КӨРЕМ, Ди́на кымче аалдап бар чыдар-дыр? Ханаа́н черинде чурттап турар уругларже. Бо чүүл ачазы Иа́ковтуң сеткилинге тааржыр деп бе? Сеңээ бо айтырыгга харыылаары белен боор кылдыр, Авраа́м биле Исаа́к Ханаа́н херээженнерниң дугайында чүнү бодап турганын, сактып келем.

Ханаа́н чериниң уругларының бирээзинге Исаа́к өглензин деп, Авраа́м күзеп турган ийик бе? Чок болбайн канчаар. Ханаа́н чериниң уругларының бирээзинге оглу Иа́ков өглензин деп, Исаа́к биле Реве́кка күзеп турган ийик бе? Чок болбайн канчаар. Чүге деп, билир сен бе?

Чүге дизе Ханаа́нның чурттакчылары меге бурганнарга чүдүп турган. Олар ашак, кадай болур хире эки эвес кижилер турган, база чоок эштер болур хире эки эвес кижилер турган. Ынчангаш бир эвес Иа́ков уруун Ханаа́нның уруглары-биле эдержип турар деп билип каан болза, ол таарзынмас деп, чигзиниг чок бүзүреп болур бис.

Ынчанмайн —Ди́на-биле хай-халап болган. Чурукта Ди́наже көрүп турар ханаа́нчы эр кижини көрүп тур сен бе? Ооң адын Сихе́м дээр. Бир хүн Ди́на аалдап кээрге, Сихе́м Ди́наны туткаш, күш-биле кады чыдарын албадапкан. Ол кончуг багай чорук болган, чүге дизе чүгле өгленип алган эр биле херээжен кижилер кады чыдып болур. Сихе́мниң Ди́наны бак аажылааны хөй халаптарга чедирген.

Ди́на-биле чүү болганын билип кааш, ооң акылары хөлчок хорадаан. Ылаңгыя оларның ийизи: Симео́н биле Ле́вий — олар хенертен хоорайже селемелерлиг кире халы бергеш, чурттакчыларже халдай бергеннер. Оон өске акылары-биле кады Сихе́мни болгаш ол хоорайның шупту эр улустарны өлүрүп каапканнар. Ындыг каржы чорук Иа́ковту дыка килеңнеткен.

Ынчалза-даа ол бүгү бак-халап чүүден эгелээнил? Бурганның хоойлуларын дыңнавас кижилер-биле Ди́наның найыралындан эгелээн. Бис ындыг эштерлиг болуксавас бис, ындыг аа?