1, 2. Иегованың Херечилери кандыг темаларның дугайында чугаалажырынга ынак?

 ИЕГОВАНЫҢ Херечилери Ооң адын алдаржыдарынга болгаш чагырар эргезинге хамаарышкан темаларның дугайында чугаалажырынга ынак. Ол ийи айтырыг аразында сырый харылзаалыг.

² Бурганның ады нүгүлден арыглаттынар ужурлуг база Ооң чагыргазы эң-не эки деп бадыткаары эргежок чугула деп билир бис. Ол ийи тема бистиң кичээнгейивиске төлептиг.

3. Бурганның ады-биле чүү харылзаалыг?

³ Иеговага хамаарышкан шупту чүүл, ооң санында чагырар эргези, Ооң ады-биле харылзаалыг. Ынчангаш Бурганның адын нүгүлден арыглаар болзувусса, Иегованың чагыргазы эң-не эки деп бадыткап турар бис. (« Маргыштыг айтырыгның өске талалары» деп көзенекти көрүңер.)

4. Ырлар 134:13-те Бурганның адының дугайында чүү дээнил? Бо статьяга кандыг айтырыгларны сайгарар бис?

⁴ Бурганның ады кара чаңгыс, катаптаттынмас. Чаа делегейниң очулгазында, Ырлар 134:13-те: «Иегова, Сээң адың кезээ мөңгеде артар!» — деп бижээн. Ооң ады чүге ындыг чугула? Кажан ону бир дугаар нүгүлдээн? Бурган Бодунуң адын арыглаар дээш, чүнү кылып турар? Бис чүнү кылып болур бис? Ол айтырыгларның харыызын билип алыылыңар.

5. Бурганның адын алдаржыдарынга хамаарыштыр кандыг айтырыг тургустунуп болур?

⁵ Бир дугаарында чүнүң дугайында мөргүүр ужурлуг бис?  Иисус мынчаар мөргүп чоруңар дээн: «Дээрде Адавыс! Сээң адың алдаржызын!» (Мф. 6:9) Бо сөстерниң утказы кандыгыл? Алдаржыдары дээрге бир-ле чүүлдү ыдыктаары азы арыглаары дээн уткалыг. Ынчалза-даа кандыг-бир кижи мынча деп болур: «Ындында-ла ыдыктыг атты чүге алдаржыдар херек?» Ол айтырыгга харыылаарының бетинде, баштай ат деп сөс чүнү илередип турарын сайгарыптаалыңар.

6. Ат чүге ол хире чугула?

⁶ Ат дээрге анаа-ла үжүктер азы үннер чыындызы эвес-тир. Библияда: «Эки ат-сураг байлакшылдан күзенчиг» — дээн (У. ч. 22:1; Эккл. 7:1). Моон алырга, кижиниң ады ат-алдары-биле сырый харылзаалыг боор. Ынчангаш атты канчаар бижиири азы адаары эвес, а улустуң ол атты дыңнааш, чүнүң дугайында бодап кээри чугула.

7. Кижилер Бурганның адын канчаар бужартадып турар?

⁷ Улус Иегованың дугайында мегени чугаалап тургаш, Ооң ат-алдарын баксырадып турар. А ону кылып тура, олар Ооң адын бужартадып турар. Ол чүүл бир дугаар кижи төөгүзүнүң эгезинде болган. Моон чүнү өөренип ап болурувусту көрүптээлиңер.

8. Ада́м биле Ева чүнүң дугайында билир турган? Аңаа хамаарыштыр кандыг айтырыглар тургустунуп кээр?

⁸ Ада́м биле Ева Бурганның дугайында алыс шынны, чижээ, Ооң ады — Иегова деп, билир чораан. Чаяакчы Бурган оларга амы-тынны, четпес-дудуу чок мага-ботту, кайгамчык чараш чурттаар черни база кады чурттаар тергиин эшти берген деп, олар билир турганнар (Э. д. 1:26—28; 2:18) Ынчалза-даа олар Иегованың белектерин үнелээн бе? Олар өөрүп четтирген хөөннүг бооп, Аңаа сеткилинден ынак турган бе? Бурганның дайзыны оларны шенептерге, ол чүүл билдине берген.

