ХААРЖАК-ХЕМЕДЕН дашкаар өске кижилер биеэги хевээр чуртталгазын уламчылавышаан. Ол-ла хевээр олар суг халавы кээринге бүзүревээн. Олар биеэгизинден артык кыжырып-каттыржып турганнар чадавас. Ынчалза-даа олар удаваанда каттыржырын соксаткан.

Хенертен суг агып келген. Хумуңдан суг аккан-биле дөмей, дээрден чаъс куда берген. Нойнуң чугаазы шын болган! Ынчалза-даа ам хааржак-хемеже кирери эмин эртир орай болган. Иегова эжикти быжыг дуглап каан.

Удаваанда шупту шынааларны суг шыпкан. Суг улуг шапкын суглар бооп, агып турган. Ол ыяштарны аңдара ужуруп, улуг даштарны чууй идип, аажок дагжап турган. Кижилер аажок корткан. Олар бедик черлерже үнүп турган. О, эжик ажык турда-ла, Нойну дыңнавайн, хааржак-хемеже кире бербээнинге олар дыка-ла хараадап турганнар! Ынчалза-даа ам орайтаан.

Суг өрү көдүрлүп-ле, көдүрлүп-ле турган. Ол 40 хүн, 40 дүн дургузунда үзүк-соксаал чок чаап келген. Суг дагларның ийлерин дургаар өрү көдүрлүп, удаваанда эң бедик даглар безин суг адаанче кире берген. Бурганның сөстери бүде берген: хааржак-хемеден дашкаар шупту кижилер болгаш дириг-амытаннар өлүп калганнар. А хааржак-хемеже чаштып кирген кижилер дириг арткан.

Ной база ооң оолдары хааржак-хемени тулган кылдыр тудуп алганнар. Ол суг-биле кады көдүрүлгеш, ооң кырынга салдап чораан. Оон чаъс соксаан — хүн үнүп келген. Кайы-хире кайгамчыктыг хевир көстүп келген-дир! Кайнаар-даа көөрге — долгандыр канчаар-даа аажок улуг океан чаттылган. Ооң кырынга чүгле хааржак-хеме салдап турган.

Кайгамчык улуг кижилер ам чок болган. Олар ам кижилерге хора чедирип шыдавас. Олар иелери-биле база өске-даа багай кижилер-биле кады өлүп калганнар. Ынчаарга оларның адалары-биле чүү болган?

Кайгамчык улуг кижилерниң адалары бистер ышкаш анаа кижилер эвес турган. Олар кижилер бооп чурттаар дээш, черже бадып келген дээрниң төлээлери турган. Ынчангаш улуг үер кээрге, олар өске кижилер-биле кады өлбээн. Ол дээрниң төлээлери кижи мага-бодун каггаш, дээрже дедир эглип чорупканнар. Ынчалза-даа Бурганның төлээлериниң өг-бүлезинче оларга ам кирери хоруглуг болган. Ынчангаш олар Эрликтиң төлээлери апарган. Библия оларны аза-буктар деп адап турар.

Оон Бурган хатты чоргузуптарга, үерниң суу сыыгап эгелээн. Беш ай эрткенде, хааржак-хеме бедик дагларның бирээзиниң кырынга доктаай берген. Хааржак-хеме иштинге турган кижилер дашкаар бакылап, даглар баштарын көрүп каарынга чедир хөй үе эрткен. Суг сыыгадыр бадып уламчылавышаан.

Ынчан Ной хааржак-хемеден кара өңнүг кушту — кускунну үндүр салыпкан. Кезек дээскингеш, кускун дедир эглип келген, чүге дизе хонуптар таарымчалыг чер тыппаан. Ынчаар ол элээн каш катап кылган, ынчалза-даа база катап эглип келгеш, хааржак-хемеге хонуп турган.

Ной чер кыры кургаан бе, суг бүрүнү-биле чавырлып баткан бе дээрзин билип алыры-биле, көге-буганы ужудуп үндүрүпкен. Ынчалза-даа көге-буга хонуп алыр чер тыппайн, хемеге дедир ужуп келген. Ной көге-буганы база катап ужудуп үндүрүптерге, ол олива бүрүзүн ызырып алган чедип келген. Чер суг кырындан көстүп келген дээрзин Ной шак ынчаар билип алган. Ной көге-буганы үш дугаар үндүр салыптарга, ол ам-на бодунга кургаг чер тып алгаш, аңаа чурттап артып калган.

Ынчан Бурган Нойга айыткан: ‘Хемеден үнүп кел. Сээң-биле кады өг-бүлең база шупту дириг-амытаннар үнүп келзин’. Олар хааржак-хемеге бир чыл ажыг чурттап келгеннер. Ынчангаш олар даштыгаа үнүп келгенинге, ол ышкаш дириг артып калганынга кайы-хире өөрээнин билип болур!