ЧАГЫНЫ долгандыр орааштына берген чылан ёзулуг чыланга дөмей-дир бе? Чок. Ол чылан честен кылдынган. Иегова Моисе́йге чыланны чагыга быжыглап каарын дужааган, кижилер ынаар көргеш, өлбейн баар кылдыр. Ынчалза-даа черде соястап турар чыланнар — ёзулуг чыланнар-дыр. Олар кижилерни шаптарга, кижилер аарый бээр турган. Бо бүгү чүүл чүге бооп турарыл, билир сен бе?

Чүге дээрге изра́ильчилер Бурганга болгаш Моисе́йге удурланып турар. Олар хомудап: ‘Чүге сен бисти Еги́петтен үндүрүп алгаш, бо куруг ховуже бисти өлүм көрзүн дээш эккелдиң? Мында ижер, чиир чүү-даа чок. А бо ма́ннаны моон соңгаар чип шыдавас-тыр бис’,— дижип турганнар.

Херек кырында ма́нна — амданныг чем-дир. Иегова ону хуулгаазын арга-биле берип турар. Сугну ол база-ла хуулгаазын арга-биле берип турар. Ынчалза-даа чон ону үнелевейн турар. Ынчангаш Иегова шииткел кылдыр хоранныг чыланнарны чоргузупкан. Чыланнар изра́ильчилерни шап турар боорга, оларның хөй кезии өлген.

Ам кээп кижилер Моисе́йге келгеш, аңаа чаннып турар: ‘Бис бачыт кылдывыс, чүге дээрге Иеговага база сеңээ удурланып, хорадап турган бис. Чыланнарны ап кааптар кылдыр, Иеговага мөргүп көрем’.

Ынчангаш Моисе́й чон дээш мөргүп турар. Харыы кылдыр Иегова Моисе́йге бо чес чыланны кылырын дужааган. Оон ону чагыга быжыглааш, шактырган кижи бүрүзүнге чыланче көөр кылдыр дужаап турар. Моисе́й Бурганның даалгазын ол олчаан күүсеткен. Ынчангаш чыланнарга шактырган кижилер чес чыланче көргеш, экирип турар.

Моон бис эки өөредиг шиңгээдип ап болур бис. Бир талазында, бис база чыланнарга шактырган изра́ильчилерге дөмей бис. Шупту кижилер кажан-бир дөмей-ле өлүп каар. Долгандыр көрүптер болзуңза, кижилерниң кырып, аарып, өлүп турарын көрүп каар сен. Бо чүүлдүң болуп турар чылдагааны — бир дугаар эр биле херээжен кижилерниң, Ада́м биле Е́ваның, Иеговадан ойталаанында, а бис — оларның ажы-төлү-дүр бис. Ынчалза-даа Иегова биске мөңге чурттаар арганы берип турар.

Иегова бодунуң Оглун, Иисус Христосту, чер кырынче чоргускан. Иисус чагыга астынган, чүге дизе хөй кижилер ону багай кижи кылдыр санап турган. Ынчалза-даа Иегова бистиң амы-тынывысты камгалаар дээш, Иисусту өлүмге берген. Бир эвес бис Иисусче көрүп, ооң соондан чоруур болзувусса, мөңге чурттап болур бис. Ынчалза-даа ол дугайында хөйнү дараазында эгелерден билип алыр бис.