АМ Ханаа́нның хөй хоорайлары Изра́иль-биле тулчурунга белен. Олар тиилээринге идегеп турар. Ынчалза-даа ырак эвесте Гавао́н хоорайның чурттакчылары ынчаар бодавайн турар. Изра́ильчилерге Бурган дузалажып турар дээрзинге олар бүзүреп турар, ынчангаш Бурганга удур тулчурун күзевейн турар. Ынчаарга гаваончулар чүнү кылганыл, билир сен бе?

Олар бир дыка ырак чурттуң чурттакчылары бооп мегеленип алганнар. Элээн каш кижи самдар идик-хеп кедип алган. Элчигеннеринге орбак шоодайлар артып алгаш, кадып калган эрги хлеб ап алганнар. Ооң соонда Иисус Навинге чедип келгеш: ‘Силерниң өндүр улуг Бурганыңар — Иегованың дугайында дыңнааш, ырак чурттан келдивис. Еги́петке силерге ооң чүнү кылганын дөгерезин дыңнадывыс. Ынчангаш удуртукчуларывыс бисти орукка чиир чемден ап алгаш, барып: „Бис — силерниң чалчаларыңар бис. Биске удур дайылдашпас силер деп аазап көрүңер“,— деп чугаалаарын дилээннер. Көрүңерем, бистиң хептеривис узун орукка самдарай берди, хлевивис кургап калды’,— деп чугаалааннар.

Иисус Навин болгаш өске удуртукчулар гаваончуларга бүзүрепкен. Оларга удур дайылдашпас деп, олар аазааннар. Ынчалза-даа үш хүн эрткенде, гаваончулар херек кырында көңгүс чоокта чурттап турар дээрзин, олар билип кааннар.

— Чүге биске ырак чурттан келдивис дидиңер?— деп, Иисус олардан айтырган.

— Иегова Бурган силерге бүгү Ханаа́н черин бээрин аазап каан деп биске чугаалаарга, ону кылдывыс. Силерге өлүртүрүнден корга бердивис,— деп, гаваончулар харыылаан. Ынчалза-даа изра́ильчилер сөзүн ээлээш, гаваончуларны өлүрбээннер. Ооң орнунга оларны бодунуң чалчалары кылдыр кылып алганнар.

Гаваончулар изра́ильчилер-биле тайбың чарып алганы дээш, Иерусали́мниң хааны дыка килеңнээн. Ынчангаш ол өске дөрт хааннарны: ‘Келгеш, меңээ гаваончулар-биле тулчурунга, дузалажыңарам’,— деп дилээн. Оон ол беш хаан гаваончулар-биле тулчур дээш үнүпкен. Бо чүүл ол хааннар-биле дайынга чедирген болганда, Изра́иль-биле тайбың чарганы гаваончуларның талазындан шын болган бе? Ындыг-дыр, көрүптер бис.