БИБЛИЯДА Руфь деп аттыг ном бар. Изра́ильдиң шииткекчилери-биле чаңгыс үеде чурттап турган, бир өг-бүлениң төөгүзү ында бижиттинген. Руфь — Моав черинден аныяк херээжен; ол Бурганның чону Изра́ильге хамаарышпас. Ынчалза-даа Руфь алыс шын Бурган Иегованың дугайында билип алгаш, аңаа бүгү чүрээниң ханызындан ынак апарган. Ноеми́нь — улгады берген херээжен, ол Руфька Иегованың дугайында билип алырынга дузалажып турар.

Ноеми́нь — Изра́иль чурттуг. Изра́ильге аш бооп турар үеде ол ашаа-биле база ийи оглу-биле Моав черинче көже берген. Кезек үе эрткенде Ноеми́ньниң ашаа өлүп калган. Сөөлзүредир Ноеми́ньниң оолдары Моав чурттуг уругларга өгленип алган: бирээзиниң адын Руфь дээр, а өскезин Орфа дээр. Ынчалза-даа 10 хире чыл эрткенде Ноеми́ньниң ийи оглу өлүп калган. Ноеми́нь биле ийи уругнуң качыгдалын билип болур! Ноеми́нь ам чүнү кылыр эвес?

Бир катап Ноеми́нь чурттунче, бодунуң чонунче чанар деп шиитпирлээн. Руфь биле Орфа ооң-биле чарлыр хөңнү чок, ынчангаш ону эдерип чорупканнар. Ынчалза-даа олар элээн ырай берген соонда, Ноеми́нь уругларже көрнүп келгеш, чугаалаан: ‘Бодуңарның аваларыңарже эглип, олар-биле чурттаңар’.

Ол байырлажып, оларны чыттап каан. Ынчан уруглар ыглажып эгелээн, олар Ноеми́ньге дыка ынак болгай. Олар чөпшээрешпээн: ‘Чок! Бис сээң-биле сээң чонуңче чоруур бис’.— ‘Уругларым, чана бериңер. Чурттуңарга артып каары силерге дээре болгай’,— деп, Ноеми́нь оларны көгүдүп чугаалаан. Ынчан Орфа чана берген. Ынчалза-даа Руфь артып калган.

Ноеми́нь олче көрүнгеш: ‘Орфа чорупту. Сен база чана бер’,— деп чугаалаан. Ынчалза-даа Руфь: ‘Сенден чоруптар кылдыр мени дилевейн көр! Сээң-биле чоруурун чөпшээреп көр. Сен кайнаар баар болдур сен, мен ынаар баар мен, каяа чурттаар-дыр сен, мен база аңаа чурттаар мен. Сээң чонуң мээң чонум болур, сээң Бурганың мээң Бурганым болур. Каяа өлүр-дүр сен, аңаа мени хөөржүдүп каар’,— деп харыылаан. Ол сөстерниң соонда Ноеми́нь моон соңгаар Руфь-биле ындыг чугаа кылбаан.

Ам-на херээженнер Изра́ильге чедип келген. Маңаа олар турумчуп алганнар. Руфь дораан-на шөлге ажылдап эгелээн, чүге дизе арбай ажаалдазының үези турган. Вооз деп эр кижи бодунуң шөлдеринге арбай чыырын аңаа чөпшээрээн. Воозтуң авазы кым турганыл, билир сен бе? Иерихо́н хоорайдан Раа́в.

Бир катап Вооз Ру́фька чугаалаан: ‘Мен сээң дугайыңда хөйнү дыңнадым база Ноеми́ньге кайы-хире буянныг чүүлдерни кылганыңны. Ада-иеңни болгаш чурттуңну каапкаш, ооң мурнунда билбезиң чоннуң аразынга чурттаар дээш келгениңни билир мен. Иеговадан сеңээ авырал болзунам!’.

Руфь харыылаан: ‘Дээргим, сен меңээ дыка-ла буянныг-дыр сен. Сээң буянныг сөстериңден меңээ чиик апарды’. Воозтуң сеткилинге Руфь дыка таарышкан, ынчангаш удаваанда ол аңаа өгленип алган. Ноеми́нь дыка өөрээн! Руфь биле Воозтуң Овид деп аттыг бир дугаар оглу төрүттүнүп кээрге, ооң өөрүшкүзү кызыгаар чок. Соонда барып Овид Дави́дтиң кырган-ачазы апаар, ооң дугайында сөөлзүредир хөйнү билип алыр бис.