ИИСУС Навинче көрем. ‘Хүн — доктаай бер!’ — деп, ол чугаалап тур. Ол доктаай берген. Хүн дээр ортузунга хүнзедир турган. Бо чүүлдү Иегова кылган! Ынчаарга Иисус Навинге чүге хүн чырыы херек бооп турар, билип алыылам.

Ханаа́н черинден беш багай хаан гаваончуларже халдай бээрге, олар Иисустан дуза дилеп, шапкынчы чортупкан. ‘Дүрген бисче кел!— деп, шапкынчы чаннып турар.— Бисти камгала! Даглыг чурттуң шупту беш хааннары сээң чалчаларың-биле тулчур дээш келди’.

Иисус Навин шупту дайынчылары-биле ол-ла дораан дузалажыр дээш чорупкан. Олар чыыскаал кылажы-биле хондур чоруп келгеннер. Олар Гавао́нга чедип кээрге, беш хааннарның дайынчылары хөлчок корга бергеш, дезипкеннер. Иегова дээрден күштүг даш долу бадырыптарга, ол даштарның согуушкуннарындан изра́ильчи дайынчыларның холундан бодаарга, хөй шеригжилер өлген.

Иисус көөрге, хүн удавас ажа бээр деп барган. Караңгылай бээрге, беш багай хааннарның хөй дайынчылары дезип болур. Ынчангаш Иису́с Иеговага мөргүп чугаалаан: ‘Хүн — доктаай бер!’ Хүн улаштыр чырып турар үеде, изра́ильчилер тиилелгени эчизинге чедирген.

Ханаа́нда Бурганның чонун көөр хөңнү чок оон-даа өске хөй багай хааннар бар. Ол черниң 31 хаанын чылча шаварынга Иисус Навинге болгаш ооң шериинге алды хире чыл херек. Ол чүүл кылдынган соонда, ам-даа чери чок төрел бөлүктер аразынга Ханаа́нның черин үлеп бээр дээш, Иисус сагыш салып турар.

Хөй чылдар эрткенде, Иисус Навин 110 харлыында мөчээн. Иисус болгаш ооң өңнүктери дириг турда, чон Иегованы дыңнап турган. Ынчалза-даа ол эки кижилер өлген соонда, чон бодун багай кылдыр алдынып эгелээнинден, бергелер тыптып эгелээн. Ынчан чонга, шынап-ла, Бурганның дузазы херек апарган.