1, 2. Иегова бисти өг-бүлезинче канчаар хүлээп алган база чүге?

 ИЕГОВА Ооң бараалгакчыларындан тургустунган өг-бүлениң кежигүннери болур кайгамчык арганы биске берген. Ол аас-кежиктиг өг-бүле Бурганга чуртталгазын бараалгаткан, Ооң Оглунуң бачыттан хостаар өргүлүнге бүзүреп чоруур улустан тургустунган. Чуртталгавыстың ужур-уткалыг апарганынга өөрүп, черге азы дээрге мөңге чурттаар үевисти четтикпейн манап турар бис.

² Иегова биске ынак болгаш, Ооң өг-бүлезиниң кежигүнү болур арганы биске ажыткан. Ол дээш Адавыс улуг төлевирни берген (Ин. 3:16). Ол бисти «улуг өртек-биле садып хостаан» (1 Кор. 6:20). Төлевирниң ачызында Иегованың чоок өңнүктери бооп болур бис. Октаргайның Чагырыкчызын Адавыс деп адаар кайгамчык улуг алдар-хүндүге төлептиг болган бис. Эрткен статьяда чугаалааны дег, Иегова — бистиң эң-не эки Адавыс-тыр.

3. Кандыг айтырыглар бисте тыптып турар чадавас? (« Иегова мени эскерип турар бе?» деп көзенекти көрүңер.)

³ Силер база, ыр күүседикчизи дег: «Дээрги-Чаяакчының меңээ хайырлаан бүгү буяны дээш, чүнүң-биле харыылаар мен?» деп бодуңардан айтырып турар чадавас силер (Ыд. ыр. 115:3). Херек кырында дээрде Адавыска чүнүң-биле-даа харыылап шыдавас бис. Ынчалза-даа Иегованың биске көргүскен ынакшылы бисти база Аңаа ынак болурунче оттуруп турар. Иоанн элчин: «Бурган баштай биске ынакшаан боорга, бис ынак-тыр бис» — деп бижээн (1 Ин. 4:19). Дээрде Адавыска ынакшылывысты канчаар көргүзүп болур бис?

4. а) Иаков 4:8-тен алырга, Бурганга чоокшулаар дээш, чүге бар-ла күжүвүстү үндүрер болзувусса эки? б) Иеговага канчаар чоокшулап болур бис?

⁴ Иегова бисти Ооң-биле чугаалажып, чоок өңнүктер болурун  күзеп чоруур. (Номчуптуңар: Иаков 4:8.) Ол бистерни кайы-даа үеде дыңнаарынга белен болгаш, «мөргүлден черле салдынмаңар» деп деткип турар (Рим. 12:12). Бурган бисти дыңнаар дээш, кажан-даа шылавас база чай чок болбас. А бис Библияны болгаш ону билип алырынга дузалаар дептерлерни номчуп тургаш, Иегованы дыңнап турар бис. Оон аңгыда чыыштар үезинде кичээнгейлиг бооп, Иегованы дыңнап турар бис. Ажы-төл ада-иези-биле ажык чугаалажыр болза, оларның хамаарылгазы чоок болур. Ооң-биле дөмей, Иегова-биле үргүлчү чугаалажыр болзувусса, Ооң-биле чоок өңнүктер болур бис.

5. Мөргүлдеривистиң шынарын канчаар экижидип болур бис?

⁵ Бурган-биле кайы хире ажык, чоок чугаалажыр-дыр силер, боданып көрүңер. Иегова «сеткил-чүрээвисти Аңаа ажыдып», мөргүүрүвүстү күзеп турар (Ыд. ыр. 61:9). Ынчангаш: «Мээң мөргүлдерим чүге дөмей: кургаг сөстерлиг, парлап каан открыткаларга бе азы ажык сеткилдиг, хол-биле бижээн чагааларга бе?» деп бодувустан айтырар болзувусса эки. Чигзиниг чок, Иеговага дыка ынак силер база Ооң-биле быжыг найыралдыг болуксаар силер. Ынчаарга Бурган-биле үргүлчү чугаалажыры чугула. Аңаа сеткилиңерден бүзүреңер. Иеговага өөрүшкүңерни болгаш муңгаралыңарны ажыы-биле чугаалаңар. Кандыг-даа үеде Оон дузаны дилеп болур силер дээрзинге чигзинмеңер!

6. Дээрде Адавыс-биле эки хамаарылгалыг болур дизе, чүнү канчаар болзувусса эки?

