1. Иисус өөреникчилеринге чүнү даасканыл? (Матфей 28:18—20).

 ИИСУС дирлип келген соонда, Галилеяга чыглып келген турган өөреникчилеринге көзүлген. Иисус оларга бир-ле чугула чүүлдү чугаалаксаан. Матфей 28-ки эгениң 18-тен 20-ге чедир шүлүктерде ооң сөстерин бижээн (номчуптуңар).

2. Кандыг айтырыгларны сайгарар бис?

² Амгы үеде Бурганның шупту бараалгакчылары Иисустуң даалгазын күүседир ужурлуг. Ол даалга-биле холбашкан үш айтырыгны сайгарыптаалыңар. Бирээде, Библия өөренип турар улуска Бурганның олардан чүнү манап турарын анаа-ла тайылбырлап бээри чедер бе? Ийиде, Библия өөренип турар улуска Бурган-биле найыралын быжыктырарынга чыышта шупту суртаалчылар канчаар дузалап болурул? Үште, суртаалдаарын соксаткан акы-угбаларга өөреникчилер белеткээр ажылга катап киржип эгелээринге канчаар дузалап болурул? b

3. Иисус кандыг чугула чүүлдүң дугайында чугаалааныл?

³ Иисус биске тодаргай айтыышкыннарны берген. Бис ооң айыткан чүүлүнге кижилерни өөредир ужурлуг бис. Ынчалза-даа эскерип көрүңер даан, Иисус: «Оларны Мээң өөреникчилерим боор кылдыр ээлдирип, мээң бүгү айтыышкыннарымны оларга өөредиңер» дивээн. Ол мынча дээн: «Оларны Мээң өөреникчилерим боор кылдыр ээлдириңер. Силерге Мээң бүгү айтыышкыннарымны сагыыр кылдыр оларны өөредиңер».  Ынчаарга бис Библия өөредип турар киживисти анаа өөредиринден аңгыда, алган билиглерин чуртталгазынга канчаар ажыглаарын тайылбырлаар ужурлуг бис. Ону кылыры чүге чугула?

4. Христостуң айтыышкыннарын сагыырын өөредири дээрге чүү дээни ол? Чижектен чугаалаңар.

⁴ Сагыыры дээрге кандыг бир чүүлдү шак ынчаар күүседири-дир. Кижини Иисустуң айтыышкыннарын сагыыр кылдыр канчаар өөредип болур бис? Ону машинаны мунуп өөредип турар инструкторнуң чижээнге көрүптээлиңер. Ол келир үениң чолаачыларын орук шимчээшкининиң дүрүмнерин сагыырынга канчаар өөредип турарыл? Инструктор эгезинде теориядан эгелээр. Ынчалза-даа дүрүмнерни сагып өөренип алырынга чүгле теория чедишпес. Өөреникчи машинаны башкарып турда, инструктор чанынга олуруп алгаш, аңаа алган билиглерин херек кырында канчаар ажыглаарын тайылбырлаар ужурлуг. Ол чижек бисти чүү чүвеге өөредип турар?

5. а) Иоанн 14:15 биле 1 Иоанн 2:3-те бижээн шүлүктерден алырга, Библия өөредип турар улузувусту чүү чүвеге өөредир ужурлуг бис? б) Библейжи дүрүмнерни чуртталгазынга ажыглаар кылдыр, оларга канчаар дузалап болур бис?

⁵ Бир кижи-биле Библияны өөренип тургаш, Бурган ол кижиден чүнү манап турарын анаа-ла тайылбырлаары чедишпес боор. Бис ол кижини билип алган билиглерин чуртталгазынга ажыглаар кылдыр өөредир ужурлуг бис. (Номчуптуңар: Иоанн 14:15; 1 Иоанн 2:3.) Библияны өөредип турар улузувуска библейжи дүрүмнерни школага, ажылывыска азы дыштанып турар үевисте канчаар ажыглаарын бодувустуң чижээвис-биле көргүзүп берип болур бис. Чижээ, Бурганның Сөзүнден сүмелер бисти айыылдан канчаар камгалаанын база шын шиитпирлер хүлээринге канчаар дузалаанын чугаалап берип болур бис. Оон ыңай ыдыктыг сүлде оларга шын шиитпир хүлээринге дузалаар кылдыр, олар-биле катай мөргүп болур бис (Ин. 16:13).

6. Иисустуң айтыышкыннарын сагыырын улуска өөредир дизивиссе, оон ыңай чүнү канчаар ужурлуг бис?

