Бо шүлүктерде мынча дээн: «А Сүлдениң үре-түңнели бо-дур: ынакшыл, өөрүшкү, амыр-тайбың, шыдамык болгаш буянныг чорук, энерел [«ачы-буян чедирери», Чаа делегейниң очулгазы], бүзүрел, томаарыыры болгаш бодун туттунуп билири». Ол дээрге ыдыктыг сүлде биске чүгле ол тос шынарны сайзырадырынга дузалап турар дээни ол бе? Чок.

Ооң мурнунда шүлүктерде Павелдиң чүнү бижээнин эскерип көрүңер: «Кижиниң бачыттыг бүдүжүнүң ажыл-херээ илдең көскү. Ол дээрге самыырал, бужар күзээшкиннер, туттунмас туралаашкын, дүрзү-бурганга чүдүүрү, караң көрнүрү, адаан-өжээн, килең-кылык, алгыш-кырыш, аңгылажыг, бактажыры, мурнун былаажыры, арагалаары, эмин эрттир хөглеп-дойлаары болгаш өске-даа ындыг янзылыг чүүлдер-дир» (Гал. 5:19—21). Ынчап кээрге, Павелдиң бижээн «кижиниң бачыттыг бүдүжүнүң ажыл-херээнче» оон-даа өске бачыттар, чижээ, Колосчуларга 3:5-те херектер, база кирип турар. Галатчыларга 5:22, 23-те бижээн тос шынарның дугайында база ынча деп болур. Ынчап кээрге, Павел ол шүлүктерде ыдыктыг сүлдениң ачызында сайзырадып болур шынарларның чүгле чамдыызын сагындырган.

Ооң-биле дөмей, Павел Тимофейни бо алды шынарже: чөптүг-шынныг чорукче, Бурганны хүндүлеп чурттаарынче, бүзүрелче, ынакшылче, шыдамык чорукче, чөпшүл боорунче чүткүүр кылдыр деткип турган (1 Тим. 6:11). Павел ол шынарларның чүгле үжүн (бүзүрелди, ынакшылды болгаш чөпшүл чорукту) «сүлдениң үре-түңнелинче» киир бижээн. Чугаажок, Павелдиң бижээни арткан шынарларын (чөптүг-шынныг чорукту, Бурганны хүндүлеп чурттаарын, шыдамык чорукту) сайзырадырынга Тимофейге ыдыктыг сүлдениң дузазы херек турган. (Деңнеңер: Колосчуларга 3:12; 2 Пётр 1:5—7.)

Ынчаарга Галатчыларга 5:22, 23-те христианнарга херек шынарларның шуптузун биживээн. Бурганның сүлдези биске «сүлдениң үре-түңнелинче» кирип турар тос шынарны сайзырадырынга дузалап турар. Ынчалза-даа христианнарга чедишкен болуп, «ылап-ла чөптүг-шынныг база ыдыктыг амыдыралы-биле онзаланыр, Бурганның овур-хевиринге үлегерлей чаяаган чаа кижи бооп» амыдыраар дизе, оон-даа өске шынарларны сайзырадыры чугула (Эф. 4:24).