БО УЛУГ өг-бүлени көрүп көр даан. Ол дээрге Иа́ковтуң 12 оолдары-дыр. Ооң кыс уруглары база бар. Ажы-төлүнүң кайы-бирээзиниң адын билир сен бе? Оларның чамдыызы-биле таныжып алыылам.

Ли́я Руви́мни, Симео́нну, Левийни болгаш Иу́даны божаан. Бодунуң ажы-төлү чок боорга, Рахи́ль дыка муңгараан. Ынчангаш ол Иа́ковка бодунуң чалчазын Валланы бээрге, ол Дан биле Неффалим деп ийи оолду божуп берген. Ынчан Ли́я база Иа́ковка бодунуң чалчазын Зелфаны бериптерге, Зелфа Га́дты болгаш Аси́рни божаан. Ооң соонда Ли́я база ийи оол божаан: Иссаха́р биле Завулонну.

Соонда барып Рахи́ль база уруг божуп алган. Ол ону Ио́сиф деп адаан. Чоорту Ио́сифтиң дугайында оон-даа хөйнү билип алыр бис, чүге дизе ол кончуг алдарлыг кижи апаар. Ынчап кээрге бо 11 оол, Иаков Рахи́льдиң ачазы Лаванның бажыңынга чурттап турда, төрүттүнген.

Иа́ковтуң кыс уруглары база турган, ынчалза-даа Библияда чүгле оларның чаңгызының адын бижээн. Ди́наның.

Иа́ков Лавандан дедир Ханаа́нче чоруур деп шиитпирлээн үези келген. Ынчангаш ол улуг өг-бүлезин болгаш канчаар-даа аажок хөй кодан хойларын база өске малын чыггаш, ырак орукче чорупкан.

Иа́ков өг-бүлези-биле Ханаа́нче эглип кээрге, каш үе эрткенде, Рахи́ль база бир оол божупкан. Ол орукка болган. Рахи́ль дыка хинчектенген, сөөлүнде барып божуп чыткаш, ол чок апарган. Ынчалза-даа чаш уруу дириг арткан. Иа́ков ону Вениами́н деп адаан.

Иа́ковтуң 12 оолдарының аттарын биске сактып алыры чугула, чүге дизе олардан бүгү Изра́иль чон укталган. Шак-ла ындыг, Изра́ильдиң 12 салгалы Иа́ковтуң 10 оолдарының болгаш Ио́сифтиң ийи оглунуң адын эдилээн. Иа́ковтуң оолдары төрүттүнүп кээрге, Исаа́к элээн үр чурттаан, ындыг хөй уйнуктарлыг болганы дээш, ол дыка аас-кежиктиг турган боор. Ынчалза-даа ооң оглунуң уруу Ди́на-биле чүү болганыл, көрээлем.