1. Иегова Бодун чүге сагыш човангыр ие кижиге деңнээн?

 «ИЕ КИЖИ бодунуң чаш төлүн уттур бе?» — деп, Иегова Исайя медээчиниң үезинде айтырып турган. Оон Иегова чонунга: «Херээжен кижи уттуптар болза безин, Мен сени утпас мен!» — деп чугаалаан (Иса. 49:15). Бурган Библияда Бодун ие кижиге ховар деңнеп турар-даа болза, бо таварылгада Ол Бодун ие кижиге деңнээн. Иегова бараалгакчыларынга кайы хире ынаан көргүзер дээш, ие кижиниң төлү-биле хамаарылгазын чижеглээн. Жасмин b дээр угбавыстың: «Төлүңерни өстүрүп туруңарда, ооң-биле кезээ-мөңгеде артып калыр, чүге-даа деңнешпес чылыг-чымчак харылзаа тургустунуп кээр» — дээн сөстери-биле дыка хөй авалар чөпшээрежир.

2. Иегова ажы-төлүнүң бирээзи Оон ырап эгелээрге, чүнү миннип турар?

² Иегова ажы-төлүнүң бирээзи безин суртаалче болгаш чыыштарже барбайн баарга, ол дээш сагышсырап турар. Бодап көрүңер даан, чыл санында Ооң муң-муң бараалгакчылары суртаалдаарын соксадыптарга c, Ол кайы хире аарышкыны миннип турар-дыр?

3. Иегова чүнү күзеп турар?

³ Суртаалдаарын соксаткан акы-угбаларывыстың хөй кезии чыыштарже катап эглип кээрге, аажок өөрүүр-дүр бис! Иегова Бодундан ырай берген улустуң чыыштарже катап эглип кээрин күзеп турар. Бис база (1 Пет. 2:25). Ынчалза-даа оларга канчаар дузалажып болур бис? Бо айтырыгга харыылаарының  бетинде, чүге чамдык акы-угбаларывыс суртаалдаарын болгаш чыыштарже баарын соксадып турарын билип алыылыңар.

4. Ажылга шын эвес хамаарылганың ужундан Бурганның чамдык бараалгакчылары-биле чүү болган?

⁴ Акы-угбаларның чамдыызы бажы-биле ажылче кире берген. Мурнуу-Чөөн Азияда чурттап турар Хань дээр акывыс мынча дээн: «Ажылымче дүлнү бергенимге бодум буруулуг мен. Мен бай-шыырак апаар болзумза, Иеговага бараалгаары белен боор деп шын эвес бодап турган мен. Ынчангаш ажылче дыка хөй үени үндүрүп эгелээн мен. Чыыштарны бичиилеп үзүп эгелээш, соонда барып, ынаар шуут барбайн барган мен. Шынап-ла, бо делегейде шупту чүүл кижилерни чоорту Бургандан ырадып апаар кылдыр тургустунган».

5. Бир угбавыс улай-улай бергелерге таварышкаш, канчалган?

⁵ Бергелерниң ужундан чамдык акы-угбаларывыстың сузу бастынып чоруур. Великобританиядан беш ажы-төлдүг Энн дээр угбавыс мынча дээн: «Оолдарымның бирээзи төрүмелинден аар аарып турар. А өске оглум сагыш аарыындан аарып эгелээн. Хомуданчыг чүүл, уругларымның бирээзин чыыштан үндүрүпкен. Ундараанымдан чыыштарже барбастап, суртаалдаарын соксаткан мен». Бис Энни болгаш ооң өг-бүлезин, ол ышкаш бергелерге таварышкан өске-даа акы-угбаларны кээргеп турар бис.

6. Колосчуларга 3:13-те дүрүмнү ажыглавас болза, Иегованың чонундан кижи канчаар ырай берип болур?