⁶ Дээрде Адавыс-биле эки хамаарылгалыг болур дизе, Аңаа үргүлчү өөрүп четтирип чоруур болзувусса эки. Ыр күүседикчизиниң: «Дээрги-Чаяакчы, Бурганым, кайгамчык чүүлдерни хөйү-биле кылган сен! Бисти бодап кээр деп чүвеңни! Сээң-биле эннежир кым-даа чок. Ол бүгүнү медээлеп чугаалаар мен, кайгамчык ажыл-херектериң санап четпес хөй-дүр» — дээн сөстеринге катчыр-дыр бис (Ыд. ыр. 39:6). Иеговага өөрүп четтиргенивисти анаа минниринден аңгыда, ону аксы-сөзүвүс болгаш херектеривис-биле илередип турар бис. Амгы үеде хөй улустан оовус-биле ылгалып турар бис. Бурганның кылган чүүлүн үнелевес кижилер аразында чурттап чоруур бис. Өөрүп четтирерин билбес чорук — сөөлгү хүннерниң бир демдээ-дир (2 Тим. 3:1, 2). Ындыг хөөнге кажан-даа алыспаалыңар!

7. Иегова бистен чүнү манап турар база чүге?

⁷ Ада-иелер ажы-төлүнүң алгышпайн, найыралдыг чурттаарын күзеп турары дег, Иегова база шупту ажы-төлүнүң бот-боттарынга эки хамаарылгалыг болурун күзээр. Аравыста ынакшыл бисти Бурганның ёзулуг бараалгакчылары деп бадыткап турар (Ин. 13:35). «Ха-дуңма улус эп-сеткилдиг кады чурттаар болза, эки-даа, таарымчалыг-даа» — дээн ыр күүседикчизиниң минниишкиннерин үлежир-дир бис (Ыд. ыр. 132:1). Кады бүзүрээн ха-дуңмавыска ынак болзувусса, Иеговага ынаавысты көргүзүп турарывыс ол (1 Ин. 4:20). «Бот-боттарынга буянныг, энерелдиг» акы-угбалардан тургустунган өг-бүлениң кежигүнү болуру кайы хире аас-кежик-тир! (Эф. 4:32).

8. 1 Иоанн 5:3-тен алырга, Иегованы дыңнап чоруур эң-не кол чылдагаанывыс кандыгыл?

⁸ Иегова ажы-төлдү ада-иезинге дыңнангыр болзун деп күзеп турар. Ынчангаш Ол бистен база Аңаа дыңнангыр болурувусту манап турар (Эф. 6:1). Бурган аңаа төлептиг, чүге дээрге Ол — бистиң Чаяакчывыс, амыдыралдың Хайырлакчызы болгаш эң-не мерген угаанныг Адавыс-тыр. Ынчалза-даа Иегованы дыңнап чоруур эң-не кол чылдагаанывыс дээрге Аңаа ынакшылывыс-тыр. (Номчуптуңар: 1 Иоанн 5:3.) Иегованы дыңнаар чылдагааннарывыс хөй-даа болза, Ол бисти ону кылырынче албадавайн турар. Иегова биске хостуг шилиир эргени берген. Ону күзелдии-биле дыңнаарывыска, Ол аажок өөрүп турар.

9, 10. Бурганның негелделерин билири болгаш аңаа дүүштүр чурттаары чүге чугула?

 ⁹ Ада-иелер ажы-төлүнүң айыыл чок чурттаарын күзээр болгай. Ынчангаш олар, ажы-төлүн камгалаар дээш, тодаргай негелделерни тургузуп турар. Ажы-төл ол негелделерни сагып турары-биле ада-иезинге бүзүреп, оларны хүндүлеп чоруурун көргүзүп турар. Ынчалза-даа дээрде Адавыстың тургускан негелделерин билири болгаш аңаа дүүштүр чурттаары чүүден артык чугула! Шак ынчаар Иеговага хүндүткеливисти болгаш ынакшылывысты көргүзер бис. Оон аңгыда ол бистиң бодувуска-ла ажыктыг (Иса. 48:17, 18). А Иеговадан болгаш Ооң негелделеринден ойталаар улус боттарынга-ла хора чедирип чоруур (Гал. 6:7, 8).

¹⁰ Иегованы өөртүрүн кызып чоруур болзувусса, мага-бодувуска, сагыш-сеткиливиске болгаш Бурган-биле харылзаавыска хора чедирги дег чүүлдерден бодувусту камгалап ап турар бис. Биске чүү эң-не эки болурун Иегова билир. АКШ-тан Орора: «Иеговага дыңнангыр болзуңза, эң аас-кежиктиг чуртталгалыг боор сен» — дээн. Кончуг шын сөстер-дир! Иеговага дыңнангыр чорук силерге кайы хире хөй йөрээлдерни эккеп турар-дыр, бодап көрүңер даан!

11. Мөргүлдер биске канчаар дузалап турар?

