КӨРЕМ, эр улус кандыг чимистерни эккел чыдар-дыр. Виноградтың салбаа кандыг кончуг улуг чүвел! Ону ыяшка эккээринге, ийи эр кижи херек болган. Инжир биле гранатче база көрем. Ол кайгамчыктыг чимистерни кайыын эккелгени ол? Ханаа́н черинден. Сактып келем, Ханаа́н дээрге Авраа́мның, Исаа́ктың база Иа́ковтуң бир шагда чурттап чораан чери-дир. Ынчалза-даа кажан аңаа аш эгелээрге, Иа́ков өг-бүлези-биле Еги́петче көже берген. Ам, 216 хире чыл эрткенде, Моисе́й изра́ильчилерни Ханаа́нче катап баштап чорупкан. Олар ховуда Кадес деп черге чедип келгеннер.

Ханаа́н черинде багай кижилер чурттап турар. Ынчангаш Моисе́й 12 хайгыылчыны чортуп тура: ‘Ында каш кижи чурттап турарыл база кайы-хире күштүгүл, билип алыңар. Үнүш өстүреринге чер тааржыр-дыр бе. Оон кандыг-бир чимистерден албан эккээр силер’,— деп оларга чагаан.

Хайгыылчылар Кадесче эглип келгеш, Моисе́йге: ‘Ол чурт — шынап-ла кайгамчык-тыр’,— деп чугаалааннар. Олар бадыткал кылдыр чамдык чимистерни база көргүскен. Ынчалза-даа оларның аразында он кижи хомудап турар: ‘Ында аажок узун-шыырак болгаш күштүг чон чурттап турар. Бир эвес бис ол черни ээлеп оралдажыр болзувусса, өлүр бис’.

Ол сөстерни дыңнааш, изра́ильчилер аажок корга берген. ‘Ооң орнунга Еги́петке-ле өлүп калган болзувусса азы бо ээн ховуга-даа болза,— деп човууртап турганнар.— Бис тулчуушкунга өлүп каар бис, а бистиң кадайларывысты болгаш ажы-төлүвүстү тудуп аппаар. Моисе́йниң орнунга чаа баштыңчыдан шилип алгаш, Еги́петче эглип чоруптаалыңарам!’

Ынчалза-даа ийи хайгыылчы Иеговага идегеп турар болгаш чонну оожургадырын кызып турар. Оларның адын Иисус Навин болгаш Халев дээр. Олар чонну аргалап турар: ‘Кортпаңар — Иегова бистиң-биле кады. Ол черни белени-биле эжелептер бис’. Ынчалза-даа чон дыңнавайн турар. Олар Иисус Навин биле Халевти безин өлүрер деп турар.

Иегова аажок хорадаан — ол Моисе́йге чарлап турар: ‘Чээрби хардан өрү чаңгыс-даа кижи Ханаа́н черинче кирбес. Олар Еги́петте болгаш элезинниг ховуга мээң хуулгаазыннарымны көрген-даа болза, меңээ дөмей-ле бүзүревес-тирлер. Ол дээш олар ховуга 40 чыл дургузунда, оларның сөөлгүзү өлүп каарынга чедир, азып кылаштаар. Чүгле Иисус Навин биле Халев Ханаа́н черинче кирер’.