⁶ Номчуптуңар: Колосчуларга 3:13. Иегованың чамдык бараалгакчыларынга кады бүзүрээн акы-угбалары аарышкы чедирген. Чыышта кандыг-бир кижиге хомудаар чылдагаанывыс туруп болур деп, Павел элчин чугаалаан. Безин бир кижи бисти чөптүг эвес аажылаан чадавас. Оваарымчалыг болбас болзувусса, чүрээвис каржыланы берип болур. Ындыг байдалда Иегованың чонундан ырай бээр айыыл бар. Мурнуу Америкадан Пабло дээр акывыс-биле ындыг чүүл болган. Чыыштан бир кижи ону кылбааны херекке меге буруудаткан соонда, Пабло чыышта хүндүткелдиг хүлээлгелерин чидирип алган. Пабло канчалган? «Ол чүүл меңээ дыка хоранныг болган. Ынчангаш чыыштан чоорту ырай берген мен» — деп, ол сактып чугаалаан.

7. Буруузунуп турар минниишкиннер кижиге кандыг салдар чедирип болур?

⁷ Ооң мурнунда Бурганның хоойлузун үреп, частырыг кылыпкан кижиниң арын-нүүрү аарып, бодун Бурганның ынакшылынга төлеп чок кылдыр миннип болур. Ол бачыттарын миннинген-даа болза, Бурганның чонунуң аразынга ооң турар эргези чок деп бодап болур. Франсиско дээр акывыс база ындыг бодалдыг турган. Ол мынча дээн: «Самыын чорук кылганым дээш, чемелээшкин (порицание) алган мен. Эгезинде чыыштарже барып турган-даа болзумза, ундаралче кире бергеш, бодумну Иегованың бараалгакчыларының аразынга төлеп чок кылдыр миннип турган мен. Арын-нүүрүм мени хинчектеп туруп бээрге, Иегова мени өршээвээн деп бодап турдум. Чоорту чыышта акы-угбалар-биле аралашпайн барган мен». Сайгарганывыс ышкаш байдалга таварышкан акы-угбаларга кандыг хамаарылгалыг силер? Оларны кээргээр-дир силер бе? А эң-не чугула чүүл, Иегованың оларга хамаарылгазы кандыгыл?

8. Иегова Аңаа бараалгап чораан улузун сактыр бе? Тайылбырлаптыңар.

⁸ Иегова Аңаа түр када бараалгаарын  соксаткан база Ооң чону-биле аралашпайн барган бараалгакчыларын утпайн чоруур. Оларның Аңаа кылып турган «ажыл-херектерин» Ол утпаан (Евр. 6:10). Бараалгакчыларынга Иегованың кайы хире ынаан база олар дээш канчаар сагыш човап турарын Исайя медээчи чараш сөстер-биле дамчыткан: «Ол Бодунуң сүрүг малын, кадарчы кижи ышкаш, кадарып турар: хураганнарны холунга тудуп, кужактап [чоруур]» (Иса. 40:11). Хойларының бирээзи чиде бээрге, Өндүр улуг Кадарчы чүнү миннип турар? Иисус өөреникчилеринге мынча деп тайылбырлаан: «Чүү деп бодаар силер? Чүс хойлуг кижи оларның бирээзин чидирипсе, арткан тозан тозун дагларга каапкаш, читкен хоюн дилеп чоруппас бе? А тып алганда, читпээн тозан тозунга бодаарга, демги хою дээш өөрүшкүзү улуг боор деп силерге алыс шынны чугаалап тур мен» (Мф. 18:12, 13).

9. Бурунгу үелерде эки кадарчы бодунуң хойларынга кандыг хамаарылгалыг турган? (Статьяның даштында чурукту көрүңер.)

⁹ Иегованы кадарчыга чүге дөмейлеп болур? Чүге дизе бурунгу үелерде эки кадарчы бодунуң хойлары дээш сагыш човаар турган. Чижээ, Давид малын камгалаар дээш, арзылаң болгаш адыг-биле тулчуп турган (1 Хаан. 17:34, 35). Эки кадарчы чүс хойнуң бирээзи безин чиде бээрге, ону эскерип каар (Ин. 10:3, 14). Ол 99 хойну айыыл чок черге — кажаага азы өске кадарчыга хайгаарадып арттырып кааш, боду чиде берген чаңгыс хойну дилеп чоруптар. Иисус бо чижекти чугула алыс шынга бисти өөредир дээш чугаалаан: «Дээрде Адаңар база шак ындыг: бо бичии уругларның чаңгызы-даа чиде бээрин Ол күзевейн турар» (Мф. 18:14).

