КӨРЕМ, бо эр кижи бодунуң чадырында чүнү хөөп тур! Чараш хепти, шуткумал алдынны болгаш элээн каш мөңгүн чоостарны. Ол оларны Иерихо́ндан ап алган. Ынчалза-даа Иерихо́ндан шупту эт-септи канчаар турган ийик? Сактыр-дыр сен бе?

Оларны узуткааш, а алдын-мөңгүннү Иегованың чадырының эртинелер шыгжамырынче бээр ужурлуг турган. Ынчап кээрге, ол кижилер Бурганны дыңнавайн барганы ол-дур. Олар Бурганга хамааржыр чүүлдү оорлап алганнар. Бо кижини Ахан дээр, а ооң чанында — өг-бүлезиниң кежигүннери-дир. Улаштыр чүү болур эвес, билип алыылам.

Ахан ол чүвелерни оорлаан соонда, Иисус Навин элээн каш кижини Гай хоорай-биле тулчур кылдыр чортупкан. Ынчалза-даа тулчуушкун үезинде олар уттуруп алганнар. Элээн кижилер өлүрткен, а артканнары дезипкен. Иисус дыка муңгараан. Ол черже доңгая кээп дүшкеш, Иеговага мөргүп чугаалаан: ‘Ындыг чүүл бистиң-биле болу бээрин, чүге чөпшээрээниң ол?’

Иегова харыылаан: ‘Туруп кел! Изра́иль бачыт кылган. Ол узуткаар, чок болза Иегованың чадырынче бээр ужурлуг эт-сеп алган. Чараш хепти оорлааш, чажырган-дыр. Хепти база ону алган кижини узуткаваан шааңарда, силерни йөрээвес мен’. Ол багай кижини айтып бээрин Иегова Иисуска аазаан.

Иисус Навин бүгү чонну чыып алган соонда, Иегова Ахан деп багай кижиже айыткан. Ахан шынын сөглээн: ‘Бачыт кылдым. Мен чараш хепти, шуткумал алдынны база мөңгүн чоостарны көрүп кагдым. Ол чүвелерни хөлчок алыксааш, ап алдым. Оларны чадырымда хөөп кагдым’.

Ол эт-септи тыпкаш, Иисуска эккеп бээрге, ол Аханга чугаалаан: ‘Бисче чүге айыыл чоруттуң? Ол дээш Иегова сенче айыыл чортуптар!’ Ол сөстерниң соонда шупту чон Аханны база ооң өг-бүлезин даштар-биле соп кааптарга, олар өлүп калган. Кажан-даа өске кижиниң эт-севин ап болбас деп, бо болуушкун көргүзүп турар эвес-тир бе?

Ооң соонда Изра́иль Гай-биле тулчур дээш катап чорупкан. Бо удаада Иегова бодунуң чонунга дузалажып турар болгаш, ол тулчуушкунну тиилеп алган.