КӨРҮП тур сен бе, мында чүү болуп турар-дыр? Ол дээрге изра́ильчи дайынчылар-дыр. Олар доңгайгаш, суг ижип турлар. Оларның чанында Гедео́н шииткекчи тур. Ол оларның суг ижип турарын хайгаарап турар.

Эр улус канчаар аңгы-аңгы кылдыр ижип турарын, кичээнгейлиг көрем. Чамдыктары арыннарын сугже шуут доңгайып алган. Бирээзи сугну холундан ишпишаан, долгандыр чүү болуп турарын хайгаарап турар. Ол чүүл уткалыг, чүге дизе Иегова Гедео́нга суг ижип тургаш, чүгле серемчилелдиг артып турар улусту шилиирин дужааган. Артканнарын Бурганның дужаалы-биле чандырыптар ужурлуг. Чүге ындыг, билип алыылам.

Изра́ильчилер база катап айыылга таварышкан. Олар база катап Иегованы дыңнавайн барганнар. Оларны мадиамчылар кулдар кылып алган. Ынчангаш изра́ильчилер Иеговадан дуза дилеп чаннып турар боорга, Иегова оларны дыңнап каан.

Иегова Гедео́нга шериг чыырын дужаарга, ол 32 000 дайынчы чыып алган. Ынчалза-даа Изра́ильге удур 135 000 дайынчылыг шериг чыылган. Ындыг турбуже, Иегова Гедео́нга мынча дээн: ‘Сенде чон хөлүн эрттир хөй-дүр’. Иегова чүге ынча дээнил?

Чүге дизе бир эвес изра́ильчилер дайынны удуп аар болза, ол дээрге оларның боттарының тиилелгези деп бодап болур. Ынчангаш тиилеп алырынга Иегованың дузазы-даа херекчок дээр турган. Ынчангаш Иегова Гедео́нга дужааган: ‘Шупту кортук кижилер чана бээр кылдыр чугаала’. Гедео́н ынчаар кылыптарга, ам-даа 22 000 дайынчы чана берген. Ындыг янзы-биле, дайзынның 135 000 дайынчыларынга удур, ооң-биле чүгле 10 000 дайынчы арткан.

Ынчаарга чүл бо! ‘Сээң-биле чон ам-даа хөй-дүр’,— деп, Иегова чугаалаан. Ол Гедео́нга аккан суг чанынче дайынчыларны эккелгеш, суг ижип тура, сугже арнын шуут-ла доңгайып алыр кижилерни шуптузун чандырыптарын дужааган. Суг ижип тура, серемчилелдиг артып турган 300 дайынчы-биле тиилээринге мен сеңээ дузалажыр мен’,— деп, Иегова аазаан.

Тулчуушкун үези келген. Гедео́н 300 дайынчыны үш бөлүкке чарыпкан. Дайынчы бүрүзүнге эдиски база иштинде чырыткылыг доңга берген. Дүн ортузу кээрге, олар дайзынның турлаан бүзээлеп алганнар. Ооң соонда деңге эдискилерин үрүпкеш, доңгаларын бузупкаш: ‘Иегованың база Гедео́ннуң селемези!’ — деп алгырганнар. Одунган дайзыннар аңгадаан болгаш девидээн. Олар дезе бергеннер, а изра́ильчилер тулчуушкунну тиилеп алганнар.