⁶ Иисустуң айтыышкыннарын сагыырын улуска өөредир дизивиссе, оон ыңай чүнү канчаар ужурлуг бис? Оларның өөреникчилер белеткээр күзели тыптып кээр кылдыр, дузалаар болзувусса эки. Чамдык улус суртаалдаарындан коргар. Ынчангаш оларга алыс шынны хандыр билип алырынга шыдамыы-биле дузалажыр болзувусса эки. Ынчан алыс шын оларның чүрээнге дээштиг бооп, хөделиринче оттурар. Ындыг болганда, өөредип турар улузувустуң суртаалдаар күзели тыптып кээр кылдыр, чүнү канчаар ужурлуг бис?

7. Буянныг медээни суртаалдаар күзели оттуп кээр кылдыр, Библия өөренип турар улуска канчаар дузалап болур бис?

⁷ Өөренип турар кижиден мынчаар айтырып көрүңер: «Библиядан билиглер чуртталгаңны эки талаже канчаар өскертипкенил? Чүү деп бодаар сен, ол билиглер өске кижилерге херек бе? Оларга канчаар дузалап болур сен?» (У. ч. 3:27; Мф. 9:37, 38). Өөренип турар кижиге суртаалдаар херекселдерниң аразындан каш буклетти көргүскеш, төрелдеринге, эш-өөрүнге болгаш кады ажылдап чоруур улузунга оларның кайызы эң-не солун болурун айтырыңар. Оон каш буклетти аңаа бергеш, өскелерге канчаар сүмелеп болурун көргүзүп бериңер. А кажан ол сугга суктурбаан суртаалчы апаарга, аңаа дузаны кадып, ооң-биле суртаалдаар бис (Эккл. 4:9, 10; Лк. 6:40).

8. Библия өөренип турар улус Бурганга болгаш чанында кижилерге ханы ынакшылды чүге сайзырадыр ужурлуг? (« Бурганга ынакшылды сайзырадырынга аңаа дузалаңар» деп көзенекти көрүңер.)

⁸ Эскерип көрүңер даан: Иисус биске ооң бүгү айтыышкыннарын сагыырынга өскелерни өөредир кылдыр дааскан. Ол айтыышкыннарже ийи эң чугула дүрүм кирип турар:  Бурганга болгаш чаныңда кижиге ынак болуру (Мф. 22:37—39). Ол ийи айтыышкын суртаалдаары болгаш өөреникчилер белеткээри-биле сырый харылзаалыг. Чүге дизе бистерни бараалгаарынче бир дугаарында Бурганга болгаш чоок кижилерге ынакшыл оттуруп турар. Ийе, Библия өөренип турар улус танывас улустарга суртаалдаарындан коргуп болур. Ынчалза-даа ол коргушту чоорту ажып эртип алырынга Иегова дузалаар деп оларны бүзүредир болзувусса эки (Ыд. ыр. 17:2—4; У. ч. 29:25). Библия өөренип турар кижиге Бурганга ынакшылды канчаар сайзырадырын көзенекте тайылбырлаан. Чыышта акы-угбалар Библия өөренип турар кижиге Бурганга болгаш чанында кижиге ынакшылды сайзырадырынга канчаар дузалап болур?

9. Машина мунуп өөренип турар кижиге орукка шын алдынарынга чүү дузалаар?

⁹ Машинаны чаа мунуп өөренип турар чолаачының чижээнче эглип кээлиңер. Ол машинаны мунуп турган үеде чүгле инструкторнуң чугаазын дыңнап тургаш эвес, а орукта өске чолаачыларны хайгаарап тургаш, өөренип ап болур. Чижээ, инструктор өөреникчиниң кичээнгейин өске чолаачыларже салып: «Көр даан, удур халдып орар чолаачы, өске чолаачыларны бодааш, машиназының карааның чырыын бичииледипти. А дуу ол чолаачы соонга чораан машинаны эрттирипти ышкажыл» деп тайылбырлап болур. Шак ынчаар өөреникчи орук дүрүмнерин эки шиңгээдип ап, дуржулгалыг чолаачы апаар.

10. Библия өөренип турар кижиге Бурган-биле найыралдажып алырынга чүү дузалаар?

¹⁰ Чаа-ла Бурганның алыс шын оруу-биле чоруп олурар, Библия өөренип турар кижи база чүгле бисти дыңнап тургаш эвес, а Бурганның өске-даа бараалгакчыларын хайгаарап тургаш, база өөренип болур. Ынчаарга аңаа Бурган-биле чоок харылзаалыг болурунга чүү дузалаар? Чыыштарже баары. Оон билип алган чүүлдериниң ачызында ооң билии ханылап, бүзүрели быжыгып, Бурганга ынакшылы күштелир (Аж.-ч. 15:30—32). Оон аңгыда, Хурал залынга баргаш, ол кижини өске акы-угбалар-биле таныштырып болур бис. Ёзулуг христиан ынакшылды ол аңаа эскерип каап болур. Дараазында каш байдалды сагыштаалап көрээлиңер.