10. Иезекиил 34:11—16-дан алырга, Иегова чиде берген хойларынга чүнү кылырын аазаан?

¹⁰ Иегова бистиң кижи бүрүзүнге, ооң санында «кодандан» ырай берген улуска, ынак. Иегова чиде берген хойларын дилээрин база Ооң-биле хамаарылгазын катап тургузуп алырынга дузалажырын Иезекиил медээчини таварыштыр аазаан. Хою чиде берген кадарчы ышкаш, «Мен база Бодумнуң хойларымны хайгаарап, карактаар мен»  деп, Иегова чугаалаан. (Номчуптуңар: Иезекиил 34:11—16.) Баштай кадарчы кижи хоюн дилээр дээш, хөй үе болгаш күжениишкин үндүрер турган. Ол ону тып алгаш, коданче катап эккээр турган. Бир эвес ол хой аштап-түреп калган азы балыгланы берген болза, кадарчы ону ажаап-тежээп, балыгларын шарып, эктинге чүктеп, ону ашкарып-чемгерер турган. Бурганның хойларының кадарчылары, удуртукчулар, чыыштан ырай берген улуска дузалаар дээш, база шак ынчаар кылыр ужурлуг (1 Пет. 5:2, 3). Хуралдың удуртукчулары ындыг акы-угбаларны дилеп, чыышче катап эглип кээринге болгаш Бурган-биле харылзаазын катап тургузуп алырынга ынакшылдыы-биле дузалап турар d.

11. Эки кадарчы чүнү билир турган?

¹¹ Эки кадарчы хою чиде берип болур деп билир турган. Хой чиде бээр болза, ол ону тып алгаш, каржы-хажагай аажылавас турган. Иегова Бодундан кезек када ырай берген бараалгакчыларынга канчаар дузалап турганын болгаш оон чүнү өөренип ап болурувусту сайгарыптаалыңар.

12. Иона Иегованы дыңнавайн баарга, Ол канчалган?

¹² Иона медээчи Иегованы дыңнавайн, аңаа берген даалгазын күүсетпейн барган. Ындыг-даа болза, Иегова оон хая көрүнмээн. Иегова, эки кадарчы ышкаш, Ионаны камгалааш, даалганы күүседиптер күштү аңаа берген (Иона 2:7; 3:1, 2). Ооң соонда Бурган Ионага үнүштүң чижээнге кижи бүрүзүнүң чуртталгазының кайы хире үнелиин көргүскен (Иона 4:10, 11). Оон чүнү өөренип алыр бис? Суртаалдаарын соксаткан кижини удуртукчулар херек чок бараалгакчы деп санаарының орнунга, ооң чүге ындыг байдалга келгенин билип алыр дээш кызар. Оон ол Иеговаже эглип кээрге, удуртукчулар дөмей-ле аңаа ынакшылды болгаш кичээнгейни илередир.

13. 72-ги Ырның авторунуң сөстерин дыңнааш, Иегова канчалган? Оон чүнү өөренип алыр бис?

¹³ Каржы улус чедиишкинниг чурттап турар ышкаш боорга, 72-ги Ырның автору аажок  ундарай берген. Бурганга бараалгаан ажыы бар бе деп, ол чигзинип эгелээн (Ыд. ыр. 72:12, 13, 16). Иегова ону көргеш, канчалган? Ол ыр күүседикчизин шиитпээн. Оон артык, Бурган ооң сөстерин Библияже киирип каан. Түңнелинде ыр күүседикчизи Иегова-биле найыралдан артык үнелиг чүве чок деп билип каан (Ыд. ыр. 72:23, 24, 26, 28). Ол чүүл бисти чүү чүвеге өөредип турар? Кандыг-бир кижи Иеговага бараалгаан ажыы бар бе деп чигзинип турар болза, удуртукчулар ооң дугайында түңнелдер үндүреринче далашпас. Ындыг бараалгакчыны шиидериниң орнунга, удуртукчулар ооң чүге ынчаар алдынып эгелээнин билип алыр дээш кызар. Чүгле ооң соонда олар ындыг кижини деткип быжыктырар дээш, ооң-биле Библиядан шүлүктерни сайгарып болур.