9. Эге дөс 2:16—17; 3:1—5-тен алырга, Иегова Ада́м биле Евага чүү дээнил база Эрлик Ооң сөстерин канчаар хажыткан?

⁹ Номчуптуңар: Эге дөс 2:16—17; 3:1—5. Эрлик чыланны таварыштыр Евадан: «Сесерликте кандыг-даа ыяштан чимистерни чиирин Бурган силерге хоруп каан дээр, ол ылап-ла шын бе?» — деп айтырган. Эрлик хоранга дөмей кажар айтырыы-биле Еваның  угаан-медерелинге Бурганның дугайында шын эвес бодалдарны тывылдырган. Херек кырында Бурган Ада́м биле Евага, чаңгыс ыяштан аңгыда, сесерликте шупту ыяштарның чимизин чиирин чөпшээрээн. А ол сесерликке эңмежок ыяштар өзүп турган болгай! (Э. д. 2:9). Иегова Ада́м биле Евага шупту чүүлдү элбээ-биле берип турган. Ол чаңгыс борбак ыяштың чимизин чиирин хоруп каан. Ынчангаш Эрлик ол айтырыы-биле алыс шынны хажыткан. Бурган кижилерден бир-ле үнелиг чүүлдү чажырып турар деп, ол Еваны бүзүреткен. Ынчан Ева: «Ол шынап-ла ындыг эвес бе?» деп бодаан чадавас.

10. Эрлик Бурганның адын канчаар ажыы-биле карартып турган база ол чүнү чедип алган?

¹⁰ Ол үеде Ева чүү багай, чүү эки дээрзин чүгле Иегова шиитпирлээр эргелиг деп чөпшээрежип турган. Эрликтиң салган айтырыынга харыы кылдыр, ол Бурганның берген тода айтыышкынын чугаалаан. Оон ыңай Ева Ада́м-биле эки-бактың ыяжының чимизинге дээп безин болбазын база чиптер болза, олар өлүп каар деп Бурганның сагындырыын чугаалаан. Эрлик аңаа: «Чок, өлбес силер» — дээн (Э. д. 3:2—4). Ол ам ажыы-биле Бурганның адын карартып, Иегова Еваны мегелеп турар деп нүгүлдээн. Ынчалдыр Эрлик нүгүлчү апарган. Ева Эрликтиң мегезинге долузу-биле алзыпкаш, Иеговага эвес, а Эрликке бүзүрей берген (1 Тим. 2:14). Ол дээш Ева чуртталгада эң-не багай дээн шиитпирни хүлээп алган: ол Адазының айтыышкынын тоовайн барган. Ол Бурганның хоруп каан чимизин амзааш, Ада́мга база берген (Э. д. 3:6).

11. Ада́м биле Ева чүнү канчаар ужурлуг турган?

¹¹ Ол болуушкунну бичии када өскээр сагыштаалап көрүңер даан. Ева Эрликтиң мегезинге мынча дээн дижик: «Мен сени билбес-даа болзумза, Ачам Иегованы билир мен. Мен Аңаа ынак болгаш, бүзүрээр мен. Ол Ада́м биле меңээ шупту чүүлдү берген. Сен Ооң дугайында канчап багай чүве чугаалаар сен? Ыңай чор!» Иегова ынак уруундан ындыг сөстерни дыңнааш, кайы хире өөрүүр турган деп! (У. ч. 27:11). Ынчалза-даа Ева-даа, Ада́м-даа Иеговага ынак эвес турган. Олар Адазының буянныг адын камгалаар дээш, чаңгыс-даа эки сөс чугаалаваан база Нүгүлчүге удур харыы бербээн.

12. Эрлик Еваның угаанынга чигзиниглерни канчаар тывылдырган? Ада́м биле Ева чүнү кылбаан?