¹¹ Мөргүлдер Бурганга дыңнангыр болурунга дузалап турар. Чамдыкта биске Иегованы дыңнаары берге, ынчалза-даа Аңаа таарымча чок чүүлдер кылыр сундувус-биле демисежир ужурлуг бис. Ыр күүседикчизи Бургандан: «Мени угаан киир сурга, ынчан Сээң дүрүм-хоойлуңну сагып, ону бүгү чүлдү-чүрээм-биле кадагалаар мен» — деп чаннып дилеп турган (Ыд. ыр. 118:34). Доктаамал эгелекчи кылдыр  бараалгап чоруур Дениз мынча дээн: «Иегованың кандыг-бир хоойлузун сагыыры берге үелерде, шын алдынарынга херек күштү дилеп, мөргүүр чордум». Иегова ындыг мөргүлдерге албан харыылаар деп бүзүреп болур бис (Лк. 11:9—13).

12. Эфесчилерге 5:1-ден алырга, чүнү канчаар ужурлуг бис?

¹² Номчуптуңар: Эфесчилерге 5:1. Иегованың ынак ажы-төлү болганывыста, Аңаа дөмей боор дээш, бар шаавыс-биле кызып чоруур бис. Ону өттүнүп, өскелерге чылыг-чымчак болгаш ынакшылдыг хамаарылгалыг бооп, оларның частырыгларын өршээп турар бис. Бистиң эки алдынып чоруурувус Бурганның дугайында оон-даа хөйнү билип алырынче өскелерни оттуруп болур (1 Пет. 2:12). Ада-иелер Иегованы өттүнүп, ажы-төлүнге эки хамаарылгалыг болур болза эки. Ынчан оларның ажы-төлү ынакшылдыг Адавыс-биле найыралдажыксай бээр чадавас.

13. Биске дидим болурунга чүү дузалаар?

¹³ Бичии төл колдуунда ачазынга чоргаарланып, ооң дугайында өске улуска күзелдии-биле чугаалаар боор. Ооң-биле дөмей, бис база дээрде Адавыска, Иеговага, чоргаарланып, Ооң дугайында өске улуска чугаалаксаар бис. Давид хаан мынча дээн: «Дээрги-Чаяакчы дээш, мактаныр мен» (Ыд. ыр. 33:3). Бис база шак ындыг минниишкиннерлиг бис. А бир эвес кортук болгаш ыядыычал болзувусса канчаар? Канчаар дидим апарып болурул? Иегованы кайы хире өөртүп болурувусту база улуска Ооң дугайында чугаалап бээривиске, оларның чуртталгазы  канчаар өскерли берип болурун боданыр болзувусса, дидим апаар бис. Иегова эрес-дидим болурунга биске дузалаар. Бирги векте акыларывыска дидим болурунга Ол дузалаан болганда, биске база дузалаар (1 Фес. 2:2).

14. Суртаалдаар база өөреникчилер белеткээр ажылга киржири чүге чугула? Каш чылдагаанын чугаалап көрүңер.

¹⁴ Иегова кымны-даа ылгай көрбес. Ынчангаш улустуң язы-сөөгүн барымдаалавайн, оларга ынакшылды көргүзеривиске, Ол өөрүп турар (Аж.-ч. 10:34, 35). Улуска ынакшылды илередир эң-не эки аргаларның бирээзи — оларга буянныг медээни чугаалаары-дыр (Мф. 28:19, 20). Ол медээ чүзү-биле ажыктыгыл? Бисти дыңнап турар улус чуртталгазын эки талаже өскертип, мөңге чурттаар идегелдиг апарып болур (1 Тим. 4:16).

15, 16. Бисте аас-кежиктиг болур кандыг чылдагааннар бар?

¹⁵ Иегова — ынакшылдыг Ада болгаш, Ооң өг-бүлезиниң аас-кежиктиг болурун күзеп турар (Иса. 65:14). Амгы үеде бергелерге таваржып чоруур-даа болзувусса, аас-кежиктиг болур чылдагааннарывыс хөй. Чижээ, дээрде Адавыс биске дыка ынак деп билир бис. Бис Бурганның Сөзүнден, Библиядан, ылап шын билиглерни ап турар бис (Иер. 15:16). Оон аңгыда Иеговага, Ооң бедик мөзү-шынар негелделеринге болгаш бот-боттарынга ынак улустан тургустунган кайгамчык өг-бүлениң кежигүнү болганывыска өөрүп чоруур бис (Ыд. ыр. 105:4, 5).

¹⁶ Бис аас-кежиктиг бис, чүге дээрге келир үеде чуртталга оон-даа эки апаар деп билир бис. Иегова удавас шупту каржы кижилерни узуткап кааптар, а чер Ооң Чагыргазының адаанга дываажаң апаар. Чок апарган улус дирлип келгеш, чоок улузу-биле ужуражып кээр деп кайгамчык идегел бисте бар (Ин. 5:28, 29). Ол дыка өөрүшкүлүг үе болур! А эң кол чүүл, дээрде-даа, черде-даа шупту чаяалгалар бистиң ынакшылдыг Адавыска бердинген бооп, Ону алдаржыдып мактаар. Чүге дизе ындыг макталга чүгле Иегова төлептиг!