11. Библия өөренип турар улус Хурал залынга кымнар-биле таныжып ап болур база ол чүүл оларга кандыг салдар чедирип болур?

¹¹ Библия өөренип турар херээжен кижи чааскаан төлүн азырап турар дижик. Ол Хурал залынга келгеш, ооң-биле дөмей байдалдыг угбавыс-биле таныжып ап болур. Угбавыстың чаш уруг-дарыын эдертип алгаш, чыыштарны үспейн, кээп турарын эскерип кааш, ол херээжен кижи магадап ханмаан. Оон өске чижек: таакпызын каап чадап турар Библия өөренип турар эр кижи ооң мурнунда база ындыг багай чаңчылдыг турган акывыс-биле таныжып алган. Акывыс: «Мээң Иеговага ынакшылым өскен тудум, Ооң дүрүмнерин сагыыр күзелим күштелген. Мен таакпыны октап шыдаан болганымда, сен база шыдаар сен!» — деп демги эр кижини сорук киирген (2 Кор. 7:1; 2 Кор. 4:7). Оон база бир байдалды көрүптээлиңер. Библия өөренип турар аныяк уруг Хурал залынга боду хире назы-харлыг дуңмавыс-биле таныжып алган. Иеговага бараалгал аңаа кайы хире аас-кежикти эккеп турарын ол эскерип турар. Ынчангаш ооң чүге үргүлчү өөрүшкүлүг чоруурун ол билип алыксап турар.

12. Библия өөренип турар кижиниң Бурган-биле чоок харылзаалыг болурунга хуралда суртаалчы бүрүзү үлүүн киирип болур бе?

¹² Библия өөренип турар кижи хуралга янзы-бүрү акы-угбалар-биле таныжып алгаш, Бурганга болгаш чаныңда кижиге ынак бол дээн Иисустуң айтыышкынын оон-даа эки күүседип өөренип алыр (Ин. 13:35; 1 Тим. 4:12). Ооң ышкаш бергелерге таваржып чоруур христианнар-биле аралашкаш, ол бодунга бүзүрей  бергеш, Иисустуң өөреникчизи болур дээш, кылыр ужурлуг өскерлиишкиннерни мен-даа кылып шыдаар мен деп бодай бээр чадавас (Ы. х. к. 30:11). Библия өөренип турар кижиниң Бурган-биле чоок харылзаалыг болурунга хуралда суртаалчы бүрүзү үлүүн киирип болур (Мф. 5:16). Хурал залынче кээп турар улусту деткиир дээш, чүнү канчап турар силер?

13, 14. Холун сула салыпкан элчиннерге Иисус кандыг хамаарылгалыг болган?

¹³ Суртаалдаарын соксаткан акы-угбаларга Иисустуң өөреникчилер белеткээр дээн даалгазынга катап киржир кылдыр дузалажыксап турар бис. Ол чүүлге биске Иисустуң чижээ дузалаар. Кезек када холун сула салыпкан элчиннерге ооң кандыг хамаарылгалыг болганын сайгарыптаалыңар.

¹⁴ Иисустуң черге бараалгалының төнчүзүнде, өлүр шагы чоокшулап келгенде, өөреникчилери ону «каапкаш, дезе бергеннер» (Мк. 14:50; Ин. 16:32). Иисус оларга кандыг хамаарылгалыг болган? Ол дирлип келгеш, херээжен өөреникчилеринге мынча дээн: «Кортпаңар! Баргаш, „Галилеяже чоруптуңар“ деп Мээң ха-дуңмамга чугаалаңар. Олар Мени аңаа көрүп каар» (Мф. 28:10). Элчиннери ону берге үеде каапкан-даа болза, Иисустуң оларга бүзүрели читпээн. Харын-даа ол оларны «ха-дуңмам» деп адаан. Ачазы ышкаш, Иисус база кезээде улуска энерелди көргүзүп, өршээринге белен турган.

15. Суртаалдаарын соксаткан акы-угбаларга кандыг хамаарылгалыг бис?

¹⁵ Суртаалдаарын соксаткан акы-угбалар дээш сагыжывыс аарып чоруур. Олар бистиң кады бүзүрээн ха-дуңмавыс болгай. Оларга ынак бис! Ооң мурнунда оларның кайы хире чүткүлдүг суртаалдап чораанын утпаан бис (Евр. 6:10). Бис оларны аажок сактып чоруур бис! (Лк. 15:4—7). Иисустуң үлегерин өттүнүп, ол акы-угбалар дээш канчаар сагыш човап болур бис?

16. Суртаалдаарын соксаткан акы-угбалар дээш канчаар сагыш човап болур бис?