¹² Көргенивис дег, Эрлик эгезинде Еваның угаанынга чигзиниглер тывылдырып эгелээн. Эрлик Иегованың ат-алдарын баксырадып, Еваны Аңаа чигзине бээр кылдыр мегелепкен. Ада́м биле Ева Эрликтиң көк мегезин дыңнааш безин, Адазынга болушпаан. Ынчангаш олар Эрликке катчып, Бурганга удурланы бергеннер. Амгы үеде Эрлик ол-ла аргазын ажыглавышаан хевээр. Ол Бурганның буянныг адын карартып чоруур. Ол мегеге бүзүреп турар улус Иегованы чагырыкчызы кылдыр хүлээвейн турар. Ынчангаш олар Ооң чөптүг-шынныг негелделерин белени-биле ойталап чоруур.

13. Иезекиил 36:23-те Библияның кол темазын канчаар көргүскен?

¹³ Эрликтиң нүгүлүнге Иегованың хамаарылгазы кандыгыл? Ол чүнү-даа кылбайн турар бе? Чок! Бүдүн Библияда кол кичээнгейни Эдемге болган нүгүлден адын арыглаар дээш Иегованың чүнү кылып турарынче салган (Э. д. 3:15). Библияның кол темазын мынча деп болур: Иегова Бодунуң адын арыглап, чер кырынга амыр-тайбыңны болгаш чөптүг чорукту Чагырганың дузазы-биле тургузар. Бурган ол Чагырганың Хааны кылдыр бодунуң Оглун томуйлап каан. Иегова Бодунуң адын арыглаар дээш, чүнү кылып турарын Библиядан билип ап турар бис. (Номчуптуңар: Иезекиил 36:23.)

14. Эдемге болган үймээн соонда Иегованың кылган чүүлү Ооң адын канчаар арыглап турар?

¹⁴ Эрлик Иегованың күзел-соруунга канчаар-даа шаптыктаарга, чүү-даа болдунмайн турар. Иегованың канчаар хөделип турарын Библиядан билир бис. Аңаа кым-даа деңнешпес деп, ол чүүл бадыткап турар. Эрликтиң болгаш ооң талалакчыларының үндүрген үймээни Иеговага дыка улуг аарышкыны чедирген (Ыд. ыр. 77:40). Ынчалза-даа Бурган адын арыглап тура, кайгамчык мерген угаанны, шыдамык болгаш чөптүг чорукту илередип турар. Оон аңгыда Ол Бодунуң өндүр улуг күжүн эңмежок катап көргүскен. А эң чугула чүүл, Ол бүгү чүвени ынакшыл-биле кылып турар (1 Ин. 4:8). Шынап-ла, Иегова адын арыглаар дээш, соксаал чок ажылдап турар.

15. Амгы үеде Эрлик Бурганның адын канчаар карартып турар база ооң түңнели кандыгыл?

¹⁵ Эрлик Бурганның адын карартпышаан хевээр. Амгы үеде ол улуска Бурганның күчү-күжүнге, чөптүүнге, мерген угаанынга болгаш ынакшылынга чигзиниглер тывылдырып, оларны мегелеп турар. Чижээ, Иегова — Чаяакчы эвес-тир деп, Эрлик улусту бүзүредирин кызып турар. А Бурганга бүзүрээр кижилерни Ооң негелделери шыңгыы болгаш чөптүг эвес деп бодаарынче ол оттуруп турар. Оон аңгыда, Иегова — улусту алдыы оранда хинчектеп турар, каржы, ынакшыл чок Бурган деп, өөредигни Эрлик нептередип турар. Кижилер ол нүгүлге  бүзүрээш, Иеговадан хая көрнү бээринге безин белен. Эрлик сөөлүнге чедир Бурганны нүгүлдеп, аргалыг-ла болза, Оон хөй улусту, оларның санында силерни, ырадырын кызар. Ынчалза-даа ол чедиишкинниг боор бе?

16. Ада́м биле Евага бодаарга, чүнү кылып болур силер?

