АЖЫДЫЫШКЫН номунда чамдык шүлүктерниң утказы дорт эвес (Ажыдыышкын 1:1). Чижээ, ол номда хаваанда «Өндүр улуг Вавилон» деп бижиктиг херээжен дугайында бижээн. Ол херээжен «янзы-бүрү аймактар, чоннар» кырынга олуруп алган (Ажыдыышкын 17:1, 5, 15). Ол шүлүкте анаа херээжен кижи дугайында чугаа чорбайн турары билдингир, ынчаарга Өндүр улуг Вавилон доора уткалыг бооп турар. Ол самыыраан херээжен чүнү илередип турарыл?

Ажыдыышкын 17:18-те ол херээженни «черниң хааннарын чагырган өндүр улуг хоорай» деп адаан. Ол «өндүр улуг хоорай» «черниң хааннарын» чагырып турар болганда,  «Өндүр улуг Вавилон» деп аттыг херээжен делегей хемчээлдиг күш-салдарлыг организацияны илередип турар. Ону делегей чергелиг тургузуг деп адап болур. Ооң салдары кайнаар угланганыл? Шажынче. Ажыдыышкын ному ону канчаар бадыткап турарын көрээлем.

Делегейде политиктиг, коммерциялыг болгаш шажынчы тургузуглар бар. «Өндүр улуг Вавилон» деп адаткан херээжен политиктиг тургузуг бооп шыдавас, чүге дээрге «черниң хааннары [азы бо делегейниң политиктиг күштери] ооң-биле самыырап турган» деп Бурганның Сөзүнде чугаалаан. Ол херээженниң самыыраар чоруу — черниң чагырыкчылары-биле эвилелдежип турарында болуп турар. Ынчангаш ону «сурагжаан самыыраан херээжен» деп адаан (Ажыдыышкын 17:1, 2; Иаковтуң 4:4).

Өндүр улуг Вавилон коммерциялыг тургузуг бооп шыдавас, чүге дээрге «бүгү делегейниң садыгжылары», азы коммерциялыг организациялар, ол доора уткалыг хоорайның узуткаашкынын көргеш, ажыын ажып ыглажыр. Оон аңгыда, хааннар болгаш садыгжылар Вавилонче «ырадыр турупкан» көрүп турар деп Библияда чугаалаан (Ажыдыышкын 18:3, 9, 10, 15—17). Ынчап кээрге, Өндүр улуг Вавилон — политиктиг азы коммерциялыг эвес, а шажынчы тургузуг-дур.

Өндүр улуг Вавилон меге шажынны илередип турар деп, база бир бадыткал бар. Ол хоорай «бо делегейде бар чоннарны бодунуң» илби-шидизи-биле дуурайлаан деп Ажыдыышкын номунда чугаалаан (Ажыдыышкын 18:23). Илби-шиди база караң көрнүр дээн ышкаш чүүлдер шажын-биле холбашкан болгаш буктардан кээп турар болганда, Библияда Өндүр улуг Вавилон деп хоорайны «четкерлерниң чурттаар чери» деп адаанында кижи кайгаар чүве чок (Ажыдыышкын 18:2; Хоойлу 18:10—12). Делегей чергелиг меге шажынның ниити бөлүү алыс шын шажынга өжээнниг хамаарылгалыг болуп, «медээчилерни» болгаш «шынчы хамык улусту» истеп-сүрүп турар (Ажыдыышкын 18:24). Өндүр улуг Вавилон алыс шын шажынны көөр хөңнү чогундан «Иисусту херечилээн» улусту каржы-дошкун истеп-сүрүп, оларны безин өлүрүп турар (Ажыдыышкын 17:6). «Өндүр улуг Вавилон» деп аттыг херээжен Иегова Бурганга удурланып турар делегей чергелиг шупту меге шажыннарның ниити бөлүүн илередип турар деп бо бүгүден көскү-дүр.