыр, Иегова удавас «черни узуткап турарларны чок кылыр» (Ажыдыышкын 11:18; 2 Пётр 3:10).

⁷ Ынчалза-даа ол кажан болурул? «Бо делегейниң төнчүзүнүң демдээ» кылдыр Иисус чоннар аразында дайыннарны, «күштүг чер шимчээшкиннерин, чер болганга аш-чутту, аарыг-аржыкты», «бузуттуң нептерээрин» сагындырган (Матфей 24:3—13; Лука 21:10, 11; 2 Тимофейге 3:1—5). Улаштыр ол: «Шак ынчалдыр, ол бүгүнүң боттанып эгелээнин көрүп кагзыңарза, Бурганның Чагыргазы чоокшулап келгенин билип алыңар» — деп өттүр медеглеп чугаалаан (Лука 21:31). Ийе, Иегованың каржы кижилерни узуткаар үези мырыңай чоокшулап келген.

⁸ «Бүрүн Күчүлүг Бурганның өндүр улуг шииткел хүнүнүң» соонда, кажан Иегова черни каржыдан арыглап кааптарга, бистиң бөмбүрзээвис дываажаң апаар (Ажыдыышкын 16:14, 16; Исайя 51:3). Ынчан «чөптүг-шынныг улус чер-чуртту салгап алгаш, ону кезээ мөңгеде ээлеп чурттаар» (Ырлар 36:29). А өлген улус-биле чүү болурул? «Ындыг боорга, элдепсинмеңер: чевеглерде чыдар бүгү улус Ооң үнүн дыңнааш, чевеглерден туруп кээри үе-шактың келгени бо-дур. Ынчан буян кылып чорааннар катап дирилгеш, амыдыраар, а бузут-бак кылып чорааннар катап дирилгеш, шииттирер» — деп, Иисус чугаалаан (Иоанн 5:28, 29). Иегова хууда кижи бүрүзүн сонуургап турар, ынчангаш Ол шупту чок апарган улусту катап диргизерин күзеп турар. Амгы үеде эртемденнер генныг инженерия дузазы-биле кижилерни клоннаарының дугайында боданып турар, ынчалза-даа Чаяакчы кижилерниң амы-тынын эгидерде, ындыг арганы ажыглавас. Ол өлген кижи бүрүзүнүң даштыкы хевирин болгаш иштики бүдүжүн дыка эки сактыр, ынчангаш шупту чок апарган кижилерни диргизиптер. Ийе, чоок, эргим улузуңар-биле  черге дываажаңга катап ужуражы бээр идегелиңер бар!

⁹ Черге дываажаңга чуртталга кандыг болурул? Чаяакчыны демниг алдаржыдып турар, аас-кежиктиг кижилер-биле чер дола бээр. «Черивистиң чурттакчыларындан кым-даа: «Мен аарып тур мен» — дивес» (Исайя 33:24; 54:13). Кым-даа стресске алыспас, ол ышкаш сагыш азы угаан аарыгларындан хилинчектенмес. Шупту улустуң аъш-чеми элбек болур база кижи бүрүзү Бурганның күзел-соруунга дүгжүр, бодунуң сеткилинге кирер ажылын кылыр (Ырлар 71:16; Исайя 65:23). Кижилер бот-боттары-биле болгаш дириг амытаннар-биле тайбың чурттаар, а эң-не кол чүүл — кижилер «Бурган-биле эп-найыралдыг» болур (Римчилерге 5:1; Ырлар 36:11; 71:7; Исайя 11:6—9).

¹⁰ Шак ындыг дываажаңга сеткил ханып чурттаар дизиңерзе, чүнү канчаар ужурлуг силер? Иисус: «А мөңге амыдырал дээрге-ле дың чаңгыс алыс шын Бурган болур Сени база Сээң айбылап чорутканың Иисус Христосту билип алыры болгай» — деп чугаалаан (Иоанн 17:3). Ынчап кээрге Иегова Бурган биле Иисус Христостуң дугайында билиглерни алырын уламчылаңар. Ынчан силер Иегова Бурганга таарымчалыг болур силер, а ол чүүл чуртталгаңарга сеткил ханып чурттаарынга дузалаар.