14. Илия чүге дуза хереглеп турган? Иегова аңаа канчаар дузалаан?

¹⁴ Илия медээчи Иезавел кадындан камгаланыр дээш дезип турган (3 Хаан. 19:1—3). Иегованың медээчилеринден ол чааскаан арткан деп бодап турган. Илия бодунуң бараалгалын херек чок деп бодааш, муңгараанындан чурттаксавайн барган (3 Хаан. 19:4, 10). Иегова Илияны шиидериниң орнунга, ол Ооң күжүнге ынанып болур деп, ол чааскаан артпаан база ону дыка хөй ажыл манап турар деп бүзүреткен. Медээчизи сагыш-сеткилин ажыдып чугаалап турда, Иегова ону кичээнгейлиг дыңнааш, чаа даалгаларны дагзып каан (3 Хаан. 19:11—16, 18). Оон чүнү өөренип ап болур бис? Бис шупту, ылаңгыя удуртукчулар, Иегованың хойларынга чылыг-чымчак хамаарылгалыг боор  ужурлуг бис. Акывыс азы угбавыс миннишкиннерин үлежип турда, ол Бурганның энерелинге төлеп чогун чугаалап азы хорадап турда безин, удуртукчулар ону кичээнгейлиг дыңнаар ужурлуг. Ындыг кижини дыңнааш, олар ону Иегованың ынакшылынга бүзүредирин кызар.

15. Иоанн 6:39-тан алырга, Иисус Адазының хойларынга кандыг хамаарылгалыг турган?

¹⁵ Иегованың читкен хойларынга хамаарылгавыс кандыг боор ужурлуг? Бурган бистен чүнү манап турар? Иисустуң үлегерин сайгарыптаалыңар. Иегова шупту хойларын үнелеп турар деп, Иисус билир турган. Ынчангаш ол «израиль чоннуң азып читкен хойларынга» дедир эглип кээринге дузалаар дээш, шыдаар-ла чүүлүн кылып турган (Мф. 15:24; Лк. 19:9, 10). Оон аңгыда Иисус, «ачылыг кадарчы» дег, Иегованың хойларының чаңгызы-даа читпес кылдыр, бүгү күжүн үндүрүп турган. (Номчуптуңар: Иоанн 6:39; 10:11.)

16, 17. Иеговаже эглип кээрин күзеп турар улуска удуртукчулар канчаар дузалап турар? (« Олар чүнү миннип турар?» деп көзенекти көрүңер.)

¹⁶ Павел элчин Эфесте удуртукчуларны Иисустуң үлегерин өттүнеринче оттуруп турган: «Дээрги Иисустуң сөстерин сактып, кошкак улуска дузалажыр ужурлуг бис дээрзин силерге көргүзүп келген мен. Ол: „Алырынга көөрде, бээри — амыр-чыргалдыг“ — дээн болгай» (Аж.-ч. 20:17, 35). Бо сөстерден алырга, удуртукчулар Иегованың чону дээш сагыш човаар тускай хүлээлгелиг. Испаниядан Сальвадор дээр удуртукчу мынча дээн: «Хойларынга Иегованың кайы хире ынаан бодап келгеш, оларга шыдаар шаам-биле дузалажырын кызар чордум. Иегова мени олар дээш сагыш човазын деп күзеп турар».

¹⁷ Бо статьяда сагындырган акы-угбаларның шуптузунга Иеговаже катап эглип кээринге удуртукчулар дузалаан. Ындыг-даа болза, Бургандан ырай берген улус ам-даа хөй. Олар катап эглип кээрин күзеп турар. Дараазында статьядан ындыг улуска канчаар дузалап болурувусту билип алыр бис.