¹⁶ Иегова адын арыглаарда, тергиин эвес улусту ажыглап турар. Ада́м биле Еваның кылбаан чүүлүн кылып болур силер. Бөгүн бүгү делегейде улус Бурганны бак атка киирип турар-даа болза, силер Ооң талазынче туруп, Иегова — ыдыктыг, чөптүг-шынныг, буянныг, ынакшылдыг Бурган деп шупту улуска чугаалаар аргалыг силер (Иса. 29:23). Иегованы Чагырыкчыңар кылдыр шилип алганыңарны көргүзүп болур силер. Чүгле Ооң чагыргазы эң-не эки база кижи төрелгетенинге аас-кежикти болгаш амыр-тайбыңны эккээр деп улуска билип алырынга дузалап болур силер (Ыд. ыр. 36:9, 37; 145:5, 6, 10).

17. Иисус Бурганның адын ажыдып бээр дээш, чүнү канчап турган?

¹⁷ Бурганның адын камгалаар болзувусса, Иисус Христоска дөмей боор бис (Ин. 17:26). Иисус Адазының адын адап турганындан аңгыда, Ооң ат-алдарын камгалап турганы-биле улуска Ооң адын ажыдып берген. Фарисейлер улуска Иегованы кадыг-дошкун, тоомча чок, энерел чок, негелделиг Бурган кылдыр өөредип турган. А Иисус улуска Адазын шыдамык, ынакшылдыг, бодап билир болгаш өршээчел кылдыр көргүскен. Оон аңгыда хүннүң-не Адазының шынарларын тергиини-биле илередип тургаш, Иисус улуска Иегованы эки билип алырынга дузалап турган (Ин. 14:9).

18. Иегованың адынга удур нүгүлдү болгаш мегени канчаар буруу шаап турар бис?

¹⁸ Бис база, Иисус ышкаш, Иегованың кайы хире ынакшылдыын болгаш буянныын улуска чугаалап болур бис. Шак ынчаар Иегованың адынга удур нүгүлдү болгаш мегени буруу шаап турар бис. Улусту Бурганның адынга ыдыктыг чүүлге дег хамаарылгалыг боор кылдыр өөредип тургаш, ол атты алдаржыдып турар бис. Оон аңгыда Иегованың шынарларын илередип болур бис. Тергиин эвес-даа болзувусса, ол чүүл болдунар (Эф. 5:1, 2). Бистиң аксы-сөзүвүстен болгаш ажыл-херээвистен Иегованың херек кырында  кандыызын улус көрүп турар. Ынчаар бис Иегованың адын арыглаарынга киржип турар бис. Улуска Бурганның дугайында алыс шынны билип алырынга дузалап тургаш, Ооң адын камгалап турар бис b. Бачыттыг улус Бурганга шынчы бооп артып шыдаар деп бодувустуң үлегер-чижээвис-биле бадыткап турар бис (Иов 27:5).

19. Улусту алыс шынга өөредип турувуста, сорулгавыстың кандыызын билип алырынга Исайя 63:7 канчаар дузалап турар?

¹⁹ Бурганның адын оон ыңай канчаар ыдыктап болур бис? Улусту библейжи алыс шынга өөредип тургаш, оларның кичээнгейин Бурганның чагырар эргезинче салып турар бис. Өскээр чугаалаарга, Октаргайда шупту хоойлуларны чүгле Иегова тургузар эргелиг деп улусту өөредип турар бис. Ол шынап-ла ындыг. Кижилерге Бурганның хоойлуларын билип алыры чугула-даа болза, бистиң кол сорулгавыс — оларны Иеговага шынчы болгаш ынак болурунга дузалаары-дыр. Ону кылырда, Иегова деп аттың артында Хуу-ботче кичээнгей салып, Бурганның кайгамчык шынарларын онзалап демдеглээр болза эки. (Номчуптуңар: Исайя 63:7.) Ынчан олар Иеговага ынак апарып, Ону дыңнаар күзели оттуп кээр.

20. Дараазында статьяга чүнү сайгарар бис?

²⁰ Алдынып турарывыс-биле база өскелерни канчаар өөредип турарывыс-биле Иегованың адын алдаржыдып, улуска Аңаа ынак апаарынга дузалап турар дээрзинге канчаар шынзыгып болур бис? Ол айтырыгны дараазында статьяга сайгарар бис.