¹⁶ Оларны чыыштарже чалаңар. Иисус элчиннерниң хей-аъдын көдүрер дээш, оларны тускай ужуражылгаже чалаан (Мф. 28:10б; 1 Кор. 15:6). Бис база суртаалдаарын соксаткан акы-угбаларны чыыштарже чалап болур бис. Ону чаңгыс удаа эвес кылыр апаар чадавас бис. Өөреникчилер Иисустуң чалалгазын хүлээп алырга, Иисус дыка өөрээн. Бис база шак ындыг өөрүшкүнү миннип болур бис (Мф. 28:16; деңнеңер: Лк. 15:6).

17. Чыышче суртаалдаарын соксаткан акывыс азы угбавыс кээр болза, канчаар бодувусту алдынар бис?

¹⁷ Оларны чылыг уткуңар. Иисустуң өөреникчилери ол тускай ужуражылгаже чедип кээрге, ол оларның-биле боду чугаалажып эгелээн (Мф. 28:18). А кажан чыышче суртаалдаарын соксаткан акывыс азы угбавыс чедип кээр болза, канчаар бис? Бис бир дугаар базымны кылып, оларны чылыг-чымчак уткуп хүлээп алыр ужурлуг бис. Эгезинде чугаалаар сөс тыппайн баар болзувусса, мынча деп болур бис: «Сени көөрү дыка өөрүнчүг-дүр!» Ынчан ол эпчоксунмас боор.

18. Суртаалдаарын соксаткан акы-угбаларны канчаар деткип болур бис?

¹⁸ Оларны деткиңер. Иисустуң өөреникчилери бүгү делегейге Бурганның Чагыргазының дугайында медээни суртаалдаары берге болур деп бодаан чадавас. Ынчалза-даа Иисус: «Мен кажан кезээде, бо делегейниң төнчүзүнге чедир силер-биле кады мен» — деп оларны деткээн (Мф. 28:20). Ол сөстер оларны сорук киирген бе? Ийе! Олар хүн бүрүде буянныг медээни «улуска чедирип, суртаалдаарын уламчылап турганнар» (Аж.-ч. 5:42). Суртаалдаарын соксаткан акы-угбаларга база бистиң деткимчевис херек. Олар катап суртаалдап эгелээринден коргуп турар чадавас.  Ынчангаш оларны: «Ажырбас, чааскаан суртаалдавас сен» деп деткип болур бис. Олар суртаалдаарынга белен апаарга, оларның-биле дугуржуп алгаш, кады суртаалдап болур бис. Ынчан олар силерниң дузаңар дээш, аажок өөрүүр. Суртаалдаарын соксаткан акы-угбаларга чылыг-чымчак хамаарылгалыг боор болзувусса, олар база катап суртаалдап эгелээр чадавас. А ол чүүл бүдүн чыышка өөрүшкүнү эккээр.

19. Сеткиливис ханызындан чүнү күзеп турар бис база чүге?

¹⁹ Өөреникчилер белеткээр ажыл кайы хире үр уламчылаар? Иисус: «Бо делегейниң төнчүзүнге чедир» — дээн (Мф. 28:20). Даалгавысты күүседип шыдаар бис бе? Ону күүседир дээш, «мөңге амыдыралга шын хамаарылгалыг бүгү улусту» дилеп, үевисти, күжүвүстү, акша-төгериивисти берип турар бис (Аж.-ч. 13:48, Чаа делегейниң очулгазы). Ынчалдыр Иисусту өттүнүп турар бис. А ол мынча дээн: «Мээң аъш-чемим болза Мени айбылап чоруткан Адамны тооп дыңнаары болгаш Ооң Меңээ дааскан ажыл-херээн эчизинге чедир кылыры болур» (Ин. 4:34; 17:4). Биске дааскан ажылды эчизинге чедирерин аажок күзеп турар бис (Ин. 20:21). Суртаалдаарын соксаткан акы-угбалар ол чугула ажылга бистиң-биле кады катап киржип эгелээр кылдыр күзээр бис (Мф. 24:13).

20. 2 Коринфичилерге 4:7-ден алырга, Иисустуң даалгазын чүге күүседип шыдаар бис?

²⁰ Иисустуң даалгазын күүседири ындыг-ла амыр эвес. Ынчалза-даа чааскаан эвес бис. Иисус биске дузалаарын аазаан. Оон аңгыда, «Бурган-биле кады чаңгыс ажыл херек кылып турар» болганывыста, Иегова бисти деткип чоруур (1 Кор. 3:9). Ынчап кээрге, даалгавысты күүседип шыдаар бис база өскелерге ону кылырынга дузалап болур бис. Ол дээрге биске дыка улуг алдар-хүндү-дүр! (Номчуптуңар: 2 Коринфичилерге 4:7.)